Read Lashi YOHAN 4 Bible Online

YOHAN 4 - Lashi bible

YOHAN 4

¹Yesu gi Yohan tho' mo Byu myoo" sho' ri Babtisma byid: nyid ziyo' cangzoo: yi je myo: lo ziri Pharishe zheung: shau" gyo: boem.

²Gyeing" nyang: ga: rigi ASEING Yesu nya: gung gi Babtisma ri a byid. Nya: cangzoo: yi za: date: kham: byid.

³Houg: su" Pharishe yi shau" gyo: ga: zi ASEING Yesu si' lang" gi Yuda mung" mo, thu' lo" lho: Galile mung" khyoo: tau" lo.

⁴Nya: khyoo: gi Samari mung" khyo" phyed led: loo" ca" zi nghoid.

⁵Samari mung" mo Sukha ga: da" voogung moo ju" lo. Hau: voo gi Yaku nya: zoo: Yoseb ri byid: to" da" mougmyid yo" athei" ve: da" joyoo nghoid.

⁶Hau: joyoo moo Yaku da" gyid thung" jo, Yesu gi khyoo: so" myung: yoomo gyid thung" nam, moo zhoung: jo. Hau: da" ayo, gi bidnyid" gung tu: da" ayo, nghoid bye.

⁷Samari myhi, dayug gi gyid kham: wa shid' mo jure. ASEING Yesu gi Ngoori shug gyid dagoem koo: byid: we' ga: hau: myiyi: ri tid.

⁸(Nya: cangzoo: yi gi zoo: noem qei wa shid' re" voo khoug: khyoo: vang lo" boem uri nghoid.)

⁹Myiyi myhi, phougtu" zigi nang gi Yuda byumyu" dayug nghoid. Ngoo gi Samari byu dayug nghoid nga" jang" mo khasu" wim wigi shug gyid ri mho' lha". (Hid: su" myid: da" khyoo: gi Yuda byumyu" yi gi Samari byu yi oug" khu, alhoung poung" ci: yu" yoomo nghoid.)

¹⁰Yesu phougtid zigi Mangsoo ci: byid: nyid ziyo'- nang ri shug gyid dagoem mho' nyid su: gi hang" nghoid da" khyoo: ri nang se' nghoid ri koem gi hau: youg jang" mo nang gyid mho' wa zi nghoid. Hau: yug we' nang ri kangso' gyid byid: wa zi nghoid ga: tid.

¹¹Hau: myiyi: gi ‹‹Aseing: we" gyid thung" gi gye no,- Aseing: nang gyid pung" we' aci:- nang khayo kangso' gyid se' yoo" wa lha".»

¹²He: gyid thung" gi phoug" Yaku ngoonu" ri byid: to" zi nghoid. Nyang: we' nya: zoo: yi we' Yang joem Nu: joem gi he: gyid thung" mo shug led loo" bye. Nang Yaku tho' je gyi: la".

¹³Yesu doem phougtid zigi «He: gyid shug mo, dangain"- thang: ri gyid doem shed shi" wa.

¹⁴Nghoidloug we' ngoo byid: wa da" gyid shug mo, hang" we' khanham we' gyid doem shed loo: wa zi anghoid. Hau: ngoo byid: da" gyid shug su: gi nya: da" akhoug: moo gyid bug dalang bue" loo wa. Hau: zigi nya: da" shid' re" Kangso' gyid bue" wigi nyang: ri apyaid ato: kangso' byid: wa zi nghoid.

¹⁵Hau: myiyi: tid zigi ‹‹Lu daid' we"- Ngoo ri thang: phyang" gyid adoem shid wa shid' re" we' He: joyoo moo re" lho: gyid akham: ca" loo: wa shid' re" we' hau: gyid ngoori byid: jhug we"» ga: mho' da.

¹⁶Yesu tid zigi lo" lho: Re" yhoem: seing: phoo ri khe: shu" ri" we' ga: tid.

¹⁷Hau: myiyi: phougtu" zigi ‹‹Ngoo yhoem: seing: phoo dayug we' ayoo"» ga: tid. Yesu phougtu" zigi ngoo yhoem: seing: phoo ayoo" ga: nang tid zi deing.

¹⁸Nang gi yuggi wim: yug yo" loxo' yu bye:- Akhid" nang yo" dage" nyid su: gi re" yhoem: seing: phoo anghoid. Nang gi nghoid deing ziri tid nyid abye:.»

¹⁹‹‹Ngoo yu" ri nang gi Lapi: dayug nghoid zi myang si' bye: ga:›› myiyi: myhi, tid.

