Read Lashi ACTS 23 Bible Online

ACTS 23 - Lashi bible

ACTS 23

¹Polu gi Yuda tarha" yabdo, goin" bang: ri yu" zhug to" lho: Nga" mang: nhung" Israela byumyu" yi we" - akhid" nyid" ju" sho' ngoo gi Mangso da" shid' khoin" moo nheigloem: gyeing: gyeing: za: kang: so' dei, lid loo bye- ga: tid.

²khainjung agyi moo"' Anania gi Polu nam, moo yab, jo, mo, ri Polu da" nhoid' moo baid' byid: wa shid re" amyeing" byid: kaid.

³Houg: lang" Polu gi shafoid" phyu: mhoin" to" da" xiyam, we"- Mangsoo nang ri gyeing" nyang: re" baid' wa zi nghoid. Nang gi hau: tarha" yo' dakhyoo" ti" ngoori phyed' byid: wa shid re" houg: moo zhoung: jo, sho' nghoid loug we' tarha" ri shoid vhang: lho: ngoori baid' wa da" amyeing" byid: da- ga: tid.

⁴Polu da" anam, moo tain" nyid mo, gi nang gi Mangso khainjung agyi moo" ri yo" rui" nhung: lha"» ga: tid boem ago".

⁵Houg: lang" Polu gi mang: nhung" Israela byumyu" yi we"- nyang: khainjung agyi moo" nghoid ziri ngoo asi- ga: tid. Jhoem: mungdang: moo Re" byumyu" ri zoug: koid su: ri age khyo" age tid- ga: tid to" - ga: phoug tid da.

⁶Polu gi Tarha" yab, do' moo boo bang: dayham" gi Pharishe" nghoid wigi dayham" gi Saduke nghoid ziri myang lang" Polu tid zi gi mang: nhung" Israela byumyu" yi we"- ngoo gi Pharishe" dayug nghoid wigi pharishe" dayoug nya: zoo: we' nghoid. Shid: jang" mo doem dei to'' loo wa ziri ngoo myed byu lang" nyid khyoo: athang shi" wigi ngoo gi he: khyi, moo myed: ca: yu" ziri shau" nyid zi nghoid-ga: tarha" yab, do, moo nyho: tid nyid.

⁷Polu he: dang: ri tid kaid' yo' - Pharishe" yo, Saduke" gi nyang: cang" nyang: tid ngeug byo, go" thu' lo wigi tarha" yab, do' moo boo bang: gi eig phung go, gyo" loo" khari" bye.

⁸(Khasu" wim gari Saduke" gi byu yi gi shid: jang" mo doem dei, to' lo khyoo: ajo,- Mau lagyoo: yi ga: zi we' anyed- Venyi ga: zi we' aboo» ga: tid mo, nghoid ago, Nghoid loug we' Pharishe" ga: bang: gi Houg: soem" ja: goin" jo, zi nghoid: ga: loem" jeung" ago".)

⁹Nyho: nyid thui: je" gyi: lo nyid wigi Pharishe" shoid khyoo: zheung: bo da- Tarha" sara: yi dayham" bang: gi to' yab, re" boem lho: tid boem zigi ce: noem shoid khyoo: ri ngoonu" amyang - Venyi wigi nghoid la' - anghoid lang" Mauglagyo: wigi nghoid la' - nyang: ri tid nhang: bye" - ga: tid ago".

¹⁰Houg: su " tid ngeug byo, go" da" khyoo: gi je" myo: loo yoomo Polu ri adu atoem koid pyam boem wa ziri gyizoug: moo" gi gyoug nyid Houg: yoomo nyang: gi nya: gyizoo: yi da" mo, phung: khyoo: gyoo" lo" lho: Polu ri nyangnu" lo, mo yhe: shu" yu wigi gyidab, khoug: khyoo: shu" vang loo" wa shid re" amyeing" khyo' kaid.

