Read Lashi YOHAN 8 Bible Online

YOHAN 8 - Lashi bible

YOHAN 8

¹(Hau: thang: ri nyangnu" gi nyang: tu: nya: yhoem: khyoo: yug khang" moo" lo" boem. Aseing: Yesu gi zhainlun boem khyoo: yhe: lo.

²Hau: thang: nab kyoo ri no ku" yhoem moo" moo dalheing: dam ju" lo" da" uri byu myoo" sho' mo, gi Aseing: jang" moo re" lheung khoem byid ago". Yesu gi: zhoung: jo, lho: houg: bang: ri jhoug" byid: nyid.

³Tarha" sara: yi yo"- Pharishe bi: gi myiyi: dayug ri Yesu jang" moo khe: shu" re. Hau: yug gi soem" lid shoo: go" nyid jang" mo shau" myheug da" myiyi: nghoid. Tarha" sara: yi yo"- Pharishe gi-hau: myiyi: ridangain" mo, da" shid' khoin" moo yab jo, nhang: lho:

⁴ASEING Yesu ri Sara: we"- He: myiyi: gi soem" lid shoo: go" nyid jang" mo- myo, moo gyo, nyang: shau" myheug boem bye.

⁵Moshe tarha" moo sang: to" zigi hid: yhangti" myiyi: rigi-luggo, wigi du" said pyam ca"- ga: ngoonu" ri tarha" byid: to. Yesu ri nang khasu" tid noug: la"» ga: myid: boem.

⁶Nyangnu" gi Yesu ri yooboo zhug lho: myheig wa shid' re. Pyi: sho: nyid boem. Nghoidloug we' ASEING Yesu gi goeb' ci: lho: myidjang: moo lo, nyhau" wigi thau" lhid" nyid.

⁷Houg: bang: gi doem phoug myid myid koid; nyid boem. Houg: lang" Yesu gi to' yu" kaid lho: Nanu" mo ce: yooboo adab su: gi nyang: ri luggo, yo" xang: shed" du" ge' ga: amyeing" byid: kaid.

⁸Hau: lho: myidjang: moodoem goeb lho: thau" lhid" nyid.

⁹Houg: bang: gi Hau da" amyeing" ri shaug" gyoo: lang" gi apyaid' je gyi: mo, mo shi"- dayoug thang: moo dayug- thu' lo" byug boem ago". Yesu yo" houg moo yab jo, da" myiyi: myhi za: date: nyid lo.

¹⁰Yesu gi doem lheing: yu kaid lho: myiyi: myhi nang we"- houg: bang: gi khayoo: lo? Nang ri yooboo dam: byid wa mo, dayug we' anyid loo: rhe" ga: myid.

¹¹Houg: lang" hau: da" myiyi: gi Aseing: we" dayug we' azheung: nyid khari" loo:- ga: phougtu. ‹‹Yesu gi Ngoo we' nang ri yooboo dam abyid: loo" we' yooboo adoem koid loo: lhe" ga: tid kaid.»

¹²Dalheing: ri Yesu gi hparishe yi ri ngoo gi mougmyid: bidbang nghoid. Nga" thang: moo cang loo su: gi apyaid' ato: kangso' bidbang ri yo" yu lho: moug: coid' khoug: moo khanham we' asoo" loo: wa zi nghoid. ga: tid.

¹³Pharishe yi gi nang gi na nya: khyoo: nanyang: sagsi: kham: nyid. Houg: yoomo re" da" sagsi: dang: gi adeung ga: tid nyid boem.

¹⁴Yesu phougtu" zigi ngoo nya: khyoo: ri ngoo sagsi: kham: nghoid loug we' nga" sagsi: dang: gi deung main" nyid. Khasu" wim ga: ri ngoo gi khayo, re" lho: kha: khyoo: doem yhe: lo" nyid zi ngoo se' nyid. Nanu" gi ngoo khayo, re" ziri we' kha: joyoo khyoo: doem yhe: lo" nyid ziri we' ase' boem.

¹⁵Nanu" gi byu da" akhyoo" khyo" dang: phyed' boem- Ngoo gi hang" ri we' aca: joeb- dang: aphyed.

