Read Lashi ACTS 21 Bible Online

ACTS 21 - Lashi bible

ACTS 21

¹Nyang: nu" gi nyang: ri vhu" kaid' lho: lhid' mo dain: za: gu: yhe: lo" ri Kusa gugyoo: kang: khyoo: ju" yhe: lo" boem bye. Hau: thang: nyid" ri nyangnu" gi Rodo gugyoo: kang: khyoo: ju" lo" wigi houg: mo Patara voogung khyoo: ju" yhe: lo" boem bye.

²Hau: voogung moo Phonishia mung" khyoo: gu: yhe: loo" wa da" lhid' dakhyab, ri ngoonu" myang wigi hau: lhid' tho' moo yhe: do, zhoung: lho: gu: yhe: lo" boem bye.

³Ngoonu" gi kupru gugyoo: kang: ri lo" myang. kaid lang" hau" gugyoo: kang: gyid byeung: shoid khyo" gu: gyo" lo" lho: Suri mung" khyoo: gu: yhe: lo" boem bye. kid" zi joem ri khyoo, wa shid re" Turu Voogung mo gu: khuang" moo lo" theung: boem bye.

⁴Ngoonu" gi voogung mo loem jeing" bang: dayham" ri lo" shau" myang go" lho: nyangnu" yo' labain daloem: lo" theung: nyid bye. Hau: loem" jeing" bang: gi gyeungshang: da" Venyi yoem: so' khyo" wigi Polu ri Yerusalem voomoo" khyoo: ayhi: wa shid mo tid ago".

⁵Nghoid loug we' - nyangnu" yo' shau" theung: nyid da" ayo, bidnyid thang lang" ngoonu" gi houg: mo thu' lho: yhe: lo" boem bye. Ngoonu" dangain" mo, gi nyangnu" yhoem: seing: myhi' yi yo' zoo: shang: mi" dangain" we' voogoung tung: gung khyo" gyid yam, moo ju" sho' ngoonu" ri re" de" kaid' boem ago". Hau: khyi, moo ngoonu" dangain" mo, poid' thug thoug lho: akyu" coem mho' boem bye.

⁶Hau: thang: ri ngoonu" gi dayug yo' dayug nyang: cang" nyang: bain vhu" goo" lang" gi ngoonu" gi lhid' khoug: moo yhe: do, zhoung: lho: wigi nyangnu" gi yhoem: khyoo: doem, tau" lo" ago".

⁷Ngoonu" gi Turu voogung mo doem xo' gu: lo" wigi Patoleme voogung moo ju" lo" boem bye- ngoonu" gi hau: voogung mo loem" jeing" bang: ri lo, zei: zei: being" si' go" lho: nyangnu" yo' danyed" yhe: theung: nyid bye.

⁸Hau: thang: nyid ri ngoonu" gi hau: voogung mo doem, to' lo" wigi kesare voogung moo ju" lo" boem bye- ngoonu" gi Yerusalem voomoo" mo pang" thoug wa byu nyhed yug ri zheung: khyen: yu to" jang" mo dayug nghoid lho: ngeibu: ludang: gi, ri kho" kyoo" su- Philib, da" yhoem: moo yhe: theung: nyid boem.

⁹Philib, gi yhoem: ayoo" shi" da" myiyi: zoo: myed: yug yo" - nyangnu" gi Mangso mungdang: ri tid fu" nyid mo, nghoid ago".

¹⁰Ngoonu" gi hau: yhoem: moo myang" sho' theung: nyid thang: ri Yuda mung" mo Agapu ga: da" lapi: dayug ju" re" da.

¹¹Nyang: gi ngoonu" jang" moo ju" ri" lang" Polu da" phyid" cu" ri yu lho: hau: ze wigi nya: khyid: yo' lo, joem moo tei" da. Hau: lho: nyang: gi he: phyid" cu" seing: ri Yuda byumyu" yi wigi Yerusalem voomoo" moo hidsu" tei" joeb, lho: nyangnu" gi nyang: ri tungbau byumyu" yi da lo, moo ab, byid: pyam' goo" wa gyeungshang: Venyi tid» ga: tid da.

¹²He: da" dang: ri ngoonu" shau" gyo: boem lang" ngoonu" yo' hau: khyi, moo bo nyid bang: dayham" gi Polu ri Yerusalem voomoo" khyoo: ayhi: wa shid re" coem, mho' boem bye.

¹³Nghoid loug we' polu gi nanu" cenoem wim wigi hid: su" ngau, lho: ngoori shoo" byo, nhang: go" lha". Ngoo gi ASEING Yesu gang mo Yerusalem voomoo" moo tei" zi shau" wa shid re" za: we' anghoid- shid: wa zi lang" gi jen" jen" nghoid bye"- ga: phoug tu.

¹⁴Ngoonu" gi nyang: ri nukhyab' moo vang sho' - ayo" tid loo: yoomo «ASEING vho: khyo" dajha" nghoid loo: baja"» ga: tid lho: sam zoo: nyid pyam' boem bye.

