Read Lashi TARHA" TID POIN" 5 Bible Online

TARHA" TID POIN" 5 - Lashi bible

TARHA" TID POIN" 5

¹Moshe gi Israela byumyu" yi dangain" ri dage" khe: zheing" yu lho: nyangnu" ri «Israela byumyu" yi we"- akhid" nyid" ngoo nanu" ri byid: wa da" tarha" joem dangain" ri tam" gyoo: ge'. Hau: joem ri jhoug" yu wigi hau: joem ri gyeing" nyang: tam" gyo: cang yhe: nyid ge'.

²Sina boem moo ngoonu" ASEING Mangsoo koid to" da" dang: theing gi

³ngoonu" nya: phoo yi yo' za: anghoid akhid nyid" dei nyid shi" da" ngoonu" dangain" bang: yo' koid to" zi nghoid.

⁴Hau: boem tho' moo ASEING gi myi: khoug: mo myonhoo: shu: go" to" lho: nanu" yo' dang: ji goo" bye:.

⁵Hau: ayo, moo nyang: tid da" dang: ri nanu" ri tid kyoo" wa shid re" ngoo gi nanu" yo' ASEING agyoo: moo yab jo, bye:. Ciwim gari nanu" gi myi: ri gyoug lho: boem khyoo: ado, loo" nghoid ago". «ASEING tid zigi

⁶‹Ngoo gi nanu" join bue" lid lo da" Egutu mung" mo nanu" ri khyoid yu da" su: nanu" ASEING Mangsoo nghoid.

⁷«‹Ngoo mo lid gootu: yu phara" ri ano' goo".

⁸Nanu" shid re" mougkhung: mo mougmyid mo gyid khoug: mo ce: ja: soolhoo: ri we' akoid goo".

⁹Ce: ja: soolhoo: ri we' agoeb pid ano' goo". Ciwim gari ngoo gi nanu" ASEING Mangsoo nghoid. Ngoo gi mi shi' bang: hang" ri we' ayo" zeing: kham: nghoid da:. Ngoo gi ngoo ri ngheing" da" bang: ri yooboo dam byid: wigi nyangnu" amyed ashen yiri we' soem" xeig myid: xeig ju" sho' yooboo dam byid: wa.

¹⁰Nghoid loug we' ngoo ri jheddab wigi nga" tarha" joem ri tam" gyo: cang yhi: bang: adang moo byuxeig khyeing" moin ju" sho' jheddab myid ri ngoo ci: shug wa.

¹¹Nga" myeing ri akhyeing" ashoeb da" khyo" aci: goo". Ciwim gari ngoo nanu" ASEING Mangsoo gi nga" myeing ri anghoid aeung: khyo" ci: da" yug hang" ri we' yooboo dam byid: wa.

¹²«Ngoo nanu" ASEING Mangsoo gi nanu" ri amyeing" byid: bye: ziyo' dayhang: ti" ‹Dougno: Bidnyid" ri phau" myang: wigi hau: ziri younglho' nhang: nyid ge'.

¹³Nanu" moo" zei: wa shid re" bidnyid khyug nyid" nanu" yo" ago".

¹⁴Nghoid loug we' nyhed nyid" ein: nyid" gi ngoo ri shugbyid: to" da" Dougno: Bidnyid nghoid. Hau: bidnyid moo hang" we' moo" ayo" zei: wa. Nanu" we' nanu" nya: zoo: yi we' nanu" join yi we' nanu" gougnyhoug joem we' nanu" mungdain: moo nyid boem da" tungbau yi we' moo" azei: goo". Nanu" koid ziyo' dakhyo" nanu" join yi we' Dougnoo: ca" da:.

¹⁵Egutu mung" moo nanu" join bue" nyid wigi nanu" ASEING Mangsoo ngoo gi nga" yoem: so' moo" yo' yoem: zeing khyo" nanu" ri khyoid yu da" khyoo: ri myid boin: ge'. He: khyo: gang mo Dougno: Bidnyid ri phau" myang: ge' ein: nanu" ri ngoo amyeing" byid: zi nghoid.

¹⁶«‹Nanu" ASEING Mangsoo ngoo nanu" ri amyeing" byid: to" ziyo' dakhyo" nanu" nya: phoo yo' nanu" nya: myhi' ri phau" myang: ge'. Houg: lang" nanu" nyid gi yab ge lho: ngoo nanu" ri byid: wa nghoid da" mung" moo kang: sheing: sho' shoug" nyid boem wa.

¹⁷«‹Byu asaid goo".

¹⁸«‹Myi: lhoid lang alhoid goo".

