Read Lashi YOHAN 19 Bible Online

YOHAN 19 - Lashi bible

YOHAN 19

¹Hau: thang: ri Pilaid khokham" gi Yesu ri khe: shu" loo" nhang: lho: gyoem thoung" wigi yug nhang.

²Gyizoo yi gi zu: mug ri koid; yu lho: Yesu da" vhuloem moo zhung" byid. Byi ni sheing: ri we' nyang: ri foid byid: to.

³Nyangnu" gi Yesu jang" moo tain" re" boem lho: «Yuda khokham" phoo kang: sheing: nyid baja" o"» ga: tid zoore thoin: byid: boem ago".

⁴Pilaid khokham" gi nghi: khyoo: dalheing: thu' lo" lho: Meing: byu yi ri yu" ge'. He: yug ri said pyam wa shid' re" ngoo ce: yooboo we' amyang khyoo: nanu" we' si' wa shid' re" nanu" jhang khyoo: ngoo shu" thu' loo wa ga: tid.

⁵ASEING Yesu we' zu: mug ri zhoung" ci: lho: byi ni sheing: ri void ci: wigi thu' re. Pilaid khokham" gi yu" ge' he: yug nyang: nghoid bye: ga: tid.

⁶Khainjung agyi yi yo"- no ku" yhoem moo" zung" lhug da" gyizoo: yi gi Aseing: Yesu ri myang lang" nyang: ri pyang" zeing: moo baid jen" said pyam ge' ga: nyho: phau kaid ago". Pilaid khokham" gi Nanu" nyang: nyang: ri khe: shu" lo" lho: pyang" zeing: moo baid jen" said pyam ge' nyang: ri shid: dam byid: wa zigi ngoo ce: yooboo we amyang ga: tid.

⁷Meing: byu phung: moo" gi He: yug gi nya: da" gung ri Mangso da" nya: zoo: nghoid ga: tid yoomo shid: dam kham: moin: da" khyoo:- ngoonu" da" tarha" moo bo nyid; ga: tid nyid boem.

⁸Houg: bang: da" dang: zheing: shaug" gyoo: lang" Pilaid khokham" gi je gyo: gyoug lo.

⁹Houg: yoomo yhoem: khoug: khyoo: doem vang lo" lho: ASEING Yesu ri Nang gi kha: mo re" zi nghoid lha"» ga: doem myid. Nghoidloug we' ASEING Yesu gi jed' we" aga: loo: tam" to.

¹⁰Pilaid khokham" gi nang ri ngoo gi nang ri yo" nhang: kaid da" akhang" we' pyang" zeing: moo yo" baid jen" said pyam wa da" amyeing we' ci: zi nang asi rhe" ga: myid.

¹¹ASEING Yesu phougtu" zigi nang ri Mangsoo ab byid: yoomo za: hid: yhangti" yo" zi nghoid. Houg: yoomo ngoori we' re" da" lo, moo ab byid: su: gi yooboo je gyi wa nghoid- ga: tid.

¹²Hid: su" ga: tid yoomo Pilaid khokham" gi Yesu ri doem lhoid kaid wa da" khyoo: sho: nyid. Nghoidloug we' Meing: byu yi gi he: yug ri doem lhoid kaid nghoid rigi Aseing: zoug moo" gi Ketha khokham" da" bidnoem anghoid loo. Hang" nghoid loug we' nyang: nya: da" gungdu: ri khokham" ga: tid su: gi Ketha khokham" ri tu: lhei" su: nghoid- ga: je nyho: lo ago".

¹³He: da" dang: ri shaug" gyoo: lang" gi Pilaid khokham" gi Yesu ri nghe: shoid khyoo: shu" thu' lo" lho: Lug pyi" myhu" to" da" tarha" gabyam: tho' mo, zhungtang tho' moo zhoung: jo, nhang. (Hau: lug pyi" myhu" to" da" gabyam: ri Hebre myeing" khyo" gi Gabatha ga: da" joyoo nghoid.)

¹⁴Hau: da" ayo, gi lhed: kaid pui" xang: shid" nyid"- bid gung zoo: tu: ri" yo, nghoid bye. Pilaid khokham" gi yu" ge' He: yug gi nanu" da" khokham" nghoid ga: Yuda byumyu" yi ri tid.

