Read Lashi YOHAN 7 Bible Online

YOHAN 7 - Lashi bible

YOHAN 7

¹Hau: thang: ri ASEING Yesu gi Galile mung" moo daso' so" koem" lheing: yen. Yuda zoug: myeing" ci: mo, gi Yesu ri said pyam wa ga: soin' go" nyid yoomo Yesu gi Yuda mung" moo aso" koem" yen" noug.

²Yuda byumyu" yi da" seig kyang: zoem loung" da" pui" we' jhang loo bye.

³Yesu da" nya: no, gi Yesu ri «Nang koid; da" moozoo" joem ri Re" cangzoo: yi myang wa shid' re" he: joyoo mo thu' lo" lho: Yuda mung" khyoo: loo" we'.

⁴Myeing thu' myeing fu" nougsu: nghoid rigi hang" nghoid loug we' nya: moo" ri zau" too" khyoo: aboo. Nang gi hid: yhi' te" mau" pho" moo" ri zei: wa shid' re" gi re" moozoo" ri moug myid si' sho' zei we'» ga: tid boem.

⁵(Nya: no, nyang: lang" Yesu ri aloem" jeing" boem nghoid ago".)

⁶ASEING Yesu nyangnu" ri doem tid zigi «Nga" ayo, aju" shi"- nanu" da" ayo, gi khanham we' ju" nyid.

⁷Mougmyid xangsu: byu yi gi nanu" ri ayo" ngheing". Ngoori gi ngheing" boem. Khasu" wim gari Ngoo gi nyangnu" da" akhyeing" ashoeb da" nheigloem: ri toin" shid' nyid yoomo nghoid.

⁸Hau: da" pui" khyoo: nanu" dangain" mo, yhi: ge'. ngoo gi nga" ayo, aju" shi" yoomo yhi: wa zi anghoid» ga: wigi doem tid.

⁹Houg: su" ga: bain tid thang: ri Yesu gi Galile mung" moo danyid" nyid shi.

¹⁰Hau: pui" mo nya: no, bain thu' loo" lang" ASEING Yesu we' hau: pui" moo yhe: gau" nyid yen.

¹¹Yuda zoug: myeing" ci: mo, gi hau: pui" moo Yesu ri re" sho: zoore"- «hau: yug gi kha: khyoo: lo"» ga: yen: nyid boem.

¹²Byu phung: moo" yi gi Yesu yo" sen: lho: so' so' ga: gau" doem go" nyid boem. Byu dayham" bang: gi he: yug gi byu gi nyang: danghoid ga: tid go" nyid boem. Dayham" tid nyid zigi byu gi anghoid mung" byu yi ri khyoo: shu" vhang: loo" su: danghoid ga: tid go" nyid.

¹³Nghoidloug we' Yuda zoug: myeing" ci: mo, ri gyoug yoomo Yesu da" khyoo: ri hang" we bang bang avoem" tid.

¹⁴Pui" koid; nyid da" bidnyid dago" yi" koo: led' lo" nyid lang" Yesu gi noku Yhoem: moo" moo vang yhe: lho: Tarha" kho" kyo" jhau" mhoo, byid: nyid.

¹⁵Yuda zoug: myeing" ci: mo, gi gye" mau" nyid boem lho: He: yug gi khayoo: ce: jung we' ado, yu" zi Hid: te" phajhi" gi khayo, yu lha"» ga: tid moug" go" nyid.

¹⁶ASEING Yesu phougtu" zigi Ngoo kho" kyo" jhoug" byid: da" tarha" mungdang: gi nga" tarha" anghoid ngoori nhang: kaid su:- Mangso da" tarha" dangoid.

¹⁷Hau: Mangsoo: vho: da" khyoo: moo cang loo" noug: su: gi Ngoo kho" kyo" da" tarha" gi Mangso da" tarha" nghoid la". Ngoo nya: vho: da" nga" tarha" nghoid la"» ga: zigi se' soin: myed yu" boem wa.

¹⁸Nyang: nya: da" Tarha" ri kho" kyo" jhoug" byid: su: gi nyang: nya: da" myonhoo: ngeilang: ri shoo: wa nghoid. Nghoidsho' loug we' nyang: ri nhang: kaid su: da" myonhoo: ngeilang: ri shoo: su: gi deing: deing: main" main" se' kho" kyo. lho: nyang: moo mhau' fain" zi aboo.

