Read Lashi ACTS 15 Bible Online

ACTS 15 - Lashi bible

ACTS 15

¹Byu dayham" bang: gi Yuda mung" mo zi Antioki voo moo zheung: ju" re" boem lho-loem" jeing" bang: ri nyangnu" gi Moshe da" tarha" yo' dakhyoo" ti" shooyid' thang: yham" zi akoid boem nghoid rigi khyoid yu zi ayo" shau" ga- yhe: jhoug" byid: shed" lo" ago".

²Polu yo' Barnaba eig yug gi-He: Khyoo: yo' sen: lho: nyangnu" yo' gye" ngeug byo, go" nyid boem. byen, phyoo" sham: goo" wa shid' mo Polu yo' Barnaba ri Antioki voo moo phung ludaid' yi dayham" yo' Yerusalem voomoo" moo nyid da- lagyoo: yi yo' phung ludaid' yi jhang khyoo: nhang: kaid wa shid mo sham: phyed' to" ago".

³Phung byu yi gi nyangnu" ri yhe: de" kaid ago- nyangnu" gi Phonisha mung" yo' Samari mung" khyo" so" lid lo" zoore- tungbau byumyu" yi gi Mangso shoid khyoo: - khasu" phoug lheung: lo boem wa da" khyoo: ri hug: moo nyid mo, ri we' zhang: kyo" ago".

⁴Nyang: nu" gi Yerusalem voomoo" moo ju" yhe: lo" boem uri houg: mo da" phung byu yo' dage" za: lagyoo: yi yo' phung ludaid yi gi nyangnu" ri lhoem: tau, yu boem bye. Houg: lang" Polu gi nyangnu" da" lo, khyo" wigi Mangsoo gi khayhang: te" da" moozoo" ri zei: nyid da" khyoo: nyangnu" ri tid kyo.

⁵Nghoid loug we' pharishe be da" phung moo bo da" loem" jeung" mo, dayham" gi zheung: to' yab, lho: wigi tungbau byumyu" yi gi shooyid' thang: yham" khyoo: kham: yu ca" hau: lho: Moshe da" tarha" ri bo phau" cang wa shid re" nyangnu" ri tid ca" ga: bo tid nyid boem ago".

⁶Houg: yoomo Lagyoo: yi yo' phung ludaid yi gi he: khyoo: ri myed yu" wa shid re" zoeb, phung ri koid ago".

⁷Soo" soo" myang" sho' bain tid sham: go" thang: ri Petru gi to' yab, lho: nga" mang: nhung" yi we" - tungbau byumyu" yi shau" gyo: lho: loem" jeung" lo boem wa shid re" - Mangsoo gi goonham, mo wigi tungbau byumyu" yi ri ngeibu: ludang: seig yhe: kho" kyoo" wa shid re" ngoori nanu" phung mo khyen: thu' yu too" bye: ziri nanu" nyang: si' bye.

⁸Byu yug khang" mo" da" ung: khoug: nheigloem: ri se' da" Mangsoo gi ngoonu" ri gyeungshang: da" Venyi byid: bye: ziyo' dakhyoo" ti" tungbau byumyu" yi ri we' - gyeungshang: Venyi byid: bye: ziyo' dakhyoo" ti" nyangnu" ri we' vho: nghei nyid bye: da" khyoo: ri toin" shid' too" bye.

⁹Mangsoo gi ngoonu" yo' Tungboug yi da" agyoo: moo gootu: akho' too" nghoid da- nyng: nu" we' loem" jeung" lo boem bye: yoomo Mangsoo gi nyangnu" da" yooboo dangain" ri we' khyoid pyam' byid: bye.

¹⁰Houg: su" danghoid rigi ngoonu" da" phoug" phyid" yi we' -ngoonu" nyang: we' ayo" voin, da" yoovoin, ri loem" jeing" bang: da" atho' moo foin: byid: bye- akhid" ciwim wigi ngoonu" Mangsoo ri leig yu jham" ca: yu" noug go" la".

¹¹Ngoonu" we' nyangnu" yo' dakhyoo" ti" loem" jeing" yoomo ASEING Yesu da" jeju" khyo" wigi khyoid yu khyoo: ri shau" yu boem bye- ga: tid.

