Read Lashi TARHA" TID POIN" 14 Bible Online

TARHA" TID POIN" 14 - Lashi bible

TARHA" TID POIN" 14

¹Nanu" gi nanu" ASEING Mangso da" byumyu" yi nghoid ago". Houg: yoomo shid: da" yug shid re" koug ngau uri gootu: byumyu" yi koid yhang: ti" nanu" nya: gung ri ayham" khang" goo". Nanu" vhuloem mo xam: ri ayug pyam goo".

²Nanu" gi nanu" ASEING Mangso da" byumyu" yi nghoid da:. Nyang: gi mougmyid tho' moo nyid da" byumyu" dangain" akhoug: mo nya: byumyu" bui" wa shid re" nanu" ri khyen: yu bye:.

³ASEING gi ayung" alho' ga: tid to" da" ce: ja: ri we' azoo: goo".

⁴He: gougnyhoug joem rigi nanu" yo" zo: da:. Hau: joem gi nu:- yang- coidbaid.

⁵Shoocid:- yang lam" joem coid lam" joem anghoid lang" layoo: joem

⁶khyid: sain" go, wigi mhain" thoid rhe" da" gougnyhoug ce: ja: ri we' yo" zo: da:.

⁷Nghoid loug we' khyid: sain" ago, mhain" athoid rhe" da" gougnyhoug ce: ja: ri we' nanu" age zoo: nghoid da:. Nanu" gi Gola-ug- thanglhoo- ceuglhid" joem ri age zoo: nghoid da:. Hau: joem ri ayung" alho' khyo" myid yu ca" da:. Hau: joem gi mhain" thoid rhe" ago". Nghoid loug we' khyid: sain" ago, nghoid da:.

⁸Vu, shoo" azoo: go". Hau: joem ri ayung" alho' khyo" myid yu ca" da:. Hau joem gi khyid sain" go, nghoid loug we' mhain" athoid rhe" nghoid da:. He: gougnyhoug joem mo daja: ri we' azoo: go". Houg: joem shid: mang ri tain" lang" atain' goo".

⁹Nanu" gi wimdo, dung yo' wimkyab dab da" wimdo, ce: ja: ri we' ge zo: da:.

¹⁰Nghoid loug we' dung yo' akyab' adab da" gyid khoug: mo ce: ja: ri we' age zoo: nghoid da:. Hau: joem ri ayung" alho' khyo" myid yu ca" da:.

¹¹Younglho' da" ngho' ce: ja: ri we' ge zo: da:.

¹²Nghoid loug we' he: ngho' joem gi nanu" age zo: da" ngho' joem nghoid da:. Hau: joem gi zoin, bung- khung" boeb- zoin boeb- zoin kyang"- zoin kyang" myiko- join yu- kano,- ngho' gola-ug pang lid pheing" kyoug"- gyid ngho' tuang- gyid ngho' khyid: sheing:- gyid ngho' gyi:- gyid kano,- moug: ngho'- pho shid joem nghoid ago".

¹⁹Dung dab da" tungdi: dangain" ayung" alho' nghoid da:. Hau: joem ri azoo: goo".

²⁰Younglho' da" tungdi: joem rigi ge zo: da:.

²¹Nyang: nyang: kyeing" shid: da" gougnyhoug ce: ja: ri we' azoo: goo". Nanu" akhoug: moo nyid da" tungbau byu yiri nanu" hau: ziri ge zoo: nhang: da:. Anghoid lang" gootu: tungbau byu yiri ge oung" byid: da:. Nghoid loug we' nanu" gi nanu" ASEING Mangso wigi seing: da" bang: nghoid da:. Nanu" gi nya: byu nghoid. Yang nu" anghoid lang" coidbaid nu" ri nya: myhi' noug" yo' ashoin" ajhoug goo".

²²Zain khang" zain nanu" yoo mo thu da" gu: dangain" mo daxi: boem daboem ri gootu: kho' too" ge'.

²³Hau: thang: noku wa shid re" nanu" ASEING Mangsoo khyen: to" da" joyoo khyoo: yhe: wigi houg: khyi' nya: shidkhoin" moo nanu" shivoo: zabyid yhid: zhainloin: xu: xang: shi" xang" da" nanu" nu: yo' yang mo daxi: boem daboem alu: ri zoo: shug ge'. Nanu" ASEING Mangsoo ri nanu" ajang" ngi: se' shab byid: wa ziri yo" se' yu wa shid re" he: ziri koid ge'.

²⁴ASEING wigi nanu" ri mainkaid byid: to" da" gu: mo daxi: boem mo daboem ri nanu" yhoem: mo hau: noku joyoo khyoo: voin yhi: wa sung ve: nghoid rigi hid: su" koid ge'.

²⁵Hau: joem ri oung" pyam wigi hau: noku joyoo khyoo: ngei voin yhi: ge'.

²⁶Nu: shoo" yang shoo" zabyid yhid: yed: shed su" te" nanu" vho: ja: dangain" shid re" hau: ngei ri yhung: lho: nanu" ASEING Mangso shidkhoin" moo nanu" yo' nanu" yhoem: byu yi zoo: wa nghoid wigi nanu" nya: gung ri ngei pyoo: sho' koid ge'.

²⁷Nanu" voogung joem cang nyid da" Levi byumyu" yiri ayu" lhid: pyam goo". Nyangnu" gi nyangnu" nyang: seing: da" mougmyid jonu" ciwe' ayoo" goo" nghoid da:.

²⁸Soem" zain ju" khang" moo" lo" thang ri nanu" gug zoo mei: loem: dangain" mo daxi: boem daboem alu: ri ci: re" wigi nanu" voogung joem moo hau: ziri yung: too" wa zi nghoid.

²⁹He: zoo: noem joem gi nyangnu" seing: wa mougmyid jonu" ayoo" nghoid da" Levi byumyu" yi yo' nanu" voo moo nyid boem da" tungbau byumyu" yi coug" zoo: yi cougmoo" yi shid re" nghoid da:. Nyangnu" gi nyangnu" vho: gu: dangain" zheing: re" yu boem wa nghoid ago". Hougsu" koid ge'. Houg: lang" ASEING Mangsoo gi nanu" koid da" moo" ja: khang" moo" moo nanu" ri mainkaid byid: loo wa.