Read Lashi ACTS 18 Bible Online

ACTS 18 - Lashi bible

ACTS 18

¹Hau: thang: ri Polu gi Athen voogung mo thu lo" wigi Korinthu voogung khyoo: ju" yhe: lo.

²Hau: da" voogung moo gi Pontu mung" byu Akula ga: su: Yuda byu dayug yo' nya: yhoem: seing: myhi' Priskela eig yug yo' yhe: shau" go. Yuda byumyu" yi dangain" mo, gi Roma voogung mo thu' loo" ca"- ga: Roma khosen: phoo kolodi gi amyeing" khyo' kaid' yoomo nya: eig yug gi athei" myang" shi" ri Itali mung" mo ju" re" atang: nghoid ago".

³Polu gi nya: eig yug moo yhe: nghe: khau: nyid wigi moo" dage" yhe: bo cang zei: nyid. Khasu" wim gari Polu we' - nyang: tang: yo' dakhyoo" ti" - moo" oeb, zo: zi nghoid nyid.

⁴Polu gi Dougno: Bidnyid khang" moo" - Yuda tarha" jung moo Yuda byumyu" yi yo' doem, go' koin, lho: nyangnu" loem" jeung" loo sho' -tid ngoug yu nyid.

⁵Sila yo' Timothi eig yug Makedoni mung" moo zheung: ju" ri" lang" Polu gi nya: ayo, dangain" mungdang: kho" kyo" khyoo: moo za: kaid pyam' wigi Yesu gi Meshia nghoid ga: Yuda byumyu" ri sagsi: kham, byid: nyid.

⁶Nyang: nu" gi nyang: ri aphoug" akhyoid tid ngeug lo nyid lang" Polu gi nya: byimi, joem mo phei" lhoug: joem ri ko: khyo, pyam' lho: nanu" joem: lo" boem lang" gi nanu" nya: yooboo za: danghoid loo: wa Nga" vhudi tho' moo gi ce" yoovoin, we' ajo, loo:- akhid " nyid" mo thei: gu: ngoo gi tungbau byumyu" yi ri mungdang: kho" kyoo" wa shid re" yhe: loo" zi nghoid bye- ga: tid.

⁷Hau: thang: ri Polu gi nyangnu" jang" mo thu lo" lho: Mangsoo: ri coung" pid' da" Titu Yustu ga: da" tungbau byu dayug yhoem: moo yhe: theung: nyid hau: youg yhoem: Yuda tarha" jung yo' jhang jhang za: nghoid nyid.

⁸Houg: yoomo tarha" jung mo agyi phoo Krispu yo' nya: yhoem: byu yi dangain" mo, gi Aseing: ri loem" jeung" lo boem ago". Korinthu voobyu yi myoo" sho' bang: we' - hau: mungdang: ri shau" gyo: lho: loem" jeung" lo wigi Babtisma kham: yu boem bye.

⁹Myen" damyen, moo Polu gi yoeb, myang daja: ri myang bye- Hau: yoeb myang mooAseing: gi Polu ri ‹‹Agyug- xo' lho: kho" kyoo" we' Yoem: ashoin: khasu" wim gari ngoo gi nang yo' dage" nyid.

¹⁰Nang ri hang" we' ce: dam we' ayo" tab wa He: voogung moo ngoori loem" jeung" loo wa mo, myoo" sho' nyid boem ago- ga: tid.

¹¹Houg: yoomo Polu gi hau: voogung moo dazain lham" moo" khyug khyab, ju" sho' nyid nyid lho: mung" byu yi ri Mangso mungdang: kho" kyoo" bye.

¹²Nghoid loug we' Galio ga: su: gi Akhaia mung" zoug: bue" loo lang" Yuda byumyu" yi gi zeung: foem: lo lho: Polu ri myheug yu wigi tarha" yung" khyoo: shu" yhe: lo" ago".

¹³Nyang: nu" tid zigi he: yug gi tarha" yo' azhung" go" khyo" Mangsoo ri noku wa khyoo: mung" byu yi ri shu" pue: nyid su: nghoid- ga: zheung: tid boem.

¹⁴Polu phoug tu" wa ga: soin' yo' - Galio gi Yuda byumyu" yi ri gyeing" nyang: he: moozoo" gi akhyeung" da" moozoo" - anghoid lang" gi shoid rue da" moozoo" nghoid ziri ngoo gi nanu" yooboo foin: khyoo: ri nyeing" zoo: tam" gyoo: byid: zi nghoid.

