Read Lashi ACTS 13 Bible Online

ACTS 13 - Lashi bible

ACTS 13

¹Antioki voo, mo da" phung khoug: moo lapi: yi dayham" yo' sara: yi dayham" bang: bo ago". Houg: bang: gi Barnaba da" mang: no' ga: da- Simun- Kureni byu Luki- mung" zoug: phoo Herod yo' dage" nyid gyi: lo da- Mana en yo' sholu nghoid ago".

²Nyang: nu" gi Aseing: ri noku loem khau: wigi zoo: noem, ri jang" pyam' lho: nyid boem uri gyeungshang: da" Venyi gi nyangnu" ri tid zigi Barnaba yo' Sholu eig yug ri nga" moozoo" voin, vu, wa shid re" gootu: khyen: nyheung too" ge' -ga: tid.

³Houglang" nyangnu" gi zoo: noem jang" lho: akyu" mho' nyid wigi nya: eig youg tho' moo nyangnu" lo, ki" byid: wigi moozoo" ri voin, vu, wa shid mo nya: eig yug ri nhang: kaid ago".

⁴Houg: su" gyeungshang: da" Venyi wigi nhang: kaid' ziyo' dakhyoo" ti" Barnaba yo' Sholu eig yug gi Seluki voo khyoo: yhe: lo" wigi hau: voo mo zi Kupru, gugyoo: kang: khyoo: lhid' yo' gu: yhe: lo" ago".

⁵Nya: eig yug gi Salami voo moo ju" loo" lang" tarha" jung moo Mangso mungdang: ri kho" kyo" ago". Nya: eig yug ri bo pang" thoug wa shid mo Yohan Marku ri we' bo, shu" yhe: ago".

⁶Nya: eig yug gi gu gyoo: kang: khyo" gu: lid lo" wigi Paphu voo gung moo ju" yhe: lo" ago". Hau: voogung moo Yuda byu lapi: pyeug nghoid lho: wigi goem, phain" phain" zo: nyid su- Bara: Yesu ga: da" byu dayug ri shau" myang.

⁷Nyang: gi hau: gu gyoo: kang: mung" mo zoug: phoo- Segi Polu ga: su: da" byen, cang" phoo nghoid. Mung" zoug: phoo gi nheigloem: soozoo: lheing: su: nghoid. Houg: yoomo zoug: phoo gi Mangso mungdang: ri tam" gyoo: noug yoomo Barnaba yo' Sholu eig yug ri nya: shid khoin" khyoo: khe: fang yu.

⁸Nghoid loug we' Grid" myeing" khyo" - Eluma ga: da" goem, phain" phoo gi Yesu khyoo: ri mung" zoug: phoo alhoem: vhoo: wa shid re" Barnaba yo' sholu eig yug ri lhoem: ngeug toem, pyam.

⁹Houg: yoomo Polu ga: da" Sholu gi gyeungshang: Venyi yo' byeung" wigi nyang: gi goem, phain" phoo ri dain: dain: za: yu" zhoug to" lho:

¹⁰Satan yu da" nya: zoo: we" - nang gi deingmain" ziyo' ge, da" khyoo: dangain" da" gyivoo- akhyeing" ashoeb, mhau' fain" vo, khyoo: yo' to' za: byeung" jo, da" byu nghoid da- nang gi khanham we" Aseung: da" deingmain" khyoo: ri mhau' fain" vo, dang: bui" sho' koid su: nghoid.

¹¹Akhid" nyang: Mangso da" lo, gi re" da" atho' moo ju" re" wigi re" myo, jed' loo" khari" wam: bye- nang dayo, koo: bidbang ri ashau" myang loo wa-ga: tid. Houg: lang" jang: Eluma gi myo, jed' lo" wigi dayug gi nya: lo, mo she: yu baja" ga- soeb, sho: yen" bye.

¹²Mung" zoug: phoo gi houg: su" bue" ziri myang lang" gi Yesu ri loem" jeung" loo bye. khasu" wim gari Aseung: khyoo: yo' sen: lho: jhoug" byid: khyoo: ri nyang: gi xoo" sho' mau" nyid bye.

