Read Lashi ACTS 17 Bible Online

ACTS 17 - Lashi bible

ACTS 17

¹Polu yo' Sila eig yug gi Ampipholi yo' Apoloni Voogung ri so" lid, lo" wigi Thesaloni voogung khyoo: ju" yhe: lo" ago". Hau: voogung moo Yuda tarha" jung daloem: jo.

²Polu gi nyang: khanham we' lhoung koid ziyo' dakhyoo" ti-Yuda Tarha jung khyoo: yhe: lo"- Houg: moo labain' nyid" ri jhoem: mungdang: yo' cang lho: mung" byu yi yo' doem, go" nyid.

³Meshia gi dayam, dayoo: kham' zoo: ca" wa ziyo' - shid: jang" mo doem, dei to'' loo wa"- ga: da" khyoo: joem ri jhoem: mougsoug" moo shid' lho: nyangnu" ri phyed' phyed' kho' kho' tid kyo" nyid. Polu gi nyangnu" ri hid: ngoo tid kyo" nyid da- Yesu gi Meshia nyang: nghoid bye"- ga: tid kyo.

⁴Nyang: nu" mo dayham" gi loem" jeung" lo boem wigi Polu yo' Sila shoid khyoo: bo dab, ago".

⁵Nghoid loug we' Yuda byu yi gi myed, zheung: noug: yoomo fu" moo" khyoo: cang nyid yen" da" - byugang: yi ri khe: zheung" yu lho: byu phung: daloem: koid yu boem ago". Nyang: nu" gi davoo, goin" ziri lhu: nhau" zhuang" to' kaid' boem lho: wigi Yasun ga: su: yhoem: khyoo: sarhi' yhe: zheung: koid wigi Polu yo' Sila eig yug ri mung" byu yi da" shid khoin" moo she: khyoid thu' yu wa shid re" - yhe: pue: ago".

⁶Nyang: nu" gi azheung: shau" sho: myang lang" nyangnu" gi Yasun yo' loem" jeing" bang: dayham" ri hau: voogung mo amyeing" ci: mo, shid' moo she: khyoid re" lho:" Hid: bang: gi joyoo khyi, khang" moo" moo yau: khe" da" khyoo: ri ze" bue byid: loo mo, nghoid ago'- akhid" ngoonu" da" voogung moo we' ju" lo boem abye: go"-,, Yasun we' nya: yhoem: moo he: eig yug ri lhoem: kham: yu to" da" - ga: zheung: tid kyo".

⁷Nyang: nu" gi Yesu ga: da" khokham" dayug nyid ga: zheung: tid wigi Khosen" da" tarha" joem ri shoid rue" nyid mo, nghoid ago- ga: zheung: zeug yoid boem.

⁸He: da" dang: ri shau" gyo: boem lang" mung" byu yi yo' voogung mo amyeing" akhang" ci: bang: gi gye" lu: fu: go" lo boem bye.

⁹Amyheing ci: bang: gi Yesun yo' gooji bang: ri Pakham: ngei khyoug" nhang: lho: nyangnu" ri nhang: kaid' ago".

¹⁰Moug: coid' loo yo' - loem" jeing" bang: gi Polu yo' Sila eig yug ri Beria voogung khyoo: nhang: kaid' ago". Hau: voogung moo zheung: ju" yhi: lang"= nya: eig yug gi Yuda yi da" tarha" jung khyoo: yhe: lo.

¹¹Beria voobyu yi gi Thesaloni voobyu yi da" tho' re- khoin: lheing: mo, nghoid boem. Nyang: nu" gi mungdang: ri nheigloem: zhug zhug za: tam" gyo: yu boem wigi Polu kho" kyo" da" mungdang: gi deung adeung ziri si' wa shid re" nyid" khang" moo" jhoem: mougsoug" ri nghab xoin: se' nyid ago".

