Read Lashi TARHA" TID POIN" 4 Bible Online

TARHA" TID POIN" 4 - Lashi bible

TARHA" TID POIN" 4

¹Hau: thang: Moshe gi byumyu" yiri «Ngoo nanu" ri jhau" byid: da" tarha" dangain" ri tam" gyo: cang yhe: nyid ge'. Houg: lang" nanu" phoug" phyid" yi da" ASEING Mangsoo nanu" ri byid: wa ga: da" mougmyid ri yhe: yo" seing: yu nyid wa zi nghoid.

²Ngoo nanu" ri amyeing" byid: to" jang" mo ce: daja: we' alung: goo". Ce: daja: ri we' ayu pyam goo". Ngoo nanu" ri byid: bye: da" nanu" ASEING Mangso amyeing" dang: ri tam" gyo: cang yhe: nyid ge'.

³Poera boem moo ASEING koid bye: da" lo, moo" ri nanu" nyang: myang: abye: go". Bala ri no' bang: yugkhang" moo" ri houg: moo nyang: said toem' pyam bye:.

⁴Nghoid loug we' nanu" ASEING Mangsoo ri dang: zung" nyid da" mo, nanu" gi akhid" nyid" ju" sho' dei nyid boem ashi".

⁵«Nga" ASEING Mangsoo ngoo ri koid wa tid to" ziyo' dakhyo" ngoo gi tarha" dangain" nanu" ri jhau" byid: bye:. Nanu" jhen" vang yhe: wigi yhe: nyid loo: wa za: danghoid lo: da" mung" moo: hau: joem ri tam" gyo: cang yhe: nyid ge'.

⁶Hau: dang: joem ri jhug zug za: tam" gyo: cang yhe: nyid ge'. He: zigi nanu" khayhi' phajhi" boo mo, nghoid da" khyoo: ri gootu: byumyu" yiri ci: shug wa zi nghoid. Nyangnu" he: tarha" dangain" ri shoug" gyoo: lang" nyangnu" gi ‹He: gye gyi: myhang: da" byumyu" gi phajhi" yo' lasi laleug gye" boo mo, nghoid goo" nhung:› ga: tid boem wa.

⁷Khayhi' gyi: myhang: da" byumyu" nghoid ri nghoid ngoonu" ASEING Mangsoo ngoonu" ri koid yhang: ti" nyangnu" nyang: ri ca" uri gye" jhang da" yu phara" ayo" bui" nghoid da:. ASEING gi ngoonu" pang" thoug wa shid re" mho' yoid khang" moo" nyang: tam" gyoo: byid: da:.

⁸Khayhi' gyi: myhang: da" byumyu" nghoid ri nghoid kha: ja: byumyu" we' akhid" nyid" ngoo nanu" ri jhau" byid: da" tarha" joem yo' dakhyo" gye" deungmain" da" tarha" ayoo" goo" nghoid da:.

⁹Nanu" nya: myojid" yo' myang bye: ziri nanu" dei nyid da" ayo, gu: moo ato" myhid pyam loo: lhid zid" lho: xoem" too" ge'. Sina boem moo nanu" ASEING Mangso shidkhoin" moo nanu" yab jo, boem da" bidnyid moo nyang: ngoo ri tid da" khyoo: ri nanu" nya: zoo: yi yo' nanu" nya: myid: yiri tid kyoo" ge'. Houg: dang: gi ‹Byumyu" yiri zheing" foem: too" ge'. Ngoo gi ngoo tid da" dang: nyangnu" ri gyoo: nhang: nau. Hougsu" nghoid ri nyangnu" gi nyangnu" dei nyid da" ayo, goin" moo nga" dang: ri se' tam" gyoo: wa shid re" nyangnu" jhau" yu go" wa ziyo' nyangnu" da" zoo: yiri we' dayhang: ti" za: yo" jhau" byid: wa zi nghoid› ga: tid da:.

