Read Lashi ACTS 28 Bible Online

ACTS 28 - Lashi bible

ACTS 28

¹Ngoonu" gi tung: gung khyoo: nyeing" za: yo" ju" loo" lang" hau: gugyoo: kang: gi Meliti ga: ziri khyag nyang: yhe: si bye.

²Hau: gugyoo: kang: moug: mo da" byu yi gi ngoonu" ri nheig gye" lhoem: yu" khyeug boem- moug: vo lho: ngam" nyid yoomo nyangnu" gi myi: moid: wigi ngoonu" dangain" mo, ri being" lhoem: tau, yu boem ago".

³Houg: lang" Polu gi thang" kyang" dadeing: koid: yu lho: myikhyoem, moo nghe, kaid- myiso' yo' nge" loo lang" hau: thang" deing: khoug: mo lhang: myu yu: thu' re" wigi polu da" lo, moo thei" zhoug lho: xei" lhang: to" da.

⁴Hougsu" Polu da" lo, moo lhang: myu, xei" lhang" to" ziri hau: moug: mo byu yi zheung: myang lang" byu he: yug gi byu said' su: nghoid nyang: nghoid bye- panglai gyid gyi mo loid loo nghoid loug we' - deingmain" da" tarha" gi nyang: ri dei nyid wa da" akhang" abyid: loo: nhung- ga: nyang: cang" nyang: tid go" nyid boem.

⁵Nghoid sho' loug we' Polu gi nya: lo, mo da" lhang: myu ri myikhyoem khoug: khyoo: pyi: khyo kaid lho: ci: we' aca" loo: za: danyid nyid.

⁶Nyang: nu" gi Polu ri gung goin" yam: loo wa anghoid lang" gi dalheing: dam, shid: leung loo" wa" zheung: yu" nyid boem ago". Nghoid loug we' nyangnu" gi houg: su" myang sho' zheung yu" nyid ri Polu moo daja: we' abue" lo ziri myang boem lang" gi nyangnu" da" nheigloem: thed' lo lho: he: yug gi phara" dayug danghoid ga: tid go" nyid boem.

⁷Houg: mo wigi athei" ve: da" joyoo moo hau: gugyoo: kang: mo da" agyi phoo bobli ga: su: seung: ci: da" moug: myed jo, da. Hau" agyi phoo gi ngoonu" ri nyeing" za: being" lhoem: tau, yu lho: soem" nyid" nyang: being" did" byid: bye.

⁸Hau: Bobli da" nya: phoo gi nooyoem" yo' voem: ni no nyid wigi yhoeb cuang moo leung jo. Houg: lang" Polu gi hau: youg da" yab, khyoo: vang lo" wigi akyu" mho' byid: lho: hau: youg da" atho' moo nya: lo, ki" byid: wigi mainkaid byed.

⁹Hidsu" bain bue" lo" thang: ri hau: gugyoo: kang: moo nyid da" noo, phyoo" aja: ja: shau" nyid bang: gi Polu jang" moo re" lo boem wigi nyangnu" dangain" bang: gi noo: phyoo" ge:, shang: lo" boem bye.

¹⁰Nyang: nu" gi ngoonu" ri jhung: shug joem myoo" sho' ja: byid: ago- ngoonu" doem, gu: loo" wa ein: soin' lo" ri ngoonu" gyung: khyoo: moo zoo: ca" da" - zookhoo: joem ri sangphoo' tho' moo re" cang kaid' byid: kaid' boem shi.

¹¹Lham" moo" soem" khyab, kyo: lo" da" thang: ri hau: gugyoo: kang: mo da" ngam" yo, lo" Khau: nyid da" - Alexandru voogung mo phara" zoozoem, tang: ga: da" - sangphoo' tho' moo yhe: do, zhoung: lho: gu: lo" boem bye.

¹²Ngoonu" gi Surakusa voogung khyoo: ju" yhe: lo" wigi hau: voogung moo soem" nyid" yhe: theung: nyid boem.

¹³Hau: voogung mo wigi ngoonu" doem xo' gu: yhe: lo" ri Regi voogung moo ju" yhe: lo" boem bye. Thang: nyid rigi moug: thang: khyo" lid' hau, lo wigi eig nyid" ein: da" nyid ri she' Potioli voogung khyoo: ju" yhe: lo" boem bye.

¹⁴Ngoonu" gi hau: voogung moo loem" jeing" bang: dayham" ri yhe: zheung: myang wigi nyangnu" gi ngoonu" ri nyangnu" yo' dage" labain daloem: theung: nyid khoo, wa shid re" mho' ago". Hau: thang: ri ngoonu" gi Roma voomoo" khyoo: yhe: lo" boem bye.

¹⁵Roma voomoo" mo loem" jeing" bang: gi ngoonu" da" khyoo: ri shau" gyo: boem lang" gi Api: ga: da" kid" vang" joyoo ju" sho' we' being" do, yhoem: soem" loem: ga: da" joyoo ju" sho' we' - zheung: ju" re" boem wigi ngoonu" ri tau, yu ago, Polu gi nyangnu" ri myang lang" - nyangnu" gi Mangso jeju" ri coung" nghei boem lho: nheigloem: yoem: gyi" sho' yo" lo boem bye.

