Read Lashi TARHA" TID POIN" 17 Bible Online

TARHA" TID POIN" 17 - Lashi bible

TARHA" TID POIN" 17

¹Daja: ja: noo bo da" nu: anghoid lang" yang ri nanu" ASEING Mangsoo ri xoin" atoo' byid: goo". ASEING gi hau: ziri ngheing" nyid.

²Nanu" da" voogung daloem: loem: moo yuggi dayug anghoid lang" myiyi: dayug gi ASEING da" amyeing" dang: ri nung phug wigi gootu: yu phara" joem ri la'- bid ri la'- lhammoo" ri la'- kyi: ri la'- no' nyid dei byid: nyid khyo" ASEING ri thougtheung yooboo koid lho: nya: dang: theing ri phyo' shoin' pyam ein: shang

⁴houg: yhang: te" da" lu dang: ri nanu" shau" gyo: nghoid rigi hau: ziri jid" jid" nug nug pei: sho: yu" ge'. He: yhang: te" akhyeing" moo" zoo" Israela byumyu" phung: moo bue" nghoid rigi

⁵hau: yug ri voo mo she: thu lo" wigi lugzeing yo' du" said pyam ge'.

⁶Nghoid loug we' sagse: eig yug mo dang khyoo: nyang: ri yooboo jhug lang" za: nyang: ri yo" said pyam wa zi nghoid. Sagse: dayug za: danyid rigi nyang: ri age said pyam wa.

⁷Xang: shi" ri sagse: byu yi shi" lug boem yo' du" goo" baja". Hau: thang: deing da" byu phung: yigi hau: yug ri lug boem yo' du" goo" baja". He: su" khyo" wigi nanu" gi hau: akhyeing" ashoeb moo" ri yu pyam wa zi nghoid.

⁸Moo" daja: ja: gi voogung mo tarha" agyi yi wigi dang: ayo" phyed byid: zi lhung jo, thu re". Hau: joem gi jonu" yo' sen: da" moo"- gung moo dam dab da" moo"- byu said moo" yo' byu zang" said da" moo" joem nghoid. Hougsu" bue" loo lang" nanu" ASEING Mangsoo wigi khyen: to" da" daloem kyeing" da" noku joyoo khyoo: yhi: ge'.

⁹Houg: lho: nanu" da" moo" ri Levi khainjung yi jang" moo we' hau: uri tarha" agyi moo" zei: nyid yug jang" moo we' yhe: tid kyoo" ge'. Hau: moo" nyangnu" ri soin: phyed nhang: ge'.

¹⁰Nyangnu" dang: phyed byid: ri" goo" wa. Houg: lho: nanu" ri nyangnu" tid ziyo' toeb nanu" cang ca" wa zi nghoid.

¹¹Nyangnu" myid phyed zi cang wigi nyangnu" jhoug" shed da" khyo" tab did" cang yhi: ge'.

¹²Tarha" agyi anghoid lang" moo" voin da" khainjung tid khyo" agyoo: loo: voem" koid yug ri said pyam goo" ca" wa. Hid: khyo" wigi Israela byumyu" phung: mo akhyeing" ashoeb moo" ri yo" yu pyam wa zi nghoid.

¹³Houg: lho: yugkhang" moo" gi hau: ziri shoug" gyoo: lang" gyoug loo goo" wa. Hau: thang: gootu: hang" we' houg: yhang: te" moo" ri avoem" koid loo: wa.

¹⁴Nanu" ASEING Mangsoo gi nanu" ri byid: wa ga: da" mung" ri bain yo" seing: yu lho: houg: moo nyid thang: ri nanu" gi nanu" ri lheing khoem to" da" gootu: byumyu" yi yo' dakhyoo" ti" khokham yoo" ca" ga: nanu" myid phyed loo goo" wa.

¹⁵Nanu" wigi khokham khyo" khyen: too" yug gi ASEING khyo" khyen: yu yug nghoid ca" wa. Nyang: gi nanu" nya: byumyu" mo nghoid ca". Tungbau byu ri nanu" khokham khyo" age koid nhang:.

¹⁶Khokham phoo gi nya: da" gyidab shid re" myang: myoo: sho' du: age yoo" wa. Houg: lho: nya: mung" byu yiri myang: qei wa shid re" Egutu khyoo: ayo" nhang: kaid wa. Ciwim gari ASEING gi nya: byumyu" yiri hau: mung" khyoo: khanham we' age doem tau" yhi: ga: tid da:.

¹⁷Khokham gi yhoem: seing: myhi' myoo: sho' age yu. Ciwim gari hougsu" koid lang" nyang: ri ASEING jang" mo ve: gang: loo" nhang: da:. Houg: lho: nyang: nya: shid re" ngei sheing: jonu" yoo" zoo: yoo" shug khyoo: aboo wa.

¹⁸Nyang: khokham bue" loo lang" nyang: gi Mangso da" tarha" mougsoug" pug dapug ri yoo" ca" wigi Levi- khainjung yi da ayang: pug mo jhoug" shed dang: joem ri nyang: seing: too" ca" wa.

¹⁹Hau: soug" pug ri nya: nham moo zoem: ci: wigi nya: pyaid goin" houg: ziri nghab zhang: yu ca" da:. Houg: lang" nyang: gi ASEING ri ngi: shab byid: wa ziri yo" si' wa zi nghoid wigi houg moo bo da" amyeing" dang: ja: khang" moo" ri jhug zug yo" cang tam" gyoo: wa zi nghoid.

²⁰He: zigi nyang: ri nya: Israela byumyu" yi tho' je ge ga: myid soin: yu wa ziyo' ASEING da" amyeing" dang: joem ri daja: ja: khyo" acang wa jang" mo toem' too" wa zi nghoid. Houg: lang" nyang: gi zain nyid myang" sho' yo" vhoebkhang" nyid wa yo' nya: amyed ashen yigi Israela byumyu" yiri byuxeig myoo" sho' yo" vhoebkhang" loo wa.