Read Lashi YOHAN 21 Bible Online

YOHAN 21 - Lashi bible

YOHAN 21

¹Hau: thang: ri Yesu gi Tiberi gyid nung" yam moo cangzoo: yi ri nya: gung dalheing: doem thu' shug. Thu' shug da" aved' gi hid: su" nghoid nyid.

²Simun Petru- Thoma (Galile meing: Kana voo byu) Nathanela- Zebedi da" nya: zoo: yi yo" cangzoo: gootu: eig youg bang: gi dage" nyid boem ago".

³Simon Petru gi gootu: ri ngoo ngoodo, kuang yhe: loo" wa ga: tid. ‹‹ Houg: bang: gi ngoonu" we' bo cang ri" wa ga: tid boem.» Houg: yoomo nyangnu" gi lhid' yo' ngoodo, kuang thu' yhe: lo" boem. Nghoid loug we' hau: myen goin" nyangnu" ci" we' ashau" boem.

⁴Bid xain" lo da" uri Yesu gi gyid yam moo yab jo, nghoid loug we' cangzoo: yi gi Yesu nghoid zire: ase' boem.

⁵Hau thang: ri nyang:- nyangnu" ri zoo: lu: yi we"- nanu" ci: ayoo" shi" goo" rhe" ga myid:-. houg: bang: gi ‹‹Ci: ayo" boem o"» ga: phoug tid.

⁶Yesu gi nanu" lhid' lo, yo shoid khyoo:- goin re" du" yu" ge' nanu" ngoodo' shau" kuang boem ago" wa ga: tid. Aseing: tid ziyo' dakhyoo" ti"- nyangnu" gi goin ri du" khyo' kaid lang" ngoo: myo: yoo" yoomo ayo" doem lang thoid yu boem ago" da.

⁷Yesu jhed' dab, da" cangzoo: phoo gi Aseing: danghoid nhung: o"- ga: Petru ri tid kyo. Aseing: nghoid ga: zi ri shaug" gyoo: lang" Petru gi nyang: khyoid to" da" byi: ri gung moo baid yeig lho: wigi gyid nung" khyoo: byam gyoo" loo" khare". Khasu" wim gari nyang gi byi mi khyoid pyam lho: mod zei: nyid yoo mo nghoid.

⁸Cangzoo: goo" ji gi lhid' yo' gyid yam khyoo to" lho: ngoodo' byeung" sho' bo da" goin ri lang she: yu" boem. Nyangnu" gi gyid yam mo wim: xi: lam' koo: ve: jang" moo zheing: nyid boem.

⁹Nyangnu" gi lhid' tho' mo gyo" lho: tung: gung moo ju" lo lang" zooyho' ri we' myi: gyu: moo kang: da" ngoodo ri we' lo" myang boem

¹⁰Yesu gi nanu" akhid" yo" da" ngoodo' dayham" ri ci: loo ge" ga tid.

¹¹Simun Petru gi lhid' tho' moo do, lo" lho: ngoodo' zeing: joem yo" byeung" jo, da" goin ri tung: gung ju" sho' she: yu da. Ngoodo' dasho: wim: xe soem" du: bo da:- ngoodo' houg: myhoo, myoo: nghoid loug we' goin gi ajeig loo.

¹²Yesu gi lo zoo: ge'. ga: nyangnu" ri lhoung nyangnu" da" Aseing: nghoid ziri se' boem yoomo cangzoo: yi kha: yug we' nang hang nghoid lha"» ga: avoem" myid: boem nghoid da.

¹³Yesu gi nyangnu" nyid da" jang" moo yhe: lho: zooyho' ri yu wigi nyangnu" ri byid. Ngoodo' ri we' houg: su" yu lho: byid.

¹⁴He zigi nyang: shid: jang mo doem dei to'' lo thang ricangzoo: yi ri gung thu' shed da" zigi he: lheing: yo" ri soem" lheing: nghoid bye.

