Read Lashi TARHA" TID POIN" 3 Bible Online

TARHA" TID POIN" 3 - Lashi bible

TARHA" TID POIN" 3

¹«Hau: thang: ngoonu" gi mougzhung: shoid Bashan mougmyid khyoo: to' yhe: lo" ri khokham Oga gi ngoonu" ri khaid zain: wa shid re" Edrei voogung nam khyoo: nya: byu yi yo' thu re" da:.

²Nghoid loug we' ASEING ngoo ri ‹Nyang: ri agyug goo". Ngoo gi nyang: we' nya: byu yi yo' nya: mougmyid dangain" nanu" ri byid: wa. Heshbon moo: vhoeb nyid da" Amori khokham Sihon ri nanu" gyi koid boem bye: ziyo' dayhang: ti" nyang: ri gyi koid ge'› ga: tid.

³Houg: yoomo ASEING gi khokham Oga yo' nya: byu yiri ngoonu" da" yoem: so' lo, khoug: mo too" byid: wigi ngoonu" nyangnu" dangain" ri said pyam bye:.

⁴Hau: ayo, ri nya: voogung dangain" ri ngoonu" seing: yu boem bye:. Ngoonu" aseing: yu da" voogung daloem: we' ajo, nghoid da:. Ngoonu" seing: yu da" voogung dangain" gi khyug xi: nghoid da:. Bashan khokham Oga vhoeb da" Argoba dameing: goin" mo voogung joem bo da:.

⁵He: voogung joem dangain" gi vang khyam: joem myhang: sho' koid wigi khoem" moo" joem yo' hau: ziri khoem" kyang kyang to" da" gyidab voogung joem nghoid. Houg: moo vang khyam: abo da" voogung joem myoo: sho' we' jo, da:.

⁶Ngoonu" gi Heshbon khokham Sihon seing: da" voogung joem ri koid loo bye: ziyo' dayhang: ti" voogung dangain" ri phyo' pyam wigi yuggi myiyi: yo' zooshang: yi dangain" ri said pyam boem bye:.

⁷Ngoonu" gi yhoem: gougnyhoug joem ri yu wigi voogung joem ri lhoid yu pyam boem bye:.

⁸«Hau: ayo, moo ngoonu" gi Armon lang mo Hermon boem ju" sho' nghoid da" Yodan gyid lang bidthu shoid Amori khokham eig yug seing: da" mougmyid ri seing: yu boem bye:.

⁹(Hermon boem ri Sidon byu yigi Sirion ga: myheing wigi Amori byu yigi Senira ga: myheing ago".)

¹⁰Ngoonu" gi Bashan khokham Oga da" mougmyid nghoid da" bouggung mo voomoo" joem bidthu shoid mo Saleka voogung yo' Edrei voogung joem ju" sho' nghoid da" Gilead yo' Bashan moug: dangain" ri seing: yu boem bye:.

¹¹Khokham Oga gi Rephim byumyu" mo lo" thang yug nghoid da:. Nya: gung: ri lugzeing yo' koid wigi tarha" vang da" laki' yo' ke' ri gyi: khyoo: khyug pe: sheing: khyoo: daxe: myid: pe: koo: bo da:. Hau: ziri Amon byu yi da" Raba voomoo" moo akhid" ju" sho' yo" myang ashi".)

¹²«Ngoonu" hau: mungdain: ri seing: yu da" uri ngoo gi Ruben yo' Gad byu kung: yiri Arnon lang nam mo Aroera voogung mougzhung: shoid mougmyid joem yo' Gilead boem moug: du- houg: mo voogung joem yo' dage" ab byid: da:.

¹³Manashe byu kung: agung dayi" ri deing da" Gilead moug: ri ngoo byid: da:. Oga vhoeb kho' da" Argoba moug: nghoid da" Bashan moug: dangain" ri we' byid: da:. (Bashan gi Rephim bang: da" mougmyid khyo" myeing yo" lo da:.

¹⁴Manashe byu kung: mo Yaira gi Geshura yo' Makhathi mougkyoo" ju" sho' nghoid da" Bashan- Argoba khung" goin" ri seing: yu da:. Nyang: gi hau: voogung joem ri nya: myeing ri cang lho: myeing myheing da:. Hau: voogung joem gi Yaira da" voogung joem khyo" myeing akhid" ju" sho' yo" jo, ashi".)

¹⁵Ngoo gi Gilead mung" ri Manashe da" byu kung: mo Makhira akung: ri byid: bye:.

