Read Lashi YOHAN 1 Bible Online

YOHAN 1 - Lashi bible

YOHAN 1

¹He; mougmyid yoo soo" ri aphain" too" shi" mo Mungdang: gi jo, jo, gu nghoid bye. Hau: mungdang: gi Mangsoo yo" dage" nyid. Mungdang: we Mangsoo nyang: nghoid bye.

²Hau: mungdang: gi apoem: ayang mo nyang:- Mangsoo yo" dage" nyid bye.

³Nyang: khyo" wigi Mangsoo gi - jo, moo jo, ri phain" so: to. Phain" to" jang" moo nyang: aboo loo bue" lo zi gi daja we ajo.

⁴Hau: mungdang: gi kangso' ajhung nghoid- hau: da" kangso' gi Byu yi da" bidbang nghoid.

⁵Hau: bidbang gi moug coid moo thoin" pang byid: nyid. Hau: moug coid gi bidbang ri khanham we ayo" nghoeb too.

⁶Mangsoo gi nya: lagyoo: Yohan ga: su: dayug ri nhang: kaid.

⁷Mangso: mungdang: ri Byu dangain" shau" gyo: lho: loem" jeing" lo boem baja" ga: hau: Yohan gi bidbang da" khyoo: ri sagsi: kham: byid: wa ga juri" bye.

⁸Nyang: gi bidbang anghoid. Bid bang da" khyoo: ri sagsi: kham: wa ga: dare.

⁹Hau: gyeing" da" bidbang gi mougmyid moo gyoo" lo lho: Byumyu" bain sho' mo da" tho' moo thoin" pang too" bye.

¹⁰Mungdang: gi mougmyid moo jo, jo bye. Mangsoo gi mougmyid ri Mungdang yo" phain" too" bye: nghoid loug we' mougmyid gi nyang: ri asi.

¹¹Nyang: gi nya: da" moug moo juri" nghoid loug we' nya: da" byu yi gi nyang: ri alhoem: kham: yu boem.

¹²Nghoidloug we' dayham" koem gi nyang ri lhoem: yu lho: loem" jeung" lo boem bye:- houg: su" nyang: ri loem" jeing" mo ri Mangso da" nya: zoo: yi yo" bue" loo wa akhang" byid: bye.

¹³Houg: bang: gi byu da" nya phoo mo khu: lo da" nya: zoo yi nghoid nyid wigi xangsu: suid shoo" khyo" Mangso: nya: zoo: yi yo" bue" lo zi anghoid. Mangsoo nyang- nyangnu da nya: phoo nghoid nyid.

¹⁴Mungdang gi Byu gung bue" lo lho: Jeju" yo" deingmain" khyoo: byeung" zoore"- ngoonu" jang" moo re" nyid bye. Ngoonu" gi nya: da" Phung" yoeb ri yo" myang boem bye. Hau: da" phung" yoeb gi Nya: pho, zooti" zoo: khyo" yo" kham: yu da" myonhoo: phung" yoeb nghoid.

¹⁵Yohan gi nya: khyoo: ri tid bye nyang tid zigi Nga" thang: moo juri" wa su: gi nga" tho' je gyi: su nghoid. Khasu" wim gari nyang: gi ngoo: akhu: shi" mo, nyid nyid bye: su: nghoid ein: ngoo lhoung tid nyid da" su: gi he: yug nyang nghoid bye" ga: nyho: tid.

¹⁶Nyang: gi Jeju" yo" byeung" su: nghoid zi yo" dakhyoo" ti"- Jeju" da loem: thang: moo daloem: nyhang" ri shamain" byid: nyid.

¹⁷Mangsoo gi tarha" ri Moshe khyoo" wigi byid: kaid. Nghoidloug we' Jeju" yo" deingmain" zigi Yesu Hkristu khyo" wi ju" loo bye.

¹⁸Byu hang" we' Mangsoo ri amyang yu" nghoid loug we' nya: pho da" shid khoin moo nyid da" Mangsoo: yo' dakhyoo" ti" da" zooti" zoo: gi Mangsoo ri thoin" pang shug nyid bye.

