Read Lashi TARHA" TID POIN" 34 Bible Online

TARHA" TID POIN" 34 - Lashi bible

TARHA" TID POIN" 34

¹Moshe gi Moba jang: pa: mo Nebo boem khyoo: Yerikho mo bidthu shoid Pisga boem tho' khyoo do, lo" wigi hau: joyoo moo ASEING wigi nyang: ri hau: mung" dangain" ziri toin" shed bye:. Mougzhung: shoid Dan voogung moo ju" sho' da" Gilead mougmyid

²Naphtali mougmyid dangain" Ephrim yo' Manashe mougmyid- bidvang shoid Meing: gung panglai: moo ju" sho' da" Yuda mougmyid.

³Yuda mougpyi: shoid yo' Zora mo zi thab gam joem da" voomoo" Yerikho ju" sho' da" jang: pa: jang: dam joem ri toin" shed da:.

⁴Hau: thang: ASEING gi Moshe ri «He: zigi ngoo wigi Abraham- Isag yo' Yaku ri nyangnu" amyed ashen yiri byid: wa ein: dangsoo" to" da" mougmyid nghoid. Ngoo gi nang ri hau: ziri myang nhang: bye:. Nghoid loug we' nang ri houg: khyoo: ayhi: nhang: wa» ga: tid da:.

⁵Houg: yoomo ASEING dei zoo: Moshe gi ASEING wigi shid: wa ga: amyeing" byid: to" ziyo' dakhyo" hau: Moba moug: moo shid: loo" bye:.

⁶ASEING gi nyang: ri Bethpeora voogung mo tab cang" tab Moba janggyoin: moo myhoeb pyam da:. Nghoid loug we' akhid" nyid" ju" sho' nyang: ri myhoeb to" da" joyoo ri goolhoo: za: hang" asi' nghoid da:.

⁷Moshe nyang: shid: lo" da" uri dasho: eig xi: zain nghoid bye:. Nyang: gi goou" mo yhang: ti" yoem: bo wigi nya: myojid" yoem: we' gi shi" da:.

⁸Israela byumyu" yigi Moba janggyoin: moo nya: shid re" soem" xi: nyid" byeung" sho' kougshu: nyid ago".

⁹Nun da" yuggi zoo: Yoshu gi phajhi" yo' byeung" nyid da:. Ciwim gari Moshe gi nyang: ri moo" thid voin wa shid re" khyen: too" kho' su: nghoid da:. Israela byumyu" yigi Yoshu da" dang: ri tam" gyo: wigi ASEING wigi Moshe khyo" byid: to" da" amyeing" dang: joem ri cang nyid ago".

¹⁰Israela byumyu" moo Moshe yo' du da" lapi: khanham we' anyid yu" shi" nghoid da:. ASEING gi Moshe yo' myonhoo: yo' myonhoo: yu" go" to" lho: dang: tid go" da:.

¹¹Egutu khokham- nya: gyizoug: yi yo' damung" goin" bang: ri thougtheung wa khyo" ASEING nhang: kaid da" Moshe yhang: ti" mau" pho" alho: again- mau" pho" moo" zoo" joem yo' du ziri hang" lapi: dayug- khanham we' ayo" koid shug nghoid da:.

¹²Israela byumyu" yi dangain" bang: myang da" joyoo moo Moshe koid shug bye: da" gyi: sheung: ziyo' gyoug pho" moo" joem ri hang" lapi: dayug we' ayo" koid shug nghoid da:.