Read Lashi TARHA" TID POIN" 23 Bible Online

TARHA" TID POIN" 23 - Lashi bible

TARHA" TID POIN" 23

¹«Yuggi dayug gi shain: pyam anghoid lang" yuggi alhoo: ri phyid pyam nghoid rigi ASEING da" byu phung: moo age boo nghoid da:.

²«Neing gyi khyo" khu: ri" yug anghoid lang" houg yhang: ti" su: da" amyed ashen yi hang" nghoid loug we' daxi: xeig ju" sho' lang" ASEING da" byumyu" phung: moo age boo nghoid da:.

³«Amon byumyu" anghoid lang" Moba byumyu" anghoid lang" nyangnu" da" amyed ashen yi hang" nghoid loug we' daxi: xeig ju" sho' ASEING da" byumyu" phung: moo age boo nghoid da:.

⁴Egutu mo nanu" thu lo da" gyung: khyoo: moo nyangnu" gi nanu" ri zoo: noem yo' gyid ri byid: khyo" apang" thoug goo" nghoid da:. Nyangnu" gi nanu" ri nheing" wa shid re" Mesopotamia moug: Pethora voomoo" mo Beora da" yuggi zoo: Balam ri ngho" ago".

⁵Nghoid loug we' nanu" da" ASEING Mangsoo gi Balam da" dang: ri atam" gyoo: byid: nghoid da:. Hau: gungthid nyang: gi nheing" khoin" ri mainkaid dang: khyo" thid pyam da:. Ciwim gari nyang: gi nanu" ri jheddab yoomo nghoid da:.

⁶Nanu" gi byumyu" damyu" dabue" nyid nyid gi he: byumyu" yiri pang" yu wa ci: we' akoid goo". Nyangnu" nyid gi yab ge wa khyoo: ri ciwe' akoid goo".

⁷«Edom byumyu" yiri anoug akhyoid akoid goo". Nyangnu" gi nanu" da" bidnoem nghoid. Egutu byumyu" yiri we' anoug akhyoid akoid goo". Nanu" gi nyangnu" mung" moo goonham' dalheing: nyid kho' abye: go".

⁸Byu soem" xeig mo thu: gu: moo nyangnu" amyed ashen yiri ASEING da" byumyu" phung: moo bo yo" vang da:.

⁹«Meing: zain: nyid da" ayo, moo nanu" gi gyidab moo nyid boem uri noku thung" khyo" ayung" alho' da" khyoo: ciri we' jang" pyam ca" da:.

¹⁰Yuggi dayug gi myen" ri yhoebmo, moo aco' ajhoid zi bue" khyo" ayung" alho' zi bue" nghoid rigi gyidab da" nghi: khyoo: thu yhe: wigi houg moo yhe: nyid wa zi nghoid.

¹¹Nyang: gi myen" thang: zoo" ri gung cid" pyam lho: bidvang zoo" ri dab khyoo: doem yo" lo da:.

¹²«Nanu" nghi: yhi: nau uri gyidab nghi: shoid joyoo daloem loem: khyoo: thu yhi: ca" da:.

¹³Gyizi gyikhoo khyo" cabbang" daloem: bo voin we'. Voem: doug: no lho: nghi: yhe: nau lang" myidjang ri duang khuang" du wigi nghi: yhe: to" ziri yo" shoem" nghoeb pyam wa zi nghoid.

¹⁴Nanu" da" gyidab joem ri noku thung" khyo" younglho' tung" too" we'. Ciwim gari nanu" da" ASEING Mangsoo gi nanu" ri goem loem byid: wigi nanu" da" gyivoo yi atho' moo oung: doid nhang: wa shid re" nanu" da" gyidab moo nanu" yo' dage" nyid da:. ASEING gi nanu" mo nungthang phug loo" nhang: da" ayung" ashoeb moo" ciri we' akoid goo".

¹⁵«Join dayug gi nya: yhoem: seing: lo, mo phang: thu lo wigi goem loem yu wa shid re" re" jhang khyoo: re" nghoid ri nyang: ri adoem nhang: thu kaid.

¹⁶Nyang: gi nanu" da" voogung joem mo nyang: khyen: yu da" kha: voogung moo we' yo" nyid lho: nang gi nyang: ri anau ashoo" age koid.

¹⁷«Israela yuggi anghoid lang" myiyi: hang" nghoid loug we' noku yhoem: mo shava phoo shava myhi' age koid wa.

¹⁸He: moo" khyo" yo" da" ngei ri we' nanu" ASEING Mangso da" Noku Yhoem: Moo" khyoo: thang" cab pyeing byid: wa shid re" age ci: vang yhi: goo" wa. ASEING gi noku yhoem: mo shava phoo shava myhi' ri ngheing" nyid da:.

¹⁹«Nang gi Israela mang: nhung" dayug yug ri ngei nghoid nghoid zoo: noem nghoid nghoid gootu: cinghoid nghoid jhid" byid: ri nya: jang" mo atu" amyaid amho' yu.

²⁰Nang gi tungbau dayug yug ri jhid" byid: jang" mo atu" amyaid yo" mho' yu da:. Israela mang: nhung" dayug yug ri jhid" byid: jang" mo koem gi atu" amyaid age mho' yu nghoid da:. He: tarha" ri tam" gyo: cang yhi: ge'. Houg: lang" nanu" yhe: seing: yu wa da" mung" mo nanu" koid zi ja: khang" moo" adang moo re" ASEING Mangso wigi mainkaid byid: loo wa.

²¹«Re" ASEING Mangsoo ri thang" cab koid to" uri nang dangsoo" byid: to" ziri koid pyeing wa khyoo: ri atheing: pyam. ASEING gi re" thang" cab ri nang moo to" to" wigi hau: ziri akoid pyeing zigi yooboo nghoid da:.

²²ASEING ri thang" cab akoid to" zigi yooboo anghoid.

²³Nghoid loug we' nanya: myid khyo" thang" cab koid to" nghoid rigi hau: ziri yo" koid pyeing sho' koid we'.

²⁴«Nang gi dayug yug da" zabyid yoo khyo" so" lid: lo" da" uri nang vho: nhoo' zabyid shi" ri yo" zo: da:. Nghoid loug we' nang gi gyoin daloem: mo age phyo' ci: nghoid da:.

²⁵Nang gi dayug yug da" shivoo: yoo khyo" so" lid: lo" da" uri re" lo, yo' yo" lang: phoin yu da" shivoo: dangain" yo" zo: da:. Nghoid loug we' nang gi shivoo shi" ri bain nen" yo' age yham" yu wa nghoid da:.