Read Lashi ACTS 2 Bible Online

ACTS 2 - Lashi bible

ACTS 2

¹Pentikoti bidnyid ju '' loo lang-loem'' jeung" da'' byu yi dangain'' mo joyoo da loem: moo za: zeung: phoung nyid boem ago".

²Ug lid hau, lo te" da" thui: da ja-moung: khung: khyo" nyid' dain tung" myeung thu lo wigi nyangnu" zhoung: jo, da" yhoem: goin" jang" moo hau: da" thui: byeung" jo, bye.

³Hau: thang: ri nyangnu" gi-nge" byo sain" lo" da" myiyham: yo' du, da" zi nyangnu" yug khang" mo" da" tho' moo dab, jo, ziri myang ago".

⁴Nyangnu" dangain" bang: gi gyeungshang: da" Venyi: byeung" lo wigi Hau: Venyi wigi yo" tid wa yoem: so' byid: ziyo' dakyoo" ti" gootu: myeing" aja: ja: ri tid thu lo boem.

⁵Moug: myed tho' moo dajo, da" mungdain loem khang" moo" mo ju" re" boem da- Mangsoo ri gyoug phau" da" Yuda byu yi gi Yerusalem voomoo" moo nyid nyid ago".

⁶Hid: yhang: ti" myeung da" thui: ri zheung: shaug" gyoo: lang" mung" byu yi zeung: foem: lo boem ago". Nyangnu" yug khang" moo" gi loem" jeing" mo, tid nyid da" dang: ri nyang: nya myeing" khyo" se' gyo: yu boem yoomo mung" byu yi gi mau" dain nyid boem.

⁷Houg: lang" nyangnu" mau" hang" to" boem wigi hidsu" tid nyid mo, gi Galile byu yi anghoid goo la".

⁸Houg: ri nyangnu" tid da" dang: ri ngoonu" nyang: myeing" nyang: khyo" se' gyo: yu zigi khasu" nghoid lha".

⁹Ngoonu" gi Pathai meing: Media meing- xlam mung" Mesopotemia mung" Yuda mung" kapadokia mung" pontu mung- Asia mung"-

¹⁰Phyugi Pamphuli mung" Egu tu mung" kureni anam, mo Libya" meing: mo ju" ri" mo, nghoid nyid boem.

¹¹Houg" su: wigi ngoonu" mo dayham" bang: gi Roma mo ju" re" da" Yuda yo' Yuda noku thung" khyoo: phoug lheug lo" da" tungbau byu yi nghoid ago". Hau: lho: ngoonu" mo dayham" gi-krewti yo' Arabia mung" mo bang boem ago". Nghoid loug we' Mangsoo bain zei: bye: da" gyeungshang: moozoo" joem ri shau" gyo: yu" boem zigi khasu" nghoid lha"» ga: tid nyid ago".

¹²Nyangnu" dangain" bang: gi mau" hang" to" boem wigi He: zigi ce: noem ga: zi nghoid lha"» ga: nyang: cang" nyang: myed: go" nyid ago".

¹³Nghoid loug we' dayham" bang: gi hau: loem" jeing" bang: ri He: byu yi gi yhid: yed mo, nghoid boem ago" ga: juang" yi pyam.

¹⁴Houglang" Petru gi-lagyoo: daxe: dayug yo' dage" to' yab, jo, lho: wigi-Thui: to' kaid' lho: mung" byu yi ri tid zigi mang: nhung" Yuda byumyu" yi we' Yerusalem voobyu dangain" bang: we-nga" dang: ri tam" gyo: yu" ge-he: khyoo: yo' sen: lho: nanu" ri tid kyoo" ba.

¹⁵He: byu yi gi nanu" co: ziyo' dakhyoo" ti-yhid: yed, mo, anghoid. akhid" nabsoin: goug na: yi: shi" da nghoid.

¹⁶He: khyoo: gi Lapi: Yoela tid kyo" to" ziyo' dakhyoo" ti" nghoid.

¹⁷Mangsoo hid: su" ga: tid- Ngoo gi lo" thang da" bidnyid ri byu yug khang" mo" da" atho' moo-nga" Venyi foid shoin" byid: wa nghoid- nyangnu" da" nya: zoomyi: nu" yi: yo' yug gi nu" yi gi Nga" mungdang: ri kho" kyo" lo boem wa zi nghoid. Nyangnu" da" zoolu: yi gi-yoeb myang gi ri myang goo" wa hau: lho: nyangnu" da" mang: zoo: yi gi-yhoeb, mo, myang goo" wa nghoid.

¹⁸Nghoid bye- hau: da" bidnyid ri Nga" da" dei zoo: yug gi myi: yi: dangain" mo, da" atho moo nga" Venyi: foid shoin" byid: wa Houg: lang" nyangnu" gi Nga" mungdang: ri tid fu" loo" wa nghoid.

