Read Lashi TARHA" TID POIN" 31 Bible Online

TARHA" TID POIN" 31 - Lashi bible

TARHA" TID POIN" 31

¹Moshe gi Israela byumyu" yiri dang: xo' tid.

²Nyang: gi «Akhid" nga" kangso' gi 120 zain nghoid bye: ziyo' nanu" da" vhujhung: ayo" bui" loo:. Hau: tho' agoo" ngoo gi Yodan gyid lang ri ayo" bo gu: phyid wa ga: ngoo ri ASEING wigi bain tid too" bye:.

³Nanu" shidkhoin" khyoo: nanu" ASEING Mangsoo nyang: yhe: lo" wigi houg: moo nyid da" byumyu" yiri phyo' shoin' pyam loo wa. Houg: lang" nanu" gi nyangnu" mung" ri yhe: yo" seing: yu wa zi nghoid. ASEING tid too" bye: ziyo' dayhang: ti" Yoshu gi nanu" da" vhujhung: bue" loo wa.

⁴ASEING gi Amori khokham yi nghoid da" Sihon yo' Oga ri oung: pyam wigi nyangnu" mung" ri phyo' shoin' pyam yhang: ti" nyang: gi hau: byumyu" yiri phyo' shoin' pyam wa zi nghoid.

⁵ASEING gi nanu" ri houg: bang: adang moo oung: pyam nhang: loo wa. Houg: lho: nanu" gi ngoo nanu" ri tid ziyo' dayhang: ti" toeb za: nyangnu" ri koid ca" goo" wa.

⁶Myid phyed wigi myid loem nyid ge'. Nyangnu" ri agyug goo". Nanu" ASEING Mangsoo nyang: nanu" yo' dage" nghoid nyid wa. Nyang: gi nanu" ri asoem" nhang: wa anghoid lang" ashe: pyam wa» ga: tid.

⁷«Hau: thang: Moshe gi Yoshu ri khe: yu wigi Israela byumyu" yi dangain" bang: shidkhoin" moo nyang: ri ‹Myid phyed wigi myid loem nyid we'. Nang gi he: byumyu" yiri ASEING wigi nyangnu" phoug" phyid" yiri dangsoo" byid: to" da" mung" khyoo: yhe: vang seing: nyid wa shid re" shu" yhi: wa yug nghoid da:.

⁸Nang ri ASEING nyang: vhu" she: wigi nang yo' dage" nghoid wa. Nyang: gi nang ri asoem" nhang: wa anghoid lang" ashe: pyam wa. Houg: yoomo nheigloem: athang- gyoug we' agyug» ga: tid.

⁹Houg: lho: Moshe gi Mangso da" tarha" ri lhid" wigi ASEING da" Dang: Theing Kuid: ri yu" zung" wa yoovoin bo da" Levi khainjung yi yo' Israela vhujhung: yiri byid: da:.

¹⁰Nyang: gi nyangnu" ri amyeing" byid: zigi «Nyhed zain thang khang" moo" jhen: phyed pyam da" zain nyid ju" lang" he: ziri pui" moo: thui: zeing yo' nghab ge'.

¹¹Israela byumyu" yi nanu" da" ASEING Mangsoo ri noku wa shid re" noku joyoo khyoo: re" boem da" uri nyangnu" ri hau: zi nghab kyoo" ge'.

¹²Yuggi- myiyi:- zooshang: yi yo' nanu" da" voogung joem moo nyid da" tungbau byu dangain" ri dage" za: khe: zheing" ge'. Houg: lang" yugkhang" moo" gi hau: ziri shau" gyo: wigi nanu" ASEING Mangsoo ri ngi: shab byid: wa yo' nya: da" jhau" shid dang: joem ri jhug zug tung" tam" gyoo: wa zi nghoid.

¹³Hid: su" khyo" wigi nanu" ASEING Mangso tarha" ri khanham we' ashau" gyo: yu" da" nanu" amyed ashen yigi hau: ziri shoug" gyoo: wa zi nghoid. Houg: lang" nyangnu" gi Yodan gyid lang thei: tab mo nanu" yhe: seing: yu wa za: danghoid lo: da" mung" moo nyangnu" dadei nyid nyid gi nyang: ri se' tam" gyo: cang yhe: ri" goo" wa» ga: amyeing" byid: bye:.

¹⁴Hau: thang: ASEING gi Moshe ri «Nang gi xo' lho: ayo" nyid loo wa. Yoshu ri khe: yu wigi nyang: ri Zoem" khyoo: shu" ri" we'. Houg: lang" ngoo nyang: ri jhau" shid byid: wa» ga: tid. Moshe yo' Yoshu gi zoem" khyoo: yhe: wigi

¹⁵ASEING gi hau: joyoo Zoem" khoem" bung nam moo jhoemmoug" zeing bung: khyo" nya: tang: ri thu shug bye:.

¹⁶ASEING gi Moshe ri «Nang gi amyang" ri shid: loo wa. Houg: lho: nang shid: byug thang: ri hau: byumyu" yigi ngoo ri zhug azug loo: bue" re" wigi ngoo nyangnu" yo' koid to" da" dang: theing ri phyo' pyam re" boem wa. Nyangnu" gi ngoo ri to" pyam wigi nyangnu" vang yhi: loo wa za: danghoid lo: da" mung" moo tungbau yu phara" joem ri no' goo" wa.