¹²Nyang: nu" mo myoo" sho' mo, gi loem" jeung" lo boem bye- byunyed, azhang myhang: bye: da" - Grid" myiyi: yi myoo" sho' mo, yo' Grid" yuggi yi myoo" sho' bang: we' loem" jeung" lo boem ago".

¹³Nghoid loug we' Polu gi Beria voogung moo we' - Mangso mungdang: ri tid kyo" nyid ga: da" ludang: ri Thesaloni voogung: mo Yuda byumyu" yi shau" gyo: boem wigi nyangnu" gi Beria voo khyoo: zheung: ju" re" lho: mung" byu yi ri lu: fu: loo wa shid re" re" pue: boem ago".

¹⁴Loem" jeing" bang: gi houg: lang" jang- Polu ri panglai gyid yam, moo ju" sho' yhe: de" kaid' boem ago". Nghoid loug we' Sila yo' Timothi eig yug gi Beria voogung moo theung: nyid shi" ago".

¹⁵Polu ri yhe: de" kaid' khoo, mo, gi Athen voo moo ju" sho' Polu yo" dage" zheung: cang yhe: wigi Sila yo' Timothi eig yug ri ge, bue" yhi' myab, khyo" nya: jang" moo cang ri nhang: ge' ga: Polu pyeung: kaid' da" dang: ri voin, lho: Beria voo khyoo: doem tau" lo ago".

¹⁶Polu gi Athen voogung moo Sila yo' Timothi ri lang" nyid da" uri nyang: gi hau: voogung moo phara" soolhoo: za: byeung" jo, ziri myang wigi nya: nheigloem: gye" apyoo: loo.

¹⁷Houg: yoomo Polu gi tarha" jung moo Yuda byumyu" yi yo' Mangsoo ri noku da" tungbau byumyu" yi yo' we' - Shava kid vang" cang so" lid, yen" da" mung" byu dangain" mo, ri we' - nyid" khang" moo" tid sham: go" nyid.

¹⁸Epikuri yo: Ati- yi nheigloem: phajhi" sara: yi dayham" we' polu yo' gye" tid ngeig go" nyid boem. Nyang: nu" mo dayham" gi He: ci: ase' da" koopyoid' khyoid' gi ce" noem, ri tid nau nyid lha"» ga: tid boem lho: gootu: dayham" bang: gi goo tu: byumyu" yi da" phara" khyoo: tid nyid sam" ga: tid go" nyid boem. Nyang: nu" hidsu" tid nyid boem zigi Yesu Khyoo: yo' nyang: doem dei to'' lo da" khyoo: ri Polu kho" kyo" nyid yoomo nghoid.

¹⁹Houg: yoomo nyangnu" gi Aripagu boug voogoung da" Kongsi: yung" shid' moo Polu ri shu" do, yhe: lho: nang tid kyo" nyid da" he: jhoug" byid: khyoo: aseig yo' sen: lho: ngoonu" si' nau.

²⁰Nang jhoug" byid: da" khyoo: dayham" gi ngoonu" gyo: ri gye" gyo: mau"- Hau: da" dangkang: joem ri ngoonu" si' nau" ga: tid boem ago".

²¹(Khasu" wim gari Athen voobyu yi yo' houg: moo zeung: nyid da" tungbau byumyu" yi gi lo" thang da" ludang: aseig khyoo: ri tid kyo" gyo: yu khyo" nyangnu" da" ayo, joem bain sho' ri lhai: kaid' nyid boem ago".

²²Polu gi voogoung kongsi: yung" mo byu yi da" shid khoin" moo yab, jo, lho: wigi- Athen voobyu yi we" - nanu" gi noku thung" ri gye" kang: lung bu mo, nghoid da" khyoo: ri khyookhaid gu: khang" moo" ri yu" lho: ngoo si' bye.

²³Khasu" wim gari ngoo nanu" da" voogung khoug: moo so" yen" ri nanu" da" coung" pid' joyoo joem ri cang yu" yen" ri" Ngoonu" ase' da" Mangso shid mo, , ga: lhid" tab to" da" phoin: daloem: ri ngoo myang. Hau: nanu" asi looza: noku nyid da" Mangso khyoo: ri akhid" ngoo tid khyo" nyid zi nghoid.