¹⁹Yerusalem voo moo nyid da" yuda zoug: yi gi Khainjung agyi yi dayham" yo"- Levi yi dayham" bang: ri Yohan jhang khyoo: nhang: kaid lho: nang gi hang" nghoid ga: myid: nhang: kaid boem.

²⁰Houg: lang" Yohan gi Ngoo gi Meshia anghoid- ga: wigi azoug" loo: bang bang lhoem: tid kyo. Houg: bang: gi nang Meshia anghoid rigi hang" nghoid Elia nghoid la"» ga: doem myid: boem.

²¹Houg rigi nang hang" nghoid- Elia nghoid la"» ga: myed: ‹‹Yohan gi ngoo Elia anghoid ga: tid.» Nyangnu" gi nang gi Lapi: nghoid la"» ga: doem myid: lang" Yohan gi ‹‹Ngoo gi hau: da" lapi: we anghoid ga: tid.»

²²‹‹Houg: bang: gi Houg: ri nang hang" nghoid-» ngoonu" ri nhang: kaid mo, ri lo" tid kyoo" ca. Nang nya: gung ri nang hang" nghoid ein: myid nyid ga: doem tid.

²³Yohan gi lapi: Esaia tid kyo" to" zi ' dakhyoo" ti"-- ngoo gi Aseing: ri" wa da" khyoo: ri dain: dain: nyheing ge' ga: dain" pyoid yoo moo nyho: nyid su: da" thui: nghoid ga: tid.

²⁴Yohan jang" moo Pharishe" yi nhang: kaid da" lagyoo: yi doem myid: zigi

²⁵Nang Meshia we anghoid- Elia we anghoid- Mangso: da" lapi: phoophoo we anghoid rigi Ce: noem koid; wigi Babtisma kham: byid: yen" lha"» ga: zheing: myid: boem.

²⁶Yohan gi ngooo gi gyid yo' Babtisma ri kham: byid. Nanu" da" Phung: moo nanu" asi su: dayug bo yab jo.

²⁷Hau: yug gi nga" thang: moo da ju" ri" nghoid loug we' Ngoo gi nya: khyid: baid tei" phid: byid: wa zi lang" amoin: yi" su: nghoid- ga: tid.

²⁸He khyoo: gi Babtisma kham: byid: da" Yodan gyidlang bid thu' shoid moo jo, da" Bethani voo moo bue" da" khyoo: nghoid.

²⁹Thang: nyid" ri nya: jang" moo Yesu jure" zi myang lang" Yohan tid zigi Mougmyid byu yi da" yooboo ri yu pyam byid: da:- Mangso: yang nu" ri yu" yu" ge'.

³⁰Nga" thang: moo juri" su: danghoid loug- Nga" tho' mo je gyi: su: nghoid. Khasu" wim gari he: yug gi ngoo akhu: shi" mo nyid nyid su: nghoid- ngoo lhoung tid nyid su: gi he: yug nyang: nghoid bye.

³¹He: yug hang" su: nghoid zi xang: shi" ri ngoo asi. Nghoidloug we' Israela Byumyu" yi nyang: ri zheing: se' boem wa shid' re" Ngoo gi gyid yo Babtisma ri kham: byid.

³²Hau: thang: Yohan sagsi; kham: da" zi gi gyeungshang: Venyi: gi mougkhung: khyo" pheing" kyoug" yhangti"- gyoo" lo lho: nya: tho' moo zhoung: jo, ziri ngoo myang.

³³Nyang: gi hang" su: nghoid zi xang: shid" ri ngoo asi- nghoid loug we' gyid yo" Babtisma kham: byid: wa shid' re" ngoori nhang: kaid da" Mangsoo: tid zigi gyeungshang: Venyi: gi gyoo" lo lho: dayug yug da" atho' moo zhoung: jo, ziri nang shau" myang wa. Hau: yug gi gyeungshang: da" Venyi: yo" Babtisma byid: wa su: nghoid.

³⁴Houg: su" tid to" ziyo' dakhyoo" ti"- ngoo shau" yang bye. Houg: yoomo ngoo nanu" ri tid ba- nyang: gi Mangso da" nya: zoo: nghoid.