¹³Polu yo' nya: byen cang" yi gi Paphu voogung mo lhid' zhoung: lho: Pamphuli mung" mo Perga voogung khyoo: ju" yhe: lo" ago". Yohan Marku gi hau: voogung moo nyangnu" ri too" kho' wigi Yerusalem voomoo" khyoo: doem tau" loo" bye.

¹⁴Nyang: nu" gi Perga khyoo: xo' yhe: lo" wigi Pesidi mung" mo Antiki voogung khyoo: ju" yhe: lo" ago". Nyang: nu" gi Dougno: Bidnyid moo Yuda tarha jung yhoem: khoug: khyoo: vang yhe: lho: zhoung: jo, ago".

¹⁵Moshe tarha" yo' lapi: yi da" mungdang: ri bain, nghab lang" tarha" jung mo da" agyi yi gi mang: nhung" yi we" - mung" byu yi ri yoem: byid: wa da" mungdang- nanu" yo" boem nghoid rigi re" tid kyoo" ge" - ga: byu nhang: kaid' lho: tid nhang.

¹⁶Houg: lang" Polu gi to yab, lo, tu, lho: tid zigi Israela byumyu" yi we' hid: moo nyid da" Mangsoo ri coung" nghei tungbau byumyu" yi we' tam" gyo: yu" ge'.

¹⁷Israela byumyu" yi da" Mangsoo gi ngoonu" da" phoug" phyid" yi ri khyen: yu lho: Egutu mung" mo nyangnu" da" being" voo khyo" nyid nyid da" ayo, moo byumyu" yi bue" loo nhang: bye. Mangsoo gi nya: yoem: zeing: so' moo" yo' nyangnu" ri Egutu mung" mo shu" thu' lo wigi

¹⁸Dain" pyoid yoo moo myed: xi zain' loem: loem- Mangsoo gi nyangnu" tho' moo zeung: kham' byid: nyid.

¹⁹Nyang: gi khanan mung" moo nyid da" byu nyhed myu" ri phyo' shoin, pyam' lho: wigi hau: mungdain rigi nya: byunyu" yi ri seing: nhang: bye.

²⁰Hid: su" bui" sho' gi zain ved' 450 zain koo: myang" bye- Hidsu" bain bue" thang: ri Mangsoo gi Lapi: Samuela pyaid ju" sho' - nyangnu" ri tarha" agyi joem byid: too" bye.

²¹Hau: thang: ri nyangnu" gi Khokham" mho' boem lang" gi Mangsoo gi Ben- yamin amyu akung: ako'' mo Kesha da" nya: zoo: Sholu ri nyheing byid: bye. Sholu gi nyangnu" da" khokham" 40 zain' ju" sho' koid byid: bye.

²²Hau: thang: ri Mangsoo gi Sholu ri khyo, pyam' lho: David ri nyangnu" da" khokham" doem koid nhang: bye- Mangsoo gi David yo' sen: lho: wigi Yese nya: zoo: David gi Ngoo vhoo: su- Ngoo zei: nhang: da" moozoo" dangain" ziri zei: wa nghoid ziri ngoo myang bye- ga: tid.

²³Mangsoo gi nyang: dang: soo byid: to" ziyo' dakhyoo" ti" David nya: myed: nya: zoo: yi mo nghoid da- Yesu ri Israela byumyu" yi da" khyoid yu Aseing: bue" loo nhang: bye.

²⁴Yesu gi nya: moozoo" ri azei: shed" loo" shi" mo nyang: Yohan gi Israela byumyu" dangain" mo, ri nyangnu" da" yooboo joem mo nheigloem: thed' lo lho: Babtisma kham: yu boem wa shid mo, kho" kyoo" byid: bye.

²⁵Houg: yoomo Yohan gi nyang: ri zei: nhang: to" da" moozoo" mo bain zei: lo" nyid lang" gi Meing: byu yi ri ngoori hang" nghoid ein: jho: nyid go" lho? Ngoo gi houg: nanu" lang" nyid su: anghoid. Nyang: gi nga" thang: moo ju" ri" zi nghoid- ngoo gi nya: da" khyid: mo khyid: baid ri khyoid' byid: wa zilang"- amoin: yi" nghoid da" - ga: tid.

²⁶Abraham da" myed: zoo: yi nghoid da- nga" byen, cang" Israela byumyu" yi we" - he: da" khyoid yu mungdang: ri Mangsoo gi ngoonu" jhang khyoo: foin byid: kaid' abye:.