¹⁹Moshe gi nanu" ri tarha" byid: to" anghoid goo" la". Nghoidloug nanu" dayug we' hau: tarha" ri acang boem. Nanu" gi ngoori said pyam wa shid' re" cikoid; sho: nyid go"- ga: myid.

²⁰Meing: byu: yi gi nang gi yu vang ci: su: nghoid. Nang ri said wa ga: hang" su: se' soin nyid wa ga: tid boem.

²¹Yesu phougtu" zigi Ngoo mau" pho" moo" daja: koid; shug lang" gi nanu" dangain" mo, gye mau" lo" ago"-

²²Moshe gi nanu" da" zooshang: mi" ri athang: yham" pyam wa da" tarha" byid: to". Houg: yoomo nanu" gi Dougno: Bidnyid ri lang" athang: yham" da" moo" ri koid; boem ago". (Khyag ga: rigi shooyid thang: phyed' da" tarha" ri byid: zigi Moshe anghoid Nanu" da" phoug" phyid" yi danghoid ago".)

²³Houg: su" nghoid lang" gi zooshang: dayug yug ri Dougno: Bidnyid moo shooyid thang: yham" byid: ri Moshe da" tarha" ri ashoid ga: nanu" myid: ago". Houg: yo' dakhyoo" ti"-- Ngoo gi labain nyid" ri byu dayug yug ri akhang: yhangti" doem yang" zain: loo nhang: lang" ci: wim wigi ngoori nheig yo: nyid go" lha".

²⁴Atho' pyam: mo da" akhyoo" again ri za: yu" lho: dang: aphyed goo. Deung main" da" khyoo" khyo" dang: daphyed ge ga: tid.

²⁵Yerusalem mo, voo byu yi dayham" gi He: yug gi zoug: myeing" ci: mo, said pyam wa sho: nyid su: anghoid la".

²⁶Yu" ge' nyang: gi bang bang kho" kyo" nyid da" hang" dayug we' nyang: ri atoem boem nhung: lha". He: yug gi Meshia nghoid zi zoug: myeing" ci: mo, gi gyeing" nyang: se' boem bye: go" la". Nghoidloug we' he: yug kha: moug: mo, nyid lo zi ngoonu" se.

²⁷Nghoidloug we' Meshia gyoo" lo nghoid ri koem gi nya: ayang: ri hang" we' si' zi anghoid.

²⁸Yesu gi no ku" yhoem moo" moo tid zigi Nanu" ngoori se' boem go" la". Ngoo khayo, re" ziri we' se' boem bye. Nghoidloug we' ngoo gi ngoo nyang: vho: khyo" re" zi anghoid. Ngoori nhang: kaid su: gi deung main" ziyo' joeb byeung" su: nghoid. Hau: Aseing: ri nanu" gi ase' boem nghoid da.

²⁹Nghoidloug we' ngoo gi hau: Aseng: jang" mo ri" yoomo ngoori nhang: kaid su: ri nyang: ngoo se' nyid.

³⁰Byu yi gi Yesu ri myheig tei" wa da" akhyoo" ri sho: nyid nghoid loug we' ayo, aju" shi" yoomo Yesu ri hang" lo, we' ayo" toin" shid' boem shi.

³¹Meing: byu yi da" akhoug: mo Nyang: ri loem" jeing" mo, myoo" sho' gi Meshia gyoo" lo da" uri he: youg tho' moo mau" pho" khyoo: je yo" koid; shug wa la"» ga: myid: ago".

³²Houg: su" Yesu da" khyoo: ri Meing: byu yi so' so' ga: doem go" nyid khyoo: ri Pharishe shau" gyo: boem. Houg: yoomo nyangnu" yo" khainjung agyi yi gi zung" lhug: nyid da" pyada: yi dayham" ri Yesu ri myheig wa shid' re" nhang: kaid boem.

³³ASEING Yesu tid zigi Ngoo gi nanu" yo" daso' za: byam nyid lho: Ngoori nhang: kaid da" Aseing: jhang khyoo: doem loo" wa su: nghoid.

³⁴Nanu" gi ngoori cang shoo: nghoid loug we' myang zi anghoid. Khasu" wim gari ngoo nyid wa joyoo moo nanu" yo" ju" zi we' anghoid ga: tid.

³⁵Yuda zoug: myeing" ci: mo, gi ngoonu" ashau" shoo: sho' nyang: kha: moug: khyoo: loo" wa la'- Yuda byumyu" yi nyid da" Greed voo gung yi moo lo" lho: Greed byumyu" yi ri jhau" mhoo, byid: wa la".