¹¹Hau: da" myen" ri Mangsoo gi Polu da" anam moo re" yab, jo, wigi agyug- nang gi he: da" Yerusalem Voomoo" moo nga " khyoo: ri sagsi: yo" kham, byid: abye:- houg: yo' dakhyoo" ti" Roma voomoo" moo we' sagsi: kham, byid: ca" shi" wa ga: tid.

¹²Thang: nyid" nab, kyoo ri Yuda byumyu" dayham" gi sham: go" lho: phajhi" daja: ri khyau" ci: ago". Nyang: nu" gi Polu ri ayo" said' pyam' pyam' gi ci" we' azoo: ashug wa"- ga: nheung" ci ago".

¹³Hidsu" phajhi" khyau" too" bang: gi Byu myed: xi: jain" koo: su" nghoid boem ago" da.

¹⁴Hau: thang: ri nyangnu" gi Khainjung agyi zeing yi yo' Ludaid' vhu" jhung: yi jhang khyoo: zheung: yhe: lo" lho: ngoonu" gi Polu ri ayo" said' said' gi ci" we' azoo: ashug wa ein: jham, gye" tang: nheung" ci: boem bye.

¹⁵Houg: yoomo ngoonu" yo' tarha" yab, do, mo phung: bang: gi Polu da" khyoo: ri je" si' noug goin' koid lho: Polu ri nanu" jhang khyoo: shu" gyo" loo wa shid mo Roma gyizoug: moo" jhang dang: pyeung: kaid ge'. Nanu" jhang khyoo: nyang: aju" gyo" loo shi uri ngoonu" gi nyang: ri said' wa shid re" - jen" jen" lang" nyid boem wa ga: yhe: tid boem.

¹⁶Nghoid loug we' houg: su" phajhi" khyau" to" da" khyoo: ri Polu da" zoo: oug: yug gi nu" shau" gyo: lho: nyang: gi gyidab, khyoo: vang yhe: wigi polu ri tid kyoo" bye.

¹⁷Houg: yoomo Polu gi gyizoug: phoo dayug ri khe: yu lho: He: zoolu: zoo: ri gyizoug: mo" jhang khyoo: shu" yhi: we' gyizoug: moo" ri tid kyoo" wa zi nyang: daja: yo"- ga: tid.

¹⁸Gyizoug: phoo gi hau: zoolu: zoo: ri shu" yu lho: gyizoug: mo" jhang khyoo: shu" vang:, yhe: wigi Thung: byu Polu gi ngoori khe: yu lho: he: zoolu: zoo: ri nang zoug: mo" jhang khyoo: shu" byid: nhang: kaid. Khasu" wim gari zoolu: zoo: gi nang ri tid kyoo" wa da" dang: daja: yo" ga: tid kyo".

¹⁹Houg: lang" gyizoug: moo" gi nyang: ri lo, mo she: yu lho: gau: da" joyoo khyoo: shu" yhe: lho: nang ngoori ce: ja: tid kyoo" nau, lha"» ga: myed.

²⁰Houg: lang" hau: da" zoolu: zoo: gi Yuda amyeing" akhang" ci: bang: gi Polu da" khyoo: ri je" wigi si' noug goin, koid boem lho: wigi nab, kyoo, polu ri tarha" yab, do, mo shu" gyo" loo wa shid re" Nang zoug: moo" ri mho' wa ga- sham: veing" to" ago".

²¹Nyang: nu" da" dang: ri nang atam" gyoo: - Khasu" wim gari byu myed: xi: yug jain" gi fu" moo" khyoo: moo gau" jo, lho: wigi nyang: ri lang" nyid boem wa nghoid. Nyang: nu" gi Polu ri za: ayo" said' pyam' pyam' gi ci" we' azoo: ashug wa ga: jham, gye" tang: lho: nheung" ci: abye: go. Akhid" nyangnu" gi Polu ri said' pyam' wa shid re" nyheung. soin' to" wigi re" da" dang: riza: dalang" nyid lo: ago"» ga: tid kyo".

²²Gyizoug: moo" gi nang ngoori hidsu" re" tid kyo" da" khyoo: ri gooji, hang" ri we' atid kyoo". ga: tid lho: hau: zoolu: zoo: ri zung" nhang: kaid.

