Read Lashi TARHA" TID POIN" 12 Bible Online

TARHA" TID POIN" 12 - Lashi bible

TARHA" TID POIN" 12

¹«He: zigi nanu" phoug" phyid" yi da" Mangsoo ASEING wigi nanu" ri byid: wa nghoid da" mungdain: moo nanu" nyid myhang cang wa da" tarha" joem nghoid da:. Hau: joem ri tam" gyoo: ge'.

²Nanu" yhe: yu wa da" mungdain: khoug: moo byumyu" yi noku boem da" yu phara" joem jo, da" boem myhang:- bouggung- nyau young" seiggam yang: joem dangain" ri phyo' sain" pyam ge'.

³Nyangnu" da" phoin: joem ri phyo' khyo' pyam byid: wigi nyangnu" da" gyeung" shang: da" lug zeingboung: joem ri adu atoem' du" khyoeb pyam byid: ge'. Nyangnu" da" yu phara" myhi' Ashera da" ladoo" zeing joem ri nghe' pyam lho: nyangnu" alhoo: joem ri bug kho' pyam ge'. Houg: lang" nyangnu" gi hau: joyoo moo khanham we' ayo" no' loo: wa nghoid.

⁴«Nanu" gi hau: byumyu" yi nyangnu" yu phara" joem ri no' yhang: ti" nanu" ASEING Mangsoo ri ano' goo".

⁵ASEING gi nanu" byumyu" kung: dangain" mo, da" mougmyid mo joyoo daloem: ri khyen: yu wa zi nghoid. hau: joyoo moo byumyu" yi nya: shidkhoin" khyoo: re" wigi nyang: ri yo" noku wa zi nghoid.

⁶Nanu" gi nanu" da" nghe' ngei" xoin"- nanu" da" gootu: xoin" joem daxi boem mo daboem- nanu" da" goo" ki" lid jhungshug nanu" ASEING ri dangsoo" byid: to" da" jhungshug joem nanu" myid bau" wigi byid: da" xoin" joem nanu" da" xang: shi" xang" da" nu: yo' yang joem ri hau: joyoo moo: shugbyid: ca" wa zi nghoid.

⁷Houg: moo nanu" ri mainkaid byid: su: nghoid da" nanu" ASEING Mangso shidkhoin" moo nanu" yo' nanu" yhoem: byu yigi zo: wigi nanu" koid bye: da" ge moo" zoo" joem shid re" ngei bu boem goo" wa.

⁸«Hau: ayo, ju" lang" nanu" zei: bye: moo" zoo" ri azei: ca" loo wa nghoid. Nanu" dangain" bang: gi nanu" vho: ngei ziyo' dakhyo" akhid" nyid" ju" sho' noku lo boem ago".

⁹Ciwim gari nanu" myenjham" tung" yo" nyid wa joyoo nanu" ASEING Mangsoo nanu" ri byid: wa nghoid da" mungdain: khyoo: nanu" ayo" vang yhi: shi" yoomo nghoid da:.

¹⁰Nanu" Yodan gyid lang ri gu: dab yhe: boem lang" ASEING wigi hau: mungdain: ri nanu" ri seing: yu nhang: wigi hau: mung" moo shoug" nyid re" boem wa. Nyang: gi nanu" gyivoo dangain" mo, lo, mo goem loem lho: nanu" gi myenjham" tung" yo" nyid re" boem wa.

¹¹ASEING gi nyang: ri noku wa joyoo daloem: ri khyen: yu wa. Nanu" gi hau: joyoo khyoo: ngoo amyeing" byid: to" da" gu: ja: khang" moo" ri nya: jhang ci: yhi: ca" wa zi nghoid. Nghe' ngei" da" xoin" nanu" da" gootu: xoin" nanu" da" daxi: boem daboem nanu" da" jhungshug joem ASEING ri nanu" dangsoo" byid: to" da" hau: goo" ki" lid jhungshug joem ri shugbyid: wa zi nghoid.

¹²Nanu" nya: zooshang: yi yo' nanu" da" dei zoo: yi yo' nanu" voogung moo nyid boem da" Levi byumyu" yi yo' dage" nya: shidkhoin" moo ngei bu: ge'. Levi byu yigi nyangnu" seing: da" mougmyid ajo, ein: ziri boin: nyid ge'.

¹³Nanu" gi nanu" nyang: khyen: yu da" kha: joyoo moo nghoid loug we' nanu" da" xoin" ri yo" ngei" wa zi anghoid.

¹⁴Nanu" byumyu" kung: joem mo dakung: da" mougmyid mo ASEING khyen: yu wa nghoid da" dajoyoo moo za: hau: joem ri nanu" ngei" byid: ca" goo" wa zi nghoid. Hau: joyoo moo za: nghe' ngei" byid: wa da" nanu" da" xoin" joem ri shugbyid: wa ziyo' ngoo nanu" ri amyeing" byid: to" da" gootu: dangain" ri koid wa zi nghoid.

¹⁵«Nghoid loug we' nanu" da" gougnyhoug joem ri nanu" nyid da" joyoo khyi' khang" moo" moo yo" said zo: da:. Nanu" gi nanu" ri ASEING wigi athang agoin byid: da" gu: riza: yo" zoo: wa zi nghoid. Nanu" dangain" bang: gi noku thung" khyo" younglho' mo, nghoid loug ayung" alho' mo, nghoid loug shoocid: anghoid lang" layoo: shoo" ri zo: yhang: ti" hau: joem ri yo" zo: da:.

