Read Lashi TARHA" TID POIN" 2 Bible Online

TARHA" TID POIN" 2 - Lashi bible

TARHA" TID POIN" 2

¹Ngoonu" gi lo" thang moo ASEING amyeing" byid: to" ziyo' dakhyo" Thoem" Ni khyoo: ju" da" khyoo: deing- dain" pyoid yoo khyoo: yhe: lo" boem wigi ngoonu" gi Edom moug: cang ayo, myang" sho' yhe: lam" yen" lid loo bye:.

²«Hau: thang: ASEING ngoo ri

³Houg: boem moug: cang ngoonu" nyid lam" yen" da" ayo, gi gi" bye: ziyo' mougzhung: shoid khyoo: ngoonu" yhe: loo" wa nghoid khyoo: ri tid.

⁴Nyang: gi ngoo ri vhoo: mo pyeing: dang: joem ri tid kyoo" wa shid re" tid da:. Hau: joem gi nanu" gi Eso da" amyed ashen yi nghoid da" nanu" yo' vi: bye: da" bidnoem yi da" moug: khyoo: Edom boem moug: khyo" lid phyed yhi: goo" wa zi nghoid. Nyangnu" gi nanu" ri gyoug wa zi nghoid.

⁵Nghoid loug we' nanu" khyo" shi" houg: bang: ri gyi age koid wa. Ciwim gari ngoo gi nyangnu" mougmyid ri khyid: dakhoo: nang: wa yhi' lang" nanu" ri ngoo abyid: wa yoomo nghoid. Ngoo gi Edom moug: ri Eso da" amyed ashen yiri byid: too" bye:.

⁶Nanu" gi zoo: noem yo' gyid ri nyangnu" jang" mo yo" qei yu wa zi nghoid.

⁷Nanu" ASEING Mangsoo gi nanu" koid bye: da" moo" ja: khang" moo" ri khasu" mainkaid byid: lid loo bye: ziri myid boin: ge'. Nyang: gi nanu" ri he: damung" dadain: gyi: da" dain" pyoid yoo khyo" nanu" so" lheing: yen" uri yu" goem abye:. Nyang: gi myid: xi: zain nanu" yo' dage" nyid lho: nanu" ca" gu: ja: khang" moo" ri nanu" yo" yu abye: go".

⁸Houg: yoomo ngoonu" gi to' lo" wigi Elad yo' Eziongebera voogung mo zi Thoem" Shid: khyoo: yhe: wigi mougzhung: bidthu shoid Moba shoid khyoo: yhe: bye:.

⁹ASEING gi ngoo ri ‹Lod da" amyed ashen yi nghoid da" Moba byu yiri yau: khi" abyid: goo". Nyangnu" yo' we' gyi akhaid goo". Ngoo gi nyangnu" ri Ara voomoo" ri byid: too" bye: wigi ngoo gi nyangnu" mougmyid mo dajhi' we' nanu" ri abyid: wa›» ga: tid da:. (

¹⁰Emim ga: myheing da" yoem: bo byu gyi: yigi Ara voomoo" moo lhoung nyid ago". Nyangnu" gi Anakim byu yi yhi' myang: da" gootu: byu gung gyi: myhang: bang: nghoid ago".

¹¹Anakim yo' du da" nyangnu" gi Rephim ga: we' tid boem. Nghoid loug we' Moba byumyu" yigi nyangnu" ri Emim ga: myheing ago".

¹²Hori byu yigi Edom moo lhoung nyid ago". Nghoid loug we' Eso da" amyed ashen yigi nyangnu" ri khaid thu pyam lho: nyangnu" mung" ri phyo' pyam wigi houg: moo yhe: de: nyid boem ago". Houg: yo' dayhang: ti" ASEING wigi Israela byumyu" yiri byid: da" mung" mo nyangnu" gyivoo yiri Israela byumyu" yi wigi khaid thu pyam ago".)

¹³Hau: thang: ngoonu" gi koid wa shid re" ASEING ngoonu" ri tid to" ziyo' dakhyo" Zared gyid lang ri gu: dab yhi: bye:.

¹⁴He: zigi ngoonu" Kadesha Barnea mo to' yhe: lo" thang: soem" xe: shed zain thang: ri bue" zi nghoid. Nyangnu" bui" wa khyo" ASEING tid too" bye: ziyo' dayhang: ti" hau: boin: mo gyi khaid bang: dangain" shid: lo" boem bye:.

¹⁵Nyangnu" dangain" bang: ri bain said toem" pyam sho' ASEING gi nyangnu" ri gyi koid da:.

¹⁶Nyangnu" dangain" bain shid: thang: ri

¹⁷ASEING gi ngoonu" ri

¹⁸‹Akhid" nyid" nanu" gi Ara khyoo: khyo" wigi Moba moug: khyoo: lid phyed yhi: goo" wa zi nghoid.

¹⁹Houg: lang" nanu" gi Lod da" amyed ashen yi nghoid da" Amon byu yi da" moug: yam khyoo: tab yhe: goo" wa zi nghoid. Nyangnu" ri yau: khi" abyid: goo" gyi azain: goo". Ciwim gari ngo wigi nyangnu" ri byid: to" da" mougmyid mo dajhi' ri we' nanu" ri abyid: wa›» ga: tid da:. (

²⁰He: mougmyid ri houg: moo nyid lid lo yu" da" byu yi myeing nghoid da" Rephim byu yi da" mougmyid khyo" we' myeing thu da:. Amon byu yigi nyangnu" ri Zamzumin ga: myheing ago".