³⁵Thang: nyid" moo Yohan gi nya cangzoo: eig yug yo" dage" yab jo, da" uri

³⁶ASEING Yesu jure" zi myang lang" thei: yug gi Mangso yang nu" nghoid ga: tid.

³⁷Cangzoo: eig yug gi hau: dang: khoin" ri shaug" gyoo: lang" Yesu da" thang: moo cang lo" ago".

³⁸ASEING Yesu gi thang: khyoo: lheing: yu" kaid ri houg: bang: cang lo ziri myang lang" ‹‹Nanu" ce: noem sho: yen" go" ga: wigi myid. Houg: bang: gi ‹‹Rabai we" nang khamoo nyid la"»ga: myid: boem. (Rabai ga: da" dangkang: gi sara: we" ga: tid nau zi nghoid.)

³⁹Yesu gi hid: moo re" yu" ge" ga: phougtu. (hau: ayo gi myenthang: myid nayi: koo nghoid bye.) Houg: lang" nyangnu" gi nya: thang: cang yhe: ri nyang: nyid joyoo yhe: zheing: myang boem lho: nyangnu" gi Yohan yo' danyid" goin" nyid koin ago".

⁴⁰Hau: cangzoo: yi mo dayug gi Simun Petru da" nya: nhung"- Andre nghoid.

⁴¹Nyang: gi nya: mang: Simun ri myang lang" tid zigi ‹‹Ngoonu" koem Meshia ri myang bye.» (Meshia ga: da" dangkang: gi)- Khristu ga: zi nghoid ga: tid.

⁴²Hau: thang: ri nyang: gi Simun ri Yesu jhang khyoo: khe: shu" yhe. Yesu gi Simun ri yu" lho: tid zigi ‹‹Nang gi Yohan nya: zoo: Simun nghoid. Nghoidloug we' nang rigi Kepha ein: myheing wa zi nghoid. (Hau: zigi Petru ga: ziyo' du: lho: lung: moo" boem ga: da" dangkang: bo.)

⁴³Thang: nyid" moo Yesu gi Galile mung" khyoo: loo" wa shid' re" myid phyed' to". Philib ri myang lang" nga" thang: cang we' ga: tid.

⁴⁴Philib gi Besaida voo mo nghoid. Besaida gi Andre yo" Petru eig yug nyid da" voogung nghoid.

⁴⁵Philib gi Nathanela ri myang lang" Moshe da" tarha" pug moo nghoid loug- Lapi: yi da" Jhoem: mungdang: moo nghoid loug- lhid" shed' too" su: ri ngoonu" myang bye. Hau: yug gi Yoseb da" nya: zoo:- Nazared mo Yesu nghoid ga: tid.

⁴⁶Nathanela gi Nazared voo mo zi gi daja: ja: thu' yu" la"» ga: myid. ‹‹Philib gi re" we' yu" we' ga: tid.»

⁴⁷Nathanela re" nyid zi Yesu myang lang" nya: khyoo: Yesu tid zigi fain" da" nheigloem: abo da" Israela Byu gyeing" dayug hid: moo ju" bye: ga: wigi tid.

⁴⁸Nathanela gi-Yesu ri nang khasu" wim ngoori khayo se' lha"» ga: myid: yu". Yesu phougtu" zigi ‹‹Nang ri Philib are" khi: shi" re- lafoem gam gyid" moo danyid shi" mo nang ri ngoo myang bye.»

⁴⁹Houg: lang" Nathanela gi Sara: we" nang gi ‹‹Mangso da" nya: zoo: nghoid Israela byumyu" yi da" khokham" nghoid.» ga: wigi Nathanela phougtu.

⁵⁰ASEING Yesu tid zigi Lafoem gam gyid" moo ngoo nang ri myang bye: ga: tid yoomo za: nang loem" jeing" la". He: tho' moo je gyi: da" moozoo" joem ri nang myang shi" wa zi nghoid.

⁵¹Ngoo deing" deing nanu" ri tid ba- mougkhung: khoem" phang lho: Byu da" nya: zoo: tho' moo moug: lagyoo: yi gyoo" loo do, loo" koid' nyid da" ziri nanu" shau" myang wa ga: wigi nyangnu" ri Yesu tid.