Read Lashi ACTS 24 Bible Online

ACTS 24 - Lashi bible

ACTS 24

¹Hau: thang: wim: nyid" ri khainjung agyi moo"' Anania gi Ludaid' vhu" jhung: yi dayham" yo' dage- Tarha" zoug: phoo Tertulu ga: su: ri shu" lho: wigi Kesare voogung Khyoo: yhe: lo. Nyang: nu" gi Philid shid khoin" khyoo: vang yhe: boem lho: Polu ri yooboo foin: da" khyoo: yhe: kau: to" ago".

²Houg: lang" Polu ri khe: fang yu lho: wigi Tarha" zoug: phoo Tertulu yooboo foin: da" dang: tid zigi * Phau" myang: da" zoug: moo" Philid we" - Phajhi" koung da" re" khyoo: shed' vhu" she: jang" moo ngoonu" gi zain myang" sho' ngei pyoo: yug yoo tung" za: yo" nyid lid lo boem bye. Nang gi ngoonu" da" mungdain moo ca" yo, nyid da" khyoo: moozoo" jid: zoo" sho' ri zei: byid: lid loo bye: su: nghoid.

³Houg: su" nghoid yoomo ngoonu" gi hau: khyoo: ri joyoo khyi, khang" moo" moo khanham we' kham: yu wigi ngoonu" gi nang ri jeju" gye" boin: nyid boem.

⁴Ngoo gi zoug: phoo re" da" ayo, akhyeing: ri-myoo" sho' ayu pyam' noug. Houg: yoomo leung" khyo" ngoonu" tid da" dang: ri tam" gyoo: byid: wa shid re" mho' nyid.

⁵Byu he: yug gi ayoug: akhi" bui" nhang: su: nghoid ziyo' mougmyid gyab, goin" jang" mo Yuda Byumyu" yi ri mo, thei" mo, yug bui" nhang: wa shid mo pui: su: nghoid yoomo Nazared phung: mo vhu" jhung: dayug nghoid ziri ngoonu" shau" myang bye.

⁶Nyang: gi noku yhoem: ri we' - asain' aseng" bui" nhang: wa ga- soin' nyid su: nghoid yoomo-ngoonu" gi nyang: ri myheug yu zi nghoid.

⁸Nanyang: byu he: yug ri myed: ca: yu" nghoid rigi ngoonu" nyang: ri yooboo foin: da" khyoo: dangain"- Nanyang: shau" gyo: loo" wa nghoid ga: tid ago".

⁹Yuda byu yi gi he: dang: gi dangain" deung zi nghoid ga: coem, tid boem ago".

¹⁰Mung" zoug: phoo gi lo, tu, tu, lho: Polu ri dang: tid nyid Polu ri dang: tid shid" nhang: khyoo: gi " Zoug: phoo nang gi he: byumyu" yi da tho' moo zain nyid myang" sho' dang: phyed' byid: lo yu" bye. Houg: yoomo ngoo gi re" da" shid' khoin" moo ngoo: nya: gung ri yo" tid ve, yu yoomo gye" gau.

¹¹Ngoo gi Yerusalem voomoo" khyoo: Mangsoo ri noku wa shid mo yhe: zi akhid" daxe: eig nyid" ajain" shi" ziri zoug: phoo nanyang: yo" ge, yen: yu shi.

¹²Ngoo gi noku yhoem: moo" moo dayug yo' we' tid byo, go" ziri Yuda byumyu" yi amyang boem. Hau: tho' moo gootu: Yuda tarha" jung moo we' Voogung khoug: moo nghoid loug we' mung" byu yi lu: fu: to' loo nhang: wa shid re" lhu: tau: khyoo: ri nyangnu" ashau" myang nghoid boem ago".

¹³Nyang: nu" gi akhid" re" da" shid khoin" moo yooboo foin: nyid boem da" khyoo: ri we' sagsi: ayo" toin" shid' nghoid boem ago".

¹⁴Shoid ga: nyangnu" tid da" houg: khyoo: ein: da" phung: loem khau: da" khyoo: moo cang yhe: khyo" wigi-Ngoo gi nyangnu" phoug" phyid" yi da" Mangsoo ri noku nyid ein: - he: khyoo: rigi re" shid' khoin" moo ngoo yhen: yu bye. Nghoid loug we' ngoo gi Moshe tarha" yo' lapi: yi da" mougsoug" joem moo lhid" to" khyoo: dangain" ri loem, khau: cang pyeung nyid.