¹⁰

¹¹«Teing: teing: no, ziyo' thu: da" jhoemmoug" pung nghoeb to" lho: mougkhung: mo myi: yi yi bang nyid da" boem khyid: khyoo: nanu" khasu" yhe: yab jo, go" da" khyoo: ri nanu" nya: zoo: yiri tid kyoo" ge'.

¹²ASEING gi myikhoug" mo nanu" ri khasu" dang: tid ziyo' nyang: ri cite" alhoo: khyo" we' azang" myang nghoid loug we' nyang: tid da" dang: thui: ri nanu" khasu" shau" gyo: da" khyoo: nyangnu" ri tid kyoo" ge'.

¹³Nyang: gi nanu" ri nyang: yo' koid to" da" dang: theing ri khasu" tam" gyo: yhi: wa khyoo: ri tid too" bye:. Hau: lug pyi" eig pyi" adang moo nyang: lhid" to" da" Dang: theing khoin" daxi: ri nanu" tam" gyo: cang yhi: ca" ago".

¹⁴ASEING gi ngoo ri jhen" vang yhe: wigi yhe: seing: yu wa zi za: danghoid lo: da" mung" moo nanu" yhe: tam" gyo: cang yhe: nyid wa nghoid da" tarha" dangain" ri nanu" ri jhau" shid byid: wa shid re" ngoo ri tid too" bye:.

¹⁵«Nanu" moo: akyu" bo wa shid re" he: khyoo: ri zid" ge'. ASEING gi Sina boem dang moo myi: khyo" nanu" ri dang: tid uri cite" alhoo: we' nanu" amyang nghoid da:.

¹⁶Houg: yoomo Yuggi lhoo: myiyi: lhoo: gougnyhoug lhoo: ngho' lhoo: do: yen" ja: da" lhoo: yo' wimdo, lhoo: joem nanu" nya: shid re" soolhoo: daja: ja: koid wigi yooboo ashoid goo".

¹⁷

¹⁸

¹⁹Mougkhung: mo nanu" myang boem da" bid- lhammoo"- kyi: joem ri no' lho: coung" byid: wa jhu' phyo' zi ashoug" nhang: goo". Gootu: byumyu" yigi hau: ziri no' wa shid re" nanu" ASEING Mangsoo gi hau: joem ri byid: too" bye:.

²⁰Nghoid loug we' nanu" gi myikhyoem' yhang: ti" da" Egutu mo nyang: khyoid yu da" byumyu" yi nghoid. Akhid" nyid" nanu" nghoid nyid ziyo' dakhyo" nya: byumyu" koid yu wa shid re" nyang: gi nanu" ri shu" thu lo zi nghoid.

²¹Nanu" da" gang mo nanu" ASEING Mangsoo gi ngoo ri nheig yo: wigi nyang: nanu" ri byid: wa nghoid da" mougmyid nu" da" mung" khyoo: vang yhi: wa Yodan gyid lang ri ngoo ayo" gu: dab yhi: wa ga: ziri nyang: no, mo tid too" bye:.

²²Ngoo gi he: mung" moo shid: wigi gyid lang ri khanham we' ashau" gu: wa. Nghoid loug we nanu" gi gu: dab yhe: lho: hau: mougmyid nu" da" mung" ri yhe: seing: nyid wa nghoid abye: go".

²³Nanu" ASEING Mangsoo yo' nanu" koid to" da" dang: theing ri ato" myid wa ziri boin: nyid ge'. Nanu" nya: shid re" soolhoo: daja: ja: ri akoid wa shid re" nya: amyeing" dang: ri cang ge'.

²⁴Ciwim gari nanu" ASEING Mangsoo gi myiyham: dab da" myi: yo' du da:. Nyang: gi gyivoo yiri ayo" zeing: kham: nghoid da:.