¹²Barnaba yo' Polu eig yug gi-nya: eig youg da" lo, khyo" wigi tungboug yi da" shid khoin" moo Mangsoo koid shug da" mau" pho" moozoo" yo' mau" pho" alhoo: again khyoo: ri tid kyo" nyid da" uri zoeb, phoung nyid mo, dangain" gi sam" zoo: gyo: nyid boem ago".

¹³Nyang: nu" bain tid thang: ri Yaku we' Nga" mang: nhung" yi we" - Nga" dang: ri we' tam" gyo: yu" ge'.

¹⁴Mangsoo gi tungbau byumyu" yi mo dayham" ri nya: byumyu" bue" loo nhang: wa shid mo khyen: yu to" khyo" wigi tungboug nyang: goin, coung: da" khyoo: xang: shed" mo wigi khasu" toin" shid' bye: da" khyoo: ri Simun gi sho' kyo" abye:.

¹⁵Lapi: yi tid to" da" mungdang: yi yo' we' he: khyoo: gi dangain" zi du, go" nyid da.

¹⁶Jhoem: mougsoug" moo he: thang: nab, ri ngoo doem tau" re" lho: David da" mungdain ri doem, tam: too" byid: wa Byo, yoin" jo, da" zi, ri ngoo doem nyheung koid too" wa Hau: lho: hau: ziri yoem: doem, bo loo nhang: wa ga: Aseing: tid.

¹⁷Houg: lang" deung nyid da" byu xang: su: dangain" mo, gi Nga" byumyu" yi bue" loo wa shid re" ngoo khe: yu bye. Tungbau byumyu" yi dangain" bang: gi nga" jang" moo ju" ri" goo" wa zi nghoid.

¹⁸He: khyoo: ri goonham, goo co, mo wigi si' nhang: to" da" Aseing: gi hid: su" ga: tid nyid.

¹⁹Yaku we' xo' tid nyid zigi Ngoo myed khyo" nghoid rigi Mangso shoid khyoo: phoug lo da" tungbau byumyu" yi ri ngoonu" gi ayoug: akhi: age koid byed.

²⁰Hau: tho' moo phara" soolhoo: ri ngei" byid: ziyo' asain asen" ayung" alho, da" zoo: noem, ri abo zoo: wa shid re" gain: tho' zung" khyoo: acang wa shid re" leung zeung: mo, cu" said' da" shoo" yo' suid" ri azoo: goo" wa shid re" mougsoug" lhid" lho: nyangnu" ri kyo" kaid' ri gi, wa"- ein: ngoo myed yu".

²¹Khasu" wim gari Moshe da" tarha" ri Dougno: Bidnyid khang" moo" tarha" jung joem moo goonham, mo nyang: - zheung: nghab nyid boem lho: wigi voogung loem: khang" moo" mo: nya: mungdang: ri kho" kyo" nyid boem abye: go- ga: tid kyo.

²²Houg: Lang" lagyoo: yi yo' phung ludaid yi dangain" mo, gi sham: go" lho: nyangnu" mo byu dayham" ri khyen: yu wigi Polu eig yug Barnaba yo' dage- Antioki voogung khyoo: bo nhang: kaid' wa shid re" sham: go" to" boem ago". Hougsu" loem" jeing" bang: dangain" wigi phau" myang: da" Basaba ga: da" Yuda yo' Sila eig yug ri khyen: yu lho: nya: eig youg lo, khyo" mougsoug" dakhyab, lhid" foin: kaid' ago".

²³Hougsu" lhid" foin: kaid da" mougsoug" moo Ngoonu" da" mang: nhung" yi nghoid da- ngoonu" lagyoo: yi yo' phung ludaid yi gi Antioki voogung yo' Suri mung" kilik mung" moo zheung: nyid da- tungbau byumyu" mang: nhung" yi ri vhu" kaid.

²⁴Ngoonu" da" phung mo byu dayham" bang: gi ngoonu" wigi ci: we' apyeung: kaid' ziri nanu" jang" moo ju" re" lho: myid myo: ja: dang: aja: ja: ri zheung: tid wigi nanu" ri myid zheung: myoo: nhang: ga: da" thui: ri ngoonu" shau" gyo: loem bye.

²⁵Houg: yoomo ngoonu" ce: noem, sham: go" lo" lho: lagyoo: bue" loo wa da" byu dayham" ri khyen: yu wigi nyangnu" jhang. khyoo: nhang: kaid wa shid' mo dangain" bang: coem myed veung" to": boem bye.

