Read Lashi TARHA" TID POIN" 28 Bible Online

TARHA" TID POIN" 28 - Lashi bible

TARHA" TID POIN" 28

¹«Nanu" ASEING Mangsoo ri tam" gyo: wigi akhid" nyid" ngo wigi nanu" ri byid: da" nya: amyeing" joem ri jhug zug tung" cang nyid nghoid rigi nyang: gi nanu" ri mougmyid tho' mo gootu: byumyu" ja: khang" moo" tho' je gyi: sheung: nhang: wa.

²Nanu" ASEING Mangsoo ri tam" gyo: cang yhe: nyid ge'. Houg: lang" he: mainkaid jeju" dangain" gi nanu" shid re" nghoid ri" wa.

³«ASEING gi nanu" voogung joem yo' nanu" yoothung" yoolang: joem ri mainkaid byid: wa zi nghoid.

⁴«ASEING gi nanu" ri zooshang: yi myoo" sho' gug zoo athang agoin- nu: yo' yang myoo" sho' mainkaid byid: wa zi nghoid.

⁵ASEING gi nanu" da" gug shi" mei: shi" yo' nanu" soin' to" da" zoo: noem joem moo mainkaid byid: wa zi nghoid.

⁶«ASEING gi nanu" koid da" ja: khang" moo" ri mainkaid byid: wa zi nghoid.

⁷«Nanu" gyivoo yi nanu" ri khaid zain: lo uri nyangnu" ri ASEING wigi oung: pyam byid: wa. Nyangnu" gi dashoid khyo" za: re" khaid zain: nghoid loug we' nyangnu" gi nanu" jang mo shoid khang" moo" khyo" phang: thu loo" goo" wa zi nghoid.

⁸«Nanu" ASEING Mangsoo gi nanu" moo" zoo" moo mainkaid byid: wigi nanu" da" jhi: joem moo shivoo: yo' byeung" nhang: wa. Nyang: gi nanu" ri nyang: byid: wa mung" moo mainkaid byid: wa zi nghoid.

⁹«Nanu" gi nanu" ASEING Mangsoo ri tam" gyo: wigi nyang: amyeing" dang: ja: khang" moo" ri koid nghoid rigi nyang: dangsoo" byid: to" bye: ziyo' dakhyoo" ti" nanu" ri nya: byumyu" bui" nhang: wa.

¹⁰Houg: lang" mougmyid tho' mo byumyu" dangain" gi nanu" ri ASEING wigi nya: byumyu" bui" wa shid re" khyen: yu ziri zang" myang boem lho: nanu" ri nyangnu" gyoug re" boem goo" wa.

¹¹ASEING gi nanu" ri byid: wa ga: nanu" phoug" phyid" yiri dangsoo" byid: to" da" mung" moo: zoo: yi myoo" sho' nu: myoo" sho' yo' gug shi" mei: shi" athang agoin mainkaid byid: wa zi nghoid.

¹²Nyang: gi ayo, yo' ayo, moo mougkhung: mo jonu" byeung" da" nya: jhi: mo moug: vo khyo' kaid nhang: wigi nanu" moo" zoo" dangain" ziri mainkaid byid: loo wa. Houg: lang" nanu" gi byumyu" myoo" sho' ri yo" jhid" byid: goo" wa. Nghoid loug we' nanu" gi hang" jang mo we' ajhid" yu ca" wa.

¹³Nanu" ASEING Mangsoo gi nanu" ri byumyu" yi da" agung moo vhujhung: yi bui" nhang: wa. Thang: cang bang: abui" nhang: wa. Nanu" gi akhid" nyid" ngoo nanu" ri byid: nyid da" nya: amyeing" dang: dangain" ri jhug zug tung" tam" gyo: cang yhe: nghoid rigi khanham nghoid loug nyid pyoo: yab pyo: wigi khanham we' ajoem: loo" wa.

¹⁴Nghoid loug we' nanu" gi hau: joem ri khakhyo" nghoid nghoid atam" gyoo: age koid wa anghoid lang" gootu: yu phara" joem ri age no'- age dei byid: wa.

