Read Lashi TARHA" TID POIN" 27 Bible Online

TARHA" TID POIN" 27 - Lashi bible

TARHA" TID POIN" 27

¹Hau: thang: Moshe gi Israela vhujhung: yi yo' dage" hau: byumyu" yiri «Akhid" nyid" ngo wigi nanu" ri byid: to" da" jhau" shid dang: dangain" ziri tam" gyo: nyid ge'.

²Nanu" gi Yodan gyid lang gu: dab wigi ASEING wigi nanu" ri byid: wa mung" khyoo: vang yhe: da" bidnyid ri lug boem moo" joem ri tu: zhug wigi hau: joem ri ingade shoin" ca" goo" wa.

³Hau: adang moo he: tarha" joem yo' jhau" shid dang: dangain" ri lhid" too" ge'. Nanu" phoug" phyid" da" ASEING Mangsoo wigi nanu" ri dangsoo" byid: to" da" moug myid nu" da" mung" khyoo: nanu" yo" vang yhe: wigi

⁴Yodan gyid lang dashoid khyoo: ju" yhi: lang" akhid" nyid" ngoo nanu" ri jhau" shid ziyo' dakhyoo" ti" Ebala boem moo he: lug boem moo" joem ri tu: zhug to" wigi hau: joem ri ingade shoin" pyam ge'.

⁵Hau: joyoo moo joto' ziyoo aci: loo: za: lugboem joem yo' phoin: daloem zhug ge'.

⁶Ciwim gari nanu" ASEING Mangso shid re" nanu" zhug da" phoin: kha: loem: nghoid loug we' akho' pyam da" lugzeing wigi koid ca" da:. Hau: joyoo moo nghe' ngei" da" xoin" we' nanu" ngei" byid: ca" da:.

⁷Houg: lho: nanu" gi xoin" ngei" byid: wigi zoem" khau: xoin" ri zo: lho: nanu" ASEING Mangso shidkhoin" moo jeju" boin: so" nyid ca" da:.

⁸Ingade shoin" to" da" lugboem moo" joem adang moo Mangso da" tarha" joem mo dang: khoin" khang" moo" ri bang bang za duang sho' lhid" tab too" ca" da» ga: tid da:.

⁹Hau: thang: Moshe gi Levi khainjung yi yo' dage" Israela byu dangain" ri «Israela byumyu" yi we" sam: zoo: nyid wigi nga" dang: ri tam" gyoo: ge'. Akhid" nyid" nanu" gi ASEING Mangsoo da" byumyu" bue" lo abye:.

¹⁰Houg: yoomo nyang: ri tam" gyo: wigi akhid" nyid" ngoo nanu" ri byid: da" nya: tarha" dangain" ri cang nyid ge'» ga: tid.

¹¹Hau: thang: Moshe gi Israela byumyu" yiri

¹²«Nanu" gi Yodan gyid lang ri bain gu: dab thang: ri byumyu" yiri mainkaid dang: tid uri Gerizim boem moo vhoo: mo akung: joem yab jo, wa zi nghoid. Houg: bang: gi Simun- Levi- Yuda- Ishakha- Yoseb- yo' Benyamin kung bang: nghoid wa.

¹³Hau: thang: nheing" khoin" kaid nyid uri Ebala boem moo vhoo: mo akung: joem yab jo, wa zi nghoid. Houg: bang: gi Ruben- Gad- Ashe- Zebulun- Dan yo' Napthali kung bang: nghoid wa.

¹⁴Levi byumyu" yigi he: dang: khoin" joem ri thui: zeing yo' tid ca" da:.

¹⁵«‹Lugboem- seig- anghoid lang" joto' yo' soolhoo: koid wigi hau: ziri khau" no' yug hang" ri nghoid loug we' Mangso nheing" khoin" zang" baja". ASEING gi soolhoo: no' ziri ngheing" da› ga: tid baja". Hau: thang: byumyu" yi dangain" gi ‹Amen› ga: tu" wa zi nghoid.

¹⁶«Nya: phoo anghoid lang" nya: myhi' ri sho' phu" nhang: su: hang" nghoid loug we Mangso nheing" khoin" zang" baja". Houg: lang" byumyu" yi dangain" gi ‹Amen› ga: tu" wa zi nghoid.

¹⁷«Yhoem: kyoo" cang" da" kyoodoem: ri shu" pyam yug hang" nghoid loug we' Mangso nheing" khoin" zang" baja". Houg: lang" byumyu" yi dangain" gi ‹Amen› ga: tu" wa zi nghoid.

¹⁸«‹Myo, jed yug ri anghoid shoid khyoo: toin" shed yug hang" nghoid loug we' Mangso nheing" khoin" zang" baja". Houg: lang" byumyu" yi dangain" gi ‹Amen› ga: tu" wa zi nghoid.

¹⁹«Tungbau byu yi coug" zoo yi yo' cougmoo" yi da" akho: akhang" ri abyid: su: hang" nghoid loug we' Mangso nheing" khoin" zang" baja". Houg: lang" byumyu" yi dangain" gi ‹Amen› ga: tu" wa zi nghoid.

²⁰«‹Nya: phoo da" yhoem: seing: myhi' dayug yug yo' gung shoo" zoem" wigi nya: phoo ri sho' phu" nhang: su: hang" nghoid loug we' Mangso nheing" khoin" zang" baja". «Houg: lang" byumyu" yi dangain" gi ‹Amen› ga: tu" wa zi nghoid.

²¹«Gougnyhoug dadu: yo' gung shoo" zoem" su: hang" nghoid loug we' Mangso nheing" khoin" zang" baja". ‹Houg: lang" byumyu" yi dangain" gi ‹Amen› ga: tu" wa zi nghoid.

²²«Nya: nhammoo" seing: anghoid lang" myhi' phoo dayug shoin" da" nhammoo" yo' gung shoo" zoem" su: hang" nghoid loug we' Mangso nheing" khoin" zang" baja". «Houg: lang" byumyu" yi dangain" gi ‹Amen› ga: tu" wa zi nghoid.

²³«Nya: yugmyhi' yo' gung shoo" zoem" su: hang" nghoid loug we' Mangso nheing" khoin" zang" baja"› «Houg: lang" byumyu" yi dangain" gi ‹Amen› ga: tu" wa zi nghoid.

²⁴«Byu gau" said su: hang" nghoid loug we' Mangso nheing" khoin" zang" baja". ‹Houg: lang" byumyu" yi dangain" gi ‹Amen› ga: tu" wa zi nghoid.

²⁵«Yooboo abo da" su: ri said pyam wa shid re" aphoug" ngei khab yu su: hang" nghoid loug we' Mangso nheing" khoin" zang" baja". «Houg: lang" byumyu" yi dangain" gi ‹Amen› ga: tu" wa zi nghoid.

²⁶«Mangso da" tarha" joem yo' jhau" shid dang: joem dangain" ri atam" gyoo: su: hang" nghoid loug we' Mangso nheing" khoin" zang" baja". ‹Houg: lang" byumyu" yi dangain" gi ‹Amen› ga: tu" wa zi nghoid.