Read Lashi TARHA" TID POIN" 7 Bible Online

TARHA" TID POIN" 7 - Lashi bible

TARHA" TID POIN" 7

¹Nanu" ASEING Mangsoo gi nanu" yhe: nyid seing: yu wa nghoid da" mungdain: khyoo: nanu" ri shu" vang yhe: wigi nyang: gi byumyu" myoo: sho' ri houg: mo khaid thu pyam byid: loo wa. Nanu" shid vhu" khyoo: jhen" yhe: lo" uri nanu" tho' je myo: lho: yoem: je bo da" Hiti- Girgashi- Amori- Khanan- Perizi- Hivi- Yebusi ga: da" byumyu" nyhed myu" ri nyang: khaid thu pyam wa zi nghoid.

²Nanu" ASEING Mangsoo gi nyangnu" ri nanu" lo, khoug: moo to" wigi nanu" gi nyangnu" ri oung: pyam lang" nanu" gi nyangnu" ri dangain" said pyam ca" wa. Nyangnu" ri bidnoem akoid goo". Nheig khyeug myid aci: shug goo".

³Nyangnu" mo dayug ri we' lo, axo' goo". Nyangnu" mo dayug ri we' nanu" nya: zoo: yiri lo, axo' nhang: goo".

⁴Ciwim gari nyangnu" gi nanu" zoo: yi gootu: yu phara" yiri no' wa shid re" ASEING jang" mo shu" phang: lo" boem wa. Hougsu" bue" nghoid rigi ASEING gi nanu" ri nheig yo: wigi nanu" ri dalheing: dam said toem" pyam wa zi nghoid

⁵Houg: yoomo nyangnu" da" phoin: phyo' pyam ge'. Nyangnu" da" gyeung" shang: lug zeingboung: joem ri adu du baid khyau" pyam ge'. Nyangnu" da" Ashera yu phara" myhi' da" ladoo" zeing joem ri phyed khyo' pyam lho: nyangnu" yu phara" lhoo: joem ri nghe' pyam ge'.

⁶Hid: su" koid ge'. Ciwim gari nanu" gi nanu" ASEING Mangso wigi seing: nyid zi nghoid. Mougmyid tho' mo byumyu" dangain" mo nanu" ri nyang: gi nya: goo" ki" lid byumyu" khyo" khyen: too" bye:.

⁷ASEING gi nanu" ri byumyu" gootu: tho' je myoo: yoomo nanu" ri jheddab ziyo' khyen: yu zi anghoid. Nanu" gi mougmyid tho' moo nge thang da" byumyu" nghoid ago".

⁸Nghoid loug we' ASEING gi nanu" ri jheddab wigi nanu" phoug" phyid" yiri byid: to" da" dangsoo" ri jhug zug yoomo nghoid da:. Houg: yoomo nyang: gi nanu" ri nya: yoem: so' moo" wigi khyoid yu lho: Egutu khokham ri join koid byid: nyid jang" mo loid byoin nhang: bye:.

⁹Nanu" ASEING Mangsoo gi Mangsoo nghoid ziyo' nyang: gi dang: zung" nyid ziri boin: nyid ge'. Nyang: gi nya: dang: theing ri ci: wa nghoid wigi nyang: ri jheddab lho: nya: amyeing" dang: joem ri tam" gyo: mo, ri byuxeig khyeing" moin ju" sho' abei abyo, da" jheddab myid ri ci: shug wa zi nghoid.

¹⁰Nghoid loug we' nyang: ri ngheing" bang: ri yooboo dam byid: wa shid re" gi ane" nyid nghoid da:.

¹¹Houg: yoomo akhid" nanu" ri jhau" byid: bye: gu: ri cang nyid ge'. Akhid" nyid" ngoo nanu" ri byid: bye: da" tarha" joem dangain" ri cang nyid ge'.

¹²«Nanu" he: amyeing" dang: joem ri tam" gyo: wigi hau: joem ri dang: zung" cang yhe: nghoid rigi nanu" phoug" phyid" yiri nyang: dangsoo" byid: to" yhang: ti" nanu" ASEING Mangsoo gi nanu" yo' to" da" nya: dang: theing ri xo' ci: wigi nya: abei abyo, da" jheddab myid ri nanu" ri ci: shug byid: wa.

¹³Nyang: gi nanu" ri jheddab wa nghoid wigi nanu" ri mainkaid byid: wa. Houg: lang" nanu" gi myo: loug loo wa nghoid lho: zoo: du myoo: sho' yoo" wa. Nyang: gi nanu" yoothung" ri mainkaid byid: wa. Houg: lang" nanu" gi gug shi" mei: shi" zabyid yo' zhainloin: xu: joem yo" loo goo" wa. Houg: lho: nyang: gi nanu" da" nu: yo' yang joem ri: myo: loug je: be: loo nhang: wa. Nyang: nanu" ri byid: wa ga: nanu" phoug" phyid" yiri dangsoo" byid: to" da" mungdain: moo nyang: gi nanu" ri he: mainkaid jeju" dangain" gam khain" byid: wa.