¹⁵«Nghoid loug we' nanu" gi nanu" ASEING Mangsoo ri atam" gyo: wigi akhid" nyid" ngoo nanu" ri byid: nyid da" nya: amyeing" joem yo' tarha" joem dangain" ri jhug zug tung" acang nghoid rigi nanu" moo he: akhyeing" ashoeb zi dangain" bui" lo wa zi nghoid.

¹⁶«ASEING gi nanu" voogung joem yo' yoothung" joem ri nheing" khoin" kaid wa nghoid.

¹⁷«ASEING gi nanu" da" gugshi" meishi" yo' nanu" soin' to" da" zoo: noem joem moo: nheing" khoin" kaid byid: wa zi nghoid.

¹⁸«ASEING gi nanu" da" zoo yi myid: yi moo: we' shivoo: moo: we' nu: yo' yang moo: we' dajhi' za: byid: khyo" wigi nheing khoin" kaid byid: wa zi nghoid.

¹⁹«ASEING gi nanu" koid da" ja: khang moo" nheing" khoin" kaid byid: wa zi nghoid.

²⁰«Nanu" gi akhyeing" ashoeb zi koid wigi ASEING ri ngeug he: pyam nghoid rigi nyang: gi nanu" adang moo byo, yoin" lo" zi nhung khoid ziyo' nanu" koid moo" ja: khang" moo" ri yau: khi" nhang: wa zigi nanu" bain sho' myab myab doem: lo" da" ayo, ju" sho' nghoid wa.

²¹Nyang: gi nanu" yhe: seing: yu loo wa zi za: danghoid lo: da" mung" moo nanu" mo dayug we' adeing loo: sho' nanu" adang moo noophyoo" daja: thang: daja: nhang: kaid byid: loo wa.

²²ASEING gi nanu" ri dab lo ja: noo joem yo' gung yam: lo ziyo' nooyoem" yo' shen" yhen wa nghoid. Nyang: gi nanu" da" shivoo: joem ri phyo' shoin' pyam wa shid re" moug: kyug myid kyug ziyo' lid lung ri nhang: kaid byid: wa nghoid. He: byo, yoin" lo" zigi nanu" shid: sho' nanu" yo' dage" jo, jo, wa zi nghoid.

²³Moug: dacab we' avoo wa. Houg: lho: nanu" da" myidjang gi joto' yhang: ti" thain: wa nghoid.

²⁴Moug: voo wa gungthid ASEING gi nanu" shid: doem: sho' pheilhoug: uglid yo' midcoo: uglid nhang: khyo' kaid byid: wa zi nghoid.

²⁵«ASEING gi nanu" da" gyivoo joem wigi nanu" adang moo oung: pyam nhang: wa zi nghoid. Nanu" gi nyangnu" ri dashoid khyo" khaid zain: nghoid loug we' nanu" gi nyangnu" jang mo shoid khang" moo" khyo: phang: loo" ca" goo" wa. Houg: lho: mougmyid dang mo byumyu" dangain" gi nanu" moo bue" ziri shau" myang wigi gyoug dain loo goo" wa.

²⁶Nanu" shid: lang" ngho' joem yo' siyoo gougnyhoug joem re" wigi nanu" manggung ri zo: pyam wa nghoid. Houg: lho: houg: moo hau: joem ri khaid pyam byid: wa hang" dayug we' anyid wa.

²⁷ASEING gi Egutu byumyu" yi adang moo koid ziyo' dakhyo" nanu" adang moo byeing joem ri nhang: kaid byid: wa. Nyang: gi nanu" gung moo byeing myug boeb thu nhang: wa. Nanu" gung dagung goin" i" myug wigi yoo: goo" wa. Nghoid loug we' yo" byang" gi wa zi anghoid.

²⁸ASEING gi nanu" ri koo" nhang: wa zi nghoid. Nyang: gi nanu" ri myojid" jed nhang: wigi anhung akhoid bue" khyo" wigi shen" wa zi nghoid.

²⁹Nanu" gi nyid" gung bid jang moo myojid" jed su: yhang: ti" soeb yab yen" wa. Houg: lho: nanu" nya: khyoo: ri ayo" sho: yu wa. Nanu" koid da" moo" kha: ja: we' aoung: myug boem goo" wa. Nanu" ri doin: zeig zo: ziyo' lhoid zo: yu zi shau" boem wa wigi nanu" ri pang" yu wa dayug we' anyid wa.

