Read Lashi ACTS 25 Bible Online

ACTS 25 - Lashi bible

ACTS 25

¹Phestu gi hau" mung" moo ju" re" thang: ri soem" nyid" ein: ri nyang: gi Kesare voo mo zi Yerusalem voomoo" khyoo: yhe: lo.

²Khainjung agyi zeing yi yo' Yuda ludaid' vhu" jhung: yi gi Polu ri yooboo foin: da" khyoo: myoo" sho' ri re" tid kyo" ago".

³Nyang: nu" gi Polu ri khyoolaid' moo gau" said' pyam wa ga: phajhi" zheung: khyau" to wigi Polu ri Yerusalem voomoo" khyoo: shu:" ri byid: khyo" - nyangnu" ri myonhoo: byid: wa shid mo Phestu ri zheung: mho' boem ago".

⁴Phestu gi nyangnu" ri Polu gi Kesare voogung moo thung: loung" jo, da- ngoo nyang: we' atoung" myang" ri houg: khyoo: doem tau" loo wa zi nghoid.

⁵Hougsu" nghoid yoomo nanu" vhu" jhung: koid bang: gi ngoo yo' dage' cang re" lho: Polu nyang: daja: ja: shoid bye: nghoid rigi nyang: ri yooboo re" foin: goo" baja" - ga: tid.

⁶Phestu gi nyang: nu yo' dage" za: bidnyid shed' nyid" - daxi: nyid" koo: su" theung: nyid lho: Kesare voogung khyoo: doem lo. Hau: thang: nyid" ri nyang: gi dang: phyed' da" tarha" yung" moo zhoung: jo, lho: Polu ri shu" vang loo wa da" amyeing" byid: kaid.

⁷Polu ju" vang loo lang" gi Yerusalem voomoo" mo ju" re" da" Yuda byumyu" yi gi Polu ri khyam, lheung ci: lho: wigi nyangnu" ce" sagsi: we' ayo" toin" shid' da- yooboo myo" sho' ja: ri foin: to" ago".

⁸Nghoid loug we' Polu gi Ngoo gi yuda byumyu" yi da" atrha" ri we' Mangso jhoem: mungdang: ri we' Roma Khosen" ri we' shoid vhang: da" yooboo gi ngoo daja" we' akoid- ga: wigi nya: da" gung ri tid ve, yu da.

⁹Pestu gi Yuda byumyu" moo myonhoo: shoo: noug yoomo Nyang: polu ri tid zigi nang gi Yerusalem voomoo" khyoo: lo" wigi nga" shid khoin" moo yooboo foin: da" he: khyoo: joem ri myed: ca: yu" nau, la"» ga: myed: da.

¹⁰Houg: lang" Polu gi ngoo gi ngoori dang: phyed' eung: da" Khosen" pho, da" yung" moo yab, jo, bye- nanyang: voin: tang: si' bye: ziyo' dakhyoo" ti" ngoo gi Yuda byumyu" yi ri ce" yooboo we' ashoid yu".

¹¹Ngoo gi tarha" shoid lho: shid: moin: da" yooboo yoo" su: nghoid rigi loid byoin wa shid re" ngoo amho, wa nghoid loug we' nanu" ngoori yooboo foin: nyid da" khyoo: gi adeung amain" khyoo: nghoid ziri nyangnu" da" lo, khyoo: ngoori hang" we' ayo" ab, byid: nghoid ago". Ngoori khosen" pho, da" shid' khoin" khyoo: lhai: to' kaid wa ziri ngoo mho' nau,- ga: tid.

¹²Houg: lang" Phestu gi nya: da" phajhi" byid: ludaid' yi yo' bain, sham: go" boem lho: wigi nang: Khosen" pho, jhang khyoo: lhai: to' kaid wa shid re" mho' bye: ziyo' dakhyoo" ti" Khosen" pho, jhang khyoo: nang yhi: ca" wa"- ga: phoug tu".

¹³Dayo, koo: kyo: lo" thang: ri Khokham" Agripa yo' Bernike eig yug gi mung" zoug: phoo Phestu ri being" se' tau, yu wa shid re" Kesare voogung khyoo: lam" ju" yhe: ago".

¹⁴Hau: voogung moo nyangnu" gi myoo" sho' nyid" zheung: nyid thang: ri Phestu gi Polu khyoo: yo' sen: lho: wigi Khokham" phoo ri tid kyo" da. Phestu gi Khokham" phoo ri Hid: moo Philid' wigi thung: lhoung too" khare" da" thung: byu dayug nyid.

¹⁵Ngoo Yerusalem voomoo" khyoo: ju" yhe: uri Yuda khainjung agyi moo" yi yo' Ludaid' vhu" jhung: yi gi nyang: ri yooboo foin: lho: nyang: ri dang: phyed' byid: wa shid re" ngoori mho' ago".