¹⁴Mougmyid tho' moo nanu" yhi' mainkaid jeju" yo" zi hang" we' anyid loo. Nanu" we' nanu" gougnyhoug joem we' boug dung: boug thoin" abue" wa.

¹⁵ASEING gi noo aja: ja: mo nanu" ri goem loem byid: wa. Houg: lho: nyang: gi Egutu mung" moo nanu" nyid boem shi" uri bue" da" gyoug pho" noo daja: ri we' nanu" moo abui" nhang: wa. Nghoid loug we' nanu" gyivoo yi atho' moo koem' gi hau: joem dangain" ri bui" nhang: wa.

¹⁶Nanu" ASEING Mangsoo wigi nanu" yoem: so' khoug: moo kaid to" da" byumyu" khang" moo" ri said toem" pyam ge'. Houg: bang: ri nheig khyeug myid aci: shug goo". Houg: bang: da" yu phara" ri acoung" apid ano' goo". Hougsu" koid zigi shid: khyoo: nghoid wa.

¹⁷«Hau: byumyu" yigi nanu" tho' je myo: wigi nyangnu" ri ayo" khaid thu ein: nanu" nya: gung ri atid goo".

¹⁸Nyangnu" ri agyug goo". Nanu" ASEING Mangsoo gi Egutu khokham yo' nya: byu yi dangain" ri khasu" koid ziri myid boin: ge'.

¹⁹Nanu" myojid" yo' nyang: shau" myang bye: da" gyoug pho" lang: yoem" noo- mau" pho" alhoo: again joem yo' mau" pho" lo, moo" joem yo' nanu" ASEING Mangsoo gi yoem: so' moo" yo' yoem: vhu" yo' nanu" ri loid byoin nhang: kaid ziri myid boin: ge'. Egutu byumyu" yiri nyang: said pyam ziyo' dakhyoo" ti" akhid" nanu" gyoug nyid boem da" byumyu" dangain" ri we' nyang: said toem" pyam wa zi nghoid.

²⁰Nyang: gi nyangnu" phung: moo byoodain byooshoo" pho" zi bui" nhang: wigi loid byoin lho: goug" nyid bang: ri we' nyang: said toem" pyam ri" wa zi nghoid.

²¹Houg: yoomo hau: byumyu" yiri agyug goo". Nanu" ASEING Mangsoo gi nanu" yo' dage" nghoid. Nyang: gi phung gyi: Mangsoo nghoid lho: gyoug phoug" moin: su: nghoid.

²²Nanu" shid khyoo: jhen" yhe: uri he: byumyu" yiri zo" zo" mo nyang: khaid thu pyam wa. Nanu" gi nyangnu" dangain" ziri dalheing: dam za: gi ayo" said toem" pyam goo" wa. Ciwim gari nanu" hougsu" koid nghoid rigi siyoo gougnyhoug lam" joem myo: re" wigi nanu" ri kyug zo: boem wa.

²³ASEING gi nanu" gyivoo ri nanu" da" yoem: so' khoug: moo to" to" wigi nyangnu" shid: loo" shoug" bidnyid ju" sho' nyangnu" ri byoodain byooshoo" bui" nyhang: wa.

²⁴Nyang: gi houg bang: khokham yiri nanu" yoem: so' khoug: moo to" too" wa. Nanu" houg bang: ri said pyam wigi nyangnu" we' to" myid pyam goo" wa. Nanu" ri hang" we' ayo" toem goo" wa. Nanu" gi yugkhang" moo" ri said toem" pyam goo" wa.

²⁵Nyangnu" yu phara" soolhoo: ri nghe' pyam ge'. Hau: joem adang moo dab da" ngei anghoid lang" sheing: ri vho: da" myid aboo goo". Nanu" shid re" hau: zi joem ri ayu goo". Nanu" yu nghoid rigi shid: shoug" wa zi nghoid. Ciwim gari ASEING gi yu phara" soolhoo: no' ziri ngheing" nyid da:.

²⁶He: yu phara" soolhoo: joem mo daja: ri we' nanu" yhoem: khyoo: aci: loo goo". Anghoid lang" nyangnu" adang mo nheing" khoin" yo' dakhyo" za: nanu" dang moo we' zang" loo wa. Nanu" gi he: yu phara" soolhoo: joem ri ngheing" ziyo' aphoug" akhyoid koid pyam ca" da:. Ciwim gari nyangnu" gi ASEING da" nheing" khoin" zang" mo, nghoid da:.