³⁰«Nanu" myiyi: dayug ri mho' too" nghoid loug we' subi" gooyug wigi nyang: ri lo, xo' pyam byid: wa. Nanu" yhoem: koid to" nghoid loug we' nanu" houg: moo khanham we' ashau" lung" goo" wa. Nanu" zabyid khyam: zhung" too" nghoid loug we' houg: mo zabyid shi" khanham we' ashau" phyo' zoo: wa.

³¹Nanu" nu: joem ri nanu" shidkhoin" moo said nghoid loug we' nanu" gi hau: shoo" ri dajhi' we' ashau" zoo: wa. Nanu" yu" nyid uri nanu" loo zei: joem ri she: lo" boem wigi nanu" ri hau joem adoem tau" byid: wa. Nanu" yang joem ri nanu" gyivoo joem ri byid: pyam wigi nanu" ri pang" thoug wa dayug we' anyid wa.

³²Nanu" yu" nyid uri nanu" yuggi zoo: yi myiyi: zoo: yi join khyo" tungbau byumyu" yiri byid: pyam zi shoug" wa. Nanu" gi nyid" khang" moo" nanu" zooshang: yi doem tau" loo wa ziri myojid" myung: sho' zhug yu" nyid wa.

³³Tungbau byu damyu" gi nanu" gye" yoem: kaid wigi sho" to" da" gugshi" meishi" dangain" ziri yu pyam byid: wa. Nanu" nyang: gi ci: ashau" yu wa. Nghoid loug we' ayo, byeung" sho' moo doin: zeig ziyo' anoug akhyoid koid zi shau" boem wa.

³⁴Nanu" da" yau: khi" gi nanu" ri koo" nhang: loo wa.

³⁵ASEING gi nanu" khyid: joem moo atho' ge da" khe" da" dam joid noo nhang: wa. Nanu" da" vhuloem mo zi khyid: voo: ju" sho' byeing myug nhang: wa.

³⁶ASEING gi nanu" yo' nanu" khokham ri nanu" yo' nanu" phoug" phyid" yi anyid yu" shi" da" tungbau meing: khyoo: shu" loo" wa. Hau: meing: moo nanu" gi seig yo' lug boem wigi koid to" da" yu phara" joem ri dei byid: loo goo" wa.

³⁷ASEING wigi nanu" ri khaid sain" nyhid: to" da" meing: joem moo nyid da" byumyu" yigi nanu" moo bue" lo khyoo: ri yu" dain goo" wa. Nyangnu" gi nanu" ri yi noug tu' pyam wigi juang" pyam boem wa.

³⁸«Nanu" gi myoug: shi" myoo" sho' shoo" nghoid loug we' dajhi' za: shau" yham" yu wa. Ciwim gari nanu" shivoo: gam joem ri jhenkhyeug joem wigi zo: pyam byid: loo wa.

³⁹Nanu" zabyid khyam: koid wigi hau: ziri yu" coung: nghoid loug we' hau: joem ri shoug" zheing" yu wa zi anghoid. Hau: joem mo zabyid yhid: shoug" shug wa zi anghoid. Ciwim gari zabyid gam ri tungdi: wigi zo: pyam wa zi nghoid.

⁴⁰Nanu" mung" khyi khang" moo" moo zhainloin: gam yug nghoid loug we' nanu" gi zhainloin: xu: dajhi' we' ayoo" wa. Ciwim gari zhainloin: shi" joem shu: gyo" pyam wa.

⁴¹Nanu" gi yuggi zoo: yi yo' myiyi: zoo: yi yoo" nghoid loug we' nanu" gi nyangnu" ri ci: phyug pyam wa nghoid. Ciwim gari nyangnu" ri meing: zain: jang: mo thung: byu khyo" myheig lo" boem wa.

⁴²Nanu" seiggam joem yo' gugshi" meishi" dangain" gi tungdi: joem wigi zo: pyam wa.

