Read Lashi TARHA" TID POIN" 9 Bible Online

TARHA" TID POIN" 9 - Lashi bible

TARHA" TID POIN" 9

¹«Israela byumyu" yi we"- tam" gyoo: ge'. Nanu" gi nanu" tho' je myo: je gyi: je yoem bo da" byumyu" yi seing: to" da" mungdain: ri yhe: seing: yu wa shid re" Yodan gyid lang ri akhid" nyid" gu: dab yhi: wa zi za: nghoid abye:. Nyangnu" voomoo" joem gi gyi: ziyo' mougkhung: khyoo: myhi: da" vang khyam: joem yo' nghoid da:.

²Hau: byumyu" yigi myhang: lho: yoem: bo ago". Nyangnu" gi gung doem gyi: bang: nghoid ago". Nyangnu" yo' gyi hang" we' ayo" koid ga: ziri nanu" shoug" gyoo: gu nghoid bye:.

³Nghoid loug we' akhid" nanu" ASEING Mangsoo gi nanu" da" shid vhu" khyoo: myiyham: dab da" myi: yhang: ti" yhe: lo" ziri nanu" nya: myojid" yo' nyang: myang goo" wa. Nanu" shid vhu" khyoo: jhen" yhe: lo" uri nyang: gi nyangnu" ri oung: pyam wa zi nghoid. Houg: lang" nyang: dangsoo" byid: to" ziyo' dakhyo" nanu" gi nyangnu" ri yo" khaid thu pyam wa nghoid wigi myab za: yo" said toem" pyam wa nghoid.

⁴«Nanu" ASEING Mangsoo nanu" shid re" houg: bang: ri bain khaid thu thang: ri he: mungdain: ri nanu" seing: yu wa shid re" nyang: shu" lo zigi nanu" yoo" moin: yoomo nghoid ein: nanu" nya: gung ri atid nyid goo". Hougsu" anghoid nyangnu" gi akhyeing" boem yoomo ASEING gi nanu" shid re" houg: bang: ri bo khaid thu pyam wa zi nghoid.

⁵Nyangnu" mungdain: ASEING nanu" ri yu nhang: zigi nanu" ge lho: jo zi koid yoomo anghoid nghoid da:. Nyang: gi nanu" phoug" phyid" yi nghoid da" Abraham- Isag- Yaku- bang: ri byid: to" da" dangsoo" ri pyeing noug yoomo we' nyangnu" akhyeing" boem yoomo ASEING gi nyangnu" ri khaid thu pyam wa.

⁶ASEING nanu" ri he: mougmyid nu" da" mungdain: ri byid: zigi nanu" moin: yi" yoomo byid: zi anghoid da" khyoo: ri nanu" xoem" too" ge'. Nanu" gi nheigloem: gyi: da" byumyu" yi nghoid da:.

⁷«Dain" pyoid yoo moo nanu" ASEING Mangsoo ri nanu" khasu" nheig yoo: nhang: boem ziri khanham we' ato" myhed goo". Egutu mo nanu" thu lo nyid" mo akhid" nyid" nanu" hid: moo ju" da" bidnyid ju" sho' nanu" gi nyang: ri thougtheung gyi koid boem ago".

⁸Sina boem mo lang" nanu" ASEING ri nheig yoo nhang: da:. Nanu" ri said toem" pyam wa sho' nheig yo: da:.

⁹ASEING gi nanu" yo' koid to" da" dang: theing lhid" to" da" lug pyi" joem ri khab yu wa shid re" ngoo hau: boem khyoo: do, yhi: bye:. Ngoo hougmoo myid: xi: nyid" myid: xi: myen ciwe' azoo: ciwe' ashug lo" nyid bye:.

¹⁰Hau: thang: nanu" hau: boem moo zeing: foem: nyid boem da" nyid" ri nyang: nanu" ri myi: khoug: mo tid da" dang: joem ri nya: lo, wigi nyang: lhid" to" da" hau: lug pyi" eig pyi" ngoo ri byid: da:.

¹¹Nghoid da- myid: xi: nyid" myid: xi: myen lid thang: ri ASEING gi dang: theing ri nyang: lhid" to" da" lug pyi" eig pyi" ngoo ri byid: da:.

¹²«Hau: thang: ASEING ngoo ri ‹Boem mo akhid" nyang: gyoo" loo" we'. Ciwim gari nang Egutu mo shu" thu lo da" re" byu yigi byugang: bue" re" wigi akhyeing" moo" zei: abye: go". Nyangnu" gi ngo wigi cang wa amyeing" byid: to" jang" mo phug lo" abye: go". Houg: lho: nyangnu" gi nyangnu" shid re" soolhoo: daloem: ri nyangnu" koid abye:› ga: tid.

¹³«ASEING ngoo ri tid shi" zigi ‹He: Byumyu" yi khayhi' nheigloem: gyi: ziri ngoo se'.