¹⁹«‹Akhoug" goo".

²⁰«‹Hang" ri we' adeing amain" khyo" sagse: akham:.

²¹«‹Goo" yug yhoem: seing: myhi' ri ayu" vhoo: goo". Nya: yhoem:- nya: mougmyid- nya: join yi nya: nu: joem nya: loo zei: joem nyang: seing: da" ciri we' ayu" vhoo: goo".

²²«He: zigi nanu" boem moo zeing: foem: nyid uri nanu" dangain" bang: ri ASEING byid: da" Dang: theing khoin" joem nghoid da:. Nyang: gi jhoemmoug" pung khoug: myi: mo thui: moo" yo' nyang: dang: ji uri nyang: he: Dang: theing khoin" joem ri byid: bye:. Gootu: aboo nghoid da:. Hau: thang: nyang: gi hau: joem ri lug pyi" eig loem: adang moo lhid" wigi hau: joem ngoo ri byid: bye:.

²³«Da boem goin" myi: nge" lho: moug: coid khoug: mo thui: nanu" shoug" gyoo: lang" nanu" vhujhung: yi yo' nanu" da" byumyu" kung: yi mo nheigboo yi nga" jhang khyoo: re" wigi

²⁴tid boem zigi ‹Ngoonu" ri myi: mo nyang: dang: ji ziri shau" gyo: uri ASEING Mangsoo gi ngoonu" ri nya: gyi: myhang: khyoo: yo' phung" yoeb ri ci: shug bye:. Mangso nyang: ri dang: ji bye: nghoid loug byu gi xo' lho: kangso' yo" dei nyid da" khyoo: ri akhid" nyid" ngoonu" yo" myang yu bye:.

²⁵Nghoid loug we' shid: lo" ja: ngoonu" ciwim doem koid wa la". Hau: yu" gyoug tung" da" myi: gi ngoonu" ri nge" pyam wa nghoid. Ngoonu" ASEING Mangsoo dang: doem ji ziri shau" gyo: nghoid rigi ngoonu" gyeing" nyang: shid: wa zi nghoid.

²⁶Kangso' dei Mangsoo gi myi: khoug: mo dang: ji ziri shau" gyo: thang: ri byu yugkhang" moo" gi kangso' yo" dei wa la".

²⁷Moshe we"- doem tau" yhe: wigi ngoonu" ASEING Mangsoo tid da" ja: khang" moo" ri yhe: tam" gyoo: we'. Hau: thang: doem tau" lo wigi nyang: nang ri citid ein: ziri ngoonu" ri lo doem tid kyoo" we'. Ngoonu" gi tam" gyo: wigi cang yhi: wa› ga: tid ago".

²⁸«Hau: ziri ASEING shoug" gyoo: lang" nyang: ngoo ri ‹He: byumyu" yi tid ziri ngoo shoug" gyoo: bye:. Nyangnu" jo da:.

²⁹Nyangnu" khanham we' hid: su" kyeing" za: bui" nyid goo" baja". Nyangnu" khanham we' ngoo ri phau" myang: wigi nga" amyeing" dang: dangain" ri tam" gyo: cang yhe: nghoid rigi ja: khang" moo" moo apyaid atoo: nyangnu" yo' nyangnu" amyed ashen yi nyid gi yab gi wa zi nghoid.

³⁰Yhe: lho: nyangnu" ri nyangnu" dab joem khyoo: lo" wa shid re" tid kyoo" we'.

³¹Nghoid loug we' Moshe- nang hid: moo ngoo yo' dage" theing: nyid shi" we'. Ngoo gi nang ri nga" tarha" yo' amyeing" dang: joem dangain" ri byid: wa nghoid. Hau: joem ri byumyu" yiri jhau" byid: we'. Hougsu" nghoid ri nyangnu" ri byid: wa da" mungdain: moo hau: joem ri nyangnu" tam" gyo: cang yhi: wa zi nghoid.

³²Moshe gi byumyu" yiri «Israela byumyu" yi we"- nanu" ASEING Mangsoo wigi nanu" ri amyeing" byid: bye: da" ja: khang" moo" ri nanu" gyeing" nyang: koid nyid ge'. Nya: tarha" daja: ja: ri we' atam" gyoo: akoid goo".

³³Hau: joem dangain" ri tam" gyo: nyid ge'. Hougsu" nghoid rigi ja: khang" moo" moo nanu" nyid gi yab gi wa nghoid. Nanu" yhe: seing: yu wa da" mungdain: moo nanu" xo' wigi kangso' yo" dei nyid wa zi nghoid.