¹⁷Hau: zi bue" loo lang" nyangnu" ri ngoo nheig yo: loo wa. Ngoo gi nyangnu" ri she: pyam wigi nyangnu" gi joem: lo" boem wa. Nyangnu" adang moo gyoug pho" byo, yoin" khyoo: myoo" sho' ju" lo loo wa. Houg: lang" nyangnu" gi ngoo nyangnu" da" Mangsoo nyangnu" yo' anyid loo: yoomo he: joem bue" nyid ziri boin: so" re" boem goo" wa.

¹⁸Hau: uri nyangnu" ri ngoo abo pang" yu wa. Ciwim gari nyangnu" gi akhyeing" zi koid wigi gootu: yu phara" joem ri no' abye: goo".

¹⁹«Akhid" he: jikhoin" ri lhid" too" we'. Hau: ziri Israela byumyu" yiri jhau" byid: we'. Hougsu" lang" hau: zigi nyangnu" ri sagse: bue" jo, wa.

²⁰Nyangnu" da" phoug" phyid" yiri dangsoo" byid: too" bye: ziyo' dakhyoo" ti" ngoo nyangnu" ri mougmyid nu" da" mung" khyoo: shu" vang yhi: wa. Houg: moo nyangnu" gi nyangnu" vho: myhoo' zoo: noem yo" yu wigi nyangnu" gi myen myen za: yo" nyid boem goo" wa. Nghoid loug we' nyangnu" gi gooshoid khyoo: lheing: ve: lo" wigi gootu: yu phara" joem ri no' loo goo" wa. Nyangnu" gi ngoo ri ngeug he: pyam wigi nga" dang: theing ri phyo' shoin' pyam loo goo" wa.

²¹Houg: lho: gyoug pho" byo, yoin" khyoo: myoo" sho' nyangnu" adang moo ju" loo wa. Nghoid loug we' he: jikhoin" ri dakhoin" nyid shigoo" wa. Houg: lho: hau: zigi nyangnu" ri sagse: bue" jo, wa. Akhid" nghoid loug we' ngoo nyangnu" ri byid: wa ein: dangsoo" byid: to" da" mung" khyoo: ngoo ashu" vang loo" shi" ri nyangnu" cimyid nyid ziri ngoo se' nyid» ga: tid.

²²Moshe gi hau: nyid" ri nyang: jikhoin" ri lhid" wigi hau: ziri Israela byumyu" yiri jhau" byid: da:.

²³Hau: thang: ASEING gi Nun nya: yuggi zoo: Yoshu ri he: amyeing" dang: byid: bye:. Hau: zigi «Myid loem wigi myid phyed ci: we'. Nyang: gi Israela byumyu" yiri ngo wigi dangsoo" byid: to" da" mung" khyoo: shu" vang yhi: ca" wa. Houg: lho: ngoo gi nang yo' dage" nghoid nyid wa» ga: tid.

²⁴Moshe gi mougsoug" dapug moo daja: we' agyoo" loo: sho' zid" wigi Mangso tarha" ri lhid" to" da:.

²⁵Nyang: bain lhid" lang" nyang: gi ASEING da" Dang: Theing Kuid: ri yoovoin yu lhoug zung" da" Levi khainjung yiri.

²⁶«He: Mangso tarha" mougsoug" pug ri yu wigi nanu" ASEING Mangso da" Dang: Theing Kuid: ayam moo to" too" we'. Houg: lang" hau: ziri nya: byumyu" yi shid re" sagse: khyo" houg: moo deing jo, wa zi nghoid.

²⁷Nyangnu" khayhi' nheigloem: thain: ziyo' gyi koid wa ziri se'. Nyangnu" gi nga" apyaid moo ASEING ri gyi koid lo boem abye: go". Houg: lho: ngoo shid: thang: ri nyangnu" gi je wigi gyi koid loo goo" wa.

²⁸Nanu" byumyu" kung: mo vhujhung: yi yo' gyizoug: yi dangain" nga" shidkhoin" moo khe: zheing" too" we'. Houg: lang" ngoo nyangnu" ri hid: joem ri yo" tid kyoo" wa. Ngoo gi nyangnu" ri nga" sagse: khyo" mougkhung: yo' myidjang ri khi: wa.

²⁹Ngoo shid: thang: ri hau: byumyu" yigi akhyeing" ashoeb bue" re" wigi nyangnu" ri ngoo jhau" shid byid: too" bye: ziri ngeug he: pyam ri" goo" wa ziri ngoo se'. Houg: lho: ju" loo wa da" ayo, moo nyangnu" byo, yoin" lo" zi shau" boem wa. Ciwim gari nyangnu" gi akoid goo" ga: toem' to" da" ziri koid wigi ASEING ri nheig yoo: nhang: yoomo nghoid» ga: tid.

³⁰Hau: thang: Moshe gi Israela byumyu" yi dangain" tam" gyo: nyid uri jikhoin" bain sho' ri zhang: kyo" da:.