Read Lashi ACTS 20 Bible Online

ACTS 20 - Lashi bible

ACTS 20

¹Houg: su" mo, thei" mo, yug lu: fu: go" da" khyoo: joem tam" lo" thang: ri Polu gi loem" jeing" bang: ri khe: zheung" yu lho-yoem: byid: dang: tid. hau: thang: ri nyangnu" ri vhu" too" khare" lho: Makedoni mung" khyoo: yhe: loo" bye.

²Hau: mung" khyo" so" lid: yhe: lo" wigi loem" jeung" da" mung" byu yi ri yoem: byid: lho: mungdang: myoo" sho' tid kyoo" bye- hau: thang: ri nyang: gi Akhaia mung" khyoo: ju" yhe: lo.

³Hau mung" moo lham" moo" soem" khyab, yhe: theung: nyid Nyang: gi Suri mung" khyoo: yhe: loo" wa ga: doem, soin' nyid uri Yuda byu yi gi nyang: ri said' pyam' wa da" phajhi" gau" khyau" wigi kuang lo nyid da" khyoo: ri nyang: si' lang" Polu gi Makedoni mung" khyoo: doem, tau" phang: loo" wa ga: myed phyed' too" bye.

⁴Beria voobyu puru da" nya: zoo: Sopata: - Thesaloni voo mo Aristaku, yo' Sekundu- Derbe voo mo Ge- u Asia mung" mo, Tukhiku- Trophimu yo' Timothi gi nyang: yo' dage" bo cang yhe: lo" ago".

⁵Nyang: nu" gi gyid khyo" yhe: lo" wigi Troa voogung moo ngoonu" ri yhe: zheung: lang" nyid boem ago".

⁶Ngoonu" gi doo cid" akaid da" zooyho' zoo: pui" lid lo" thang: ri Philipi voogung mo lhid' moo zhoung: lho: wim: nyid koo: myang" thang: ri Troa voogung moo nyangnu" yo' lo" shau" go" wigi hau: voogung moo ngoonu" gi laban daloem: nyang: theung: nyid boem bye.

⁷Ngoonu" gi bain thu khyug nyid" myenthang: ri zoem" khau: da" myen" xoin: zoo: wa shid mo zeung: foem: nyid boem. Polu gi thang: nyid" ri loo" wa zi nghoid wigi gam, gung myen: ju" sho' phung: byu yi ri tarha" kho" kyo" nyid.

⁸Nyang: nu" zoeb, phoung nyid da" atho' pyam: moo gi myikug joem myoo" sho' ri tab to" ago".

⁹Utukhu" ga: da" zoolu: phoo gi bang: zo: khoem" moo zhoung: jo, da- Polu gi xo' lho: dang: tid nyid da" uri Utukhu" gi yhoeb, nghui" nghue" wigi je" yhoeb, nghue" mo, lo" lho: lo" thang moo nyang: gi soem" pyam: myhang: da" yhoem: dang mo myidjang: khyoo: yhoeb, byed' gyoo" lo. nyangnu" gi nyang: ri lo" tu: vu, yu" go" ri Utukhu" gi shid: bye.

¹⁰Nghoid loug we' Polu gi myidjang: khyoo: gyoo" lo" lho: U tukhu" ri lo" po: ci: wigi nyang: tid zigi seing" akhoo" goo"- nyang: kang: so' dei nyid shi" ga: tid.

¹¹Polu gi yhoem: dang khyoo: doem, do, lo" lho: zooyho' ri shu" yu phi' zo:. Polu gi myo, myang sho' nyangnu" yo' dang: tid go" nyid. Hau: thang: rigi hau: voogung mo to' loo" bye.

¹²Loem" jeing" bang: gi kang: so' doem dei lo da" zoolu: zoo: ri yhoem: khyoo: shu" lo" wigi nheigloem: yug yo khyoo: myoo" sho' ri shau" yu boem ago".

¹³Ngoonu" gi lhid' khyo" shid' khyoo: yhe: lo" wigi Asu voo mo Polu ri lhoem: shu" zhung: wa soin to" lho: Asu voogung khyoo: gu: yhe: lo" boem. khasu" wim gari-Polu gi khyid: khyo" hau voogung khyoo: yhi: wa zi soin to" wigi ngoonu" ri hidsu" koid wa shid re" tid to.

¹⁴Asu voo gung moo nyang: ngoonu" ri re" shau" goo" lang" ngoonu" gi nyang: ri lhid' moo shu" zhoung: yu lho: Mitulene khyoo: gu: yhe: lo" boem bye.

¹⁵Ngoonu" gi houg: mo gu: yhe: lo" wigi-thang: nyid" ri Ki- u gugyoo: kang: yo' tutab mo, joyoo khyoo: ju" yhe: lo" lho: thang: nyid" rigi Samu gugyoo: kang: moo ju" yhe. Hau: thang: nyid rigi Melitu voogung moo ju" yhe: lo" boem bye.

¹⁶Polu gi Asia mung" moo bidnyid anau ze" thang nhang: noug yoomo Ephesu voogung nam, khyo" gu: lid loo" wa ga: myed phyed' to. Ge bue" nghoid rigi Pentikoti pui" moo myhi: sho' - Yerusalem voomoo" khyoo: ju" yhi: wa ziri nyang: hain: nyid.

¹⁷Polu gi Melitu voogung mo wigi phung ludaid' yi nyang: ri re" shau" wa shid re" dang: pyeung: kaid.

¹⁸Nyang: nu" ju" re" boem lang" Polu gi nyangnu" ri ngoo Asia mung moo xang: shed" ju" re" da" bidnyid mo nanu" yo' ngoo dage" khasu" nyid lo da" khyoo: ri nanu" nyang: si' gu nghoid bye.