¹⁶Houg: lho: Ruben yo' Gad byu kung: yiri gi Gilead mo zi Arnon gyid lang ju" sho' mo mougmyid ri ngoo byid: bye:. Gyid lang agung gi nyangnu" da" mougpyi: shoid mo mougkyoo" nghoid. Nyangnu" da" mougzhung: shoid mo mougkyoo" gi Amon byu yi da" mougkyoo" dadu nghoid da" Yabug gyid lang nghoid.

¹⁷Bidvang shoid mo nyangnu" mougmyid gi Yodan gyid lang ju" sho' gyi: wigi mougzhung: shoid Galile Thoem" mo zi mougpyi: shoid Thoem" Shid: ju" sho' yo' bidthu shoid moo Pisga boem khyid: ju" sho' gyoo: mo mougmyid nghoid da:.

¹⁸Hau: ayo, ri ngoo gi nyangnu" ri vhoo: mo pyeing: dang: joem ri byid: bye:. Ngoonu" ASEING Mangsoo gi Yodan gyid lang bidthu shoid mougmyid ri yhe: seing: yu wa shid re" nanu" ri byid: too" bye:. Akhid" re" da" gyi khaid bang: ri gyi jonu" joem nyheing byid: wigi nyangnu" mougmyid seing: yu wa ziri bo pang" wa shid re" Israela byu yi gootu: bang: shidkhoin" khyoo: Yodan gyid lang ri gu: dab yhi: nhang: we'.

¹⁹Nanu" da" yhoem: seing: myhi' yi zooshang: yi yo' yhoem: gougnyhoug joem kyeing" ngoo byid: da" voogung mo nyid theing: jo, kho' wa zi nghoid. Nanu" yhoem: gougnyhoug myoo: sho' yo" ziri ngoo se'.

²⁰ASEING gi he: joyoo mo nanu" shid re" koid bye: ziyo' dakhyo" ASEING wigi gootu: Israela byumyu" yiri byid: wa nghoid da" Yodan gyid lang bidvang shoid mougmyid ri yo" seing: yu lho: yug yoo tung" nyid nhang: da" ayo, ju" sho' pang" thoug we'. Hau: thang: nanu" gi nanu" shid re" ngoo byid: da" he: mougmyid khyoo: doem tau" loo wa zi nghoid› ein: pyeing: bye:.

²¹«Hau: thang: ngoo gi Yoshu ri ‹Nang gi nanu" ASEING Mangsoo hau: Sihon yo' Oga khokham eig tang: ri koid da" khyoo: dangain" ri myang abye:. Houg: yo' dayhang: ti" nyang: gi nanu" jhen" vang yhe: da" mougmyid seing: gootu: yugkhang" moo" ri we' dakhyo" za: koid loo wa.

²²Nyangnu" ri agyug goo". Ciwim gari nanu" ASEING Mangsoo gi nanu" shid re" gyi khaid byid: ri" wa zi nghoid› ein: pyeing: bye:.

²³«Hau: ayo, moo Ngoo gi

²⁴‹Yoem: moo" bo da" ASEING we"- nang gi gyi: sheung: da" apoem: ayang: yo' nang koid wa da" mau" pho" moo" zoo" ri za: ngoo ri ci: shug ziri ngoo si' bye:. Nang koid da" myhang: thang moo" zoo" joem ri yo" koid da" yu phara" mougkhung: yo' myidjang dang mo anyid nghoid da:.

²⁵ASEING we"- ngoo ri Yodan gyid lang ri gu: dab yhi: nhang: lho: thei: tab mo myid xu: ge: da" mougmyid yung" da" boem moug: Lebanon boem joem ri myang wa akhang" byid: la› ga: zug zug mho' nyid.

²⁶«Nghoid loug we' nanu" byu yi yoomo ASEING gi ngoo ri nheig yo: wigi atam" gyoo: byid: nghoid da:. Hau: gungthid nyang: gi ‹Gi" bye:- he: khyoo: ri adoem tid goo".

²⁷Pisga boem nyug khyoo: do, lo" wigi mougzhung: mougpyi: bid thu bidvang khyoo: lo" yu" kaid we'. Nang myang ziri nyheing" za: yu" we' ciwim gari: nang gi Yodan gyid lang ri khanham we' yo" gu: dab wa zi anghoid.

²⁸Yoshu ri pyeing: dang: byid: we'. Nya: myid phyed ziri yoem: bo nhang: we'. Ciwim gari nyang: gi nang myang da" mougmyid ri seing: yu wa shid re" shu" gu: dab yhe:loo" wa› ga: tid.

²⁹«Hougsu" yoomo ngoonu" gi Bethpeora voogung tu tab mo janggyoin: moo theing: nyid boem bye:.