²⁷Yerusalem voomoo" moo nyid mo, yo' nyangnu" da" vhu jhung: yi gi Yesu gi khyoid yu Aseing: nghoid ziri ase' boem- Dougno: Bidnyid khang" moo" nyangnu" nghab da" lapi: yi da" jhoem: dang: joem ri we' nyangnu" gi ase' gyoo: nghoid ago- Nghoid loug we' nyangnu" gi Yesu ri dang: phyed' byid: khyo" lapi: yi da" jhoem: dang: ri - joeb byeung" loo nhang: mo, nghoid boem ago".

²⁸Nyang: nu" gi nyang: ri shid: wa da" yoobo dam kaid' wa zi ci" we' amyang to" boem nghoid loug we' -nyang: ri said' pyam' wa shid mo nyangnu" gi Pilaid' zoug: phoo ri damho, nyid ago".

²⁹Nyang: nu" gi nyang: yo' sen: lho: jhoem: mougsoug" moo bo ziyo' dakhyoo" ti" dangain" nyang: ri bain' koid lang" gi nyang: gi nyang: ri pyang" zeing tho' mo phoid: khyo, yu lho: loeb, daloem: akhoug: moo yhe: kaid' to" ago".

³⁰Nghoid loug we' Mangsoo gi Nyang: ri shid: jang" mo doem dei, to' loo nhang: wigi

³¹Galile mung" mo Yerusalem voomoo" khyoo: nyang: yo' dage" yhe: lo" nyid mo, ri bidnyid myang" sho' nyid" nyid, shug yen" da- nyangnu" gi akhid" Israela yi ri sag si: kham, byid: nyid mo, nghoid ago". Houg: bang: gi sag si: nghoid nyid.

³²Coung" nghei, jikhoin" mougsoug" abeing: eig loem: moo Nang gi nga" zoo: nghoid- Akhid" nyid" ngoo nang ri khu: kaid da" Re" phoo nghoid- ga: tid to. Houg: yo' dakhyoo" ti" Mangsoo gi Yesu ri dei, to loo" nhang: khyo" - ngoonu" da" phoug" phyid" yi ri byid: to" da" dang: soo" khon" gi nyangnu" da" myed: zoo: yi nghoid mo, ngoonu" moo zei: pyeung byid: abye:. Houg: yoomo ngoonu" gi he: da" ludang: gi, ri nanu" ri tid kyoo" wa shid mo he: joyoo moo ju" re" zi nghoid.

³³Nyang: gi khanham we' ashid: loo: wa ga: yoomo nyang: ri shid: jang" mo doem dei to' loo nhang: ziyo' sen: lho: wigi Mangsoo gi Ngoo David ri byid: wa ein: da" dang: soo" khoin" ri byid: too" bye.

³⁴

³⁵Goo tu: da" coung" nghei ji: dakhoin" moo we' nang gi dang: soo" khoin" deung da- Re" dei, zoo: ri loeb, khoug: moo boeb, lo" byug nhang: wa zi anghoid- ga: tid to.

³⁶David gi nyang: dei nyid da" bidnyid gu: moo Mangsoo myed soin' to" moozoo" joem ri zei: so' lho: shid: loo" bye. Nyang: gi nya: phoug" phyid" yi loeb, nam, moo myhoeb, shug: pyam' zi shau" lho: nya: manggung gi loeb, khoug: moo boeb, yoem: lo" byug bye.

³⁷Nghoid sho' l: oug we' Mangso wigi doem dei, to loo nhang: su: gi aboeb yoem: loo" loo: nghoid da.

³⁸Hougsu" nghoid yoomo Israela mang: nhung" yi we"- hau: Yesu khyo" wigi yooboo khyoid pyam' byid: zi shau" ziyo' sen: lho: nanu" ri kho" kyo" nyid da" Yesu ri loem" jeing" bang: dangain" gi Moshe da" tarha" wigi ayo" lhoid' pyoin, kaid' da- yooboo dangain" jang" mo, yo" loid byoin lo" da" khyoo: ri we' nanu" ri ngoo si' nhang: nau, zi nghoid.