²⁴Moug: myid yo' houg: moo nyid ja: - jo moo jo, ri phain" to" da" Mnagsoo gi Moug: khung: yo' myed jang: da" Aseing: nghoid wigi byu yi, lo, yo' koid to" da" noku yhoem: moo anyed nghoid da.

²⁵Hau: Aseing: nyang: byu yug khang" moo" ri kangso' yo' so' shi: nhang: ziyo' - ca" nyid da" zi dangain" ri byid: too" su: nyang: nghoid yoomo ngoonu" gi nyang: ri daja: ja: koid byid: aca".

²⁶Mangsoo gi xangsu: byu dayug ri shi" phain" to" lho: hau: yug mo, byumyu" acang: joeb, sho' nyid thu' loo nhang: wigi mougmyid gyab, goin" jang" moo byeung" loo" nhang: bye. Nyang: nu" nyid wa shid mo ayo, akhyeing: zain, nyid yo' joyoo jo, lang:- moug: kyoo" joem ri gu: shid' khyau" lho: kyoo" so" too" byid: bye.

²⁷Mangsoo hidsu" koid to" zigi ngoonu" nyang: ri sho: lho: Nyang: ri soeb, sho: yen" ri myang ri myang boem abe- ga: koid zi nghoid.

²⁸Nghoid loug we' Mangsoo gi ngoonu" hang" yo" we" ve: nyid zi anghoid. Byu dayug tid ziyo' dakhyoo" ti" ngoonu" gi nyang: moo kang: so dei nyid lho: so" yen" do: yen" boem. Nanu" da" dang: zhoem, ludaid' yi lhoung tid ziyo' dakhyoo" ti" - ngoonu" we' nya: zoo: du yi nghoid- ga: dang: zhoem, tid to.

²⁹Ngoonu" gi Mangso zoo: du yi nghoid boem yoomo Mangsoo gi byu da" lo, moo" phajhi" khyo" koid to" da- ngei sheing: soolhoo- lug boem' soolhoo: yo' du ein: age jhoo: nghoid da.

³⁰Mangsoo gi xangsu: byu yi nyang: ri asi loo: nyid lid: lo da" ayo, akhyeing: ri yu" lhai: kaid' bye- nghoid loug we' akhid" gi khyi khang" moo" mo xangsu: byu dangain" ri nyangnu" da" akhyeing" ashoeb, da" moozoo" dangain" jang" mo nheigloem: thed' lheung: loo wa shid re" amyeing" byid: kaid' bye.

³¹Khasu" wim gari nyang: khyen: yu too" su: da" lo, khyo" wigi nyang: gi mougmyid gyab, goin" ziri dain: nyeung khyo" tarha" dang: phyed' wa da" bidnyid' ri mhe, phyed' to" abye:. He: Khyoo: yo' sen: lho: yug khang" moo" ri sag si: toin" shid' wa shid re" hau: yug ri shid: jang" mo doem, dei to' loo nhang: bye.

³²Nyang: nu" gi shid: jang" mo doem, dei to' lo da" khyoo: yo' sen: lho: Polu tid ziri shaug" gyoo: lang" nyangnu" dayham" bang: gi Polu tid da" dang: ri juang" yi pyam' byid: boem. Nghoid loug we' dayham" bang: gi he: khyoo: yo' sen: lho: nang tid ziri ngoonu" doem, gyoo: boem shi" ga: wa tid ago".

³³Houg: yoomo Polu gi hau: phung: mo thu' lo" da.

³⁴Byu dayham" gi Polu da" thang: cang wigi Yesu ri loem" jeung" lo boem ago". Houg: bang: mo Dionusi ga: da" Aripagu kongsi: phung: moo bo da" tarha" agyi Damari ga: da" myiyi: dayug we' bo da- mung" byu yi dayham" bang: we' bo da.