³⁶Nyang: gi Nanu" ngoori shoo: nghoid loug myang zi anghoid. Ngoo nyid wa joyoo moo nanu" ayo" ju" boem ga: tid. He: da" dangkang: gi ce: noem nghoid lha"» ga: nyang: cang" nyang: myid go" nyid boem.

³⁷Hau: pui" zeing: da" lo" thang ziyo'- yhoug gyen: tang da" bidnyid moo Aseing: Yesu gi yab jo, lho: nyang tid zigi Gyid shed' su: hang" nghoid loug we' nga" jang" mo re" shug yu ge'.

³⁸Ngoori loem" jeung" sugi jhoem: mungdang: moo bo ziyo' dakhyoo" ti"- nya: da" nheigloem: khoug: mo we' dei kangso' gyid gyung: joem myoo" sho' yau thu' lo nyid wa zi nghoid.

³⁹ASEING Yesu hid: su" tid da" zigi Nyang: ri loem" jeing" mo, yo" yu wa da" gyeungshang: venyi da khyoo" ri tid zi nghoid. Nghoidsho' loug we' Yesu gi Myo, nhoo: phung" yoeb' ri ayo" yu shi"- houg yomoo gyeing shang Venyi: ri abyid: shi" zi nghoid.

⁴⁰Meing: byu yi mo dayham" gi Yesu hid: su" tid da" khyoo: ri shau" gyo: boem. Houg: su" nghoid yoomo he yug gi Deing" deing Lapi: nghoid ga: tid boem.

⁴¹Dayham" bang: tid zigi Meshia nyang: nghoid ga: tid boem. Nghoidloug we' dayham" bang: gi Meshia gi Galile mung" mo thu' loo wa zi anghoid.

⁴²Meshia gi David da" nya: myid nya: zoo: nghoid ca" ga: wigi we' David nyid khare" da" Bedlehem mo po" thu' loo wa ga: wigi we' Jhoem: dang: moo bo ga: wigi we' tid go" nyid boem da.

⁴³Houg: nghoid yoomo Yesu yo" sen: lho: wigi Meing: byu yi gi nheigloem: azhung" goo" loo nyid boem ago".

⁴⁴Byu dayham" bang: gi Yesu ri myheig noug: nghoid loug we' Hang" we' nyang: ri adab zei: boem nghoid ago".

⁴⁵Zung" lhoug: da" pyada: yi gi Khainjung agyi yi yo, Pharishe yi jhang khyoo: doem lo da" uri nyangnu" gi ci: wim wigi hau: yug ri amyheig ci: loo go" ga: lhoem: myid: boem.

⁴⁶Zung" lhug da" pyada: yi gi He: yug kho" kyo" yhangti"- hang" dayug we' akho" kyo" yu" ga: lo tid boem.

⁴⁷Pharishe gi «Nanu" we' nyang: mhau' da" khyoo: ri kham: zoo: bye: go" rhe"» ga: tid boem.

⁴⁸«Ngoonu" da" vhu" jhung: yi Pharishe bang: da" akhoug" mo, dayug we' hau: yug ri loem" jeing" yu" zi nanu" si' go" la".

⁴⁹He: mung" byu phung: yi gi Toung: to" da" tarha" ri asi yoomo Mangsoo shen" yhen zi shau" boem bye: nhung: lha".» ga: wigi tid boem.

⁵⁰Houg: bang: da" akhoug: moo Nikodi ga: su: bo- Nyang: gi xang: shed" ri ASEING Yesu jhang re" yu" bye: zi goo" ji ri tid kyo.

⁵¹Nikodi gi «Ngoonu" da" tarha" khyo" ce: moo" ri shoid da" khyoo: ri kyeung yu zi akoid. Tarha" shoid su: ri tid nyheing tid feing wa akhang"- we abyid:- loo: za: dayug yug ri tarha" dang: phyed' yu" la".» ga: tid.

⁵²Houg: bang: gi «Nang we' Galile mung" mo byu nghoid la". Jhoem: mungdang: moo nghab' yu" we' Galile mung" mo ce: lapi: dayug we' athu' lo yu" zigi nang si' ca"» ga: tid boem.

⁵³(Houg: lang" nyangnu" dangain" bang: gi nyang: nu" nya: yhoem: khyoo: lo" byug boem bye.)