Read Lashi YOHAN 12 Bible Online

YOHAN 12 - Lashi bible

YOHAN 12

¹Lhed: kaid da" pui" ju" wa khyug nyid" ca" shi" moo shid: bye: jang" mo doem dei to'' lo da" Lazaru nyid da" Bethani voogung khyoo:- Yesu doem ju" yhe: lo.

²Nyangnu" gi houg: moo Yesu ri myen" xoin: damyoo: lhoem: nyheing zho" jang" moo- Martha gidei bo dei nyid. Yesu yo" dage" zoobue" moo zhung: nyid mo, moo Lazaru we' bo nyid.

³Hau: uri Mari gi gye phoug" dab, da" shoem: nam pyo: da" Nardu xu:- agyeing" da parheing" yu lho: Yesu da" khyid: moo joid byid: wigi nya: xam: yo' doem soid' byid. He: nam pyo: da" xu: ngei" gi dayhoem: goin" moo nam pyo: lo.

⁴Nya: cangzoo: dayug nghoid da" Yuda Iskarud gi

⁵Hid: yhi' nam pyo: da" xu: ri Denari ngei soem" shoo: kyab yo" oung" pyam lho: shojhen: mo, ri ciwim agam byid: lha"» ga: tid.

⁶Nyang: gi thang: phyang" Yesu ri gyivoo yi da" lo, moo ab pyam wa su: nghoid. Nyang: hid: su" tid da" zigi shojhen: mo, ri nheig khyeig yoomo tid zi anghoid. Khoug" su: nghoid. Nyang: gi ngei thung: voin su: nghoid yoomo ngei ri lhoung gau" khau" yhung: nyid.

⁷Yesu gi hau: myiyi: zoo: ri alhu: nhung byid. Nyang: gi ngoori myhoeb wa da" ayo, shid' re" he: da" nam pyo: xu: ri shoung: to" zi nghoid..

⁸Shojhen: mo, gi nanu" yo" dage" khanham we danyid nyid. Ngoo koem gi nanu" yo" dage" nyid wa zi anghoid ga: tid.

⁹Bethani voo moo Yesu ju" nyid da" khyoo: ri shau" gyo: boem lang. Meing: byu phung: moo" gi voo moo jure" boem. Nyangnu" gi ASEING Yesu yoomo za: jure" boem zi anghoid. Aseing: wi gi doem dei to'' loo nhang: da:- Lazaru ri myang noug yoomo re" zi nghoid boem.

¹⁰Khainjung agyi yi gi Lazaru ri we' said wa ga: soin' nyid boem ago".

¹¹Khasu" wim gari Lazaru da" khyoo: yoomo mung" byu yi gi khainjung agyi yi ri aloem loo za: Yesu ri te: loem" jeing" lo" boem yoomo nghoid.

¹²Thang: nyid" moo lhed: kaid da" pui" moo jure" da" mung" byu yi gi Yerusalem voo khyoo: Yesu jure" nyid ziri shau" gyo: boem yoomo

¹³Zhainlun seig kyang joem ri khyau" ci: wigi thu' lo" boem lho: Mangso da" myonhoo: phung" yoeb' ri coung" byid: ge' Mangso: da" myeing yo" gyoo" ri" su: gi ngi lho, nyid: baja"- Israela da" khokham" ri Mangsoo: mainkaid byid: baja" o"- ga: yoid' nyho: da" thui: yo"- ASEING Yesu ri lhoem: tau yu boem.

¹⁴Yesu gi loozei: dadu: moo zhoung: lho: jure". Houg: gi Jhoem: mungdang: moo tid to" ziyo' dakhyoo ti.

¹⁵Ziun voo we" agyug- Yu" we' re" da" khokham" zeing: gi Loozei: nu" moo zhoung: lho: juri" bye.

¹⁶Nya: cangzoo: yi gi hau: yo, moo he: jhoem: dang: ri ase' gyo: boem. Nghoid loug we' Yesu gi phung yoeb myo nhoo: yo' coung" nghei tu: to shau" thang: ri she' he: jhoem: mungdang: gi nya: khyoo: ri tid to" zi yo; dakhyoo" ti" nyang: ri koid' abye: go" ziri doem myed boin: so" lo boem.

¹⁷Lazaru ri loeb' khoug: mo khe: thu' yu lho: shid: jang mo dei to'' loo nhang: da" uri bo myang bang: gi Yesu khasu" koid; da" khyoo: ri khyang" lo" shid' boem.

