Read Lashi ACTS 14 Bible Online

ACTS 14 - Lashi bible

ACTS 14

¹Ikoni Voogung moo Polu yo' Barnaba eig yug gi Yuda byu yi da" Tarha" jung moo zheung: vang lo" lho: kho" kyo" nyid uri Yuda byumyu" yi yo' nghi: zain, byumyu" yi gi ASEING Yesu ri loem" jeung" loem khau: lo byu myoo" sho' bo lo.

²Nghoid loug we' - aloem" ajeung" da" Yuda byumyu" yi yo' nghi: zain, byumyu" yi gi khristain ri pyi: sho: lho: aveing" goo" wa shid' mo lhu: nhoug" byid: nyid boem.

³Lagyoo: yi gi hau" joyoo moo-myang" sho' zheung: nyid boem wigi Aseing: da" Khyoo: ri agyug avoem loo: za: Kho" Kyo" boem ago- Aseing: gi houg: bang: kho" kyo" khyoo: gi deingmain" khyoo: nghoid ziri sag si: bue" loo wa shid re" mau" pho" alhoo: again yo' koid shug wa da" yoem: ri vhoo" phung" yoeb, ri byid: to.

⁴Houg: mo mung" byu yi gi eig phung gyo" lo" lho: daphung: gi Yuda byumyu" yi shoid khyoo: bo- gootu: daphung: gi lagyoo: yi thang: khyoo: bo dab, boem ago".

⁵Yuda byumyu" yo' tungbau byumyu" yi dayham" bang: gi lagyoo: yi ri shen" yhen wa ziyo' - lug go, ze du" wa shid re" nyangnu" da" vhu" jhung: yi yo' gye" gau" sham: go" nyid boem.

⁶Hau: khyoo: ri lagyoo: yi zheung: shaug" gyoo: lang" gi Lukoni mung" Lustra, Dabe Voogung joem khyoo: zheung: phang: lo" ago".

⁷Nyang: nu" gi hau: Voogung joem moo ASEING Yesu da" ngeibu: Ludang: gi ri zheung: kho" kyo" boem.

⁸Lustra, Voogung moo khanham we' khyoo: ayo" so" da" byu dayug nyid nyid nyang: gi khu: lo bidnyid mo nyang: khyid: yoin" su: nghoid.

⁹Nyang: gi Polu kho" kyo" da" mungdang: ri tam" gyo: nyid Polu we' nyang: ri jid" jid" yu" zhoug to" da" uri nooboug: byug loo" wa yhi'- nya: da" loem" jeung" khyoo: ri myang lang" gi

¹⁰Thui: moo" kaid' lho: to' yab, we" -ga: tid- houg: lang" nyang: gi byam, lo' lho: khyoo: so" lo.

¹¹Meing: byu yi gi Polu koid da" khyoo: ri myang lang" yu phara" gi byugung void ci: lho: wigi ngoonu" jang" moo ju" ri" bye"- ga: nyangnu" nya: da" - Lukaoni myeing" khyo" yoid nyhoo: go" nyid boem.

¹²Nyang: nu" gi Barnaba ri ze-u ga: Polu rigi shu" kho" kyoo" gu: nghoid yoomo Herma ga: myheing myheing byid: boem.

¹³Ze- u ga: da" phara" gi voogung nghe: shoid moo jo, yoomo hau: phara" yhoem: mo khainjung phoo gi nujung loo: joem yo' bain: khuang: joem ri voogoung khoem" moo" duang: moo she: re" ago- nyangnu" yo' dage" mung" byu yi gi lagyoo: yi ri xoin" to' byid: nau nyid boem ago".

¹⁴Nyang: nu" gi houg: su" xoin" to' byid: wa ga: soin' nyid boem ziri Polu yo' Barnaba eig yug zheung: shaug" gyoo: lang" nya: eig youg: da" byimi ri zheung: lang: ceug sain" pyam' lho: mung" byu yi da" mo, phung: gung khyo" zheung: gei, vang yhe: wigi

¹⁵Byu yi nanu" we"- khasu" wim wigi hid: su" koid' go" lha". Nga" eig yug gi nanu" yo' dakhyoo" te" da" xang: su: byu za: danghoid. Houg: ce: akyu" abo ja: ri coung" nghei byid: wa shid re" gi moug: khung: yo' myed jang: panglai yo' hau: akhoug: moo nyid ja- jo, moo jo, dangain" ri phain" so: too" su- dei nyid da" Mangso shoid khyoo: - phoug loo" wa shid re" ludang: seig nanu" ri tid kyoo" byid: wa shid re" nga" eig yug gi hid: moo ju" re" zi nghoid.