²⁵«Nanu" hau: mung" moo myang" sho' yhe: nyid boem lang" zoo: du yi yo' myid: zoo: yi myoo" sho' nghoid loug nanu" nya: shid re" soolhoo: daja: ja: koid wigi yooboo ashoid goo". He: zigi ASEING shidkhoin" moo akhyeing" zi nghoid da:. Houg: lho: hau: zigi nyang: ri nheig yoo: nhang: loo wa.

²⁶Nanu" nga" amyeing" dang: ri atam" gyoo: goo" nghoid rigi nanu" hau: mung" moo amyang ” ri bei: lo" boem goo" wa ein: akhid" nyid" nanu" shid moo sagse: khyo" wigi ngoo gi mougkhung: yo' myidjang ri khe: wigi tid bye:. Yodan gyid lang ri gu: dab wigi nanu" yhe: seing: yu wa da" mung" moo nanu" gye" myang" sho' anyid boem goo" wa. Nanu" gi bain sho' said toem" pyam zi shau" boem wa zi nghoid.

²⁷ASEING gi gootu: byumyu" phung: moo nanu" ri nyhid: sain" kaid lho: nanu" mo dajhi' za: danyid deing loo wa zi nghoid.

²⁸Houg: moo nanu" gi byu lo, wigi koid to" da" ayo" myang ashau" gyoo: ase' zoo: ase' nam da" seig- lugzeing yu phara" joem ri coung" byid: loo goo" wa.

²⁹Houg: moo nanu" gi nanu" ASEING Mangsoo ri sho: re" boem wa. Nanu" gi nyang: ri nanu" oung: khoug: nheigloem: dangain" ziyo' sho: nghoid rigi nanu" nyang: ri myang boem wa.

³⁰Nanu" yau: khe" kyi" khyeug shoug" lho: hau: gu: dangain" nanu" moo bui" lang" nanu" gi lo" thang moo ASEING jhang phug lo wigi nyang: ri tam" gyo: nyid boem wa nghoid.

³¹Nyang: gi nheig khyeug myid bo da" Mangsoo nghoid. Nyang: gi nanu" ri ashe: pyam wa. Said we' asaid toem" pyam wa. Nyang: gi nanu" phoug" phyid" yo' koid to" da" dang: theing ri ato" myid wa.

³²«Nanu" akhu: shi" lid lo da" ayo, mougmyid dang moo Mangsoo byu ri phain" so: ayo, dangain" ri joeb ca: yu" we'. Mougmyid gyab goin" ziri joeb ca: yu" ge'. Hid: yhi' gyi: sheung: da" moo"- shid phyang" bui" yu" bye: go" rhe". Hid: yo' du ziri hang" gyo: yu" bye: go" lha".

³³Nanu" yo' dakhyo" byu yigi myi: khoug: mo yu phara" dang: ji ziri shau" gyo: thang: ri kangso' dei nyid da" byu yi nyid yu" go" lha".

³⁴Nanu" ASEING Mangsoo gi Egutu mung" moo nanu" ri koid ziyo' dakhyo" gootu: mung" mo byumyu" yiri yhe: voem" shu" yu wigi nyangnu" ri nya: byumyu" koid yu yu" da" gootu: yu phara" nyid go" la". Nanu" myojid" vhoo: moo ASEING nya: yoem: so' moo" yo' yoem: vhoo" ri ci: shug bye:. Nyang: gi lang: yoem" no yo' gyi zain: pui" ri bui" nhang: lho: mau" pho" alhoo: yo' mau" pho" lo, moo" koid wigi gyoug dain ja: ri bui" nhang: bye:.

³⁵Nyang: dayug kyeing" Mangsoo nghoid lho: gootu: hang" anyid loo: nghoid ziri nanu" ri sagse: ci: shug wa shid re" ASEING gi he: ziri nanu" ri ci: shug bye: zi nghoid.