¹⁸Hau khyoo: ri shaug" gyoo: boem yoomo shaug" gyoo: mo, dangain" gi Yesu ri tau yu wa ga: jure" boem da" zi nghoid.

¹⁹Pharishe" yen, gi ngoonu" moo oung: lo" da" khyoo: dajhi' we' aboo. Yu" ge' mougmyid daloem: goin" nya: thang: moo cang lo" boem bye: ga: nyang: cang" nyang: tid go" nyid boem.

²⁰Hau: pue" uri noku yhe: da" byu yi akhoug: moo Greed byumyu" dayham" we' bo

²¹Nyangnu" gi (Galile moug mo Besaida voo byu ) Philib jhang khyoo: yhe: lho: wigi Sara: we"- ngoonu" gi ASEING Yesu ri myang: nau- ga: yhe: tid boem.

²²Philib gi Andre jang" moo yhe: lho: hau: khyoo: ri tid kyo. Hau: thang: ri nya: eig yug gi ASEING Yesu jang" moo zheing: yhe: lho: hau: khyoo: ri tid kyo" to.

²³Yesu phougtu" da" zigi byu nya: zoo: da" myonhoo: phung" yoeb' bang: thu' loo wa da" ayo, ju" bye.

²⁴Deing" deing nanu" ri ngoo tid ba- gug cab' gi myidjang: moo agyo"- aboeb ayoin" nghoid rigi dacab tho' moo myo: loo zi anghoid. Boeb' yoin" lo" nghoid ri koem gi ashi" myoo" sho' ri yo" bue" loo nhang: zi nghoid.

²⁵Nyang: nya: kangso' ri jheddab mo hang" nghoid loug kangso' soem" wa nyang: nya: kangso' ri ajhed' dab, she: pyam su: hang" nghoid loug we' nya: da" kangso' ri khanham we' yo" zoem: ci: su: nghoid wa.

²⁶Ngoo nyid da" jo, yooo moonga" dei zoo: we' yo" nyid wa shigre" Nga" moo" voin, noug su: gi nga" thang: moo cang ca. Nga" moozoo" ri voin, vu, su: hang" nghoid loug ri nga" phoo we' coung" byid: wa zi nghoid.

²⁷Ngoo gi nheigloem: gye seing" kho" nyid ngoo khasu" ein: tid loo: wa lha". Phoo we"- ngoori he: da" kyi" khyeug jamjau yo, mo loid byoin loo" nhang: we' ein: wigi tid wa la". nghoid loug we' ngoo gi he: da" kyi" kyeig jamjau ri kham: yu wa shid' re" gyoo" re" zi nghoid.

²⁸Phoo we"- re" da" myonhoo: phung" yoeb' ri dathu' ri" nhang: we' ga: tid nyid. Houg: lang" mougkhung: mo thui: thu' lo zigi ngoo gi nya: myeing ri myonhoo: phung" yoeb' ri thu' ri" nhang: bye. thang: ri dalheing: we doem thu' ri" nhang: shi" wa" ga: tid.

²⁹Hau: joyoo moo yab jo, da" mung" byu yi gi hau: da" thui: ri shaug" gyoo: lho: dayham" gi moug doem doem: myheing ga: dayham" gi Aseing: ri mau lagyoo: yi dang: re" tid zi nghoid ga: tid nyid boem.

³⁰Yesu gi he: da" thui: thu' lo zigi nga" shid' re" anghoid. Nanu" da" shid' re" danghoid ga: tid.

³¹He: moug myid gi akhid" lang" Tarha" dang: phyed' zi thoung" shau" nyid abye:. Mougmyid ri vhoeb khang" nyid da" su: we' akhid" nyang: keing" pyam zi shau" wam: bye.

³²Ngoo gi myidjang: tho' moo tu: zhug lhang" to" zi shau" nyid uri Byu dangain" ri nga" jhang khyoo: lang: yu wa zi nghoid ga: tid.

³³(Hid: su" ga: tid da" zigi nyang: khasu" koid; wi shid: kham: wa da" khyoo: ri avoid ayoeb khyo" toin" shid nyid da" khyoo: nghoid.)

³⁴Byu yi gi Meshia khanham we' kangso' dadei nyid ga: Moshe tarha" moo tid to. Houg: su" nghoid ri Byu da" nya: zoo: gi khasu" wim wigi se' jen" lhang" too" wa lha?Hau: byu da" nya: zoo: gi kha: yug nghoid lha"» ga: myid: ago".