¹⁶Nghoid loug we' nanu" gi houg mo suid" joem ri age zoo: wa. Nanu" gi hau: joem ri myidjang khyoo: gyid yhang: ti" foid khyo' pyam ca".

¹⁷Nanu" nyid da" joyoo moo nanu" ASEING ri shugbyid: da" ciri we' age zoo: nghoid da:. Nanu" da" shivoo: daxi: boem mo daboem alu: ri zabyid yhid: alu: ri nanu" da" zhainloin: xu: alu: ri nanu" da" xang: shi' xang" nunu" yang nu" alu: ri ASEING shid re" dangsoo" to" da" jhungshug alu: ri myid boo yoomo byid: da" alu: ri gootu: ce: ja: alu: ri we' age zoo: nghoid da:.

¹⁸Nanu" yo' nanu" nya: zoo: yi nanu" dei zoo: yi yo' nanu" voogung joem moo nyid boem da" Levi byu yigi dage" za: nanu" Mangso wigi khyen: to" da" noku joyoo nanu" ASEING Mangso da" shidkhoin" moo za: hau: xoin" joem ri zoo: wa nghoid ago". Nanu" gi hau: joyoo moo nanu" koid bye: da" lo, moo" ja: khang" moo" adang moo ngei bu: goo" wa zi nghoid.

¹⁹Nanu" gi nanu" mungdain: moo dei nyid myhang Levi byumyu" yiri ayu" lham' too" wa ziri lhid nyid ge'.

²⁰Nanu" ASEING Mangsoo gi nyang: dangsoo" byid: to" ziyo' dayhang: ti" nanu" mougmyid ri ci" byid: lang" nanu" zoo: nau khang" moo" shoo" shoug" zoo: wa zi nghoid.

²¹Hau: daloem: kyeing" da" noku joyoo gi sung vi: lho: nghoid rigi nanu" ri ngoo tid too" bye: ziyo' dayhang: ti" nanu" vho: da" uri ASEING nanu" ri byid: to" da" nanu" nu: angoid lang" yang mo dadu: du: ri said lho: hau: shoo" ri yhoem: moo nanu" yo" zo: ago".

²²Noku thung" khyo" younglho' mo, ayung" alho' mo, hang" nghoid loug shoocid: shoo" yo' layoo: shoo" ri zo: yhang: ti" hau: shoo" ri ge zo: da:.

²³Hau: shoo" ri suid" yo' dage" za: azoo: goo". Ciwim gari kangso' gi suid" moo bo da:. Houg: lho: nanu" gi kangso' yo' shoo" ri dage" age zoo: nghoid da:.

²⁴Zoo: noem shid re" suid" ri age yhung:. Hau: gungthid gyid yhang: ti" myidgung khyoo: foid khyo' pyam ge'.

²⁵Nanu" he: amyeing" dang: ri tam" gyo: cang yhe: nghoid rigi ASEING vho: ngei nyid wigi nanu" yo' nanu" amyed ashen yi dangain" nyid ge yhe: loo" wa zi nghoid.

²⁶Nanu" ASEING ri dangsoo" byid: to" bye: da" nanu" alu: joem yo' jhungshug joem ri daloem: kyeing" da" noku joyoo khyoo: ci: yhi: ge'.

²⁷Houg: moo shugbyid: da" xoin" joem gi ASEING da" phoin: moo bain sho' nghe' pyam wa zi nghoid. Hau: shugbyid: da" xoin" joem mo shoo" ri nanu" zo: wigi suid" rigi phoin: tho' moo foid khyo' pyam wa zi nghoid.

²⁸Ngoo nanu" ri byid: to" da" amyeing" dang: ja: khang" moo" ri jhug zug za: tam" gyo: cang yhi: ge'. Houg: lang" nanu" yo' nanu" amyed ashen" yiri apyaid atoo: nyid gi yab ge loo nhang: wa. Ciwim gari nanu" gi jo da" moo" yo' nanu" ASEING Mangsoo vho: ngei ziri koid yoomo nghoid wa.

²⁹Nyangnu" mung" khyoo: nanu" jhen" vang yhe: uri nanu" ASEING Mangsoo gi hau: byumyu" yiri said toem" pyam loo wa. Houg: lang" nanu" gi hau: ziri yhe: seing: yu wigi houg moo yhe: de: nyid boem goo" wa.

³⁰Hau: byumyu" yiri ASEING wigi bain said toem" pyam thang: nyangnu" koid da" noku thung" khyoo: acang yhi: wa lhid ge'. Ciwim gari hau zigi shid: shau" wa khyoo: nghoid. Nanu" houg: yo' dakhyoo" za: yo" no' wa shid re" nyangnu" yu phara" joem ri nyangnu" khasu" koid wigi no' boem khyoo: ri ayhe: yo" goo".

³¹Nyangnu" yu phara" joem nyangnu" no' yhang: ti" nanu" ASEING Mangsoo ri ano' goo". Ciwim gari nyangnu" yu phara" joem ri no' jang" moo ASEING ngheing" da" aco' ajhoid moo" dangain" ri nyangnu" koid ago". Nyangnu" gi nyangnu" da" zooshang: yiri lang" nyangnu" phoin: joem tho' moo nghe' ngei" xoin" to' boem ago".

³²Ngoo nanu" ri amyeing" byid: to" zi ja: khang" moo ” ri koid ge'. Houg: moo daja: ja: aloung: goo". Houg: mo daja: ja: ri we' ayu pyam go".