Read Lashi TARHA" TID POIN" 29 Bible Online

TARHA" TID POIN" 29 - Lashi bible

TARHA" TID POIN" 29

¹Hid: joem gi Moba mung" moo Israela byumyu" yi yo' too" wa shid re" Moshe ri ASEING wigi amyeing" byid: da" dang: theing moo bo da" dang: khoin" joem nghoid da:. He: zi dangain" gi Sina boem moo ASEING wigi nyangnu" byid: da" dang: theing moo lung: kaid zi nghoid da:.

²Moshe gi Israela byu dangain" ri khe: zheing" to" wigi nyangnu" ri «ASEING wigi Egutu khokham ri nya: gyizoug: yiri nya: mung" ri khasu" koid khyoo: ri nanu" nyang: myang abye: goo".

³ASEING wigi koid da" gyoug pho" lang: yoem" joem mau" pho" alhoo: again joem gye" gyi: da" mau" pho" moo" joem ri nanu" myang bye:.

⁴Nghoid loug we' akhid" nyid" ju" sho' nanu" thung" shoug" lo da" khyoo: ri nyang: wigi nanu" ri ase' gyoo: nhang: shi" nghoid da:.

⁵Myid: xi: zain goin" nanu" ri ASEING wigi dain" pyoid yoo khyo" shu" lid loo bye:. Houg: lho: nanu" da" byimi joem yo' khyid: baid joem ajeig thang pyam nghoid da:.

⁶Nanu" gi zoo: wa zooyho' shug wa zabyid yhid: yo' yhid: shed ayoo" nghoid loug we' ASEING gi nanu" da" Mangsoo nghoid ziri nanu" si' sho' jhau" shid wa shid re" nanu" moo ca" ziri ASEING pang" thoug byid: bye:.

⁷Houg: lho: ngoonu" he: joyoo khyoo: ju" re" ri Heshbon khokham Sihon yo' Bashan khokham Oga eig yug gi ngoonu" ri khaid zain: wa ga: thu re" agoo". Nghoid loug we' nya: eig yug ri ngoonu" gi khaid oung: pyam bye:.

⁸Nya: tang: da" mung" ri yu pyam wigi hau: ziri Ruben- Gad yo' Manashe kung agung dayi" kho' gam byid: bye:.

⁹Nanu" koid da" moo" ja: khang" moo" moo oung: doid wa shid re" he: dang: theing moo bo da" dang: khoin" dangain" ziri jhug zug tung" tam" gyo: cang yhe: nyid ge'.

¹⁰«Akhid" nyid" nanu" dangain" bang: nanu" da" vhujhung: yi gyizoug: yi nanu" da" yuggi yi yo' myiyi: yi zooshang: yi yo' nanu" akhoug: moo: nyid lho: nanu" shid re" thang" shoo: gyid kham: byid: da" tungbau byu yigi nanu" da" ASEING Mangso da" shidkhoin" moo yab jo, ago".

¹²Nanu" gi akhid" nyid" hid: moo nanu" da" ASEING Mangsoo wigi nanu" ri byid: to" da" dang: theing lheing: yu wigi houg: moo bo da" yoovoin ri khab yu ca" ago" da:.

¹³Houg: lang" ASEING gi nanu" yo' nanu" da" phoug" phyid" Abraham- Isag yo' Yaku bang: ri nyang: wigi dangsoo" byid: to" ziyo' dakhyoo" ti" nanu" ri nya: byumyu" khyo" we' nyang: gi nanu" da" Mangsoo khyo" jang deing yu wa zi nghoid.

¹⁴ASEING gi he: yoovoin yo' dang: theing ri nanu" yo' kyeing" koid to" zi anghoid.

¹⁵Nyang: gi akhid" nyid" he: nya: shidkhoin" moo yab jo, da" ngoonu" dangain" yo' we' akhu: ri" shi" da" ngoonu" da" amyed ashen yi yo' we' koid to" zi nghoid.

¹⁶Egutu moo: khasu" nyid lo ziyo' gootu: byumyu" yi mougmyid khyo" gyung: so" lid: lo" uri khasu" bue" lai lo ziri nanu" myid boin: gu nghoid bye:.

¹⁷Seig thung"- lugboem- ngei yo' sheing: joem yo' koid to" da" nyangnu" da" yu" co' sho' da" soolhoo: joem ri nanu" myang boem abye:.

