Read Lashi TARHA" TID POIN" 30 Bible Online

TARHA" TID POIN" 30 - Lashi bible

TARHA" TID POIN" 30

¹«Akhid" ngoo nanu" ri mainkaid jeju" yo' nheing" khoin" ri khyen: yu wa shid re" byid: too" bye:. He: gu: dangain" nanu" moo bue" loo lang" nanu" gi nanu" ASEING Mangso wigi khaid sain" kaid da" mung" mo byumyu" yi agung moo ju" nyid da" uri ngoo nanu" ri byid: bye: da" khyen: yu wa ziri myid boin: loo goo" wa.

²Nanu" yo' nanu" amyed ashen yigi ASEING jhang khyoo: doem tau lo" wigi akhid" nyid" nanu" ri ngoo byid: da" nya: amyeing" dang: joem ri nanu" nheigloem: dangain" yo' tam" gyo: nyid nghoid rigi

³Nanu" ASEING Mangsoo gi nanu" adang moo nheig khyeug loo wa. Nyang: gi nanu" ri nyang: wigi khaid sain" kaid da" mungdain: joem mo doem shu" yu wigi nyang: nanu" ri dalheing: doem nyid gi yab ge ri" nhang: wa.

⁴Nanu" gi moug: gyab mo ve: thang da" ajhoin: khyoo: khaid sain" pyam zi shoug" sho' nghoid loug we' nanu" ASEING Mangsoo gi nanu" ri doem khe: zheing" yu lho: doem shu" tau" yu wa zi nghoid.

⁵Houg: lang" nanu" gi goonham' dalheing: re" phoug" phyid" yi nyid kho' da" mung" ri doem yo" seing: yu wa. Houg: lho: nyang: gi nanu" ri nanu" phoug" phyid" yi lhung yo" tho' je yoo" nhang: wigi je myo: lug nhang: wa.

⁶Nanu" ASEING Mangsoo gi nanu" yo' nanu" amyed ashen yiri se' tam" gyo: da" nheigloem: kaid byid: wa. Houg: lang" nanu" gi nanu" nheigloem: dangain" ziyo' nyang: ri jheddab lho: hau: mung" moo yo" xo' nyid loo wa.

⁷Nanu" ri ngheing" wigi doin: zeig zo: da" nanu" gyivoo yiri nyang: gi he: nheing" khoin" dangain" ri doem tau" zang" nhang: wa zi nghoid.

⁸Houg: lho: nanu" gi nyang: ri doem tam" gyo: cang yhe: wigi akhid" nyid" ngoo nanu" ri byid: nyid da" nya: amyeing" dang: dangain" ziri cang nyid wa zi nghoid.

⁹ASEING gi nanu" koid moo" dangain" moo oung: doid myo: lug nhang: wa. Nanu" gi zooshang: myoo: sho' yhoem: gougnyhoug myo: sho' yoo" wa. Nanu" shivoo: yoo joem gi gugshi" meishi" myoo" sho' thu wa. Nyang: gi nanu" phoug" phyid" yiri nyid gi yab gi nhang: da" uri yo' dakhyo" nanu" ri we' nyid gi yab gi nhang: lho: gau yi loo wa.

¹⁰Nghoid loug we' nanu" gi nyang: ri tam" gyo: cang yhe: wigi he: nya: jhau" shid dang: mougsoug" pug moo lhid" to" da" nya: tarha" dangain" ri cang ca" goo" wa. Nanu" gi nanu" emyed nheigloem: dangain" yo' nya: jang doem tau" loo ca" da:.

¹¹«Akhid" nyid" ngoo nanu" ri byid: nyid da" amyeing" dang: gi sung yau: zi anghoid. Nanu" amyhi: wa zi anghoid.

¹²Hau: zigi mougkhung: moo ju" zi anghoid. Nanu" gi ‹Hang" do, lo" wigi hau: ziri ngoonu" shau" gyo: wigi yo" tam" gyo: cang yhe: wa shid re" hang" lo" yo" yu gyoo" lo byid: wa lug la" ein: amyid: ca" goo" wa.

¹³Hau: zigi panglai: thu: tab shoid moo: jo, ziwe' anghoid. Nanu" gi ‹Panglai: thei: tab khyoo: hang" gu: yhe: wigi hau: ziri ngoonu" shau" gyo: wigi yo" tam" gyo: cang yhi: wa shid re" hang" yu loo byid: wa lug la" ein: amyed: ca" goo" wa.

¹⁴Hougsu" anghoid. Hau: zigi hid moo: nanu" yo' dage" jo, abye:. Nanu" gi hau: ziri se' wigi hau: ziri doem se' zhang tid ago". Houg: lho: akhid" hau: ziri tam" gyo: cang yhe: nyid ge'.

¹⁵«Akhid" nyid" ngoo nanu" ri ge ziyo' akhyeing" zi kangso' dei ziyo' shid: ziri khyen: yu wa khyoo: byid: too" bye:.

¹⁶Nanu" gi akhid" nyid" ngoo nanu" ri byid: da" nanu" ASEING Mangso da" amyeing" dang: ri nanu" tam" gyo: cang yhe: nghoid rigi nyang: ri nanu" jheddab nghoid rigi nyang: ri nanu" tam" gyo: nghoid rigi nya: tarha" dangain" ri cang nyid nghoid rigi nanu" gi nyid gi yab ge wigi byu myoo" sho' nghoid da" byumyu" damyu" bue" loo wa. Nanu" yhe: seing: yu wa za: danghoid lo: da" nanu" mung" moo nanu" ASEING Mangsoo gi nanu" ri mainkaid byid: loo wa.

¹⁷Nghoid loug we' nanu" wigi jidang: agyoo: wigi tam" gyoo: wa shid re" he: pyam lho: gootu: yu phara" joem shoid khyoo: no' wa shid re shu" yhe: lo" nghoid rigi

¹⁸nanu" gi phyo' shoin' pyam zi shoug" wa. Hid: moo ngoo nanu" ri akhid" tid poin" nyid bye:. Nanu" gi Yodan gyid lang thei: shoid mo nanu" yhe: seing: nyid wa za: danghoid lo: da" mung" moo myang" sho' ayo" dei nyid wa.

¹⁹Akhid" ngoo nanu" ri kangso' dei ziyo' shid: zi Mangso da" mainkaid jeju" yo' Mangso da" nheing" khoin" moo khyen: yu wa byid: too" bye:. Houg: lho: nanu" khyen: yu ziri sagse: bue" wa shid re" mougkhung: yo' myidjang ri ngoo yoid bye:. Kangso' ri khyen: yu ge'.

²⁰Nanu" ASEING Mangsoo ri jheddab ge' nyang: ri tam" gyoo: ge' nyang: ri jhug zug nyid ge'. Houg: lang" nanu" yo' nanu" amyed ashen yigi nanu" phoug" phyid" Abraham- Isag yo' Yaku bang: ri byid: wa ga: nyang: dangsoo" byid: to" da" mung" moo myang" sho' yo" nyid loo wa.