¹⁵Dayo, zoo: kyo: lo" thang: ri ngoonu" da" zi joem ri soin' nyheung boem, lho: Yerusalem khyoo: yhe: lo" boem bye.

¹⁶Kasare voogung mo cangzoo: yi dayham" bang: gi ngoonu" yo' dage" cang re" lo boem lho: no" re" phung byu bue" nyid bye: mo, gi kupru gugyoo: kang: mo Manason ga: su: da" yhoem: khyoo: theing: wa shid mo ngoonu" ri shu" vang yhe: lo" boem ago".

¹⁷Ngoonu" gi Yerusalem Voomoo" khyoo: ju" yhe: boem ri loem" jeing" bang: gi ngeibu: gau yi ziyo' - ngoonu" ri lhoem: tau, yu boem.

¹⁸Hau: thang: nyid" ri Polu gi ngoonu" yo' dage" Yaku ri yhe: shau- phung ludaid' yi dangain" bang: we' houg: moo nyid ago".

¹⁹Polu gi nyangnu" ri being" si' dang: tid lho: nyang: zei: so' da" moozoo" khyo" wigi tungbau byumyu" yi da" phung: moo Mangsoo koid bye: da" moozoo" joem ja: khang" moo" ri joeb, sho' ludang: ri shed' kyo".

²⁰Polu tid kyo" da" ludang: joem ri bain shau" gyo: boem lang" nyangnu" dangain" mo, gi Mangsoo ri coung" nghei boem ago". Hau: thang: ri nyangnu" gi Polu ri mang: nhung" phoo Polu we" - Yuda byu yi moo loem" jeung" loo bye: bang:- kha myhoo, khyeing" nghoid bye: ziyo' nyangnu" dangain" mo, gi tarha" ri khayhi' ju" sho' cang loo wa shid mo kang: lung bu nyid mo, nghoid ziri nang se' myang gu nghoid.

²¹Nang gi tungbau mungdain moo nyid da- Yuda byumyu" yi ri nyangnu" da" myed: zoo: yi ri athang: yham" khyoo: akoid wa ziyo' - Yuda thung" tarha" ri acang loo: wa shid re tid yoomo nghi: zain' mungdain moo nyid da" Yuda yi gi Moshe tarha" ri she: pyam' ca" da" khyoo: ri nang jhoug" byid: loo bye"- ga: tid ziri nyangnu" shau" gyo: ci: boem abye: go.

²²Akhid" khasu" koid wa lha". nang ju" loo, bye: ga: ziri we' Nyang: nu" gi" gi" nyang: shaug" gyoo: goo" wam: bye.

²³Houg: yoomo ngoonu" gi nang ri hidau" koid nhang: nau. Ngoonu" khyi, moo we' Mangsco ri dang: soo" byid: to" byu myed: yug nyid ago".

²⁴Nyang: nu" ri shu" lo" lho: kyeung sain' da" khyoo: ri nyangnu" yo' dage" lo" koid we' Nyang: nu" gi vhu" dung: yo" doung: pyam' boem wa shid re" - nyangnu" kyeung sain da" khyoo: koid da" jang" moo gyoo" eung: da" aphoug" gi nang bo byid: we'. Hidsu" koid yoomo Re" khyoo: yo' sen: lho: nyangnu" shau" gyo: da" ludang: joem gi adeung nhung: ga: ziyo' - nanyang: we' Moshe da" tarha" ri phau" cang su nghoid nhung: ga: ziri we' - yug khang" moo" se' lo" boem wa zi nghoid.

²⁵Nghoid loug we' loem" jeung" lo da" tungbug yi shid re koem gi phara" soolhoo: ri xoin" to' byid: da" zoo: noem yo' suid" yo' leung zeung: mo cu" said da" gougnyhoug shoo" azoo: wa ziyo' gain: tho' zung" da" khyoo: ri jang" pyam' boem wa shid re" ngoonu" myed phyed' lho: nyangnu" ri foin: da" mougsoug" dakhyab, moo bo lhid" foin: kaid boem bye.

²⁶Houg: yoomo polu gi thang: nyid" hau: byu myed: yug ri shu" yu lho: wigi nyangnu" yo' dage" kyeung sain' khyoo: ri koid yu bye. Hau: thang: ri nyang: gi noku yhoem: moo" khyoo: vang yhe: lho: kyeung sain' da" ayo, bidnyid dayo, bain wa ziyo' nyangnu" yug khang" mo" shid re" xoin" ngei" byid: wa da" ayo, dayo, nghoid wa da" khyoo: ri tid kyo" too" kho' da.

²⁷Nghoid loug we' bidnyid nyhed nyid" byeung" loo lang" gi Asia mung" mo Yuda byu yi dayham" bang: gi noku yhoem: moo" moo shau" myang abye: go. Nyang: nu" gi mung" byu phung: goin" ziri lhu: nhau" pu: to' kaid lho: Polu ri myheung yu ago".