¹⁵Houg: bang: gi nyang: ri said pyam ge' said pyam ge' baid jen" said pyam ge' ga: doem nyho: lo ago". Pilaid khokham" gi Nanu" da" khokham" phoo ri pyang" zeing: tho' moo baid jen" said pyam noug go" la"» ga: doem myid. khainjung agyi moo": yi gi ngoonu" moo Ketha khokham" mo led lho: gootu: khokham" anyid ga: phougtu" boem.

¹⁶Houg: lang" Pilaid khokham" gi Yesu ri pyang" zeing: tho' moo baid jen" said pyam wa shid' re" nyangnu" da" lo, moo jha" ab kaid bye. Houg: su" nghoid yoomo nyangnu" gi Yesu ri khe: shu" lo" boem bye.

¹⁷Yesu gi vhu" gyab' boug ga: da" joyoo khyoo:- nya: pyang" zeing: ri vu, lho: yhe: lo. (Hau: da" joyoo ri Hebre myeing" khyo" Golagotha ga: zi nghoid.)

¹⁸Houg: moo Yesu ri Pyang" zeing: moo baid jen" said boem bye. Yesu yo" dage" gootu: byu eig yug ri we' Yesu da" lo, yo shoid moo dayug- lo, koung" shoid moo dayug- pyang" zeing: tho' moo bo baid jen" said boem. Yesu rigi gung" gung moo kaid to.

¹⁹Pilaid khokham" gi-xang: yoeb ladoo" mougsoug" lhid" lho: ASEING Yesu da" pyang" zeing: tho' moo tab too" nhang. Hau: da" mougsoug" gi (Yuda byu yi khokham" Nazared voo byu Yesu ga: zi nghoid.

²⁰Yesu ri pyang" zeing; tho' moo baid jen" said da" joyoo gi voogung yo" gye jhang yoomo byu myoo" sho' mo, gi hau: xang: yoeb ladoo" mougsoug" ri re" yo" nghab boem. Hau: mougsoug" ri Hebre myeing"- Latin myeing"- Greek myeing" khyo" lhid" tab to" boem.

²¹Khainjung agyi yi gi Yuda khokham" ein: alhid" goo"- He: yug gi ngoo gi Yuda khokham" nghoid ga: tid su ein: za: date: lhid" too" ge' ga: Pilaid khokham" ri re" kyo" to" boem.

²²Pilaid khokham" gi Ngo lhid" to" khyo" nghoid bye: ga: doem tid.

²³Gyizoo: yi gi ASEING Yesu ri pyang" zeing: moo bain baid jen" to" thang: ri Yesu da: byisheing: ri myid: du khyo, lho: dayug dadu zheing: yu lo" ago"- nyangnu" gi nya: adang byisheing: ri nyangnu" me" lab, lho: yu lo" boem. Nghoidloug we' hau: da" byi: gi coeb' khyoo" aboo loo: yo, to" da" byi: nghoid yoomo

²⁴Gyizoo: yi gi he: byi: ri aceig goo"- me" lab lho: dayu shang ga: nyang: cang" nyang: sham: go" nyid. Gyizoo: yi hid: su" zheing: koid; da" khyoo: gi jhoem mungdang: moo Houg: bang: gi nya: da" byi: ri zheing: gam go. Nga" da" byi: sheung ri me" lab, lho yu lo" boem: gyizoo yi gi hid yhang: ti" koid boem ago".

²⁵Hau: da" uri Yesu da" nya: myhi' yo"- nya: myhi' da" nya: no gi Klopha da" yhoem: seing: myhi' Mari yo"- Magadala voo mo Mari we' ASEING Yesu da" pyang" zeing: yang moo yab jo, ago".

²⁶Yesu gi nya: myhi' yo"- nyang: jheddab da" cangzoo: phoo yab jo, ziri myang. Houg: yoomo Yesu gi nya: myhi' ri tid. He: yug gi re" zoo: nghoid- ga: tid.

²⁷Hau: thang: ri cangzoo: phoo ri he: yug gi re" myhi, nghoid ga: doem tid. Hau: yo, mo wigi hau: cangzoo: phoo gi nyang: yo" dage" nyid wa nya: yhoem: moo shu" lo".

²⁸Hau: ayo, moo moo" dangain" bain bye: da" khyoo: ri ASEING Yesu gi si' yoomo Jhoem mougsoug" moo bo ziyo' dakhyoo" ti"- bue" loo wa shid' re" Yesu gi ngoo gyid shed' ga: tid.