¹⁸Akhid" nyid" hid: mo yab jo, mo, mo hang" yuggi dayug- myiyi: dayug- damyi" yi anghoid lang" dakung bang: we' ngoonu" da" ASEING Mangsoo mo gang: lo" wigi gootu: byumyu" yi da" yu phara" joem ri ano' goo" wa shid re" lhid nyid ge'. He: zigi kho" da" myoono, gam ri yug ri" nhang: da" seig gyi: yo' du nyid da:.

¹⁹He: tarha" moo jhau" to" da" joem ri akhid" nyid" hid: moo shoug" gyoo: yug hang" nghoid loug we' nyang: vho: da" khyo" nheigloem: thain: yhe: lo" nghoid rilang" nyang: moo dangain" ge zigi bui" wa ein: nyang: nya: gung ri amyed loem goo". Hau: zigi nanu" mo gi bang: yo' akhyeing" bang: dangain" ri dakhyo" za: joem: loo" nhang: loo wa.

²⁰ASEING gi houg: te" yug ri yooboo akhyoid byid: wa. Hau: gungthid ASEING da" nheig yo: nge" da" myiyham: gi nyang: ri nge" zang" wigi bain joem: shid: sho' he: mougsoug" pug moo lhid" to" da" yau: khe" yoem" dangain" gi nya: adang moo gyo" zang" loo wa.

²¹ASEING gi nyang: ri Israela byumyu" kung: dangain" da" shidkhoin" moo khooshid: bui" nhang: wigi ASEING da" jhau" shid pug moo lhid" to" da" dang: theing akhoug: mo nheing" khoin" joem dangain" yo' dakhyo" nya: adang moo lang: yoem" gyoo" nhang: loo wa.

²²«Ju" loo wa da" byuxeig joem moo nanu" da" amyed ashen yi yo' moug: vi: mo tungbau byumyu" yigi ASEING wigi nanu" mungdain: adang moo ju" nhang: da" noophyoo" joem yo' kyi" khyeug shoug" ziri shau" myang loo goo" wa.

²³Shivoo: yoo gi shoug: yo' xoo" boem" pyam wigi shang byug wa zi nghoid. Ciwe' age shoo" zoo: wa. Houg: lho: hau: joyoo mo mhain" lang" ayug loo: wa. Nanu" da" mungdain: gi ASEING wigi nheig joem: yo: wigi phyo' shoin' pyam da" Sodom yo' Gomora voomoo" joem yhang: ti"- Adma yo' Zeboim voomoo" joem yhang: ti" bue" lo" byug wa zi nghoid.

²⁴Houg: lang" moug: gyab goin" gi ASEING gi Ciwim yoomo nyangnu" mung" ri hid: su" koid la. Nya: da" gyoug pho" nheig yo: zigi ciyoomo nghoid la" ga: myid: lo boem wa.

²⁵Houg: lang" dang: phid: koem' gi ‹Nyangnu" ri Egutu mo shu" thu lo da" nyangnu" phoug" phyid" yi Mangsoo gi nyangnu" yo' koid to' da" dang: theing ri ASEING byumyu" yi wigi phyo' pyam wigi bue" lo zi nghoid da:.

²⁶Nyangnu" shid phyang" khanham we' ano' yu" da" yu phara" joem ri ano' wa shid re" ASEING wigi nyangnu" ri toem' to" da" yu phara" joem ri nyangnu" dei byid: nyid ago".

²⁷Houg: lho: ASEING gi nyangnu" ri nheig yo: lo wigi he: mougsoug" pug moo lhid" to" da" noophyoo" dangain" ziri nyangnu" da" mung" khyoo: nhang: kaid byid: bye:.

²⁸ASEING gi xoo: sho' nheig yo: wigi nya: da" nheig zeing yoo: yoomo nyangnu" ri nyangnu" mung" mo phoin' pyam ziyo' tungbau mung" khyoo: nyangnu" ri she: lhei" pyam da:. Houg: lho: nyangnu" akhid" nyid" hau: joyoo moo nyid boem ago"› ga: tid loo wa.

²⁹«Ngoonu" da" ASEING Mangso nyhoem" shoung: to" zi dayham" jo,. Nghoid loug we' nyang: gi nya: tarha" joem ri ci: shug bye:. Houg: lho: ngoonu" yo' ngoonu" da" amyed ashen yigi hau: ziri apyaid atoo: moo tam" gyo: cang yhe: nyid ca" da:.