⁴³«Nanu" mung" moo nyid da" tungbau byu yigi je je yoem: so' gyi: loo wa. Nanu" gi zo" zo" yoem: so' neing: loo" wa.

⁴⁴Nyangnu" gi nanu" ri jhid" byid: wa ngei yo" loo goo" wa. Nghoid loug we' nanu" gi nyangnu" ri jhid" byid: wa da" ngei ayoo" wa. Lo" thang moo nyangnu" gi nanu" ri vhoeb khang" bang: bue" loo wa.

⁴⁵«He: byo, yoin" zi dangain" gi nanu" adang moo ju" wigi nanu" bain joem: loo" sho' nanu" yo' dage" dajo, jo, wa. Ciwim gari nanu" gi nanu" ASEING Mangsoo ri atam" gyo: ziyo' nyang: byid: da" tarha" joem dangain" ri acang yoomo nghoid.

⁴⁶Hau: joem gi nanu" yo' nanu" amyed ashen yi adang moo apyaid atoo: moo tarha" dang: phyed da" asoo" bue" jo, wa.

⁴⁷ASEING gi nanu" ri khyoo: ja: khang" moo" moo mainkaid byid: loo bye:. Nghoid loug we' nanu" gi ngei bu nheigloem: yo' nyang: ri adei byid: nghoid da:.

⁴⁸Hougsu" yoomo nanu" gi nanu" ri thougtheung wa shid re" ASEING wigi nhang: kaid wa gyivoo yiri yhe: dei byid: ca" wa zi nghoid. Nanu" gi voem yoid gyid shid ziyo' shoo" cen: doem: nyid wa zi nghoid. Ja: khang" moo" ca" goo" wa. ASEING gi nanu" ri nanu" joem: loo" sho' anoug akhyoid yhen' wa zi nghoid.

⁴⁹ASEING gi nanu" ri thougtheung wa shid re" nanu" ase' gyo: da" myeing" ji da" byumyu" damyu" ri mougmyid athang: mo shu" loo byid: wa zi nghoid. Nyangnu" gi zoin bung: yo' dakhyoo" ti" nanu" atho' moo re" dang: thei" wa zi nghoid.

⁵⁰Nyangnu" gi gye" khyi" khyoid wigi ngi bang: gyi: bang: yugkhang" moo" ri nheig khyeug myid aci: shug wa.

⁵¹Nyangnu" gi nanu" da" yhoem: gougnyhoug joem yo' gug shi" mei: shi" joem ri zo: pyam wigi nanu" gi zooyoid shid: goo" wa. Nyangnu" gi nanu" shid re" shivoo:- zabyid yhid:- zhainloin: xu:- nu: yo' yang ce: daja: we' ateing too" byid: wigi nanu" shid: shoug" wa nghoid.

⁵²Nyangnu" gi nanu" ASEING Mangsoo wigi nanu" ri byid: wa mung" mo voogung loem: khang" moo" ri khaid zain: wigi nanu" myid loem to" da" gye" myhang: da" vang khyam: byo, gyo" lo" byug wa.

⁵³«Nanu" gyivoo joem wigi nanu" da" voogung joem ri re" lheing khoem to" uri nanu" gi zooshug sung myung yoomo ASEING wigi nanu" ri byid: to" da" zooshang: yiri lang" zo: pyam goo" wa.

⁵⁴Byu zeing kung: mo nu" nham' thang yug lang" gyivoo joem lheing khoem to" da" ayo, khoug: moo zoo: shug gootu: ayoo" yoomo nyang: nya: zooshang: dayham" ri zo: pyam loo goo" wa. Nyang: gi nya: mang: nhung" yiri anghoid lang" nyang: jheddab da" yhoem: seing: myhi' ri anghoid lang" deing shi" da" nya: zoo: yiri lang" dajhi' we' abyid: zhoo" loo koid ri" wa zi nghoid.

⁵⁵

⁵⁶Byu zeing kung: mo nu" nham' thang da" myiyi: nyang: gi khakhyoo: yhi: nghoid loug we' khyid: khyo" khanham we' aso" yu" yug lang" houg: yo' dakhyo" koid loo wa. Gyivoo joem wigi nya: voogung ri lheing khoem to" da" uri nyang: gi zoo: shug sung myung yoomo nyang: aseig khu: da" zoonu" yo' zooshang: nyid cang" joem ri shoung: wigi zo: pyam wa zi nghoid. Nyang: gi nyang: jheddab da" nya: yhoem: seing: phoo ri we' nya: zoo: yiri we' agam zhoo" loo: koid loo wa.