¹⁵Ngoo gi nyangnu" yo' dakhyoo" ti" xangsu: byu yi gimo, agi mo, dangain" dakhyoo" te" - shid: jang" mo doem dei to'' loo wa nghoid ein:- Mangso khoug: moo myed lang" nyid su: nghoid,

¹⁶Hougsu" nghoid yoomo ngoo gi Mangso shid' khoin" moo we' - byu yi da" shid khoin" moo we' nheigloem: gyeing: gyeing: za: nghoid wa shid re" khanham we' ge bue" yhi' mo yoem: kaid' nyid su nghoid.

¹⁷Ngoo gi Yerusalem voomoo" mo thu' lo" thang: ri myang" sho' zain ri nga" byumyu" yi shid' mo, alu: ngei ri voin, yhi: wa shid' re yo' Mangsoo ri xoin" ngei" byid: wa shid re" hau: voogung khyoo: ju" loo" bye.

¹⁸Nyang: nu" gi ngoo kyeung sain' khyoo: ri bain koid thang: ri noku yhoem: moo" moo xoin" ngei" byid: uri ngoori myang boem. Hau uri gi ngoo yo' dage" mung" byu yi hang" we' anyed- mo, thei" mo, yug we' ci: abui".

¹⁹Nghoid loug we' hau: jang" moo Asia mung" mo ju" re" da" Yuda byumyu" yi dayham" bang: nyid nyid ago". Nyang: nu" gi ngoori yooboo foin: wa zi daja: bo boem nghoid rigi nyangnu" da" gung nyang: re" da" shid khoin" moo vang re" lho: nyangnu" da" yooboo foin: khyoo: ri re" tid kyoo" eung: nyid.

²⁰Houg: su" anghoid lang" gi ngoo tarha" yab, do' bang: da" shid' khoin" moo yab, jo, da" uri nyangnu" nga" atho' moo myang da" yooboo yo' shoid vhang: da" khyoo: ri he: byumyu" yi gi akhid" he: da" joyoo moo tid goo" baja".

²¹Ngoo, gi nyangnu" da" shid' khoin" moo yab, jo, uri" Shid: bye: bang: doem dei, to loo wa khyoo: ri loem, khau: loem" jeung" nyid yoomo akhid" nyid" ngoo gi nyangnu" da" myed: ca: yu" da" khyoo: ri kham, nyid, , ein: yoid, nyho: da" tho' moo jain" lho: nyangnu" gi ngoori ce" ja" yooboo we' ayo" foin: boem nghoid ago".

²²Hau: thang: ri philid' gi hau: khyoo: ein: da" phung: da" khyoo: yo' sen: wigi nyeing" za: se' too" su: nghoid yoomo myed: ca: yu" da" khyoo: ri theung: pyam' bye. Houg: lang" nyang: gi gyizoug: moo" Lusi ju" loo lang" Ngoo nanu" moo" ri dang: phyed' byid: wa ga: nyangnu" ri tid.

²³Houg: su" wigi mung" zoug: phoo gi Polu ri voin: tang: zung" wa da" yoovoin, boo su: ri re" yu" coung: wa da" akhang" byid: wa shid re" gyizoug: phoo ri amyeing" byid: kaid.

²⁴Dayo, koo: kyo: lo" thang: ri Philid' gi Yuda myiyi: Drusila ga: da" su: nya: yhoem: seing: phoo yo' dage" ge" ju" re" da. Nyang: gi Polu ri khe: yu byid: nhang: lho: eigi- Yesu Khristu ri loem" jeung" da" khyoo: yo' sen: lho: wigi Polu kho" kyo" da" mungdang: ri tam" gyo: yu" nyid da.

²⁵Nghoid loug we' - Polu gi ge, shoeb da" khyoo: ri nyang: nya: da" gung du: ri vhoeb, khang" da" khyoo: ju" loo wa da" tarha" dang: phyed' bidnyid da" khyoo: ri kho" kyo" nyid lang" gi Philid' gi gyo: gyoug lo wigi akhid" nang loo" re' - thang: phyang" agoo ngab lang" Nang ri doem khi: wa ga: tid.

²⁶Nyang: gi Polu ngei kyab, byid: abe» ga: myed wigi Philid' gi daso' so' khe: yu lho: doem, go" nyid.

²⁷Hau: thang: ri eig zain' koo: kyo: loo" lang" Mung" zoug: phoo Philid' da" khoo" vang moo Pokuphestu ga: su: mung" zoug: doem koid nyid. Philid' gi Yuda byumyu" yi ri myonhoo: shoo: noug yoomo nyang: gi Polu ri thung: lhoung too" khare".