¹⁹Ngoo gi moug: khung" tho' mo-mau" pho" alhoo: again ri koid shug wigi vho: myed jang: gyab moo gi-mau" pho" moozoo" ri koid shug wa houg: moo suid" myi: yo' no, thu: da" myikhoug" ri shau" myang boem wa nghoid.

²⁰Aseing: gyi: sheung: da" phung" yoeb bo-bid nyid zeing a ju" ri" shi" ri-Bid moo" khyab, gi moug: coid' bue" lo" wigi Lham" moo" gi suid" su" ne, lo" byug wa nghoid.

²¹Houg: lang" pang" thoug yu wa shid mo Aseing: ri mho' yoid byu hang" nghoid sho loug we' khyoid yu zi shau" wa ga: tid kyo.

²²Israela mang: nhung" yi we' He: da" dang: ri tam" gyo: yu" ge'- Nazared voobyu Yesu gi-Mangso phung" yoem: vhoo" khyo" nghoid ziri Yesu da" lo, khyo" mau" pho" alhoo: again yo' mau" pho" moozoo" joem ri zei: shug abye:. He: khyoo: gi nanu" nya: da" phung: moo bue" lid lo ziri nanu" nyang: myang se' boem bye.

²³Mangsoo gi nyang: soin: to" ziyo' dakhyoo" ti" Yesu ri nanu" da" lo, moo ab pyam wa shid re" myed phyed' too" su: nyang: nghoid da" lo, moo ab pyam wa shid re" myed phyed' too" su: nyang: nghoid bye. Nanu" gi yooboo yoo" bang: da" lo, yo' Pyang" zeing moo nyang: ri baid' jen" said pyam nhang: khyo" Yesu ri said' pyam boem bye.

²⁴Nghoid loug we' Mangsoo gi-Nyang: ri shid: lo" da" yoem: so' lhoid kaid kho- shid: jang" mo doem dei to' loo nhang: bye. Khasu" wim gari shid: zigi Nyang: ri ayo" zei: lhoug too" nghoid da.

²⁵Nya: khyoo: yo' sen: lho: Davidd tid to" zigi "Ngoo gi Aseing: ri ayo, khyeing: khang" moo myo, shid' ti: moo nyang: shau" myang nyid-Nyang: gi nga" da" anam, moo nyid nyid yoomo ngoo gi yau: khe" khyoo: shau" loo: wa anghoid.

²⁶Houg: yoomo nga" da" ung: khoug: moo ngei bu: zi byeung" jo, ziyo' Nga" nhoid yhoo: moo gau yi zi byeung" jo. ngoo gi shid: loo" se' da" byu nghoid loug we' nheug byu lho: nheigloem: myen myen shau" dei nyid wa nghoid.

²⁷Khasu" wim gari Nang gi ngoori - shid: lo" da moovo, moug: moo she: pyam too" wa zi anghoid. Nang gi loemlug da re" deizoo: ri loeb duang: khoug: moo boeb, pyam nhang: wa zi anghoid ga: tid nyid.

²⁸Nang gi ngoori kangso' dei nyid jang: moo ju" lo" da- khyoo: ri toin" shid byid: abye: da. Nang gi ngoo yo' dage" nyid yoomo ngoori ngei pyoo: nhang: loo wa nghoid ga: tid.

²⁹Nga" mang: nhung" yi we' subi" fu" yen da" ngoonu" nya: phoug"- David khokham" da" khyoo: ri Nanu" ri bang bang za: tid kyoo" wa. Nyang: gi shid: lo" lho: nyang: ri myhoeb shoung: pyam abye: go- nya: da" loeb gi akhid" nyid ju" sho' hid: ngoonu" da" shid' khoin" moo jo, jo.

³⁰Nyang: gi lapi: nghoid lho-Mangsoo gi nyang ri dang: soo" khoin" byid: to" ziri nyang: se' da. Mangsoo gi David khokham" yo' dakhyoo" ti" khokham" koid wa nya: da" akung: mo khokham" thu ri" nhang: wa ga- jham, tang: to.

³¹Doem ju" loo wa da" bidnyid moo Mangsoo gi ce: noem koid loo wa zari- David gi se' too" yoomo Meshia gi shid: jang" mo doem dei to'' loo wa da" khyoo: ri David tid zigi nyang: ri moovo, moug: moo she: pyam to" zi ashug" nghoid da- nya: gung du: ri loeb khoug: moo aboeb loo" nhang: nghoid da- ga: tid to.

³²Mangsoo gi he: da" Yesu ri dei to'' loo nhang: abye:- hougsu" ngoonu" dangain" gi he: khyoo: yo' sen: da" sagsi: nghoid bye.