³⁶Nyang: nanu" ri pyeing: dang: yo" tid wa shid re" mougkhung: mo nya: thui: ri nanu" ri shoug" gyoo: nhang: bye:. Houg: lho: he: myidgung moo nya: gyeung" shang: myi: ri nanu" ri myang nhang: wigi houg: mo wigi nanu" ri dang: ji bye:.

³⁷Nyang: gi nanu" phoug" phyid" ri jheddab yoomo nyang: nanu" ri khyen: yu wigi nya: yoem: so' moo" yo' nya: gung nyang: nanu" ri Egutu mung" mo shu" thu loo bye:.

³⁸Nanu" shid khyoo: yhe: lo" boem nyid uri nyangnu" mung" khyoo: shu" vang yhe: lho: nanu" ri byid: wa shid re" nanu" tho' je gyi: je yoem: bo da" byumyu" yiri khaid thu pyam bye:. Houg: mougmyid ri akhid" ju" sho' nanu" seing: nyid shi" da:.

³⁹Hougsu" yoomo ASEING gi mougkhung: yo' myidjang mo Mangsoo nghoid ziri akhid" nyid" myid boin: ge'. Khanham we' ato" myid goo". Mangso gootu: anyid loo.

⁴⁰Akhid" nyid" ngoo nanu" ri byid: da" nya: tarha" dangain" ri cang nyid ge'. Nanu" yo' nanu" amyed ashen yi dangain" nyid gi yab ge loo goo" wa. Nanu" ASEING Mangsoo wigi dapyaid shid re" nanu" ri byid: wa nghoid da" mungdain: moo nanu" xo' lho: yo" nyid boem goo" wa.

⁴¹Hau: thang: Moshe gi Yodan gyid lang bidthu shoid moo voomoo" soem" loem ri de: too" bye:.

⁴²Byu dayug yug gi nya: gyivoo anghoid da" byu dayug yug ri pa: yhi: akoid loo: za: said pyam nghoid rigi phang: loid yhe: wigi houg: moo goug: nyu: tung" yhe: yo" nyid wa shid re" nghoid. Nyang: gi hau: voomoo" joem mo daloem: loem: khyoo: yo" yhe: phang: loid khau: nyid wigi nyang: ri ayo" said pyam wa nghoid.

⁴³Ruben byumyu" kung: yi shid re" dain" pyoid yoo bouggung moo jo, da" Bezera voomoo"- Gad byumyu" kung: yi shid re" Gilead moug: moo jo, da" Ramod voomoo"- Manashe byumyu" kung: yi shid re" Bashan moug: moo jo, da" Golan voomoo" joem nghoid ago".

⁴⁴Moshe gi Mangso tarha" ri byid: lho: Israela byumyu" yiri jhau" shid byid: bye:.

⁴⁵Hau: zigi nyangnu" Egutu mung" mo phang: thu lo thang: Bethpeora voogung thei: tab Yodan gyid lang bidthu shoid mo lang: khung" moo nyid boem uri nyang: gi he: tarha" joem ri byid: da:. He: zigi Heshbon voogung ri vhoebkhang" da" Amori khokham Sihon seing: da" mougmyid moo jo, da:. Moshe yo' Israela byumyu" yigi Egutu mung" mo thu lo boem da" uri nyang: ri gyi khaid oung: pyam boem.

⁴⁶

⁴⁷Nyangnu" gi nya: mougmyid yo' Yodan gyid lang bidthu shoid moo nyid da" Amori khokham gootu: dayug nghoid da" Bashan khokham Oga da" mougmyid ri seing: yu ago".

⁴⁸He: mougmyid gi Arnon gyid lang ayam mo jo, da" Aroera voogung mo zi mougzhung: shoid Hermon boem ga: da" Sirion boem khyoo: ju" sho' nghoid da:.

⁴⁹Hau: zigi Yodan gyid lang bidthu shoid mougmyid dangain"- mougpyi: shoid Thoem" Shid: ju" sho' bidthu shoid khyoo: Pisga boem khyid: ju" sho' we' bo nyid da:.