¹⁶Nghoid loug ngoo gyeing" nyang: dato' jeyang: dang: phyed' nghoid rigi ngoo dayug kyeing dang: phyed' zi anghoid. Ngoori nhang: kaid da" phoo Mangsoo gi ngoo yo" dage" nyid yoomo ngoo je: yang: dang: phyed' khyoo: gi deung main" nyid.

¹⁷Nanu" da" tarha" moo lhid" to" jang" moo Sagsi: eig yug joeb lang" gi deung main" bye: ga: tid to.

¹⁸Ngoo gi ngoo nya: khyoo: ri sagsi: kham lho:. Ngoo ri nhang: kaid da" Pho we' nga" da" khyoo: ri sagsi: kham: byid: nyid ga: tid.

¹⁹Houg: bang: gi Re" Phoo khayoo: nyid ga: myid: boem. ‹‹Nanu" gi ngoori we' nga" Phoo ri we' ase' boem. gyeing" nyang: nanu" ngoori se' nghoid rigi nga" phoo ri we' si' goo" zi nghoid ga: doem sho' kyoo.»

²⁰Yesu gi He: da" Mungdang: ri-no ku" yhoem: moo" khoug: Alu: kham: da" sadeig to" yab moo kho" kyo" jhoug" byid: uri tid da" mungdang: nghoid nyid. Nghoidsho' loug we' Yesu da" ayo, aju" shi" yoomo hang" we' Yesu ri amyheig atei" shi.

²¹Dalheing: riYesu gi ngoo gi thu' loo" wam: bye. Nanu" gi ngoori shoo: boem wa. Nanu" gi nanu" nya: yooboo mo, shid: boem wa. Ngoo lo" da" joyoo moo nanu" ayo" cang loo wa" ga: tid.

²²Yuda zoug: myeing: ci: mo, gi ngoo lo" da" joyoo moo Nanu" ayo" loo" ga: nyang: tid bye. Nyang: gi nya: gung nyang: said' shid: wa ga la lha"» ga: tid go" nyid boem.

²³Yesu phougtu" zigi nanu" gi mougmyid mo byu yi nghoid. Nghoidloug we' ngoo gi mougkhung: khyo" ri" su: nghoid. Nanu" gi he: mougmyid mo byu nu" yi nghoid boem. Ngoo koem gi he: mougmyid mo byu anghoid.

²⁴Houg: yoomo nanu" gi nanu" da" yooboo moo shid: lo" boem wa ein: wigi ngoo tid bye. Ngoo gi ngoo nghoid nyid ziyo' dakhyoo" ti"-- ngoo nghoid ziri nanu" aloem" boem rigi Nanu" gi nanu" nya: yooboo moo shid: lo" boem wam bye. ga: tid.

²⁵Houg: bang: gi nang gi hang" nghoid ga: myid: boem. Yesu gi Ngoo hang" nghoid zi xang: shid" mo nyang: ngoo tid kyoo" bye.

²⁶Nanu" da" khyoo: yo" sen: lho: ngoo tid kyoo" ca" da" khyoo: soo" soo" bo. Nanu" ri yooboo foin: wa khyoo: we' myoo" sho' bo. Ngoori nhang: kaid da" Aseing: gi dang main" da" Aseing: danghoid. Hau: Aseing: jang" mo ngoo shau" gyo: da" khyoo: ri za: he: mougmyid byu yi ri ngoo tid kyo.

²⁷Yesu gi nya: pho da" khyoo: tid nyid ziri houg: bang: gi ase' gyoo.

²⁸Houg: yoomo Yesu gi byu nya: zoo: ri myidjang: moo tu: zhug lhang" too" lang" she- ngoo gi hang" nghoid nyid ziri nanu" yo" si' zi nghoid. Ngoo gi ngoo ngoonya: amyeing" akhang" khyo" ce: moo" we azei:- Nga" phoo nhang: kaid ziyo' dakhyoo" ti"- za: ngoo dazei: ziri we' nanu" se' loo wa.