²⁶Nyang: nu" gi ngoonu" da" ASEING Yesu Khristu da" moo" zo" shid re nyang: nya: kang: so' ri lang" vhu" abyid: loo: zei: so' lo" boem ago". nyangnu" jheddab da" Barnaba yo' Polu eig yug yo' dage" nanu" jhang cang re" lo boem wa zi nghoid.

²⁷Houg: yoomo ngoonu" gi Yuda eig yug Sila ri nanu" jhang khyoo: zheung: nhang: kaid' bye. Nya: eig yug gi lhid" foin: da" mougsoug" moo ngoonu" lhid" to" gu ri nya: eig youg da" nhoid mo we' tid kyoo" goo" wa.

²⁸Phara" soolhoo: ri ngei" byid: bye: da" zoo: noem- suid" yo' leung zeung: mo cu" said' da" gougnyhoug shoo" ri azoo: goo". Gain: tho' zung" da" moo" ri we' akoid goo" ein: da: jang" mo jain" lho: nanu" ri yoovoin, gootu: afoin: wa shid re" gyeungshang: da" Venyi moo ngoonu" e" myed, sham: coem, shoin" to" boem bye.

²⁹Nanu" hau: khyoo: ri jang" pyam' boem nghoid rigi gi, bye: - yang" zain" nyid goo" baja" o" ga: zheung: lhid" kaid' ago".

³⁰Houg: lang" lagyoo: yi ri hougsu" zheung: nhang: kaid' lho: wigi loem" jeung" nyid mo, dangain" ri zheung: khe: zheung" yu lho: nyangnu" ri hau: lhid" foin: mougsoug" thoid' byid: ago".

³¹Hau" mougsoug" ri nyangnu" bain' nghab lang" gi houg: su" yoem: byid: kaid' da" mungdang: yoomo nyangnu" gi gye" ngeibu: nyid boem.

³²Yuda yo' Sila eig yug gi lapi: zheung: nghoid yoomo loem" jeing" bang: ri myang" sho' yoem: byid: da" mungdang: tid poin" tid kyeing" byid: nyid ago".

³³Nya: eig yug gi hau: voogung moo dayo, zoo: theung: nyid wigi hau: thang: ri loem khoug: bang: gi nya: eig yug ri gyoonoug tung" vhu" dang: tid boem lho: zheung: nhang: kaid' boem bye. Nya: eig yug we' nya: eig yug ri nhang: kaid' bang: jhang khyoo: doem tau" lo" ago".

³⁴Nghoid loug we' - Sila gi houg: moo jha" theung: nyid wa shid re" myed phyed' pyam da.

³⁵Polu yo' Barnaba eig yug gi Antioki voogung moo dayo, zoo: zheung: theung: nyid lho: Mangso mungdang: ri gooji bang: yo' dage" jhoug" byid: nyid ago".

³⁶Dayo, zoo: kyo: lo" thang: ri Polu gi Barnaba ri Mangso mungdang: ri ngoonu" kho" kyoo" ca" shi" joyoo khyoo: mang: nhung" yi khasu" koid nyid boem ziri yhe: cang koem" yu" wa shid re" nga" eig yug nyangnu" jhang khyoo: doem tau" loo" shang - ga: tid go.

³⁷Barnaba gi nya: eig yug yo' dage" Marku ga: da" Yohan ri we' bo lhoung: shu" loo" nau, da.

³⁸Nghoid loug we' Polu gi nya: eig youg da" moozoo" moo thang sho abo zei: loo:- Pamphuli voogung moo nya: eig yug ri nyhed: too" khare" lho: doem, tau" phang: loo" su: nghoid yoomo Marku ri shu" wa shid re" agi, ga: myed nyid.

³⁹Nya: eig yug gi he: da" khyoo: yo' sen: lho: gyi" sho' ngeug go" wigi gang: go" lo" ago". Houg: lang" Barnaba gi Marku ri shu" lho: wigi Kupro gugyoo: kang: khyoo: lhid' zhoung: lho: yhe: lo" ago".

⁴⁰Polu gi Sila ri khyen: yu lho: loem" jeing" bang: gi Polu ri Aseing: da" nheig khyeug khyoo: moo bain, ab, nung" byid: boem lang" gi to' lo" ago".

⁴¹Houg: su" wi Polu gi - Suri mung" yo' Kiliki mung" khyo" lid: jang: lo" wigi phung byu yi ri loem" jeung" da" nheigloem: lhei, teing byed.