²⁰Nga" phoug" phyid" gi he: da" boem moo Mangsoo ri noku boem. Nanu" Yuda byumyu" yi gi Yerusalem voo moo da noku ga: tid boem›› ga: tid.

²¹Yesu gi myiyi: zoo: nang we"- nga" dang: ri loem" jeing" we' he: boem tho' moo we' Yerusalem voo moo we' phoo Mangsoo ri anoku lo: da" ayo, gi ju" loo wam bye.

²²Nanu" Samari yi gi nyang: tu: nyang: ase' da" Mangsoo ri Noku ago". Ngoo nu" gi ngoonu" nyang: si' bye: da" Mangsoo ri da noku boem. Khasu" wim gari Khyoid yu khyoo: gi Yuda byumyu" mo wigi ju" loo yoomo nghoid nyid.

²³Noku loem: khoug: mo, gi Phoo Mangsoo ri Venyi: yoem: vhoo" yo"- deingmain" khyo" noku wa ayo, gi ju" loo wa. Akhid" lang" hid: moo ju" nyid bye. Houg: su" loem" jeing" noku mo, ri Mangsoo vho: ngei nyid.

²⁴Mangsoo gi Venyi: nghoid- Venyi: da yoem: vhoo" khyo" za: byugi deingmain" khyoo" yo' noku nyid.

²⁵Hau: myiyi: myhi, gi ‹‹Meshia nyang: ju" gyoo" ri" wa zi ngoo se'- Hau: da" ju" gyoo" loo lang" gi ngoonu" ri khyoo" dangain" re" tid shed wa zi nghoid›› ga: tid.

²⁶Yesu doem tid zigi ‹‹Hau: yug gi akhid" nang yo" doem go" nyid su:- ngoo nyang: nghoid bye.»

²⁷Hau: uri nya: cangzoo: yi gi doem ju" loo bye. Nyangnu" gi Yesu myiyi: myhi, dayug yo" doem go" nyid zi lo myang yoomo gye" yu" mau" boem ago". Nghoidloug we' hau myiyi: myhi, ri ‹‹Ce: noem vho: ga: khyoo: ri we'›› Yesu: ri ‹‹Ci: koid; hau myiyi: myhi, yo" doem go" nyid›› ga: nyangnu" hang" we' avoem" myid: yu" boem nghoid ago".

²⁸Myiyi: myhi, gi gyid yam: ri too" kho' lho: voo khoug: khyoo: lo" wigi voo byu yi ri

²⁹Ngoo koid; da" khyoo: dangain" ri tid thu' byid: su: ri re" yu" ge'. Nyang: gi Meshia nghoid wa la"» ga: wigi lo" tid kyo.

³⁰Houg: yoomo byu yi gi voo mo thu' re" boem lho: Yesu jhang re" lo ago".

³¹He: da" uri cangzoo: yi gi ‹‹Sara: we" zoo: noem shi" zoo: we' ga: zheung: sang: boem.»

³²Nghoid loug we' Yesu phougtu" zigi ‹‹nanu" ase' da" zoo: noem ri ngoo yoo" bye›› ga: tid.

³³Houg: yoomo cangzoo: yi gi Yesu ri ‹‹zoo: noem dayug yug ci: ri" bye: la'» ga: nyang: cang" nyang: myid: go" nyid.

³⁴Yesu gi ‹‹Nga" da" zoo: noem gi Ngoo ri nhang: kaid' su: vho: khyo" cang pyeing lho: Hau: Aseing: byid: to" da" moozoo" ri bain sho' voin vu, khyoo: gi nga" zoo: noem nghoid bye:» ga: tid.

³⁵‹‹Lham" moo" myid: khyab koo: myang" loo" lang" gug myheing yo, ju" wam: bye: ga: tid -dang: khyang" jo, anghoid goo" la". Nghoidloug we' ngoo nanu" ri tid ba;- Yoo thung" dain" khyoo: lheing: yu" kaid ge' yham" wa gug gi akhid" nyang: byang: yo" ne- myheing voin" jo, bye: ziyo' yham" wa jen" jen" nghoid bye.

³⁶Gug yham" mo, gi aphoug" ri shau" yu lho: Apyaid ato: kangso' yo" sen: da" amyoug: ashi" ri yo" yham" yu boem wa. Houg: yoomo shoo" su: yo" yham" su: gi dage" za: gau yi boem wa zi nghoid.

³⁷Dayug gi sho" lho: dayug gi yham"- ga: da" dang: khyang" gi deung nyid zi nghoid.

