Read Lashi TARHA" TID POIN" 24 Bible Online

TARHA" TID POIN" 24 - Lashi bible

TARHA" TID POIN" 24

¹Byu dayug gi myiyi: dayug ri lo, xo' yu wigi thang: ri nyang: ayu" vho: zi daja: ja: zhang" myang yoomo myiyi: ri avhoo: loo: ein: shang- hougsu" rigi nyang: gi myi: yo' lang gang: wa mougsoug" lhid" byid: wigi hau: myiyi: ri nya: yhoem: mo phang: thu loo" nhang: we'.

²Hau: thang: hau myiyi: gi yuggi dayug doem yu

³Houg: lho: hau: yuggi we' nyang: ri adoem vhoo: loo: yoomo myi: yo' lang gang: wa mougsoug" lhid" byid: lho: hau: myiyi: ri nya: yhoem: mo phang: thu loo" nhang: ein: shang. Anghoid lang" thang: yuggi yug shid: byug ein: shang.

⁴Hau: eig ja: goin" mo kha: ja: bui" nghoid loug nya: da" xang: shi" yuggi nyang: ri lo, adoem yo" xo' yu nghoid da:. Nyang: gi hau: myiyi: ri agyeungshang: khyo" myid pyam ca" da:. Nyang: gi hau: myiyi: ri lo, doem xo' yu nghoid rigi hau: zigi ASEING ri rue" zi nghoid. Nanu" gi nanu" ASEING Mangsoo wigi nanu" ri byid: wa mung" moo houg: yhang: ti" gyoug pho" yooboo ri age koid goo" wa nghoid.

⁵«Yuggi dayug gi aseig shi" myi: yu uri nyang: ri gyizoo: age koid nhang:. Anghoid lang" voo mo shava moo" age koid nhang: wa. Nyang: gi yhoem: moo nyid wigi nya: yhoem: seing: myhi' ri yo" ngei pyoo: nhang: wa shid re" moo" mo dazain akhang" byid: ca" da:.

⁶«Nang gi dayug yug ri daja: ja: jhid" byid: ri nya: da" shivoo pyeig uri ci: da" lug lheing: ri kookham: khyo" ayo" yu pyam byid: wa. Hougsu" koid zigi hau: yhoem: byu yi dei nyid wa shid re" zoo: noem soin' da" ziri yu pyam byid: khyo" bui" wa nghoid.

⁷«Israela nyang: cang" dayug yug myheig yu wigi nya: join koid anghoid lang" join khyo" oung" zo: pyam su: hang" ri nghoid loug we' said pyam ca" da:. Hid su" khyo" wigi nanu" gi he: akhyeing" ashoeb ziri yu pyam ca" da:.

⁸«Nang gi manggam nhoo dab rigi Levi khainjung yi tid ziri toeb za: cang ca" da:. Nyangnu" ri ngoo wigi byid: to" da" jhau" shid dang: joem ri cang yhe: we'.

⁹Nanu" Egutu mo thu lo uri Miriam ri nanu" ASEING Mangsoo koid bye: khyoo: ri myid boin: ge'.

¹⁰«Nang gi dayug yug ri daja: ja: jhid" byid: ri nyang: wigi kookham: khyo" nang ri byid: wa da" nya: byimi ri yu wa shid re" nya: yhoem: khoug: khyoo: avang yhi:.

¹¹Tunggung moo lang" nyid we' hau: ziri nyang: nyang: yu thu ri" byid: baja".

¹²Nyang: gi myung yug nghoid rigi hau: byimi ri damyen goin" ayu too" byid:.

¹³Hau: ziri nya: jhang myen" thang: khang" moo" doem tau" byid: we'. Houg: lang" nyang: hau: ziyo' yo" yhoeb wa zi nghoid. Houg: lang" nyang: jeju" boin: wa zi nghoid wigi re" ASEING Mangsoo nang ri yu" vhoo: wa zi nghoid.

¹⁴«Israela byumyu" mo nghoid nghoid nanu" voogung joem mo davoo moo: nyid da" tungbau byu nghoid nghoid hau: myung shoo" su: yo' myung da" dei zoo: ri amhoug zoo: go".

¹⁵Nyid" khang" nyid" bid avang shi" ri nyang: ri hau: nyid" shid re" vhoo" kung: phoug" shang" we'. Nyang: gi ngei ca" wigi hau: ziri shoug" yu wa myid nyid gu nghoid. Nang nyang: ri abyid: nghoid rigi nyang: gi ASEING jang" khyoo: nang ri thougtheung khyo" nyho: wigi nang gi yooboo yoo" wa nghoid.

¹⁶«Myhi' phoo yigi nyangnu" nya: zoo: yi shoid vhang: da" yooboo yoomo said pyam zi age shoug". Nya: zoo yi we' nya: myhi' phoo yi shoid vhang: da" yooboo yoomo said pyam zi age shoug". Byu dayug gi nyang: nya: shoid vhang: da" youg: noo yooboo yoomo za: said pyam zi shoug" ca" da:.

¹⁷«Tungbau byu yi yo' coug" zoo: nu" yiri nyangnu" da" akho: akhang" ri amyhid" pyam byid: go". Houg: lho: cougmoo" myhi' da" byimi ri we' nyang: ri jhid" byid: da" ngei shid re" kookham: khyo" ayu too" goo".

¹⁸Nanu" gi Egutu moo join bue" kho' wigi nanu" da" ASEING Mangsoo wigi nanu" ri khyoid yu ziri myid boin: ge'. Houg: yoomo ngoo gi nanu" ri he: amyeing" dang: byid: too" bye:.

¹⁹«Nang gi gug zoo ri yham" wigi nang yham" too" bye: da" gug zoo: dayham" ri ayo" de" yu uri hau: shid re" adoem tau" yhi: loo:. Hau: zigi tungbau byu yi coug" zoo: nu" yi yo' cougmoo" yi shid re" teing too" byid: ca" da:. Houg: lang" nanu" ASEING Mangsoo gi nang koid moo" ja: khang" moo" moo nang ri mainkaid byid: loo wa.

²⁰Re" zhainloin: shi" ri nang dalheing: bain phyo' lang" deing ziri adoem yhe: phyo' loo. Hau: gu: gi tungbau byu yi coug" zoo: nu" yi yo' cougmoo" yi shid re" nghoid da:.

²¹Re" zabyid shi" ri nang dalheing: bain phyo' yu lang" zabyid byab joem khyoo: thang: dalheing: adoem yhi: loo: goo". Deing kho' da" zabyid shi" joem gi tungbau byu yi coug" zoo: yi yo' cougmoo" yi shid re" nghoid da:.

²²Egutu moo nanu" join bue" lo ziri ato" myhed goo". Houg: yoomo ngoo gi nanu" ri he: amyeing" dang: byid: too" bye:.