Read Lashi TARHA" TID POIN" 6 Bible Online

TARHA" TID POIN" 6 - Lashi bible

TARHA" TID POIN" 6

¹«Hid: joem gi nanu" ri jhau" byid: wa shid re" nanu" ASEING Mangsoo wigi ngoo ri amyeing" byid: da" tarha" dangain" nghoid da:. Hid: joem ri nanu" vang yhe: wigi seing: yu wa za: danghoid lo: da" mung" moo yhe: tam" gyo: cang yhe: nyid ge'.

²Nanu" kangso' dei nyid myhang nanu" yo' nanu" amyed ashen yigi nanu" ASEING Mangsoo ri ngi: shab byid: lho: ngoo nanu" ri byid: nyid da" nya: tarha" dangain" ri tam" gyo: cang yhe: nyid ge'. Houg: lang" nanu" gi hau: mung" moo apyaid sheing: sho' dei nyid boem wa.

³Hau: joem ri tam" gyo: nyid ge'. Israela byumyu" yi we"- Hau: joem ri cang yhe: nyid ge'. Houg: lang" nanu" dangain" nyid gi yab gi loo wa. Ngoonu" phoug" phyid" da" ASEING Mangsoo dangsoo" byid: too" bye: ziyo' dakhyo" nanu" gi byumyu" zeing bue" lo lho: hau: mougmyid nu" da" mung" moo shoug" nyid boem wa.

⁴Israela byumyu" yi we"- he: ziri boin: so" nyid ge'. ASEING za: nyha" Mangsoo nghoid.

⁵Nanu" ASEING Mangsoo ri nanu" emyed nheigloem: dangain" yo' nanu" ung: khau: soozoo: dangain" yo' nanu" yoem: so' dangain" yo' jheddab nyid ge'.

⁶Ngoo nanu" ri akhid" nyid" byid: nyid da" he: amyeing" dang: joem ri khanham we' ato" myhed goo".

⁷Nanu" zoo: yiri hid: joem ri jhau" byid: ge'. Nanu" yhoem: moo we' nanu" gyung: khyoo: moo we' nanu" theing: nyid uri we' nanu" moo" zei: nyid uri we' hau: joem ri pug loo: pug jhau" byid: nyid ge'.

⁸Hau: joem ri nanu" lo, joem moo tei" tab ci: ge'. Hau: joem ri boin: nhang: da" zi khyo" nanu" ngilang: moo tab ci: ge'.

⁹Hau: joem ri nanu" da" yhoem: khoem" bung yo' khyam: khoem" atho' moo lhid" too" ge'.

¹⁰«Nanu" da" ASEING Mangsoo nanu" phoug" phyid" yi nghoid da" Abraham- Isag yo' Yaku bang: ri dangsoo" byid: to" ziyo' dakhyo" nyang: gi nanu" ade: to" da" gyi: wigi ziyoo bo da" voomoo" joem yo' dage" mungdain: ri byid: wa zi nghoid.

¹¹Yhoem: joem gi nanu" ayung: to" da" jonu" gi joem yo' byeung" shoin: loo" wa. Houg: moo nanu" adu: da" gyid thung" joem jo, wa. Nanu" asho" da" zabyid khyam: yo' zhainloin: khyam: joem: jo, wa. ASEING gi nanu" ri hau: mung" khyoo: shu" vang yhe: wigi nanu" vho: ja: dangain" nanu" shoug" zoo: lang"

¹²nanu" join bue" nyid lo da" Egutu mung" mo nanu" ri khyoid yu da" ASEING ri ato" myhed wa shid re" lhid' nyid ge'.

¹³Nanu" ASEING Mangsoo ri gyoug phau" myang: lho: ngi: shab nyid ge'. Nyang: ri kyeing" noku ge'. Nya: myeing ri kyeing" lang: wigi dangsoo" koid ge'.

¹⁴Gootu: yu phara" joem ri a no' goo". Nanu" aqei: ayam moo nyid da" byumyu" yi yu phara" joem ri we' ano' goo".

¹⁵Nanu" gootu: yu phara" ri no' nghoid rigi ASEING da" nheig yo: zigi nanu" ti thougtheung wa shid re" myi: yhang: ti" ri" wa nghoid lho: nanu" ri bain sho' said toem" pyam wa nghoid. Ciwim gari nanu" yo' dage" nyid da" nanu" ASEING Mangsoo gi nyang: ri: mi shi' bang: ri ayo" zeing: kham: nghoid da:.

¹⁶Nanu" Masa joyoo moo koid bye: ziyo' dakhyo" nanu" ASEING Mangsoo ri ajham" yu" goo".

¹⁷Nyang: nanu" ri byid: to" da" tarha" dangain" ziri tam" gyo: cang yhi: wa shid re" boin: nyid ge'.

¹⁸ASEING tid da" jo ziyo' ge ziri koid nyid ge'. Nanu" dangain" nyid gi yab ge lo boem wa. Nanu" da" phoug" phyid" yiri ASEING dangsoo" byid: to" da" mougmyid nu" da" mung" ri nanu" shoug" seing: yu wa zi nghoid.

¹⁹Nyang: dangsoo" byid: to" ziyo' dakhyo" nanu" gi nanu" da" gyivoo yiri yo" khaid thu pyam wa zi nghoid.

²⁰Thang: phyang" nanu" zoo: yigi nanu" ri «Ngoonu" ASEING Mangsoo gi he: tarha" dangain" ri tam" gyo: nyid wa shid re" ciwim yoomo ngoonu" ri amyeing" byid: to" la"» ga: myid: wa zi nghoid.

²¹Houg: lang" nyangnu" ri Ngoonu" gi ‹Egutu khokham da" join yi bue" bye: wigi ASEING gi ngoonu" ri nya: yoem: so' moo" yo' khyoid yu bye:.

²²Egutu byu yiri we' nyangnu" khokham ri we' nya: da" gyizoug: yiri we' mau" pho" moo" alhoo: again yo' gyoug dain ja: moo" koid shug ziri ngoonu" da" myojid" yo' nyang: myang: lo boem bye:.

²³Nyang: gi nyang: koid wa ga: nyha" phoug" phyid" yiri dang: soo" byid: to" ziyo' dayhang: ti" ngoonu" ri hid: khyoo: shu" lo lho: he: mungdain: ri byid: wa shid re" nyang: ngoonu" ri Egutu mo loid byoin loo nhang: bye:.

²⁴Hau: thang: ngoonu" ASEING Mangsoo gi he: tarha" dangain" ziri tam" gyo: wa shid re" yo' nyang: ri ngi: shab byid: wa shid re" ngoonu" ri amyeing" byid: too" bye:. Ngoonu" cang koid nghoid rigi nyang: gi ngoonu" byumyu" yiri khanham we' lhoug zung" byid: lho: nyid gi yab ge nhang: wa zi nghoid.

²⁵Ngoonu" gi Mangso wigi ngoonu" ri amyeing" byid: to" zi ja: khang" moo" ri jhug zug za: tam" gyo: nyid nghoid rigi nyang: ngoonu" ri vho: ngei loo wa zi nghoid› ein: tid kyoo" we'.