Read Lashi TARHA" TID POIN" 26 Bible Online

TARHA" TID POIN" 26 - Lashi bible

TARHA" TID POIN" 26

¹«Nanu" ASEING Mangsoo wigi nanu" ri byid: wa da" mung" ri yhe: seing: yu wigi yhe: yo" de: nyid thang: ri

²Nanu" mo yugkhang" moo" gi nanu" yo" yhoem" yu da" xang: shi" shivoo: moin" ja: khang" moo" ri gyoin daloem: moo kaid lho: hau: ziri daloem: kyeing" da" noku joyoo khyoo: ci: yhi: ca" da:.

³Hau: uri yoovoin foin: to" da" khainjung pho jang" khyoo: yhe: wigi ‹Akhid" ngoo gi nga" ASEING Mangso wigi ngoonu" phoug" phyid" yiri byid: wa ga: dangsoo" to" da" mung" khyoo: ngoo yo" vang yhi: bye: ziri asoo" koid too" bye:› ga: baja".

⁴«Khainjung phoo gi re" jang" mo gyoin ri yu wigi re" ASEING Mangso da" phoin: shidkhoin" moo too" wa zi nghoid.

⁵Hau: thang: nang gi ASEING shidkhoin" moo he: dang: khoin" joem ri zhang: ca" da:. Nga" phoug" phyid" gi nyid lam" yen" da" Arami byu nghoid. Nyang: gi nya: ikoin deungkhu: byu yiri Egutu khyoo: shu" yhe: wigi houg: moo yhe: nyid da:. Nyangnu" gi hau: mung" khyoo: yhe: lo" uri amyoo: nghoid loug we' nyid myo: re" wigi yoem: bo da" byu damyu" bue" lo ago".

⁶Egutu byumyu" yigi ngoonu" ri anoug akhyoid zoem" khau wigi join joem khyo" moo" zei: nhang: ago".

⁷Hau: thang: ngoonu" gi ngoonu" phoug" phyid" yi ASEING Mangsoo ri bo pang" wa shid re" yoid nyho: boem bye:. Ngoonu" ri nyang: gyoo: byid: wigi ngoonu" da" kyi" khyeug khyoo:- moo" myung: khyoo: yo' yau: khe" khyoo: joem ri myang byid: bye:.

⁸Nyang: gi nya: da" yoem: so' moo" yo' ngoonu" ri Egutu mo khyoid yu da:. Nyang: gi mau" pho" alhoo: again- mau" pho" moo" zoo" koid wigi gyoug pho" zi bui" nhang: bye:.

⁹Nyang: gi ngoonu" ri hid: khyoo: shu" lo wigi mougmyid nu" da" he: mung" ri byid: bye:.

¹⁰Houg: yoomo akhid" ngoo gi ASEING wigi byid: jang mo xang: shi" shivoo: moin" ri ASEING jhang ci: re" da› ga: tid baja". «Hau: thang: gyoin ri ASEING shidkhoin" moo khyo' zhung: to" wigi nyang: ri hau: joyoo moo noku ge'.

¹¹Nang yo' re" ikoin deungkhu: ri re" ASEING Mangsoo wigi byid: da" jeju" ri boin: so" wigi nanu" da" phung: moo nyid da" Levi byu yi yo' tungbau yi yo' dage" pui" koid nyid ge'.

¹²«Soem" zain byeung" khang" moo" nanu" gug zoo mei loem: mo daxi: boem daboem ri Levi byu yi tungbau byu yi coug" zoo: yi yo' cougmoo" yiri byid: ge'. Houg: lang" shava phung khang" moo" moo nyangnu" zoo: ca" zi dangain" yo" loo goo" wa. Nang hau: ziri bain koid lang"

¹³ASEING ri ‹Young" gyeing" da" daxi: boem daboem ciwe' nga" yhoem: moo adeing loo. Nang wigi amyeing" byid: to" ziyo' dakhyoo" ti" hau: ziri Levi byumyu" tungbau byumyu" coug" zoo: nu" yi yo' cougmoo" yiri byid: pyam bye:. Daxi: boem daboem yo' sen: da" re" amyeing" dang: joem ri ngoo angeig pyam. Too" we' ato" myid pyam.

¹⁴Ngoo koug shu: nyid uri houg: mo dajhi' we' ayu zoo:. Noku thung" khyo" ngoo ayung" alho' da" uri houg: mo dajhi' we' nga" yhoem: mo ayu thu loo". Houg: lho: houg: mo ce: daja: ri we' shid: su: shid re" ngoo ashugbyid:. O" ASEING we" ngoo gi nang ri tam" gyoo: bye:. Daxi: boem daboem yo' sen: wigi nang amyeing" byid: to" zi ja: khang" moo" ri ngoo koid bye:.

¹⁵Re" gyeung" shang: da" mougkhung: mungdain: mo yu" kaid wigi re" byumyu" Israela ri mainkaid byid: la. Nang gi ngoonu" phoug phyid" yiri byid: wa ga: dangsoo" to" da" mougmyid nu" da" mougmyid ri we' mainkaid byid: la› ein: tid we'.

¹⁶«Akhid nyid" nanu" ASEING Mangsoo gi nya: da" tarha" dangain" ri tam" gyo: cang yhi: wa shid re" nanu" ri amyeing" byid: da:. Houg: lho: nanu" gi hau: gu: ri nanu" emyed nheigloem: dangain" ziyo' jhug zug tung" tam" gyo: cang yhe: ge'

¹⁷Akhid" nyid" nanu" gi ASEING ri nanu" Mangsoo khyo" asoo" koid khab yu bye:. Nanu" gi nyang: ri tam" gyo: cang yhi: wa shid re" nya: tarha" joem ri cang wa shid re" yo' nya: amyeing" byid: zi dangain" ri koid wa shid re" dangsoo" byid: bye:.

¹⁸Akhid" nyid" ASEING gi nang ri dangsoo" byid: too" bye: ziyo' dakhyo" nanu" ri nya: byumyu" khyo" khab yu abye:. Houg: lho nyang: gi nya: tarha" dangain" ziri tam" gyo: cang yhi: wa shid re" nanu" ri amyeing" byid: too" bye:.

¹⁹Nyang: gi nanu" ri phain" so: to" da" gootu: byumyu" ja: khang" moo" tho' je gyi: nhang: wa. Houg: lho: nang gi nya: myeing khyang" ri coung" wigi ngi: shab byid: loo wa. Nyang: dangsoo" byid: too" bye: ziyo' dakhyoo" ti" nanu" gi nya: da" byumyu" bue" ri" wa nghoid da:.