³⁸Nanu" ashoo" azhoung" to" da" yoo: thung" mo gug ri yham" yu wa shid' re" ngoo nanu" ri nhang: kaid bye. Gootu: da" byu yi zei: to" jang" mo- nanu" gi akyu" ri shau" kham: yu nyid boem"» ga: tid.

³⁹Samari myiyi: myhi, gi ‹‹He: yug gi ngoo koid; da" moo" dangain" yo" tid kyo"» ga: tid yoomo hau: voo mo, Samari byu yi myoo" sho' gi Yesu ri loem" jeing" lo boem.

⁴⁰Houg: yoomo Samari byu yi gi Yesu jhang jure" boem lho: nyangnu" jang" moo lo theing: we' ga: sang: boem yoomo Yesu gi hau: joyoo moo eig nyid" koo: theing: nyid kho.

⁴¹Nya: da" mungdang: ri shau" gyo: boem yoomo byu gootu: myoo" sho' we' loem" jeing" lo boem bye.

⁴²Houg: bang: gi Samari myiyi: myhi, ri ‹‹Akhid" ngoonu" gi Aseing: ri loem" jeing" lo boem zigi re" dang: yoomo za: anghoid- Aseing: da" mungdang: ri ngoonu" nyang: shaug" gyoo: boem yoomo danghoid. He: da" Aseing: gi mougmyid da" khyoid yu su:- gyeing" gyeing"- nyang: nghoid da" khyoo: ri ngoonu" si' bye: ga: tid boem.

⁴³‹‹Khasu" wim ga: ri lapi; gi nya: da: moug moo ce: myonhoo: aboo›› ga: Aseing: nyang: tid ziyo dakhyoo" ti" nghoid- eig nyid" koo: myang" lang" hau: joyoo mo, Galile mung" khyoo: yhe: lo".

⁴⁴

⁴⁵Houg: su"Galile moo ju" lo" ri Galile byumyu" yi gi Yesu ri lhoem: tau yu boem. Khasu" wim gari Yerusalem voo moo koid; led: lo da" lhed: kaid pui" moo nyangnu" da" gung nyang: yhe: ju" yu" lho: hau: pui" uri Yesu zei: shug da" akhyoo" again joem ri zheing: myang yoomo nghoid.

⁴⁶Hau: thang: ri Yesu gi gyid ri zabyidd" yeing bui" nhang: da" Galile mung" khana voogung moo dalheing: doem ju" lo. Hau: voo moo asu" ya zoug: dayug nyid. Nya: zoo: yuggi nu" gi Karpena-um voo moo no nyid.

⁴⁷Hau: da" zoug: phoo gi Yuda mung" mo, Galile mung" khyoo: Yesu ju" lo" ziri shaug" gyoo: yoomo Yesu jang" moo re" lho: shid: tham: no nyid da" nya: zoo: ri Karpena-um voo khyoo: yhe: lho gi byid: wa shid' re" Yesu ri re" sang: nyid.

⁴⁸Yesu tid zigi nang gi mau" pho" da" alhoo: again ri ashau" myang nghoid ri gi loem" jeing" wa zi anghoid.

⁴⁹Hau: zoug: phoo gi ‹‹Aseing: we"- nga" zoo: ashid: shi" ri juri" byid: we'» ga: mho'

⁵⁰Yesu gi ‹‹loo" we' re" zoo: gi kangso' dei nyid wa›› ga: tid. Hau: yug gi Yesu tid da" dang: ri loem" jeing" ziyo' tau" loo" bye.

⁵¹Nyang: gi khyoo: laid moo daso" loo" shi" ri nya: dei zoo: yi jure" boem lho: re" yuggi zoo: gi ge loo bye: ga: re" tid lang" boem bye.

⁵²Hau: zoug: phoo gi kha: yo, ri nga" zoo: ge lo lha"» ga: myid: uri nya: dei zoo: yi gi anyi" nab' danayi: koo mo ge gyeing: loo bye. ga: tid kyo" boem.

⁵³Houg: lang" nya: phoo gi houg: noo ge lo da" ayo, gi ‹‹Re" zoo: gi kangso' dei nyid wa›› ga: Yesu nyang: ri tid da" ayo, nghoid da" khyoo: ri myid boin: kaid. Houg: yoomo nyang: yo" yhoem: byu dangain" mi" yi, Yesu ri loem: khau lo.

⁵⁴He: khyoo: gi Yuda mung" mo, Galile mung" khyoo:- Yesu ju" lo" thang: ri eig lheing: ein: lheing: toin" shid' da" mau" pho" moozoo" nghoid.