Read Lashi TARHA" TID POIN" 33 Bible Online

TARHA" TID POIN" 33 - Lashi bible

TARHA" TID POIN" 33

¹He: zigi Mangso da" byu Moshe- nyang: ashid: shi" ri Israela byumyu" yiri tid da" mainkaid dang: joem nghoid.

²ASEING gi Sina boem mo gyoo" loo bye:. Nyang: gi Edom atho' moo bid yhang: ti" thu wigi Nya: byumyu" yi atho' moo Paran boem mo zhoo: byid: da:. Moug: lagyoo: damoin gi nyang: yo' dage" nghoid nyid. Nya: lo, yo lo, moo nge" nyid da" myiyham: bo da:.

³ASEING gi nya: byumyu" yiri jheddab wigi nyang: wigi seing: da" bang: ri goem loem byid: nyid. Houg: yoomo ngoonu" gi nya: khyid: yang: moo goeb pid wigi nya: amyeing" dang: joem ri tam" gyo: cang yhe: nyid boem.

⁴Ngoonu" ri Moshe byid: to" da" tarha" ri ngoonu" tam" gyo: cang yhe: nyid. Hau zigi ngoonu" byumyu" da" phoug" thang da" jonu" nghoid da:.

⁵ASEING ri nya: da" byumyu" kung: yi yo' vhujhung: yi dage" zeing: foem: to" uri Nyang: gi nya: Israela byumyu" yi da" khokham bue" loo bye:.

⁶Moshe gi Ruben kung: yo' sen: wigi tid zigi ‹Ruben gi byu amyoo: nghoid loug we' khanham we' ashid: doem: goo" baja"» ga: zi nghoid.

⁷Nyang: gi Yuda kung: yo' sen: wigi tid zigi «ASEING we"- bo pang" wa shid re" nyangnu" yoid mho' nyid ziri tam" gyo: byid: la o". Nyangnu" ri gootu: kung: bang: yo' doem zheing" foem: byid: we'. ASEING we" nyangnu" shid re" zain: byid: we'. Houg: lho: nyangnu" da" gyivoo joem ri thougtheung wa shid re" nyangnu" ri bo pang" we'» ga: zi nghoid.

⁸Nyang: gi Levi kung: yo' sen: wigi «Nang- ASEING we"- re" myid vho: khyoo: ri Urim yo' Thumin khyo" jhug zug da" re" dei zoo: Levi yi khyo" ci: shug byid: we'. Nang gi nyangnu" ri Masa moo jham" ca: yu" abye: houg: lho: Meriba joyoo mo gyid moo nyangnu" yo' gyi koid goo" bye:.

⁹Nyangnu" gi nang ri myhi' phoo yi mang: nhung" yi yo' zoo: yi tho' je wigi dang: zung" khyoo: ri ci: shug byid: ago". Nyangnu" gi re" amyeing" dang: joem ri tam" gyo: ago" Houg: lho: re" dang: theing ri jhug zug nyid ago".

¹⁰Nyangnu" gi re" tarha" ri tam" gyoo: wa shid re" re" byumyu" yiri jhau" byid: loo goo" wa. Nyangnu" gi re" phoin: moo xoin" to' byid: loo goo" wa.

¹¹ASEING we"- nyangnu" byumyu" kung: yi yoem: bo loo wa shid re" pang" thoug byid: we'. Nyangnu" koid da" moo" joem moo vho: ngei byid: we'. Nyangnu" gyivoo dangain" ri mhoin' pyam byid: we'. Nyangnu" ri khanham we' adoem to' loo nhang: loo» ga: zi nghoid.

¹²Nyang: gi Benyamin kung: yo' sen: wigi tid zigi «He: byumyu" kung: gi ASEING jheddab wigi goem loem byid: da" akung: nghoid da:. Nyang: gi nyangnu" ri nyid" khang" nyid" lhoug zung" nyid. Houg: lho: nyang: gi nyangnu" phung: moo bo nyid nyid da» ga: zi nghoid.

¹³Nyang: gi Yoseb kung: yo' sen: wigi tid zigi «ASEING gi nyangnu" da" mung" ri moug: vo khyo" wigi we' houg: lho: myid khoug: mo gyid khyo" we' mainkaid byid: baja".

¹⁴Nyangnu" da" mung" gi bid wigi lhab' myheing da" shi" khyo" mainkaid byid: baja". Lhammoo" khyab khang" moo" moo ge thang da" shi" myoo" sho' zei: baja".

¹⁵Goonham' mo jo, da" nyangnu" da" bouggung joem moo ge thang da" shi" joem yo' byeung" baja".

¹⁶Nyangnu" da" mung" moo ge zi dangain" byeung" jo, baja". Myi: nge" nyid da" mhain" pung mo dang: ji thu kaid da" ASEING da" ge thang ziyo' mainkaid byid: baja". Yoseb kung: moo hau: mainkaid jeju" loo baja" Ciwim gari nyang: gi nya: mang: nhung" yi phung: moo vhujhung: nghoid da:.