²⁹Hau: tho' moo gootu: Ngoori nhang: kaid su" gi ngoo yo" dage" nyid. Hau: yug vho: da" moozoo" ri ngoo gi ayo, bain sho' moo zei: nyid wigi hau: Aseing: gi ngoo nyang: kyeing" ri ashe: lhei" too ga: tid kyo.

³⁰Hid: su" ga: tid da" dang: ri shau" gyo: da" byu myoo" sho' mo nyang:- Yesu ri loem" jeing" lo boem ago".

³¹ASEING Yesu gi nyang ri loem" jeing" loo mo, ri Nanu" gi ngoo jhoug" byid: khyo" cang zei: loo" lang" gi nga" da" cangzoo: agyeing" yi nghoid bye.

³²Nanu" gi deungmain" da" zi ri we' ci: wa. Hau: deungmain" da" zi gi nanu" ri lhoid pyoin kaid wa zi nghoid ga: tid.

³³Hau: da" byu yi gi Ngoonu" gi Abraham da" nya: myid nya: zoo: yi nghoid. Khanham we' sube" join, abue" yu" boem- Nanu" ri lhoid pyoin kaid wa ein: nang ci: koid; tid ga: myid boem.

³⁴ASEING Yesu nyangnu" ri tid zigi Deing" deing nanu" ri ngoo tid ba- Yooboo shoid vhang: mo, dangain" gi yooboo da" join, nghoid.

³⁵Join, gi hau: ikoin deungkhu: daloem: moo pyaid goin" nyid zi anghoid nghoid loug nya: zoo: nghoid su: gi hau: deungkhu: moo khanham we' danyid nyid wa nghoid.

³⁶Houg: su" nghoid yoomo nya: zoo: gi nanu" ri loid byoin nhang: nghoid rigi nanu" deing" deing loid byoin loo" wa.

³⁷Nanu" gi Abraham nya: myid: nya: zoo: nghoid zi ngoo se'- Houg: su" nghoid loug we' nanu" gi nga" da" jhoug" myeing" ri akham: yu noug: yoomo ngoori said wa ga: yoem: kaid nyid boem.

³⁸Ngoo gi nga" pho, jang" mo, yo" se' yu gu: dangain"- nanu" ri tid kyoo" bye: houg: nghoid loug we' nanu" gi nanu" da" nya: phoo tid ziri za: da cang nyid ago".

³⁹Nyang: nu" phougtu zigi ngoonu" dangain" mo, nya: phoo gi Abraham nghoid ga: tid boem. ASEING Yesu gi Nanu" gi Abraham da" nya: myid nya: zoo: yi nghoid boem rigi Abraham yhangti" koid; boem zi nghoid.

⁴⁰Mangso jang" mo shau" gyo: yu da" deingmain" da" moo ri nanu" ri kho" kyoo" nghoid loug ngoori- said wa shid' re" nanu" yoem kaid nyid ago". Abraham gi houg su" alhoung koid'.

⁴¹Nanu" gi nanu" da" nya: phoo nyang: yhangti" koid; nyid boem ga: Yesu tid. nyangnu" doem phoug tid zigi ngoonu" moo Mangsoo ga: da" phoo dayug kyeing" date: nyid lho. Ngoonu" we' nya: zoo: gyeing" yi nyang: nghoid bye: ga: tid.

⁴²Yesu nyangnu" ri doem tid zigi Mangsoo gi nanu" da" nya: phoo gyeing" nghoid rigi nanu" ngoori jheddab goo" wa. Khasu" wimgari ngoo gi Mangso jang" mo gyoo" lo lho: akhid" hid: moo re" ju" nyid. Ngoo nyang: vho: khyo" re" zi anghoid. Phoo Mangsoo gi ngoori nhang: kaid.

⁴³Ngoo tid ziri nanu" ci: wim ase' gyoo: go. Nanu" moo nga" da" mungdang: ri gyo: yu wa nheigloem: nyang: aboo yoomo nghoid boem ago".

⁴⁴Nanu" gi nya: phoo yu satan da" nya: zoo: nghoid yoomo nanu" nya: phoo vho: da" khyoo: moo cang koid; nyid boem. satan gi xang: shid" mo nyang: byu said da" sarhi' nyang: nghoid. Nyang: moo deingmain" zi ci" we' aboo nghoid yoomo deung main" ziri asi- se' mhau' fain" su: nghoid. Nyang: gi mhoug mo, dangain" da" nya: phoo nghoid yoomo nya: void voo: yo' dakhyoo" ti" mhoug nyid.