³⁹

⁴⁰Houg: yoomo yu" ge' - juang" yi mo, yo' mau, lho: shid: loo" ge'. khasu" wim gari-akhid" nyid" ngoo koid wa da" moozoo" daloem: ri byu dayug yug wigi nanu" ri tid sho' kyoo" nghoid l;oug we' - nanu" gi hau: khyoo: ri loem" jeing: goo" wa zi anghoid. ga: wigi Lapi yi tid to" da" jhoem: mungdang: gi nanu" moo abue" loo wa shid mo, lhid' zed" nyid ge'. ga: kho" khyoo" byid: da.

⁴¹Polu yo' Barnaba gi hau: tarha" jung mo thu' lo" nyid uri mung" byu yi gi nya: eig yug ri thang: Dougno: Bidnyid moo doem re" kho" kyoo" byid: wa shid mo mho' kaid ago".

⁴²

⁴³Hau" zoeb, phung mo, mung" byu yi byo, lo" boem thang: ri Yuda byu yi myoo" sho' mo, gi Yuda noku thung" khyoo: phoug vang loo bye: da- tungbau byu yi myoo" sho' mo, gi Polu yo' Barnaba thang: cang lo" ago". Polu yo' Barnaba eig yug gi Mangsoo nheig khyeug da" akhoug: moo xo' lho: kangso' yo" dei nyid wa shid re" nyangnu" ri yoem: byid: da" dang: ri tid ago".

⁴⁴Hau: thang: mo, da" Dougno: Bidnyid rigi Mangso mugdang: ri tam" gyoo: wa shid mo voobyu dangain" ein: wa yhi' ju" re" boem ago".

⁴⁵Yuda byumyu" yi gi hau: mung" byu yi ri re" zheung: myang lang- nyangnu" gi myid yu" nau: boem yoomo-Polu kho" kyo" da" mungdang: ri ngeug pyam' boem lho: wigi nyang: ri aphoug" akhyoid ga: rue" da" dang: ri tid ago".

⁴⁶Nghoid loug we' Polu yo' Barnaba eig yug gi je" ri agyug avoem, loo: za: Mangso mungdang: gi nyangnu" rishi" - xang: shed" tid kyoo" wa da" khyoo: eung: nyid. Nghoid loug we' nyangnu" gi hau: mungdang: ri ngeug pyam lho: hau: apyaid' atoo: mo, kangso' yo' amoin: yi" ga- nyhang: nu" nyang: dang: zheung: phyed' yu lho: nga" eig yug gi nanu" ri too" kho' lho: tungbau byu yi jhang khyoo: yhe: loo" wa zi nghoid.

⁴⁷Khasu" wim gari Aseing: gi ngoonu" ri amyeing" byid: to" zigi Moug: myed tho' moo nyid mo, dangain" ri khyoid yu zi shau" boem wa shid mo ngoo gi nang ri tungbau, yi shid' mo bidbang bui" nhang: bye- ga: tid too" bye- ga: tid ago".

⁴⁸Tungbau byumyu" yi gi he: da" dang: ri shau" gyo: boem lang" gyo: ngei boem ziyo' Mangso mungdang: ri coung" nghei ago". Apyaid' atoo: mo, da" kangso' ri yo" yu wa shid re" khyen: yu zi shau" bye: mo, gu: gi Yesu ri Loem" jeung" lo boem bye.

⁴⁹Mangso mungdang: gi hau: damung" goin" jang" moo fu" nheung lo" boem bye.

⁵⁰Nghoid loug we' Yuda byumyu" yi gi Mangsoo ri noku coung" nghei mo, nghoid da- Byu nyid azhang" myhang: bye: da- tungbau byu myiyi: yi ri we' hau: voogung moo vhu" jhung: koid nyid mo, ri we' myid lhu: zhuang" to' kaid ago". Houg: lang" nyangnu" gi Polu yo' Barnaba eig yug ri shen" yhen lho: nya: eig yug ri nyangnu" da" mung" mo khaid thu' kaid' ago".

⁵¹Polu yo' Barnaba eig yug gi nyangnu" ri ngeug pyam' da" aved' khyo" nya: eig youg da" khyid: voo: mo pheilhoug: joem ri ko: khyoo, kho' lho: Ikoni voo khyoo: yhe: lo" ago".

⁵²Antioki Voogung moo nyid da" loem" jeing" bang: gi gye" ngeibu: boem ziyo' gyeungshang: da" Venyi yo' byeung" jo, ago".