³⁵Yesu phougtu" da" zigi Bid' bang gi nanu" moo daso date: jo, loo- wa. Nanu" ri moug coid alo nghoeb' pyam wa da" shid' re" bidbang jo shi" da" uri so" yen" ge'. Moug coid khoug: moo so" yen" mo gi nyang: nyang: kha: khyoo: so" lo" zi asi nghoid ago".

³⁶Houg: su" nghoid yoomo bidbang jo, shi" da" uri hau: bidbang ri loem" jeing" ge'. Houg: su" nghoid ri za: nanu" gi bidbang da" byu yi bui" wa nghoid ga: tid. Hid: su" ga: bain tid thang: ri Yesu gi nyangnu" jang" mo phang: gau" loo bye.

³⁷Nyangnu" da" shid' khoin" moo mau" pho" moozoo"- myoo" sho' zei: shug nghoid loug we' nyangnu" gi Yesu ri aloem" jeing" boem.

³⁸Hid: su" bue" da" khyoo: gi Lapi: Esaia tid to" khyoo: zung: loo wa yoomo bue" lo zi nghoid. O" Aseing: we"- kha: yug gi ngoonu" kho" kyo" da" khyoo: ri loem" jeing" boem lha". kha: yug ri Mangso yoem: vhoo" phung" yoeb' toin" shid' lha".

³⁹Houg: yoomo nyangnu" gi atho' oung: loem" jeing" zi nghoid. Khasu" wim gari Lapi: Esaia hid: su" tid to.

⁴⁰Nyangnu" abyang" yu yu gi nyangnu" da" myojid" joem gi ayo" myang wigi Nyangnu" da" nheigloem: gi a oung: se' gyoo: wa ziyo' nyangnu" nya: jhang khyoo: ayo" tau" loo wa shig re" Mangsoo gi-nyangnu" da" myo, ri jed' nhang: lho: nyangnu" nheigloem: khoem" ri myhid" too" bye: ga tid.

⁴¹Esaia gi ASEING Yesu da" myonhoo: phung" yoeb' ri shau" myang yoomo Aseing: da" khyoo: ri hid: su" ga: tid zi nghoid.

⁴²Yuda zoug: myeing" ci: mo, myoo" sho' nyang:- Yesu ri loem" jeing" lo boem. Houg: su: nghoid loug we' Pharishe" yi yoomo Tarha" jung mo khaid thu' pyam wa zi gyoug yoomo nyangnu" loem" jeing" da" khyoo: ri bang bang ayhen: yu boem nghoid da.

⁴³Nyangnu" gi byu yi coung" byid: wa ziri Mangso coung" byid: wa tho' moo je vho: ngei nyid ago".

⁴⁴Yesu phougtu" da" zigi ngoori loem" jeing" su: gi ngoori za: anghoid. Ngoori nhang: kaid da" yug ri we' bo loem" jeing" su: nghoid.

⁴⁵Ngoori myang su: gi ngoori za: anghoid. Ngoori nhang: kaid da" Aseing: ri we' myang zi nghoid bye.

⁴⁶Ngoori loem" mo dangain" gi moug: coid khoug: moo anyid loo: wa shid re" ngoo gi bidbang khyo" nyang: mougmyid moo ri" bye.

⁴⁷Nga" Mungdang: ri alhoem: yu su: ri ngoo gi dang: aphyed'- Mougmyid: byu yi ri dang: phyed' wa da" shid' re" ngoo gyoo" re" zi anghoid. Mougmyid byu yi ri khyoid yu wa shid' re" ngoo gyoo" re: lo zi danghoid.

⁴⁸Ngoori alhoem yu lho: nga" mungdang: akham: yu su: ri dang: phyed' wa dayug nyid. Houg: nga" Mungdang: wigi nyang:- hau: yug ri lo" thang da" bidnyid moo Tarha" agyi khyo" dang: phyed' wa zi nghoid.

⁴⁹Khasu" wim gari Ngoo gi ngoo nya: amyeing" khyo" kho" kyo" da" khyoo: anghoid. Ngoori nhang: kaid da" phoo Mangso da" amyeing" yo' dakhyoo" ti"-- kho" kyo" khyoo: danghoid.

⁵⁰Phoo Mangso da" amyeing" zeing: gi Apyaid' ato: da" kangso' yo" byid: da" zi ngoo se. Houg: yoomo ngoo kho" kyo" da" khyoo: dangain" gi pho da" amyeing" yo' dakhyoo" ti"- za: date: tid zi nghoid.