²³Hau: thang: ri gyizoug: moo" gi nya: gyizoug: eig yug ri khe, Yu wigi Kesare voogung khyoo: yhi: wa shid re" gyizoo: eig shoo: myang: dab, gyizoo: nyhed xi: - lham: dab, gyizoo: eig shoo: yug akhid" myen" goug: nayi: ri too, wa shid re" soin' jen" too" ge'.

²⁴Hau: lho: Polu zhung: wa da" myang: we' nyheing byid: wigi mung" zung: phoo philid, jang" moo ju" sho' - goem loem, za: yhe: de" kaid' ge" - ga: tid kaid.

²⁵Houg: lang" gyizoug: moo" gi hid: su" ga: da" mougsoug" dakhyab, ri lhid" lho: wigi foin: kaid.

²⁶Phau" myang: da" mung" zoug: Philid, ri kalodi Lusi: gi vhu" kaid.

²⁷Yuda byumyu" yi gi byu he: yug ri myheug yu lho: said' pyam wa ga: mo" nyid ago- Nyang: gi Roma mungdain byu nghoid ga: ziri ngoo si' yoomo ngoo gi nga" gyizoo: yi yo' yhe: wigi nyang: ri yhe: khyoid yu too" bye.

²⁸Ngoo gi Yuda byu yi nyang: ri ce: noem yooboo foin: da" khyoo: ri si' noug yoomo nyang: ri Yuda tarha" yab, do' khyoo: shu" yhi: bye.

²⁹Nyang: ri yooboo foin: da" khyoo: gi nyangnu" da" tarha" yo' sen: lho: wigi yooboo foin: zi nghoid yoomo nyang: gi shid: moin: da" yooboo anghoid lang" gi thung: lhoung kaid' wa da" yooboo- nyang: gi ce: noem daja: we' ashoid da" khyoo: ri ngoo myang bye.

³⁰Houyg: yoomo nyang: ri said' pyam' wa shid re" phajhi" gau" khyau" nyid boem da" khyoo: ri ngoori zheung: tid kyo" boem lang" Nyang: ri re" jhang khyoo: de" kaid' wa ziri ngoo houg: jang: myed phyed' bye. Hau: lho: nyang: ri yooboo foin: bang: ri we' Re" shid khoin" moo yhe: tid goo" wa shid re" nyangnu" ri ngoo tid kaid' bye- ga: lhid" kaid' da.

³¹Gyizoo: yi we' - gyizoug: mo" amyeing" yo' dakhyoo" ti" koid bye- nyangnu" gi Polu ri yhe: shu" yu wigi hau: myen, nyang: Antipatri voo, gung moo ju" sho' yhe: de" kaid' ago".

³²Hau: thang: nyid" ri gyizoo: yi gi gyidab khyoo: doem tau" lo lho: wigi myang dab, gyizoo: yi gi polu yo' dage" yhe: loo" wa shid mo nyhed: too" kho' ago".

³³Hau: myang dab, gyizoo: yi gi Polu ri kesare voogung ju" sho' yhe: de" kaid' lho: mung" zoug: pho da" lo, moo hau: lhid" foin: foid' da" mougsoug" ri we' yhe: byid: wigi-Polu ri yhe: ab, byid: pyam' ago".

³⁴Mung" zoug: phoo gi hau: mougsoug" ri nghab yu" lho: Polu ri kha: mung" mo nghoid lha"» ga: myed: yu". Mung" zoug: phoo gi Polu ri Kiliki mung" mo nghoid ga: ziri si' lang"

³⁵Nyang: tid zigi nang ri yooboo foin: bang: ju" re" loo lang" ngoo gi re" da" moo" ri gyoo: byid: wa ga: tid da. Hau: thang: ri mung" zoug: phoo gi Herod koid to" da" yhoem: moo" khoug: khyoo: - zung" lhug da" goem, loem, gyizoo: yi yo' nyhed: too" wa shid mo, amyeing" byid: kaid.