¹⁹Yuda" byumyu" yi gi phajhi" gau" khyau" lho: koid da" gang mo yau: khe" khyoo: shau" nyid da" agyoo: moo nheigloem: ri nyhoem: khyo, lho: ngoug byed' ngoug nhab, gyo" wigi Aseing: da" dei zoo: khyo" ngoo moo" zei: lid loo bye.

²⁰Meing: byu yi da" shid khoin" moo yo' nyangnu" da" yhoem: joem moo ngoo kho" kyo" jhoug" byid: nyid da" uri nanu" shid mo akyu" bo da" dang: dakhoin" ri we' - ateung to" ziri nanu" nyang: si' bye.

²¹Nyang: nu" da" yooboo mo nheigloem: ri thed' pyam' lho: Mangso shoid' khyoo: lheung: lo boem wa ziyo' - ASEING Yesu ri loem" jeung" lo boem wa shid re" ngoo gi Yuda byumyu" yi yo' tungbau byumyu" yi ri dakhyoo" ti" yoem: kaid' lho: gye" khyo" tidpoin" lid loo bye.

²²Akhid" ngoo gi gyeungshang: Venyi da" ji, nu: gyoo: yoomo Yerusalem khyoo: yhe: lo" zi nghoid - hau: voomoo" moo ciyhe: bui" wa ziri ngoo asi lo.

²³Thung: loung" ziyo' yau: khe: jam jau khyoo: gi ngoori lang" nyid ga: voogung khang" moo" moo gyeungshang: da" Venyi gi ngoori tid poin" lo khyoo: riza: ngoo se' nyid.

²⁴Nghoid loug we' nga" kang: so' ri ngoo ce: vhoo" abyid- ngoo gi deung jo" da" moo" ri zei: pain wa ziyo' - ASEING Yesu wigi ngoori byid: to" da" moozoo" nghoid da- Mangso nheing khyeug khyoo: ludang: gi ri tid fu" kyo" da" moozoo" ri kyoeb, sho' zei: wa da" khyoo: riza: kang: lung bu nyid.

²⁵Ngoo gi Mangso mungdain da" khyoo: nanu" jang" moo cang kho" kyo yen" bye. Akhid" gi nanu" mo hang" we' ngoori khanham we' doem, shau" myang loo: goo" zi anghoid khyoo: ri ngoo se.

²⁶Hougsu" wigi nanu" mo dayug yug da" kang: so' joem: lo" nghoid rigi nga" vhu" di, tho' moo gi ce" yoovoin, we' aboo lo: khyoo: ri akhid" nyid" ngoo nanu" ri jhug jhug tid kyoo" ba.

²⁷Khasu" wim gari ngoo gi Mangsoo: myed young to" Khyoo: dangain" ziri ci" we' ateung too" looza: nanu" ri tid fu" kyoo" byid: bye.

²⁸Houg: yoomo nanu" nyang: gung nyang: we' - gyeungshang: da" Venyi wigi nanu" da" lo, moo ab, byid: to" da" - yang kyung ri yu" goin, coung: nyid ge'. Nya: zo: suid" wigi yang seing: daphung: za: koid yu da- Mangso yang lhug mo, bue" nyid ge'.

²⁹Ngoo thu lo" thang: ri akhyeung" da" zeing ni joem gi nanu" da" phung: khoug: moo vang re" lho: yang kyung ri phyo' zo: pyam boem wa ziri ngoo se' nyid.

³⁰Nanu" da" phung: mo nyang- byu dayham" gi mhau' fain" da" dang: tid lho: loem" jeing" bang: ri nyangnu" da" thang: khyoo: mhau' shu" vhang: lo" da" bidnyid ju" loo wa zi nghoid.

³¹Houg: su" wigi ngoo nanu" yug khang" moo" ri soem" zain loem: loem: nyang: nyid" ri myen" ri ngoug byed' ngoug nhab, myoo" sho' gyo" lho: wigi kho" kyo" jhoug" byid: bye: khyoo: joem ri myed boin: lho: lhid' zoore nyid nyid ge'.

³²"Akhid" ngoo gi nanu" ri Mangso goin, coung: nyid da" geung: teung mungdang: moo we' - hau: jeju" mungdang: gi nanu" ri yo" gyi: sheung: loo nhang: lho: Mangsoo gi nya: byumyu" dangain" bang ri byid: wa ga: young to" da" - main, kaid' jeju" joem gi nanu" ri byid: wa zi nghoid nyid.

³³Houg: su" nghoid yoomo ngoo gi hang" da" ngei sheing: mi, byi: ri we' - myo, no, vhoo: abo yu".

³⁴Hid: byen cang" yi da" ci: ca" gu: dangain" yo" ci: yhoung: zigi nanu" nyang: si' gu, nghoid boem bye.

³⁵Ngoonu" gi moo" zei: yoem: kaid' lho: wigi yoem: neing: bang: ri pang" thung ca" ein: da" khyoo: ri nanu" we' gyeing" nyang: hougsu" koid lo yu" boem bye. Houg: lang" ASEING Yesu nyang: tid zigi kham: yu tho' moo gam byid: zigi je" ngilho- ga: tid khare" dang: ri myed boin: ge" ga: tid.

³⁶Polu gi hougsu" ga: bain tid thang: ri nyangnu" yo' dage" poid' thug thoug lho: akyu" mho' da.

³⁷Nyang: nu" gi Polu ri po: vu, ci: lho: ngau, nyid boem ago".

³⁸Polu gi thang: phyang" nyang: ri - nyangnu" ashau" doem myang loo: wa ga: tid yoomo, nyangnu" gi nheing gye" gyo: koug ago". Hougsu" wi nyangnu" gi nyang: yo' dage" lhid' khyoo: yhe: lo" boem ago".