¹⁵Cangzoo: yi bain zoo lang"Yesu gi Yohan nya: zoo: Simun we"- hid: bang: jheddab tho' moo nang ngoori je jheddab la"» ga: Simun Petru ri myid. Simun gi nghoid Aseing: we"- nang ri ngoo jheddab zi nang se' ga: tid.

¹⁶Yesu dalheing: doem tid zigi Yohan nya: zoo: Simun we"- nang ngoori jheddab la"» ga: doem myid. ‹‹ Petru gi nghoid Aseing: we"- nang ri ngoo jheddab zi nang si' gu nghoid ga: tid›› ASEING Yesu gi nga" yang joem ri zung" nyid we' ga: tid.

¹⁷Soem" lheing: ein: lheing: we' yesu gi Yohan nya: zoo: Simun we"- nang ngoori jheddab la"» ga: doem myid. Hid: su" soem" lheing: ju" sho' myid: nyid yoomo Petru gi nheig koug lo wigi Aseing: we" nang gi ce: noem ri we' dangain" si' su: nhgoid' - nang ri ngoo jheddab zigi nang se' ga: doem tid. Yesu gi nga" yang joem ri zung" nyid' we' ga: doem tid.

¹⁸Deing" deing nang ri ngoo tid zigi nang gi ngi shi" da" uri ri ri soin' ci: lho: loo" nau jang" moo loo" se' nyid. Mang loo" lang" gi nang gi eig lo, goin" tu: lho: subi" gi nang ri tei" wigi nang anau lo" da" joyoo khyoo: shu" lo" boem wa ga: tid.

¹⁹(Hid: su" ga: tid jang" moo Petru gi ci: te" da" shid gyoin yo"- Mangso da" myonhoo: phung" Yoeb thoin" pang byid: wa da" khyoo:- Yesu tid shed' zi nghoid.) Hid: su" ga: bain tid lang" Petru ri nga" thang: moo cang we' ga: Yesu tid.

²⁰Petru gi lheing: yu" kaid da" uri nya: thang: moo Yesu jheddab da" cangzoo: phoo ri myang. Hau: yug gi myen xoin: zoo: uri Yesu da" nam moo nghe: to" lho: Aseing we"- Aseing ri gyivoo yi da" lo, moo ab pyam wa su: gi kha yug nghoid wa lha"» ga: myid su: nyang: nghoid nyid.

²¹Petru gi hau: da" cangzoo: phoo ri myang lang" Aseing: we" he: yug gi ci: te" su: nghoid lha"» ga: Yesu ri myid.

²²Yesu gi ngoo doem gyoo" re" da" bidnyid ju sho' nyang: ri dei nyid nhang: nau nghoid rigi houg: gi nang yo' ci: sen: lha". Nang gi nga" thang: cang we' ga: tid.

²³Houg: su" nghoid yoomo hau: cangzoo: phoo gi ashid: loo: wa ga: da" lu dang: gi cangzoo: yi da" akhoug: moo byo sain" loo" bye nghoid loug we' Yesu gi-hau: cangzoo: phoo gi ashid: loo: wa ga: tid nau zi anghoid. Ngoo doem gyoo" lo da" bidnyid ju" sho' nyang: ri dei nyid nhang: nau nghoid ri hau: zigi nang yo" ci: asen: la". ein: wigi date: tid zi nghoid.

²⁴He da" khyoo: ri lhid" too" su: gi hau: khyoo: ri tid da" cangzoo: phoo nyang: nghoid bye. Nyang: tid da" khyoo: joem gi deung main" nyid ziri ngoonu" se'.

²⁵Yesu zei: da" moozoo" goo tu: myoo" sho' jo, shi". Hau: zei: to" da" moozoo" dangain" ri daja: thang: moo daja: lhid" to" nghoid rigi mougmyid gyab, goin" jang" moo hau: mougsoug" pug joem too" wa da" jo yoo lang" jo, loo: zi anghoid ein: ngoo myed o".