⁵⁷

⁵⁸«Nanu" gi he: mougsoug" pug moo lhid" to" da" Mangso da" jhau" shid dang: joem dangain" ri jhug zug tung" atam" gyoo: lho: nanu" ASEING Mangso da" mau" pho" ziyo' gyoug pho" da" myeing khyang" ri ngi: ashab byid: goo" nghoid rigi

⁵⁹Nyang: gi nanu" yo' nanu" da" amyed ashen yi adang moo ayo" byang" ge da" noophyoo" yo' khanham we' ayo" toem' pyam da" gyoug pho" yoem" ri nhang: kaid byid: loo wa.

⁶⁰Nyang: gi nanu" Egutu moo bue" lid lo yu" bye: da" gyoug dain pho" noophyoo" joem ri doem bui" nhang: loo wa. Houg: lho: nanu" gi khanham we' ayo" ge ri" loo: wa.

⁶¹He: Mangso da" tarha" yo' jhau" shid dang: joem lhid" to" da" mougsoug" moo abo da" noophyoo" yo' gyoug pho" yoem" dangain" ziri nhang: kaid byid: loo wa. Houg: lho: nanu" gi joem: lo" zi shoug" wa.

⁶²Nanu" gi mougkhung: mo kyi: su" myo: lug ri" wa nghoid loug we' nanu" mo dajhi' za: ashid: loo: nyid deing boem wa. Ciwim gari nanu" gi nanu" da" ASEING Mangsoo ri atam" gyoo: yoomo nghoid.

⁶³ASEING gi nanu" ri nyid gi yab gi nhang: wigi myo: lug je: be: ri" nhang: da" uri ngei pyo: gau yi ziyo' dakhyoo" ti" nyang: nanu" ri joem: loo" nhang: wigi nanu" byo, yoin" joem: lo" uri we' ngei pyo: gau yi loo wa. Nanu" yhe: seing: yu wa za: danghoid lo: da" mung" mo we' phoin' pyam zi shoug" wa.

⁶⁴«ASEING gi moug: gyab dashoid mo dashoid athang: ju" sho' moo nyid da" byumyu" phung: khyoo: nanu" ri khaid sain" pyam wa. Houg: lho: nanu" gi hau: joyoo moo nanu" yo' nanu" phoug" phyid" yi shid phyang" anoku yu" da" seig yo' lugzeing yo' koid da" yu phara" joem ri dei byid: re" boem wa.

⁶⁵Nanu" gi yug yoo zi khamoo: we' ashau" wa. Nanu" nya: mougmyid ein: myheing wa joyoo ashau" myang wa. ASEING gi nanu" adang moo myid myo: zi nheigloem: thang ziyo' yoem: shoin: zi byeung" jo, nhang: loo wa.

⁶⁶Nanu" apyaid gi khanham we' gyoug ca" ziyo' nyid ca" wa. Nanu" gi nyid" ri we' myen" ri we' gyoug dain ziyo' byeung" nyid wa. Houg: lho: nanu" gi ayo, byeung" sho' moo shid: wa ziri gyoug nyid ca" loo wa.

⁶⁷Nanu" myang da" ja: khang" moo" moo gyoug wigi nanu" seing" gug thung" wa. Moug: boo" khang" moo" myen" thang: ju" noug goo" wa. Myen" thang: khang" moo" moug: boo" ju" noug goo" wa.

⁶⁸ASEING gi nanu" ri Egutu khyoo: khanham we' adoem yhi: ca" lo: wa ga: tid too" nghoid loug we' nanu" ri gyid sangphoo khyo" Egutu khyoo: doem tau" de" pyam loo wa. Houg: moo nanu" gi nyang: nya: gung ri gyivoo yi jhang join khyo" oung" zoo: wa yoem: kaid nghoid loug we' nanu" ri hang" we' anau qei yu goo" wa.