Read Lashi YOHAN 16 Bible Online

YOHAN 16 - Lashi bible

YOHAN 16

¹Re" da" loem" jeing" khyoo: abyo, yoin" loo" wa shid' re" he: khyoo: joem ri ngoo tid kyoo" khoo bye.

²Nanu" gi Tarha" jung joem mo khaid thu' pyam zi shau" boem lho: Nanu" ri said loo wa hougsu" koid' mo nyangnu" gi Mangso moozoo" voin, vu, khyoo: nyang: nghoid ga: soin: yu wa da" ayo gi ju" loo wa,

³Nyangnu" gi phoo ri ase' boem ngoori we' azheing: se' boem. Houg: yoomo hid: su" nanu" ri we' koid; lo boem wa.

⁴Ngoo nanu" ri he khyoo: tid kyo" zigi nyangnu" we' nanu" ri tid yhang: ti" koid wa ayo, ju" ngoo nanu" ri no, mo tid too" bye zigi nanu" myid boin wa shid re: nghoid. Ngoo gi nanu" yo" dage" nyid shi" yoomo nanu" ri hau: da" khyoo: no" re- atid kyoo.

⁵Akhid" koem gi ngoori nhang: kaid su: jhang khyoo:- doem: loo" wam: bye. Nghoidloug we' nanu" hang" we' ngoo kha khyoo: loo" wa zigi amyid: boem nghoid da.

⁶He: da" khyoo: ri ngoo tid kyoo" yoomo nanu" gi nheig gye" gye" gyo: koug nyid boem ago".

⁷Nghoidloug we' nanu" ri ngoo Deing" deung tid nyid da: zigi nanu" shid' re" je ge'. Ngoo alo" nghoid rigi pang" thoug wa su: gi nanu" jhang gyoo" loo wa zi anghoid. Ngoo lo" thang: hau: da" zi: nanu" jhang khyoo: nhang: kaid wa nghoid.

⁸Hau: da" yug ju" gyoo" loo lang" gi moug myid byu yi ri yoobo da" khyoo: we' deung main" da" khyoo: ri we' Mangso tarha" dang: phyed' wa da" khyoo: ri we' shoid vhang: khyoo: ri bang bang nyang: phang shug loo wam bye.

⁹Houg: bang: gi ngoori loem" jeing" da" khyoo: aboo yoomo yooboo yo" sen: lho nyangnu" shoid nyid boem.

¹⁰Ngoo gi pho jhang khyoo: loo" wa zi nghoid yoomo nanu" ngoori shau" myang loo: wa anghoid loo: yoomo we' nyangnu" gi deung main" da" tarha" yo' sen: lho: shoid nyid boem.

¹¹He moug myid ri vhoeb khang" su ri tarha" dang: bain phyed' bye yoomo dang: phyed' zi yo sen lho: nyangnu" shed nyid boem.

¹²Nanu" ri ngoo tid wa zi myoo" sho' boo shi" nghoid loug we' akhid" nanu" yo" kham: yu goo" wa zi anghoid.

¹³Nghoidloug we' Mangso da" khyoo:- deing byeung" da" tarha" ri phang shug da" gyeungshang: Venyi: ju" gyoo" loo lang" gi nanu" ri deung main" da" tarha" bain sho' re" phang shug wam bye. Hau: da" gyeungshang: Venyi: gi nyang: vho: da" khyoo: tid kyoo" wa zi anghoid. Nyang: shaug" gyoo: ci: gu: ri tid kyo" lho: thang: phyang" bue" loo wa khyoo: ri tid wa nghoid.

¹⁴Nyang: gi ngoo tid dang ri gyo: ci. lho: nanu" ri doem tid kyoo" wa nghoid yoomo nga" da" myonhoo: phung" yoeb' ri doug bang loo nhang: wa zi nghoid.

¹⁵Pho jang" moo jo, moo jo, gi ngoo yo" sen: nyid. Houg: yoomo gyeungshang: da" Venyi: gi ngoo byid: zi yu lho: nanu" ri doem tid kyoo" wa ein: wigi ngoo tid.

¹⁶Ayo, dajhi' nghoid lang" gi nanu" ngoori myang loo wa zi anghoid. Hau: thang: ri ayo, dajhi' myang" lang" gi ngoori doem shau" myang goo" wa ga: tid.

¹⁷Cangzoo: yi dayham" bang: nyang: cang" nyang: tid go" nyid zi gi ayo, dajhi' myang" lang" nanu" ngoori shau" myang loo: wa zi anghoid. Hau: thang: ri ayo, dajhi' myang" lang" gi ngoori doem myang wa ga: Aseing: tid lho: Hau: tho' moo gootu: we' Aseing: gi ngoo gi pho jhang loo" wa ga: we tid.

¹⁸Ayo, dajhi' myang" ri ga: zigi ce: noem ri tid nau zi nghoid? ce: moozoo" khyoo: ri Aseing: tid nau nyid zi ngoonu" asi- ga: tid go" nyid boem.