¹⁷Yoseb gi nuloo: dadu: yhi' yoem: bo da:. Nyang: moo nulam" yhang: ti" khyau: joem yug da:. Nya: khyau: joem gi Manashe da" khyeing" khyeing" yo' Ephrim da" moin moin nghoid da:. Nyang: gi hau: khyau: joem yo' byumyu" yiri thung" ceig pyam da:. Houg: lho: nyangnu" ri mougmyid thang sho' khaid jhen" pyam da» ga: zi nghoid.

¹⁸Nyang: gi Zebulun kung: yo' Ishakha kung: yo' sen: wigi «Zebulun gi panglai: mo nyangnu" da" phaga moo" moo: myo: loo je: loo goo" baja". Ishakha gi yhoem: khoug: moo jonu" myo: lug je: be: loo baja".

¹⁹Nya: tang: gi tungbau byu yiri nya: tang: da" boem moo khe: yu wigi Houg: moo deingmain" da" xoin" joem shugbyid: ago". Nya: tang: gi nya: tang: da" jonu" ri panglai: yo' panglai: thoem" yam moo jo, da" midcoo: mo shoug" yu ago"» ga: zi nghoid.

²⁰Nyang: gi Gad kung: yo' sen: wigi «Nyangnu" da" mougmyid ri gyi: loo nhang: da" Mangsoo ri coung" ge'. Gad gi lo, sain: anghoid lang" vhu" gyab ri ngaid ceig zoo: wa lang" nyid da" khangkhyi yo' du da:.

²¹Nyangnu" gi nyangnu" shid re" ge thang da" mung" ri yu ago". Nyangnu" ri vhujhung: dayug da" gamboem ri gam byid: bye:. Israela vhujhung: yi yo' dage" za: phung: foem: nyid uri Nyangnu" gi ASEING da" amyeing" dang: joem yo' tarha" joem ri tam" gyo: abye: go".

²²Nyang: gi Dan akung: yo' sen wigi «Dan gi khangkhyi bam: nghoid da:. Nyang: gi Bashan mo byam thu lo" da» ga: zi nghoid.

²³Nyang: gi Naphtali akung: yo' sen: wigi «Naphtali gi ASEING da" ge da" jeju" yoomo myoo" sho' mainkaid byid: zi shau" da:. Nyangnu" mung" gi Galile thoem" mo zi mougpyi: shoid ju" sho' nghoid da» ga: zi nghoid.

²⁴Nyang: gi Ashera kung: yo' sen: wigi «Ashera gi gootu: kung: bang: tho' je" wigi mainkaid jeju" shoug" wa. Nyang: gi nya: mang: nhung" yi da" vho: ngei thang su: bui" baja". Houg: lho: nya: mougmyid gi zhainloin: gam myoo" sho' yug jo, baja".

²⁵Nya: da" voogung joem gi joto' khoem" moo" joem yo' goem loem byid: too" goo" baja" Houg: lho: nyang: gi khanham we' goem loem tung" yo" nyid baja"» ga: zi nghoid.

²⁶Israela byumyu" yi we" nanu" da" Mangsoo yo' du da" yu phara" anyid. Nyang: gi mougkhung: byeung" sho' da" younglho' gyi: sheung: jang" mo zhung: lid lo" da:. Nanu" ri pang" thoug yu wa shid re" jhoemmoug" thei" moo zhung: wigi re" da:.

²⁷Mangsoo gi khanham we' nanu" ri gyi khouggoo koid byid: su: nghoid. Nya: da" apyaid atoo: lo, sain: gi nanu" da" pang" thoug joyoo nghoid da:. Nanu" jhen" do, lo nyid uri nyang: gi nanu" da" gyivoo yiri khaid thu pyam byid: wigi nyangnu" dangain" ri phyo' shoin' pyam wa shid re" nanu" ri tid abye:.

²⁸Houg: yoomo Yaku amyed ashen yigi mougkhung: mo nghain: wigi myidjang ri jhu' nhang: da" joyoo Shivoo: yo' zabyid yhid: byeung" da" mougmyid moo goem loem za: yug yoo tung" nyid boem ago".

²⁹Israela we"- nanu" gi khayhi' pyo: nyid la". ASEING wigi khyoid yu shau" da" nanu" yhang: ti" byumyu" anyid goo" nghoid da:. ASEING nyang: nyang: nanu" ri gyi khouggoo koid byid: wigi oung: doid nhang: wa shid re" nanu" da" goo yo' shamcoin" bui" byid: nyid da:. Nanu" gyivoo joem gi nheig khyeug yu wa shid re" nanu" jhang re" mho' yoid loo goo" wa. Houg: lho: nanu" gi nyangnu" ri yo" nang: pye" pyam wa zi nghoid.