²⁹Hau: joyoo moo gyid jhen: yo" kaid pyeing to" da" yam daloem: jo. Houg: bang: gi panglai gyid nyoeb thei" moo gyid jhen nyhoin" yu wigi jam pheing" yang: moo tab' lho: Yesu da" nhoid moo yhoin" jhoug boem.

³⁰ASEING Yesu gi hau: gyid jhen ri dajhi' shug lho: moo" bain bye" ga: tid zoore"- vhuloem ri nghoe" khyo kaid wigi kang: khyo" loo" khari" bye.

³¹Yuda zoug: myeing ci: mo, gi pyang" zeing: moo baid jen" lhang" too" su: da" khyid ri youg khyau" lho: mang ri yu loo" wa da" amyeing" byid: wa da" shid' re" Pilaid khokham" ri mho' ago". Nyangnu" hid: su" mho' da" khyoo: gi hau: nyid gi bainthu wim: nyid" nghoid. yoomo Yuda Dougno: Bidnyid ri shid: mang doem: ri pyang" zeing: moo alhang" too" nhang: noug yoomo we' nghoid da- hau: Dougno: Bidnyid gi - gooki" led' da" gyeungshang: Dougno: Bidnyid nghoid.

³²Houg: yoomo gyizoo: yi gi re" lho: wigi ASEING Yesu yo" dage" pyang" zeing: moo bo jen" lhang" to" da" xang: shid" dayoug da" khyid ri youg khyau" lho: gootu: dayoug da" khyid: ri we' youg khyoug" byid: pyam boem.

³³Nyang: nu" Yesu jhang ju" yhe: uri nyang: shid: jo, bye: yoomo Yesu da" khyid: ri gi ayoug khyoug" loo: nghoid ago".

³⁴Nghoidloug we' gyizoo: dayug gi Yesu da" nam joug moo lham: toin wi thau" kaid da" uri dalheing: dam nyang: suid" yo" gyid yau thu' lo.

³⁵(He: khyoo: ri nanu" we' loem" jeing" loo wa shid' re" myojid" myang da" sagsi: dayug gi tid kyoo" bye. Houg: su" tid kyo" da" khyoo: gi deingmain" da" khyoo: nghoid. Hau: yug nyang: nya: dang: main" da" khyoo:- ri nyang: se.)

³⁶Hid: su" bue" lo da" khyoo: gi nya: shoo" youg dakhaid ri we' gyoug wa anghoid. wa ga: Jhoem: mungdang: moo bo ziyo' dakhyoo ti"- bue" lo da" khyoo: nghoid.

³⁷Gootu: da" jhoem dang: moo we' Byu yi gi nyangnu" thau" phoug too" su: ri nyangnu" yu" nyid boem wa"- ga: boo lhid" to" ga: tid.

³⁸Hau: da" thang: ri Aramathi voo mo Yoseb gi Yesu da" nghain" doem ri yu shung: wa da" shid' re" Pilaid khokham" jang" moo akhang" yhe: mho'. Yoseb gi Yuda zoug myeing" ci: mo, ri gyoug yoomo boin: abang" da" Yesu cangzoo: dayug nghoid nyid. Pilaid khokham" amyeing" byid: yoomo Yoseb gi nghain" doem ri yhe: yu bye.

³⁹Shid' phyang" ASEING Yesu jang" moo myen gung ri re" shau" su:- Nikodi we' moora: yo" nam pyo: seig xu: lhu: lheig to" da" nam pyo: xu: soem" xi: juid" koo: ci: lho: Yoseb jang" moo bo cang yhe: lo.

⁴⁰Nya: eig yug gi ASEING Yesu da" nghain" doem ri yu khyo, lho: Yuda byumyu" yi da" mang myhoeb thung" jo ziyo' dakhyoo" ti"-- nam pyo: moora: yo" dage" pain" phyu: yo" thoeb boem.

⁴¹Yesu ri pyang" zeing: moo baid jen" said da" joyoo nam moo khyam daloem jo. Hau: khyam: khoug: moo hang" ri we' anyhoeb' yu" shi" da" loeb seig daloem: jo.

⁴²Hau: nyid" gi Yuda Byu yi Dougno: Bidnyid ju" yid nghoid yoomo nghain" doem ri jang" moo jo, da" hau: loeb seig moo yhe: kaid to" boem.