¹⁹ASEING Yesu gi nyangnu" nyang: ri houg: su" myid nau nyid boem zigi si' yoomo nanu" nyang: cang" ce: noem khyoo: ri myid: tid go" nyid go" ayo, dajhi' myang" lang" nanu" ngoori myang loo: goo" wa zi anghoid ein: wigi we' hau: thang: ri ayo, dajhi' doem myang" lang" gi ngoori doem shau" myang wa ein: wigi we' ngoo tid da" dang: yo" sen: wigi nghoid go" la".

²⁰Deing" deing nanu" ri ngoo tid da" zigi nanu" gi ngougmyeing" shoo" thui: to" nyid goo" wa. Nghoid loug mougmyid byu yi koem gi gau yi nyid boem wa. Nanu" sho" jhen: shau" nyid boem nghoid loug nanu" da" sho" jhen: khyoo: gi gau yi myen jhoem" khyoo: bue" loo wa.

²¹Myiyi: dayug gi zoo: khu: wa uri gyi" sho' no zi shau" lho: bain khu: kaid lang" gi mougmyid moo byu dayug yo" khu: kaid yoomo nyang: kham: zo: da" noodam ri to" myhid' bye.

²²Nanu" moo akhid" uri nheig koug nyid boem nghoid loug we' nanu" yo" ngoo dalheing: doem shau" goo" wa nghoid yoomo nanu" hau: uri gau yi boem wa zi nghoid. Nanu" da" gau yi da" khyoo: ri hang" wigi we ayo" lhoid' yu pyam.

²³Hau: da" bidnyid ju" lang" nanu" gi ngoori ce: ja: we' mho' aca" loo. Deing" deing nanu" ri ngoo tid da" zigi nanu" mho' da" khyoo: dangain" ri nga" myeing yoo mo phoo Mangsoo gi nanu" ri byid: wam bye.

²⁴Akhid" ju" sho' nanu" gi nga" da" myeing ri lang lho: daja" we' amho, atid yu" boem shi". Nanu" da" ngei pyo: da" khyoo: byeung" byeung" yo" yu wa shid' re" Akyu" mho' nyid ge'. Nanu" mho' ziyo' dakhyoo" ti"- yo" yu boem wa zi nghoid.

²⁵He: da" khyoo: joem ri dangtu' ci: lho: ngoo tid bye. Hid: su" dangtu' aci: loo: Phoo Mangso da" khyoo: ri bang" bang tid kyo" loo wa da" ayo, gi ju" loo wa.

²⁶Hau: da" bidnyid ayo, ju" lang" nanu" gi nga" da" myeing ri lang: lho: Akyu" mho' yoid: lo boem wa. Houg: gi ngoo nanu" da" gung thid' mho' byid: wa ein: tid nau zi anghoid.

²⁷Phoo nyang: lhang"- nanu" ri jheddab nyid yoomo nghoid. Nanu" gi ngoori jheddab wigi ngoo gi Mangso jhang khyo" re" da" ziri loem" jeing" yoomo Phoo gi nanu" ri gye jheddab nyid.

²⁸Ngoo gi phoo jang" mo moug myid moo gyoo" lo. Akhid" he: moug myid ri kang" lho: pho jhang khyoo: doem loo" loo: wa ga: tid.

²⁹Cangzoo: yi zheing: tid da" zigi Akhid" Aseing: gi dangtu' aci: loo bang bang nyang: tid nyid bye.

³⁰ASEING Yesu gi khyoo: acang: joeb ri si' su: nghoid zigi akhid" ngoonu" se' boem bye. Aseing: ri hang" ci: myid: nyid cang aboo loo. Houg: yoomo Aseing: gi apyaid' ato: da" Mangso jang" mo gyoo" lo da" Aseing: nyang: nghoid ziri ngoonu" loem" jeing" boem bye"- ga: doem tid boem.

³¹Yesu gi Akhid" nanu" ngoori loem" jeing" deing bye: go" la"» ga: myid.

³²Nanu" gi nyang: nya: yhoem: khyoo: nyang: phang: gang: go" lho:. Ngoo we' ngoo nyang: kyeing" ri nyhed: pyam' khoo' shau" wa da" ayo, gi akhid" lang" ju" loo bye. Nghoidloug we' phoo Mangsoo gi ngoo yo" dage" nyid yoomo ngoo gi ngoo nyang: kyeing" nyid zi anghoid.

³³Nanu" gi ngoo yo" dadeing: daloem: za: khyo" myen, jham" khyoo: yo" yu wa da" shid' re" he: dang: ri ngoo tid bye. Nanu" gi mougmyid moo nyid shi" da" uri shojhen: kyi" khyeug zi shau" zoo: goo" wa. Nghoidloug we' geing: geing: teing teing shang" yab jo, ge' ngoo gi he: mougmyid ri oung: pyam bye:- ga: tid.