¹⁶Lai loo" bye: da" apyaid' moo Mangsoo gi xang: su: byu dangain" ri nyangnu" nyang: vho: khyoo" koid wa da" akhang" byid: too" bye.

¹⁷Nghoid loug we' Mangsoo gi nyang: myed to" da" khyoo: ri khanham we' ge da" moozoo" ri zei: so' khyo" wigi sag si: toin" shid' nyid. Nyang: gi moug: khung: moug: mo, ri vo, loo nhang: wigi gug zoo meiloem: ri nya: ayo, moo nyang- myheung loo nhang: nyid. void' voo: ri byid: to" lho: nyangnu" ri zoo: noem byid: wigi nyangnu" nheigloem: ri ngei pyo: ziyo' byeung" shoin: jo, nhang: bye- ga: nyho: lho: tid nyid ago".

¹⁸Lagyo: eig yug gi hougsu" nyho: lho: tid nyid rilang" gi nya: eig yug ri xoin" to' byid: wa ga: soin' da" mung" byu yi ri lagyo: eig yug gi alug ayo" toem, pyam' nghoid ago".

¹⁹Pasidi mung" Antioki Voogung yo' Ikoni voogung mo da" Yuda byu yi dayham" bang: re" lho: mung" byu yi ri nyangnu" jhang khyoo: yo" re" ngoug yu boem ago". Hau: thang: ri nyangnu" gi Polu ri lug go' wigi zheung: du" lho: shid: bye: ga: zheung: jhoo: yoomo vooyam, moo yhe: she: thu' to" ago".

²⁰Nghoid loug we' - nya: da" ayam, aqei: mo da" loem" jeing" bang: gi nyang: ri re" lheung khoem, to" boem, Nyang: gi to' re" lho: voogung khoug: khyoo: doem, vang lo. Hau: thang: nyid" ri Polu yo' Barnaba eig yug gi Dabe voogung khyoo: yhe: lo" ago".

²¹Polu Yo' Barnaba eig yug gi ludang: gi ri Dabe Voogung moo kho" kyo" lho: wigi byu yi myoo" sho' bang: gi cangzoo: yi bue" lo boem ago". Hau: thang: moo nya: eig yug gi Lustra, voo- Ikoni yo' Pesidi mung" mo wigi Antioki voogung khyoo: doem tau" lo" ago".

²²Nya: eig yug gi loem" jeung" loo bang: ri yoem: byid: lho: loem" jeung" da" khyoo: moo- dain: dain: dayab, jo, boem wa shid re we' - nyangnu" ri tid poin" tid kyeing" byid: wigi Ngoonu" gi Mangso mungdain khyoo: vang loo" wa shid re" yau: khe" da" khyoo: myoo" sho' ri yo" lid phyed' loo" ca" - ga: kho" kyo" ago".

²³Nya: eig yug gi phung khang" moo" moo phung: ludaid' yi ri zheung: cang nyheung to" lho: wigi zoo: noem, jang" pyam' lho: akyu" bain mho' lang" gi nyangnu" loem" jeung" nyid da" Aseing: lo, khoug: moo houg: bang: ri zheung: mho' ab, byid: bye.

²⁴Nya: eig yug gi Pesidi mung" khyo" lid jang: lo" wigi Pamphuli mung" khyoo: ju" lo" ago".

²⁵Nya: eig yug gi Perag voogung moo we' ludang: seig ri kho" kyo" lho: wigi Hau: thang: ri nya: eig gi Atali voogung khyoo: zheung: yhe: lo" ago".

²⁶Nya: eig yug gi hau: voogung mo lhid' zhoung: lho: Antioki voogung moo nya: eig yug zei: bain, ca" da" moozoo" ri bain zei: wa shid re" phung: byu yi gi Mangso da" lo, khoug: moo zheung: ab, byid: da- voogung khyoo: doem, ju" yhe: lo.

²⁷Nya: eig: yug gi Antioki voogung khyoo: ju" yhe: loo" lang" phung byu yi ri khe: zheung" yu wigi nya: eig yug khyo" Mangsoo gi khate" da" moo" ri zei: loo bye: da" khyoo: dangain" ri we' Mangsoo gi tungbau byumyu" yi Yesu ri loem" jeung" lo boem wa shid' mo khyoo: khasu" phang byid: lo da" khyoo: dangain" ri we' - nyangnu" ri tid kyo" ago".

²⁸Nya: eig yug gi hau: voo mo loem" jeing" bang: yo' myang" sho' shau" zoem" khau: theung: nyid nyid ago".