Read Lashi YOHAN 15 Bible Online

YOHAN 15 - Lashi bible

YOHAN 15

¹ASEING Yesu gi Ngoo gi main" da" zabyidd" nei nghoid. Nga" phoo gi khyam: seing: nghoid.

²Ngoo moo ashi" azei: da" akung: ako' dangain" ri nyang: cu: khyo, pyam lho: ashi" zei: da" akung: ako'' ri koem gi je zei: baja" ga: kyid shang: to.

³Houg: yo' dakhyoo" ti"-- ngoo jhoug" byid: da" Mungdang: gi akhid" lang" nanu" ri kyid shang: nyid bye.

⁴Ngoo yo" dadeing: daloem: za: nyid ge'. Ngoo we nanu" yo" dadeing: daloem: za: nyid wa. zabyidd" ako' gi agam moo atei" axo, to" nghoid rigi nyang: kyeing" ashi" yo" zei: wa zi anghoid. Houg: yo' dakhyoo" ti"-- nanu" we' ngoo yo" atei" axo, to" nghoid rigi ashi" yo" zei: boem wa zi anghoid.

⁵Ngoo gi zabyidd" nei yang: nghoid. Nanu" gi akung: ako'' joem nghoid. Ngoo moo xo' wigi ngoo we nanu" yo' xo' to" ri gi na nu" ashi" myo" sho' yo" zei: loo wa khasu" wim gari ngoo yo' gang go" loo" lang" nanu" ci" we' ayo" koid loo.

⁶Ngoo yo" axo' to" su: gi nghi: zain khyoo: cu: khyo, pyam wigi kyoug main lo" da" seig kung: yo" du wa. Byu yi gi hau akung ako joem ri cang sho: zheing" yu lho: myi: moo du kaid wigi nyang: gi nghe" joem: pyam wa..

⁷Nanu" gi ngoo yo" dadeing: daloem: za: nyid wigi Nga" da" Mungdang: we' nanu" da" nheigloem: ung: khoug: moo bo jo, nghoid rigi nanu" mho' da" akyu" ci: mho' ci: yo" yu boem wa nghoid.

⁸Nanu" gi ashi" myoo" sho' zei loo yoomo Mangso da" myonhoo: phung: yoeb' ri thu' loo nhang. Hid: khyo" nanu" gi nga" cangzoo: yi bue" lo boem.

⁹Phoo gi ngoori jheddab nyid yhangti"- ngoo we' nanu" ri jheddab nyid. nga" jheddab jang" moo nyid nyid ge'.

¹⁰Ngoo gi nga" pho, amyein g" ri tam gyo: wigi nya jheddab jang moo nyid nyid yhang ti"- nanu nga amyeing" tam gyo rigi nanu" we' nga" jheddab jang" moo nyid nyid.

¹¹Nga" gau yi da" khyoo: gi nanu" moo jo, jo wigi nanu" da" gau yi zi we' joeb, byeung" loo baja"- ein: ngoo he: khyoo: nanu" ri tid bye.

¹²Nga" da" amyeing" gi hid: nghoid ngoo gi nanu" ri jheddab yhangti"- nanu" nyang: cang" nyang: jheddab goo" ge,.

¹³Nyang: nya: da" bidnoem pho shid' re" kangso' ab pyam sho' jheddab da" tho' moo je gyi: da" jheddab nheigloem: gi hang" moo we' aboo loo.

¹⁴Nanu" ngoo tid da" mungdang: khyo" cang nghoid rigi nga" da" bidnoem yi nghoid boem wa.

¹⁵Akhid" mo wigi nanu" ri ngoo join atid loo wa. Khasu" wim gari-join gi Yhoem: seing: koid da" moozoo" ri asi. Nanu" ri bidnoem da ein: loo wa khasu" wim gari pho jang" mo ngoo shau" gyo: khyoo: dangain" nanu" ri yo tid kyoo" bye.

¹⁶Nanu" gi ngoori khyen: yu zi anghoid ngoo she nanu" rida khyen: yu- nanu gi thu lo" lho: geng teing ashi myoo" sho' zei: wa zi yo"- nga" myeng mo, nanu" mho' moo mho'- phoo nanu" ri byid baja" ngoo nanu" ri nyheung to".

¹⁷He: zi gi nanu" ri ngoo byid: da" amyeing" nghoid- nyang cang" nyang jheddab goo" ge' ga: Yesu tid.

¹⁸Mougmyid byu yi nanu" ri ngheing" nghoid rigi nanu" ri angheung" shi" ri ngoori shi" ngheing" bye khyoo: ri boin: nyid ge'.

¹⁹Nanu gi moug myid ge' seing mo nghoid ri gi moug myid gi nanu" ri nyang: seung zi yhangti" jheddab wa zi nghoid. Nghoid loug we' ngoo gi nanu" ri he: mougmyid mo khyen: thu' too" bye: yoomo nanu" gi he: mougmyid yo' ci: asen. Houg: yoomo mougmyid gi nanu" ri ngheing" zi nghoid.

²⁰Join gi yhoem: seing: tho' moo je gyi: zi anghoid. Ngoo nanu" ri tid yu" bye: ziri myid boin ge'. Mougmyid byu wi gi ngoori shen" yhen nghoid rigi nanu" ri we shen" yhen wa zi nghoid. Nyangnu" gi nga" da" dang: ri cang lo" boem wa nghoid rigi nanu" da" dang: ri we' cang lo" boem wa zi nghoid.

²¹Nghoidloug we' nyangnu" gi ngoori nhang: kaid da" Aseing: ri ase' boem yoomo nga" myeing yoomo nanu" ri shen" yhen boem wa zi nghoid.

²²Ngoo gi jure" lho: nanu" ri akho" kyo" nghoid rigi nyangnu" yooboo shoid vhang goo" wa zi anghoid. Akhid" nyangnu" gi nyang: nya: da" yooboo ri shoid vhang: ci: boem yoomo ci" we' ayo" ga: boem loo.

²³Ngoori ngheing" su: gi nga" phoo ri we' bo ngheing" zi nghoid bye.

²⁴Gyeing" nyang: ngoo gi goo" ji hang" we' akoid; da" moo" joem ri nyangnu" da" shid' moo akoid; shug loo: nyid rigi nyangnu" moo yooboo aboo wa zi nghoid. Akhid" koem gi nyangnu" gi ngoo koid; shug da" moo" ri myang boem bye. yoomo ngoori we' nga" phoo ri we' ngheing" boem bye.

²⁵Hid: su" ngheing" da" khyoo: gi-Nyangnu" da" tarha" moo lhid' to" ziyo' nyangnu" gi ngoori ci: yoo abo da" jang" moo- ngheing" boem ga: to" ziyo' dakhyoo" bue" lo da" khyoo: nyang: nghoid bye.

²⁶Mangso da" deung main" khyoo: ri phang shug da: pang" thoug wa da" Mangso: jang" mo gyoo lo da" pang" thoug Aseing: ein: da:- gyeungshang: venyi nghoid. Ngoo gi nyang: ri Pho jang" mo nhang: kaid' lho: nga" khyoo: ri sagsi: kham: wa zi nghoid.

²⁷Nanu" we' xang: shid" mo nyang:- ngoo yo" dage" nyid boem yoomo nga" da" khyoo: ri sagsi: kham: boem wa zi nghoid.