Read Lashi YOHAN 14 Bible Online

YOHAN 14 - Lashi bible

YOHAN 14

¹Yesu gi nanu" nheigloem: myid amyo: nyid goo"- Mangsoo: ri loem" ge' ngoori we' loem" ge' ga: wigi tid.

²Nga" pho da" yhoem: moo yab myoo" sho' jo. Houg: ajo, nghoid rigi ajo, ein: ngoo atid loo: za: nyid wa anghoid. Ngoo gi nanu" da" shid' re" joyoo nyheing wa ein: lo" zi danghoid.

³Houg: su" nanu" shid' mo joyoo daloem: lo" nyheing too" kho lho: nanu" jang" moo ngoo doem re" wigi ngoo nyid jang" moo nanu" we' yo" nyid sho' nanu" ri nga" jhang khyoo: re" shu" yu wa zi nghoid.

⁴Ngoo lo" nyid da" joyoo moo ju" da" khyoo: ri nanu" si' bye: ga: tid.

⁵Thoma gi Aseing: we"- nang khayoo: loo" wa zi ngoonu" asi bye: re- houg: moo yo" ju" da" khyoo: ri ngoonu" khasu" se' si wa ga: tid.

⁶ASEING Yesu tid zigi khyoo: gi ngoo nghoid- deung main" ziyo' kangso' we' ngoo nghoid. Ngoo moo anghe: khoug: loo: za: hang" we' Nga" phoo jang" moo ayo" ju" loo.

⁷Akhid" nanu" gi ngoori si' bye: yoomo Nga" phoo ri we' si wam: bye. Akhid" mo nyang:- phoo ri nanu" se' lho: myang yu" boem bye: ga: tid.

⁸Philib, gi Aseing: we"- hau: phoo ga: zi ngoonu" ri toin" shid' we' houg: su" yo" toin" shid' lang" ngoonu" gi nheig shid: wa ga: tid.

⁹Yesu gi Philib, we"- ngoo gi nanu" yo" hid: myhang nyid lo ri ngoori nang asi shi" la". Ngoori myang yu su: gi phoo ri we' shau" myang zi nghoid bye. Houg: su" nghoid ri phoo ngoonu" ri toin" shid' we' ein: ci: koid; tid nyid go" lha".

¹⁰Ngoo gi phoo moo nyid phoo we' ngoo moo nyid. Phoo nyid zi nang aloem" rhe. Ngoo tid da" dang: dangain" gi nga" da" dang: anghoid. Ngoo koid; da" moozoo" we' Ngoo yo" dage" nyid da" phoo Mangsoo: nyang: koid; da" moozoo" nghoid bye.

¹¹Ngoo gi phoo yo" dadeing: daloem za: nghoid wigi Phoo we' ngoo yo" dadeing: daloem: za: nghoid yoomo ngoo tid ziri loem" jeing" ge'. Houg: su" anghoid lang" gi ngoo koid; da" moozoo" ri yu" lho: loem" jeing" ge' ga: tid.

¹²Deing" deing nanu" ri ngoo tid da" zigi ngoori loem" jeing" su: gi ngoo zei: da" moo" ri yo" zei: wa. Hau: tho' re je gyi: da" moo" ri we' yo" zei: wa nghoid. Khasu" wim gari ngoo gi phoo jhang khyoo: loo" wa yoomo nghoid.

¹³Nya: zoo: yoomo wigi nya: pho da" myonhoo: ngeilang bang thu' loo baja" ga: Nga" da" myeing ri nghe: khau: lho: nanu" mho' da" zi dangain" ngoo koid; byid: wa.

¹⁴Nga" da" myeing ri lang: lho: nanu" ce" ja: akyu" ri nghoid loug- mho' ge'. Mho' ziyo' dakhyoo" ti"-- ngoo koid byid: wa nghoid.

¹⁵Nanu" ngoori jheddab nghoid rigi Nga" tarha" ri phau" cang goo" wa nghoid.

¹⁶Ngoo gi phoo ri mho' lho: nanu" yo" khanham we' dage" nyid nyid wigi nanu" ri pang" thoug byid: wa da" yug- nanu" da" jhang khyoo: nhang: kaid wa.