¹⁶Nghoid loug we' ngoo gi nyangnu" ri yooboo foin: zi shau" su: gi nyang: ri yooboo foin: bang: yo' myonhoo: zoem" zhoung: to" lho: nyangnu" yooboo foin: da" khyoo: yo' sen: wigi nya: gung ri tid ve, yu wa da" akhang" shi" abyid: loo- hang" nghoid loug we' yooboo yo" ein: ab, byid: kaid' wa shid re" ngoonu" da" Roma thung" tarha" moo aboo ein: tid khoo, bye.

¹⁷Houg: su" nyangnu" gi voogung moo ju" re" boem ri ngoo gi ayo, aze" pain' loo: za: thang: nyid" ri nyang- tarha" dang: phyed' byid: da" yung" moo zhoung: jo, lho: hau: yug ri khe: shu" vang loo" wa da" amyeing" ri byid: kaid' bye.

¹⁸Nyang: ri yooboo koid: mo, gi to' yab, lho: wigi yooboo foin: ago". yooboo daja: we' nyang: ri azug nghoid ago".

¹⁹Nyang: nu" gi nyangnu" da" noku thung" yo' sen: lho: wigi shid: byug bye: da" Yesu ga: yug yo' sen: ziza: - nyang: yo' tid ngeig go" nyid ago".

²⁰Ngoo gi he: da" moozoo" yo' sen: lho: bue" lo da" khyoo: ri khasu" yo" se' yu wa da" khyoo: ri ayo" myid phyed' yoomo ngoo gi Polu ri Yerusalem voomoo" khyoo: yhe: lho: houg: su" yooboo foin: da" khyoo: ri myed: ca: yu" ziri yhe: kham: yu nau, la". ein: nyang: ri myed: bye.

²¹Nghoid sho' loug we' Polu gi Khosen" pho, jhang khyoo: lhai: to' kaid' byid: wa shid re" mho' da- nyang: rigi houg: su" shi" lhoung to" lho: Khosen" phoo gi nyang: ri dang: phyed' byid: baja" ga: mho'. Houg: yoomo nyang: ri Khosen" pho, jhang khyoo: de" kaid' da" ayo, ju" sho' thung: lhoung too" wa shid re" ngoo amyeing" byid: to" ga: tid.

²²Houg: lang" Agripa gi Phestu ri hau: youg dang: ngoo nyang: we' tam" gyoo: nau, ga: tid. Phestu gi nang nab, kyoo, nya: da" dang: ri shaug" gyoo: wa ga: tid.

²³Thang: nyid" ri Khokham" Agripa yo' Bernike eig yug gi gye" reung: da" aved' asam" khyo" gyizoo: yi - voogung mo vhu" jhung: ludaid' yi yo' dage" za: shava byu yi phoung nyid da" yhoem: moo" khoug: moo vang lo ago". hau: lho: phestu gi amyeing: byid: kaid' lang" Polu ri shu" vang lo ago".

²⁴Houg: lang" Phestu gi Khokham" Agripa yo' He: khyi, moo phoung nyid mo, dangain" bang: we"- Yerusalem voomoo" yo' hid: mo da" Yuda byumyu" yi dangain" mo, yooboo foin: lho: ngoori kau: too" su: gi nanu" myang da" he: yug nghoid bye: ga: tid. Houg: lang" nyangnu" gi nyang: ri gi adei nyhed: too" gi aeung: loo- ga: yoid, nyho: lo ago".

²⁵Nghoid loug we' nyang: gi shid: moin: da" yooboo ce: noem koid shoid lo ziri we' ngoo gi amyang. Houg: yoomo nyang: rigi Khosen" pho, jhang khyoo: de" to' kaid' byid: wa da" shid re" mho' zi nghoid yoomo ngoo gi nyang: ri de" kaid' wa zi myid phyed' to.

²⁶Nghoid loug we' ngoo gi Roma Khosen" phoo ri nya: da" moo" yo' sen: lho: wigi nyeing" zoo: mougsoug" lhid" lho: wigi sho' kyoo" wa da" khyoo: gi ci aboo. Houg: yoomo ngoo gi nanu" da" shid khoin" moo shu" vang loo nhang: zi nghoid. Nyang: ri Khosen" phoo bain' myed: ca: yu" lang" gi Ngoo gi Khosen" pho, jhang mougsoug" lhid" foin: kaid' wa khyoo: - dakhoin" dayoo: yoo" wa shid re"

²⁷Je" wigi Khokham" Agripa shid khoin" moo shu" lo" zi nghoid. Khasu" wim gari thung: byu dayug ri de" kaid' nghoid rigi nyang: ri yooboo foin: da" khyoo: jhung za: lhid" lho: atoin" shid' kaid' rigi khyoo" ajang wa zi nghoid - ein: ngoo jho: nyid ga: tid.