²¹Nyangnu" gi Anakim yi yhi' byu gung gyi: myhang: ago". Nyangnu" gi myoo" sho' nghoid ziyo' yoem: bo da" byumyu" yi nghoid da:. Nghoid loug we' nyangnu" mougmyid ri Amon byu yi yo" yu wigi houg: moo yo" de: nyid goo" wa shid re" ASEING gi nyangnu" ri said toem" pyam da:.

²²ASEING gi Edom boem moug: moo nyid da" Eso da" amyed ashen yi nghoid da" Edom byumyu" yi shid re" we' dakhyoo" ti" koid lid lo bye:. Edom byu yi akhid" nyid shi" go" da" mougmyid moo nyangnu" yo" yu wigi houg: moo yo" yhe: de: nyid wa shid re" nyang: gi Hori byumyu" yiri said toem" pyam da:.

²³Meing: gung panglai: gyid yam cang wigi Kreti gagyoo: kang mo byu yi de: nyid boem ago". Nyangnu" gi nyid xoug" yi nghoid da" Avim byu yiri said toem" pyam lho: mougpyi: shoid mo Gaza voomoo" ju" sho' da" mougmyid ri yu pyam ago".

²⁴«Ngoonu" gi Moba moug: khyoo: lid phyed yhe: thang: ASEING gi ngoonu" ri ‹To' yhe: lo" lo: Amon gyid lang ri gu: dab ge'. Ngoo gi Heshbon mo Amori khokham Sihon yo' nya: mougmyid ri dage" za: nanu" yoem: so' khoug: moo to" too" byid: wa. Nyang: ri yhe: khaid zain: wigi nya: mougmyid ri seing: yu ge'.

²⁵Akhid" nyid" mo zi ngoo gi nanu" ri khyi' khang" moo" mo byu yi gyoug da" byumyu" bui" nhang: wa. Nanu" myeing ri tid thui: gyoo: lang" yugkhang" moo" ko' ko' gyoug nain" ri" goo" wa› ga: tid da:.

²⁶«Hau: thang: ngoo gi Kedemod dain" pyoid yoo mo zi Heshbon mo khokham Sihon jhang khyoo: vhoo: mo myenjham" lu dang: yo' dage" lagyoo: yiri nhang: kaid lho:

²⁷‹Re" mungdain: khyo" ngoonu" ri so" lid: loo" nhang: la. Ngoonu" gi dain: za: so" lid: lo" wigi khyoo: thung avang wa.

²⁸Ngoonu" zo: da" zoo: noem yo' shug da" gyid shid re" ngoonu" aphoug" byid: wa. Ngoonu" vho: zigi ngoonu" ASEING Mangso wigi byid: wa ga: da" moug: khyoo: Yodan gyid lang ri gu: dab yhe: wigi yo" vang yi: sho' re" mungdain: khyo" so" lid: yhi: wa zi nghoid. Edom moo nyid boem da" Eso da" amyed ashen yi yo' Ara moo nyid boem da" Moba byu yigi nyangnu" mougmyid khyo" ngoonu" ri so" lid: wa akhang" byid: ago"› ga: tid kaid.

³⁰«Nghoid loug we' khokham Sihon gi ngoonu" ri nya: mungdain: khyo" aso" lid nhang: nghoid da:. Ngoonu" nyang: ri oung: pyam wigi akhid" ngoonu" seing: too" shi" da" mougmyid ri ngoonu" yo" seing: yu wa shid re" nanu" ASEING Mangsoo nyang: ri nheigloem: gyi: nhang: wigi thougtheung myid kaid byid: da:.

³¹«Hau: thang: ASEING gi ngoo ri ‹Yu" we' ngoo gi khokham Sihon yo' nya: mougmyid ri re" shidkhoin" moo agu jang to" too" byid: bye:. Nya: mougmyid ri yu wigi yhe: seing: nyid we'› ga: tid.

³²Sihon gi ngoonu" ri khaid zain: wa shid re" nya: byu yi dangain" bang: yo' Yahad voogung nam khyoo: thu re" boem ago".

³³Nghoid loug we' ngoonu" ASEING Mangsoo gi nyang: ri ngoonu" yoem: so' khoug: moo kaid byid: wigi ngoonu" gi nyang: ri yo' nya: yuggi zoo: yi nya: byu yi dangain" ri said pyam boem bye:.

³⁴Hau: uri nyang: ngoonu" gi voogung khang" moo" ri seing: yu wigi phyo' shoin' pyam boem bye: ziyo' yuggi yi myiyi: yi' yo' zooshang: yi yugkhang" moo" ri said pyam bye:. Ngoonu" gi dayug ri we' adei ateing too".

³⁵Ngoonu" gi yhoem: gougnyhoug joem ri yu wigi voogung ri phyo' sain" pyam bye:.

³⁶Ngoonu" ASEING Mangsoo gi ngoonu" ri Arnon lang: khung" thang: mo Aroera voogung joem dangain" ri we' hau: lang: khung" agung mo Gilead khyoo: yhe: da" khyoo: mo voogung ri we' seing: yu nhang: bye:. Kha: voogung mo vang khyam: joem we' ngoonu" shid re" ageing: teing nghoid da:.

³⁷Nghoid loug we' ngoonu" gi Amon byu yi da" moug: khyoo: atab' yhi:. Yobog gyid yam khyoo: we' atab' yhi:. Boem moug: mo voogung joem khyoo: we' atab yhi:. Ngoonu" ASEING Mangso wigi ayhi: wa shid re" amyeing" byid: to" da" gootu: kha: joyoo khyoo: we' atab yhi:.