¹⁴Ngoo ri toem' wa khyo" asoin'. Hang" we' nyangnu" ri amyed boin loo goo" baja" ngoo nyangnu" ri said toem" pyam wa myid soin' too" bye:. Hau: thang: ngoo gi nang ri je myo: da" byumyu" yi nya: phoo- nyangnu" tho' je yoem: bo da" byumyu" yi nya: phoo bui" nhang: wa› ga: tid.

¹⁵«Houg: yoomo ngoo gi lheing: tau" lho: hau: dang: theing lhid" to" da" lugpyi" eig pyi" ri vu, wigi boem mo gyoo" loo bye:. Myiyham: joem gi boem mo thu lo boem ago".

¹⁶Nyangnu" ASEING Mangsoo ri byid: too" bye: da" amyeing" ri nanu" acang ziri ngoo myang. Houg: lho: nanu" nya: shid re" nuloo: nu" soolhoo: ri to' wigi koid da" yu phara" soolhoo: daloem: ri koid khyo" nyang: ri yooboo shoid boem abye: go".

¹⁷Houg: yoomo nanu" shidkhoin" moo ngoo gi hau: lug pyi" eig loem: ri du" kho' sain" pyam bye:.

¹⁸Hau: thang: ngoo gi ASEING shidkhoin" moo myid: xi: nyid" myid: xi: myen ciwe' azoo: ciwe' ashug lho: doem lo" goeb jo, nyid bye:. Nanu" gi ASEING ri yooboo koid thougtheung wigi nyang: ri nheig yoo: sho' koid bye: yoomo ngoo hid: su" koid bye: zi nghoid.

¹⁹Ngoo gi ASEING nheig joem: yo: ziri gyoug bye:. Ciwim gari nyang: nheig yo: zigi nanu" ri yo" said pyam da:. Nghoid loug we' ASEING gi ngoo ri dalheing: doem tam" gyoo: byid: da:.

²⁰ASEING gi Arun ri we' said pyam wa sho' nheig yo: da:. Houg: yoomo ngoo gi hau: uri Arun shid re" akyu" mho' byid: bye:.

²¹Ngoo gi yooboo bui" nhang: da" nanu" koid to" da" hau: to' nuloo: nu" soolhoo: ri yu lho: myi: moo du" khyo' pyam bye:. Hau: thang: ngoo hau: ziri baid khyoeb lho: aphei" gyeig mhoin' wigi boem khyo" yau gyoo" lo da" gyid lang moo du" zei pyam bye:.

²²«Nanu" gi Tabera- Masa yo' Kibrod Hatava moo nyid boem uri nanu" ASEING Mangsoo ri nheig yoo: nhang: bye:.

²³Houg: lho: nanu" ri byid: wa nghoid da" mung" ri yhe: seing: yu wa amyeing" joem yo' dage" Kadesha- Baranea mo to' yhe: loo" nhang: uri nanu" gi nyang: ri thougtheung boem ago". Nanu" gi nyang: ri aloem jeing" atam" gyoo: nghoid boem ago".

²⁴Ngoo nanu" ri se' da" ayo, mo nanu" gi ASEING ri thougtheung gyi koid boem bye: ago".

²⁵«Houg: yoomo ngoo gi hau: myid: xi: nyid" myi: xi: myen agyoo: mo ASEING shidkhoin" moo lo" goeb jo, bye:. Ciwim gari nyang: nanu" ri said toem" pyam loo: wa ga: myid phyed too" bye: ziri ngoo se'.

²⁶Houg: lho: ngoo akyu" mho' zigi ‹Yoem: moo" bo da" ASEING we"- re" yoem: moo" yo' yoem: so' khyo" Egutu mo shu" thu lo lho: nang khyoid yu bye: da" byumyu" nghoid da" re" byumyu" yiri asaid pyam o".

²⁷Re" dei zoo: yi nghoid da" Abraham- Isag- Yaku bang: ri myid boin: lho: he: byumyu" yi da" nheigloem: gyi: khyoo: akhyeing" khyoo: yooboo joem ri atam" gyoo: byid: o".

²⁸Hougsu" anghoid lang" nyangnu" ri nang dangsoo" byid: to" da" mungdain: khyoo: re" byumyu" yiri ayo" shu" vang yhi: nghoid da ga: Egutu byumyu" yi tid loo" goo" wa. Nang gi nyangnu" ri ngheing" yoomo nyangnu" ri said pyam wa shid re" nang gi re" byumyu" yiri dain" pyoid yoo khyoo: shu" thu lo da- ga: nyangnu" tid loo goo" wa.

²⁹Cinghoid loug we' hid: bang: gi re" yoem: so' moo" yo' phung" yoeb khyo" Egutu mung" mo nang shu" thu lo wigi nang nyang: khyen: yu da" byumyu" nghoid ago"› ein: mho' bye:.