Read Lashi TARHA" TID POIN" 15 Bible Online

TARHA" TID POIN" 15 - Lashi bible

TARHA" TID POIN" 15

¹Nyhed zain ein: zain khang" moo" lo" thang ri nanu" ri jhen: dab bang: da" jhen: ri nanu" khyoid pyam byid: wa nghoid da:.

²He: ziri hid: su" koid ge'. Israela mang: nhung" pho ri ngei jhid" byid: da" yugkhang" moo" gi hau: jhen: ri khoid pyam byid: wa nghoid da:. Nyang: gi ngei ri doem sang: zheing" yu wa khyo" age soin' nghoid da:. ASEING nyang: hau: jhen: ri khyoid byid: bye: ga: tid fu" bye:.

³Nanu" ri jhen: dab da" tungbau byu mo gi nanu" jhen: ge do, yu da:. Nghoid loug we' nanu" ri jhen: dab da" nanu" nya: byumyu" yi mo nanu" jhen: age do, yu wa.

⁴Nanu" ASEING Mangsoo gi nanu" ri byid: wa nghoid da" mungdain: moo nanu" ri mainkaid byid: wa zi nghoid.

⁵Akhid" nyid" ngoo nanu" ri byid: da" amyeing" ja: khang" moo" ri tam" gyo: cang yhe: wigi nyeing" za: cang yhe: nghoid rigi nanu" byumyu" mo dayug we' myung shoo" wa zi anghoid.

⁶ASEING dangsoo" byid: to" ziyo' dayhang: ti" nyang: nang ri mainkaid byid: wa zi nghoid. Nang gi byumyu" myoo" sho' ri ngei jhed" byid: loo wa. Nghoid loug we' nang gi hang" dayug jang" mo we' ajhid" yu ca" wa. Nang gi byumyu" myo: sho' ri zei: ci: wa. Nghoid loug we' nang ri kha: byumyu" we' azei: zeing wa.

⁷Nanu" ASEING Mangsoo byid: wa nghoid da" mungdain: mo voo daloem: loem: moo myung sho" da" Israela mang: nhung" dayug yug nyid nghoid rigi nanya: shid re" za: amyed nyid. Nyang: ri pang" thoug wa shid re" ahe: pyam.

⁸Hau: gungthid nyang: ca" myhoo' byid: nau da" myid yo' jhid" byid: we'.

⁹jhen: khyoid pyam wa da" zain nyid ju" lo nyid bye: yoomo nyang: ri daja: ja: jhid" byid: wa ziri ahe: pyam nyid. Houg: yhang: ti" akhyeing" da" myid ri re" nheigloem: khoug: khyoo: avang nhang:. Nang jhid" byid: wa he: pyam nghoid rigi nyang: gi nang ri thougtheung wigi ASEING ri yoid: nyho: loo wa. Houg: lang" nang gi yooboo yoo" su: bue" loo wa.

¹⁰Nyang: ri acen" lho: agoin: nyang: byid: we'. Houg: lang" ASEING gi nanu" koid da" moo" zoo" dangain" moo mainkaid byid: loo wa.

¹¹Israela byumyu" yi dayham" gi khanham we' shoug" jhen: wigi ayo" ajo, bang: nghoid boem goo" wa. Houg: lho: nyangnu" ri byid: nau da" myid yo' byid: wa shid re" nanu" ri amyeing" byid: zi nghoid da:.

¹²Israela mang: nhung" yi mo yuggi anghoid lang" myiyi: dayug yug nyang: nya: gung ri join khyo" nanu" ri re" oung" byid: nghoid rigi nyang: gi nang ri nyang: khyug zain dei byid: thang: ri nang gi nyang: ri nhang: kaid wa zi nghoid da:. Nyhed zain ein: zain ju" loo lang" nang gi nyang: ri join mo loid byoin nhang: kaid ca" da:.

¹³Nang nyang: ri nhang: kaid uri nyang: ri lo, koem: anhang: kaid.

¹⁴ASEING wigi nang ri mainkaid byid: to" da" yang- shivoo:- zabyid yhid: joem mo byid: nau da" myid yo' nyang: ri byid: we'.

¹⁵Nanu" gi Egutu mung" moo join bue" lo" wigi re" ASEING Mangso wigi nanu" ri loid byoin nhang: ziri myid boin: we'. He: zigi akhid" nanu" ri he: amyeing" byid: nyid zi nghoid.

¹⁶Nghoid loug we' re" join gi anau thu loo" loo: nyang: gi nang yo' re" yhoem: byu yiri jheddab wigi nyid wa shid re" nheugshid: nyid rigi

¹⁷hau: thang: nyang: ri re" yhoem: khoem" duang: khyoo: shu' thu yhe: wigi nya: nukhyab ri yhe: cu' byid: we'. Houg: lang" nyang: gi pyaid goin" re" join bue" loo wa. Re" join myhi' ri we' houg yo' dakhyo" kyeing" koid we'.

¹⁸Join ri loid byoin nhang: kaid uri nheig ashid: awim goo". Nyang: gi nang ri khyug zain bain dei byid: wigi dei zoo: vhu" kung: dayug da" aphoug" agung dayi" dei byid: bye:. He: ziri koid we'. Houg: lang" re" ASEING Mangsoo gi nang koid da" moo" dangain" jang" moo mainkaid byid: loo wa.

¹⁹Nanu" da" nu: kyung yo' yang kyung mo xang: shi" xang" da" aloo: joem ri nanu" ASEING shid re" gootu: kho' too" ge'. Hau: nu: dadu: ri we' moo" zei: jang" moo aci: goo". Hau: yang dadu: mo we' yang mhoug" ayham" goo".

²⁰Zain khang" moo" nanu" yo' nanu" ikoin deungkhu: byu yigi daloem: kyeing" da" noku wa joyoo ASEING shidkhoin" moo hau: joem ri zoo: goo" wa zi nghoid.

²¹Nghoid loug we' hau: gougnyhoug joem moo daja: ja: bue" lho: hau: joem gi khyid: gyau: myojid gootu: gyi: sho' ca" nghoid rigi hau: joem ri re" ASEING Mangsoo ri xoin" age too' byid: nghoid da:.

²²Houg: yhang: ti" da" gougnyhoug rigi nanu" yhoem: moo ge zo: da:. Noku thung" khyo" younglho' yug nghoid nghoid ayounglho' yug nghoid nghoid nanu" dangain" bang: gi shoocid: yo' layoo: shoo" ri zo: yhang: ti" hau: joem ri yo" zo: ago".

²³Nghoid loug we' houg: joem da" suid" ri zoo: noem khyo" ayhung: goo". Hau: gungthid gyid yhang: ti" hau: suid" ri myidgung khyoo: foid khyo' pyam ge'.