²⁸Nyang: nu" tid zigi Israela byumyu" yi we" - pang" ge' byu he: yug gi khyi, khang" moo" moo cang so" yen" lho: yug khang" moo" ri we' Israela byumyu" yi ri we' - Moshe da" tarha" ri we' hid: noku yhoem: moo" ri we' gyi, koid lho: khoug" byid: yen" su: nghoid da. Hau: lho: akhid" we' noku yhoem: moo" khyoo: tungbau byumyu" dayham" ri shu" vang re" wigi hid: yhi gyeungshang: da" joyoo ri ayung" alhoo koid pyam' abye:- ga: neig yoid lho: nyho: nyid ago".

²⁹(Nyang: nu" hidsu" tid nyid boem zigi-Polu ri Ephesu voobyu Trophimu ga: su: yo' dage" Voogung khoug: moo nyangnu" shau" myang boem wigi hau: yug gi noku yhoem: khyoo: shu" vang re" zi nghoid- ga: nyangnu" jho: boem yoomo nghoid da.

³⁰Voogung goin" jang" moo mo, thei" mo, yug bue" lo wigi mung" byu yi dangain" bang: gei, zeung: re" boem lho: Polu ri noku yhoem: moo" tung: goung shoid khyoo: she: khyoid thu' lo" ago". Houg: lang" jang: noku yhoem: moo" khoem" duang: joem ri we' myhed" pyam' boem ago".

³¹Hau: lho: mung" byu yi gi Polu ri said pyam wa ga: soin' nyid boem da" uri Yerusalem voogung goin" moo mo, thei" mo, yug lu: fu" go" nyid ga: da" ludang: ri Roma gyizoug: moo ri lo" tid kyo" boem ago".

³²Houg: lang" gyizoug: moo" gi gyizoug: yi dayham" yo' gyizoo: yi ri shu" lho: mung" byu yi nyid da" joyoo khyoo: gei yhe: lo" boem ago". Meing: byu yi gi gyizoug: moo" yo' gyizoo: yi ri lhoem: myang lang- nyangnu" gi Polu ri baid nyid zi theung: lo" ago".

³³Gyizoug: moo" gi Polu jhang khyoo: yhe: lo" lho: myheug yu lho: jangcoo" eig khaid yo' tei" too" wa shid re" amyeing" khyo' kaid' bye. Hau: thang: ri gyizoug: moo" gi he: yug hang" nghoid lha". Nyang: ce: noem koid shoid lha". myed: yu.

³⁴Meing: byu yi gi daphung daja: ga- zheung: yoid nyho: nyid ago". Hougsu" nyho: lu: fu: go" nyid yoomoo- gyizoug: moo" gi bue" lo da" Khyoo: ri khyag za: asi yoomo wigi Nya: gyizoo: yi ri Polu ri gyidab, khyoo: shu" loo" goo" wa shid re" amyeing" byid: kaid' bye.

³⁵Nyangnu" gi gyidab, zoem" lhang: moo ju" loo" yo' - mung" byu yi gi aphoug" akhyoid' koid lo boem yoomo - gyizoo: yi gi Polu ri nyangnu" da" lo, phyoo" khyo" vu, do, loo" ca" bye.

³⁶Meing: byu yi gi nyang: ri said' pyam' ge" - ga: nya: thang: moo cang rue" lo zoo" re" zeug yoid boem ago".

³⁷Gyidab, khoug: khyoo: Polu ri shu" vang loo" wa zi nghoid lang" Polu gi gyizoug: moo" ri Nang ri ngoo dang: da eig khoin" ge tid wa la"» ga: myed:. Houg: lang" gyizoug: moo" gi nang Grid" myeing" se' kaid' la"» ga: myed:.

³⁸Hougsu" wigi atoung" myang" shi" ri tu: lhoin" moo" zei: lho: dabung: gyizoo: myed: khyeing" ri vhu" jhung: shu" koid lo wigi dain" pyoid yoo khyoo: shu" yhe: lo" da- Egutu byu anghoid la". ga: Polu ri doem myed: yu".

³⁹Houg: lang" Polu gi Ngoo gi kiliki mung" Tarshu voogung moo khu: lo da" - Yuda byu dayug nghoid. yhoug: gyen: da" voomoo" zeing mo byu dayug nghoid. Jeju yo' ngoori mung" byu yi ri dang: tid wa akhang" byid: we' ga: mho' tid.

⁴⁰Gyizoug: moo" gi nyang: ri akhang" byid: - hougsu" wi Polu gi zoem" lhang: phyoo" moo yab, jo, lho: mung" byu yi ri sam: zoo: nyid goo" wa shid' re- lo, tu, tu, nyid da- mung" byu yi tam" loo" lang" Polu gi nyangnu" ri Hebre myeing" khyo" wi, tid zi gi