Read Lashi TARHA" TID POIN" 25 Bible Online

TARHA" TID POIN" 25 - Lashi bible

TARHA" TID POIN" 25

¹«Israela byu eig yug gi byo, go" zi kang" wa shid re" tarha" yung" khyoo: yhe: ri dayug gi yooboo ayoo" ga: tid byid: wigi deing da" dayug ri yooboo zhug ein: shang.

²Yooboo shoug" yug ri baid wa yooboo dam byid: nghoid rigi tarha" agyi gi nyang: ri myidjang khyoo: shu: wigi goeb too" nhang: lho: baid zi shoug" nhang: ca" da:. Khanhoo' dam baid wa ein: zigi nyang: shoid da" yooboo moo cang wa zi nghoid.

³Nyang: ri myid: xi: dam byeung" sho' ge baid. Nghoid loug we' hau: tho' age jain" baid. Hau: tho' jain" baid ri shava byu yi shidkhoin" moo nyang: ri asho' ashid: bui" nhang: da:.

⁴«Nuloo: ri shivoo: nang: jang" moo nanu" ci: uri nhoid moo kyang azhung" byid: goo".

⁵«Dayhoem: moo kyeing" nyid da" mang: nhung" tang: mo dayug gi yuggi zoo: ayoo" loo: za: shid: lo" nghoid rigi nya: cougmoo" myhi' ri goo" yhoem: bang: hang" we' coug" age koid:. Nyang: ri coug" koid: wa yug gi shid: yug da" nya: nhung" da" yoovoin nghoid da:.

⁶Nya: tang: mo yo" re" da" zooshid" yuggi zoo: ri shid: yug da" nya: zoo: khyo" myheing yu ca" da:. Houg: lang" nya: yhoemkhung: gi Israela moo xo' jo, yhe: loo" wa nghoid da:.

⁷Nghoid loug we' shid: byug su: da" nya: nhung" gi nyang: ri cougmoo" myhi' ri anau koid: nghoid rigi hau myiyi: gi voogung mo vhujhung: yi jang" khyoo: yhe: wigi ‹Nga" yhoem: seing: pho da" nya: nhung" gi nya: moo" ri anau voin nghoid da:. Nyang: gi Israela byumyu" yi akhoug: moo nya: mang: da" amyed ashen ri anau xo' ga: he: pyam da› ga: tid baja".

⁸Houg: lang" voogung vhujhung: yigi nyang: ri khe: yu lho: nyang: ri myid: yu" ca" da:. Nyang: gi hau: myiyi: ri coug" koid: wa shid re" dahe: nyid shi" nghoid rigi

⁹Nya: mang: da" cougmoo" myhi' gi voogung vhujhung: yi da" shidkhoin" mo nya: jang" khyoo: yhe: wigi nya: khyid: baid dashoid mo khyoid pyam byid: ziyo' nya: myonhoo: moo shakain" byi" gyoin: lho: ‹Nya: mang: da" amyed ashen anau xo' byid: ga: he: su: gi hid: su" bue" da› ga: tid baja".

¹⁰Nya: ikoin deungkhu: gi Israela moo ‹Khyid: baid khyoid pyam byid: shoug" yug da" ikoin deungkhu:› ga: myeing yoo" baja".

¹¹«Yuggi eig yug byo, go" wigi dayug da" yhoem: seing: phoo ri bo pang" da" khyo" gootu: dayug da" yuggi alhoo: ri myheig too" byid: nghoid rigi

¹²Hau: myiyi myhi' ri nheig akhyeug goo". Nya: lo, ri zain phyed pyam byid: ge'.

¹³«Jang lug yo' laki' ci: ri amhoug goo".

¹⁵Jang lug yo' laki' jo ziyo' main" zi ci: ge'. Houg: lang" nanu" da" ASEING Mangsoo nanu" ri byid: wa da" mung" moo nanu" kangso' sheing: sheing: shoug" nyid wa.

¹⁶ASEING gi mhoug bang: ri ngheing" da:.

¹⁷«Nanu" Egutu mo thu lo uri Amaleg byumyu" yi nanu" ri cikoid ziri myid boin: ge'.

¹⁸Nyangnu" gi Mangsoo ri gyoug phoug" myid aboo goo" nghoid da:. Houg: lho: nyangnu" gi nanu" myung: wigi yoem: yoem" nyid uri nanu" ri thang: khyo" khaid zain: ago". Houg: lho: thang: so" gyo" nyid bang: dangain" ri said pyam ago".

¹⁹Hougsu" wigi nanu" ASEING Mangso wigi nanu" ri hau: mung" ri byid: ziyo' nanu" da" aqei: ayam lheing khoem moo nyid da" re" gyivoo dangain" mo goem loem byid: da" uri Amaleg byu yi dangain" ri yo" said pyam sho' said pyam ge'. Houg: lang" nyangnu" ri hang" wigi we' khanham we' amyid boin: loo: goo" wa. Ato" myhid goo".