⁴⁵Nghoid loug Ngoo gi deung main" da" dang: ri za: tid ri ngoori ci: wim aloem" jeing" go"-

⁴⁶Ngoo gi yooboo yoo" su: nghoid ein:- hang" sagsi: yo" shoo go" ngoo gi deung main" da" dang: ri za: da tid ri nanu" ci: wim- aloem" jeing" go".

⁴⁷Mangso jhang" mo ju" ri" su: gi Mangso da" dang: ri tam" gyo: nyid nghoid loug nanu" gi Mangso jang" mo anghoid boem yoomo atam" gyo: zi nghoid ago".

⁴⁸Nyangnu" Yesu ri Nang gi Samari byumyu" dayug nghoid lho: yu vang ci: su: nghoid ga: wigi ngoonu" tid dang: shoid la"» ga: myid: boem.

⁴⁹Yesu phougtu" zigi ngoo gi yu vang ci: su: anghoid. Ngoo gi nga" phoo ri phau" myang: nghoid loug we' nanu" gi ngoori aphoug" amyang.

⁵⁰Ngoo gi ngoo nya: myonhoo: ri ngoo ashoo: nghoid loug dayug su: gi nga" da" myonhoo: ri shoo: byid: lho: nga" shoid khyoo: dang: phyed' byid: nyid.

⁵¹Deing" deing nanu" ri ngoo tid ba- Nga" da" jhoug" myeing" dang: ri tam" gyo: yu su: gi khanham we' shid: wa zi anghoid ga: tid.

⁵²Nyangnu" gi nang gi yu vang ci: su: dayug nghoid da" khyoo: ri akhid" ngoonu" yo" si' bye. Abraham gi shid: led: loo" bye:- Lapi: yi we' shid: led: loo" bye. Houg: su" danghoid ri nang gi nga" dang: tam" gyo: yu su: gi khanham we ashid: wa ga: tid.

⁵³Ngoonu" da" phoo Abraham gi shid: led: loo" bye. Abraham tho' moo nang gi je gyi: la". Abraham tho' je gyi: ein: atid Lapi: yi we' shid: led: lo" boem bye:- nang gi na nya: gung ri hang" nghoid ein: myid nyid la"» ga: zheing: myid: boem.

⁵⁴Yesu phougtu" zigi Ngoo gi ngoo nya: gung ri coung" nghei nyid rigi nga" myonhoo: ngeilang: gi akoem: za danghoid wa. Ngoo ri coung" byid: su: gi nanu" lhoung: tid da" nanu" da" Mangsoo ga: su: nga" phoo danghoid.

⁵⁵Hau: da" Mangsoo ri nanu" ase' boem. Nghoid loug ngoo koem gi se- gyeing" nyang: ngoo asi ein: tid nghoid rigi ngoo gi nanu" yo' dakhyoo" ti"-- mhoug su: bue" loo" wa. Ngoo gi phoo ri gyeing" gyeing" si' yoomo nya: da" dang: ri tam" gyo: nyid.

⁵⁶Nanu" da" nya: phoo Abraham gi ngoo ju" ri" wa da" ayo, ri shau" myang wa ziri myed nyid. Hau: ziri nyang: shau" myang yoomo tid loo a ung: gau yi nyid bye.

⁵⁷Nyangnu" gi nyang: ri Nang gi apyaid' wim: xi: zain: lang" aboo shi"- khasu" koid; wigi Abraham ri myang yu" wa lha" ga: tid boem.

⁵⁸Yesu doem phougtu" zigi Deing" deing nanu" ri ngoo tid ba- Abraham akhu: ri" shi" mo ngoo nyid nyid bye: ga: tid.

⁵⁹Houg: lang" nyangnu" gi Yesu ri du" wa ga: luggo, joem: ri koid: zei: ci: boem. Nghoidloug we' Yesu gi no ku" yhoem moo" khoug: mo gau" lheing thu' lo" byug.