³³Nyang: gi nya: pho, lo, yo shoid' moo zhoung: jo, wa shid re" to' yu zi shau" lho: Nya: pho, dang: soo" khoin" byid: too" bye: ziyo' dakhyoo" ti" Nya: pho jang" mo gyeungshang: da" Venyi ri yo" shau" kham: yu bye. Akhid" nanu" shau" myang ziyo' shau" gyo: nyid khyoo: gi nyang: nga" da" atho' moo foid shoin" byid: da-nya: jeju" jhung: shug nghoid bye.

³⁴Khasu" wim gari David gi moug: khung: khyoo: ado, loo" nghoid da- Ngoid sho loug we' David gi

³⁵Re" gyivoo joem ri Re" da" khyid: nang: da" tang khug khyo" re" da" khavoo: khoug: khyoo: ngoo akaid' byid: byid: gi-Nga" lo, yo shoid moo dazhoung: jo, we' ga: wigi Hau Aseing: gi Nga" Aseing: ri tid da- ga: tid.

³⁶Houg: yoomo Nanu" wigi pyang" zeing tho' moo baid' jen" said pyam da" hau: Yesu gi Mangso wigi Aseing: yo' Meshia khyo" tang: too" bye: ziri Israela byumyu" goin" khyag za: se' yu looge' o"- ga: tid kyo" da.

³⁷Meing: byu yi hau: dang: ri shaug" gyoo: lang" gi nyangnu" da" nheigloem: moo gyi" sho' gyo: zang" boem yoomo Petru yo' lagyoo: gooji ri mang: nhung" yi we' ngoonu" khasu" koid boem wa lha"» ga: myed: boem.

³⁸Petru gi nyangnu" ri mang: nhung" yi dangain" bang: we' nheugloem: thid' ge'- nanu" da" yooboo joem ri khyoid pyam byid: zi shau" wa shid re" Yesu khristu da" myeing mo-nanu" yug khang" moo" Babtisma ri kham: yu ge'- houg: lang" Mangso jhung: shug nghoid da- gyeungshang: Venyi we' nanu" shau" kham: yu boem wa zi nghoid.

³⁹Khasu" wimgari- Mangso dang: soo" khoin" gi nanu" shid mo we' nanu" da" nya: myed: nya: zoo: yi shid mo we' ngoonu" da" Mangsoo Aseing: nyang- khe: yu bye: yoomo vi: moo nyid mo, dangain" bang: shid re" we' byid: too" bye.

⁴⁰Houg: lang" Petru gi gootu: dang: khyoo" myoo" sho' yo' nyangnu" ri tid poin" tid kyeing" byid: zoore- nanu" gi he: akhyeing" ashoeb da" byu yi tho' moo ju" lo nyid da- yoobo dam mo loid byoin loo: ge'- ga: tid poin" da.

⁴¹Nyangnu" myoo" sho mo, gi Petru kho" kyo" da" mungdang: ri loem" jeung" lo boem wigi Babtisma zheung: kham boem lho-hau: bidnyid moo loem" jeung" lo da" phung: byu yi soem khyeing"- hau: phung: moo loung: lo ago".

⁴²Nyangnu" lagyoo: yi da" dang: ri jhau" yu zoore- dage" za: bo zoem" khau: nyid boem wigi zooyho' phe, gam go" khyoo: ri koid- dage" za: akyu" shoin" mho' wigi ayo, bidnyid ri lid loo" nhang: nyid ago".

⁴³Lagyoo: yi khyo" wigi mau" pho" alhoo: again joem myoo" sho' toin" shed boem yoomo byu yug khang" moo" gi gyoug dain mau" ci' ago".

⁴⁴Loem" jeung" bang: gi dage" za: zoem" khau: nyid boem lho: nyangnu" yo" da" ziyoo joem ri" we' dage" za: coem' gam go" ci: nyid ago".

⁴⁵Nyangnu" gi nyang: nya: da" ziyoo soid gain joem ri oung" pyam boem lho: wigi hau: ngei zi joem ri kha: yug khamyoo, ca" nyid khyo" cang wigi-nyang: cang" nyang: coem gam go" ci: boem.

⁴⁶Nyang: nu" gi nyid" khang" moo" noku yhoem: moo" moo zeung: foem: phoung nyid lho: nyangnu" da" yhoem: khoug: mo da" zooyho' ri gau yi ziyo' phe, lho-khyo, nyhoem: da" nheigloem: yo' dage" za: shoin" zoo: shoin" shug nyid boem ago".

⁴⁷Nyangnu" gi Mangsoo ri coung" nghei nyid zoore- byu dangain" bang: da" shid khoin" moo myonhoo: bo nyid ago". Aseing: gi khyoid yu zi shau" bang: ri nyid" khang" moo" nyangnu" phung: moo myo: loung: loo nhang: nyid.