¹⁷Hau: da" Aseing: gi Mangso da" deung main" khyoo: ri toin" shid' wa da" Venyi: nghoid. Mougmyid gi hau: Venyi: ri myang we' amyang- si' we' asi yoomo ayo" kham: yu boem. Nghoidloug we' Hau: Venyi gi nanu" yo" dage" nyid lho: nanu" da" khoug: moo loung" jo.Hau: Aseing: ri nanu" se' boem bye.

¹⁸Ngoo loo" lang" nanu" nyang: kyeing" ri she: pyam too" khoo, wa zi anghoid. Nanu" jang" moo ngoo doem ri" wa.

¹⁹Ayo, dajhi' myang" lo" ri he: mougmyid byu yi gi ngoori amyang lo: boem wa. Nghoidloug we' nanu" koem gi myang boem shi" wa. Khasu" wim gari ngoo gi kangso' dei nyid su: nghoid yoomo nanu" we' kangso' shau" dei nyid boem wa.

²⁰Ngoo gi phoo yo" dadeing: daloem: za: nghoid ziri we' nanu" gi ngoo yo" dadeing: daloem: za: nghoid ziri we' hau: bidnyid ri nanu" yo" se' boem wa nghoid.

²¹Ngoo ri kham: yu lho: cang loo" su: gi ngoori jheddab su: nghoid. Ngoori jheddab su: ri nga" Phoo we' jheddab wa zi nghoid. Ngoo we' nyang: ri jheddab lho: Nga" da" gung nyang: ri toin" shid' wa zi nghoid ga: tid.

²²(Yuda sakarud anghoid da") Yuda goo" yug gi Aseing: we"- re" da" gung du: ngoonu" rigi: toin" shid' lho: Mougmyid byu yi ri atoin" shid' ga: rigi khasu" se' bui" wa lha"» ga: myid.

²³Yesu doem tid da" zigi Ngoori jhed' dab, su: gi nga" da" moo" myeing" ung: voin su: nghoid. Houg: yoomo nga" Phoo gi nyang: ri jheddab wa. Nga" phoo yo" ngoo we' nya: jang" moo yhe: lho: nyang: yo" dage" nyid wa zi nghoid.

²⁴Ngoori ajheddab su: gi nga" jhoug" myeing" ri ase' gyo: yu. Nanu" shau" gyo: yu" da" jhoug" myeing" gi nga" da" jhoug" myeing" anghoid. Ngoori nhang: kaid da" nga" pho jhoug" myeing" danghoid.

²⁵Nanu" yo" dage" nyid shi" da" uri he: khyoo: ri ngoo tid kyoo" bye.

²⁶Nghoidloug we' Phoo gi nga" myeing mo nhang: kaid wa da" pang" thoug su: ein: da" gyeungshang: da" Venyi: gi nanu" ri ja: khang" moo" jhoug" byid: wigi ngoo tid kyo" da" khyoo: dangain" ri doem myid boin: loo nhang: wa zi nghoid.

²⁷Ngoo gi myenjham" khyoo: nanu" ri byid: khoo bye:- hau: da" ngei pyo: myenjham" da" khyoo: gi nanu" ri moug myid byu yi byid: te" da" zi anghoid. Nanu" nheigloem: myid amyoo: goo. Nheugloem: athang goo"- gyoug we' agyug goo.

²⁸Ngoo gi akhid" loo" nghoid loug we' nanu" jang" moo doem ri" wa ein: wigi tid da" dang: ri nanu" shaug" gyoo: bye. Phoo gi nga" tho' agoo" je gyi: su: nghoid. Houg: su" nghoid yoomo nanu" ngoori jheddab nghoid rigi pho jhang khyoo: ngoo lo" ziri gau yi boem wa zi nghoid.

²⁹Hau: da" moozoo" bue" lo da" uri nanu" loem" jeing" loo wa shid' re" abui" shi" re" nyang: nanu" ri ngoo tid bye.

³⁰Mougmyid da" zoug: phoo gi jure" nyid bye. Houg: yoomo ngoo gi nanu" yo" dang:- myang" sho' shau" tid go" nyid wa da" ayo, ajo, loo. Hau: mougmyid zoug: phoo gi nga" tho' moo ce" amyeing" ajo.

³¹Nghoidloug we' ngoo gi phoo rijheddab nyid da" khyoo:- mougmyid gi si' ca" nyid. Ngoo gi phoo ri jheddab yoomo ngoori tid kyo" da" khyoo: dangain" ri ngoo cang pyeing bye. He: joyoo mo to' lho: ngoonu" thu' lo" boem loo: shang ga: tid.