¹⁵Nghoid loug we' he: da" moozoo" gi myeing" dang: thui: yo' myeing: yo' sen: lho: wigi tid ngeig go" khyoo: za" nghoid yoomo wigi nanu" nyang: vho: da" tarha: ri nyheung yu ca" ago- hid: yhang: tr" moozoo" yoomoo nyang: ri ngoo gi tarha" agyi akoid wa ga: Yuda byu yi ri tid.

¹⁶Houg: yoomo nyang: gi ngoonu" ri tarha" yung" mo khaid thu' kaid' da.

¹⁷Nyang: nu" gi tarha" jung mo agyi phoo- Sosteni ri myheug yu lho: tarha" yung" shid' moo baid' ago- nghoid loug we' Galio gi hau: ziri cishu: anhang: nghoid da.

¹⁸Polu gi Korinthu voogung mo loem" jeing" bang: yo' dage" myoo" sho' nyid" theung: nyid shi"- hau: thang: ri nyangnu" ri vhu" too" kho' lho: Lhid' khyo" wigi Priskila yo' Akula eig yug yo' dage" Suri mung" khyoo: gu: yhe: lo" ago- kenkrea voogung mo gyid sangphoo' ato' loo" shi" ri Polu gi Mangsoo ri jham, tang: too bye: yoomo nya: vhuloem xam: zhoid' khyo, pyam.

¹⁹Nyang: nu" gi Ephesu voogung moo zheung: ju" yhi: lang" Polu gi Priskila yo' Akula eig yug ri hau: voogung moo nyhed: too" kho. Hau: tang: moo nyang: gi Yuda tarha" jung khyoo: yhe: lho: Yuda byumyu" yi yo' dang: tid shi, go" nyid.

²⁰Byu yi gi nyangnu" jhang myang" sho' nyid wa mho' loug we' Polu gi he: pyam lho:

²¹Mangsoo myed vho: da" khyoo: nghoid rigi nanu" jang" moo doem ri" shi" wa ga: nyangnu" ri tid. Hau: thang: ri Polu gi Ephesu voogung mo lhid' gu: lho: to' yhe: loo" bye.

²²Polu gi Kesare voogung moo gu: ju" yhi: lang" Yerusalem voomoo" khyoo: yhe: lo" wigi phung: byu yi ri yhe: vhu" too" kho' lho: Antioki voogung khyoo: yhe: lo.

²³Hau: voogung moo dayo, koo: yhe: theung: nyid wigi houg: mo nyang: gi Galile mung" yo' phrugi mung" gyoo: khyo" lid, jang: lo" lho: loem" jeing" bang: ri so' nyheung teing byed.

²⁴Hau: ayo, moo Alexandru voobyu Apolo ga: su: Yuda byu dayug gi Ephesu voogung khyoo: ju" re. Nyang: gi dang: gye" se' tid su: yo' jhoem: mougsoug" ri gye" si' su: nghoid.

²⁵Nyang: gi Aseing: khyoo: ri jhau" yu ca" nyid su: nghoid yoomo Yesu da" khyoo: yo' sen: lho: wigi akhyoo" joo joo kang: lung bu tung"- jhoug" byid: su: nghoid. Nghoid loug we' nyang: gi Yohan da" Babtisma khyoo: ri za: si' su: nghoid,

²⁶Nyang: gi Yuda yi da" tarha" jung moo agyug avoem, looza: kho" kyo" nyid. Priskila yo' Akula eig tang: gi nya: mungdang: ri shaug" gyoo: lang" Apolo ri nya: eig youg yhoem: khyoo: khe: yu wigi Mangso khyoo: ri je" wigi jid" jid" nug nug za: nyang: ri tid phoid: sho' kyoo" nhang: ago".

²⁷Apolo gi Akhaia mung" khyoo: yhi: wa ziri myed phyed' to" houg: yoomo Ephesu voogung mo loem" jeing" bang: gi Akhaia mung" moo nyid da" loem" jeing" mo jhang khyoo: Apolo ri lhoem: kham: yu goo" wa shid re" nyhen" byid: da" yoem: byid: mougsoug" ri lhid" lho: nyang: ri bo pang" thoug kaid' ago". Nyang: gi Akhaia mung" moo ju" yhi: lang" Mangso da" nheig khyeug khyo" - loem" jeung" lo da" byu myoo" sho' mo, ri gye" yhe: yo" bo pang" thoug da.

²⁸Khasu" wim gari Yesu gi Meshia nyang: nghoid bye"- ga: ziri jhoem: mougsoug" mo sagsi: joem yo' khyag khyag za: toin" shid' byid: wigi mung" byu yi da" shid khoin" moo Yuda byu yi ri yo" tid oung: pyam' bye.