¹⁶Ngoonu" gi Roma voomoo" khyoo: ju" yhe: boem thang ri Polu rigi zung" da" gyizoo: dayug yo' nyang: kyeing" nyid wa da" akhang" yo".

¹⁷Soem" nyid" kyo: lo" thang: ri Polu gi hau: voogung mo Yuda ludaid' vhu" jhung: yi ri khe: yu da- nyangnu" gi zheung: zeung: ri lang" Nga" Israela mang: nhung" yi we"- ngoo gi ngoonu" da" byumyu" yi ri we' ngoonu" phoug" phyid" yi mo xo' kham: yu lo da" thung: ri joem ri we' - shoid vhang: da" moozoo" ri ngoo gi daja" we' akoid nghoid loug we' Yerusalem voomoo" moo ngoori thung: lhoung wigi Roma byu yi da" lo, moo ab, byid: pyam' boem ago".

¹⁸Ngoori bain ca: yu" boem thang: ri we' - ngoo shid: moin: da" yooboo- ce" daja: we' abo ziri myang boem yoomo Roma byu yi gi ngoori phoid: kaid' nau nyid ago".

¹⁹Nghoid loug we' he: khyoo: ri Yuda byumyu" yi ngeug pyam' boem wigi ngoo gi nga" byumyu" yi ri ce" yooboo foin: jang: ajo, loug we' Roma khosen" pho, jhang khyoo: ngoori lhai: to' kaid' ge" ein:- mho' ca" byug bye.

²⁰Houg: yoomo ngoo gi nanu" yo' shau" doem, goo" wa shid mo khe: yu zi nghoid. Gyeing" nyang: ga: rigi ngoo hidsu" jang coo" doem, wigi tei" zi dashau" rigi Israela byumyu" yi myid byu nyid su: gang mo nghoid da- ga: tid.

²¹Houg: lang" nyangnu" gi ngoonu" gi re" da" khyoo: yo' sen: lho: Yuda mung" mo lhid" foin: da" mougsoug" dakhyab, khyoolhang" we' ashau" yu. Hau: lho: houg: mo da" byu yi ju" re" wigi re" khyoo: yo' sen: da" ludang: age zi hang" we' are" tid kyoo" nghoid ago".

²²Khasu" wim gari nang bo da" phung: ri khyi, khang" moo mung" byu yi ngeug thoug shang" nyid ziri ngoonu" se. Nghoid loug we' nang myed khyoo: ri ngoonu" we' tam" gyoo: nau- ga: tid ago".

²³Houg: yoomo nyangnu" gi Polu yo' bidnyid deing go" ci: ago". deing go" to" da" bidnyid moo Polu nyid da" joyoo moo byu myoo" sho' zeung: ju" re" boem ago". Polu gi nab, kyoo mo zi moug: coid' sho' Mangso mungdain yo' sen: da" mungdang: joem nyangnu" ri phoid: sho' kyo" wigi Moshe tarha" yo' Lapi: yi da" jhoem: mungdang: ri gung: nhi" kaid' lho: Yesu ri nyangnu" gi loem" jeung" loo sho' kho" kyo".

²⁴Nyang: nu" mo dayham" bang: gi Polu tid ziri loem" jeung" lo boem nghoid loug we' dayham" bang: gi aloem" jeung" boem nghoid ago".

²⁵Houg: yoomo nyang: cang" nyang: aveing" goo" loo: za: thu' lo" nyid boem da" uri Polu doem tid zigi Lapi: Esaia nhoid khyo" gyeungshang: da" Venyi wigi nyangnu" da" phoug" phyid" yi ri tid da" dang: gi gye" nyang: jo, da" dang: nghoid.

²⁶Nyang: tid da" khyoo: gi Nang gi hau" mung" byu yi jhang khyoo: yhe: tid we'. Nanu" gi tam" gyoo: nghoid loug we' ase' gyoo: goo" wa Nanu" gi yu" nghoid loug we' amyang goo" wa.

²⁷Khasu" wim gari - he: da" byumyu" yi da" nheigloem: gi nheig coid' coid' jo, boem zi nghoid nyid wigi nyangnu" da" nukhyab' joem gi jhed' yoin" to" boem ziyo' Nyang: nu" da" myo, jid, joem gi coem" ci: boem yoomo nghoid. Hougsu" anghoid boem rigi nyangnu" myojid" joem gi myang lho: nyangnu" da" nukhyab' joem gi shau" gyo: wigi Nyang: nu" da" nheigloem: moo se' gyo: yu boem lho: Nyang: nu" gi nga" shoid khyoo: phoug lo boem wa nghoid- ga: Mangsoo tid nyid. Houg: lang" ngoo gi nyangnu" ri ze: gi, byid: wa" - ga: nyang: tid nyid.

²⁸Houg: lang" Polu gi dang: thang khyo" (Dang: thang khyo" Polu gi) Hau: Mangso da" khyoid khyi: yu da" mungdang: ri tungbau byumyu" yi khyoo: byid: pyam' lho: wigi nyangnu" gi hau: da" mungdang: ri tam" gyo: yu lo" boem wa khyoo: ri nanu" se' too" ge" -ga: tid kaid' bye.

²⁹Ngoo gi tarha" shod lho: shid: moin: da" yooboo yoo" su: nghoid ri gi loid byoin wa shid' re" ngoo amho, wa nghoid loug we' nanu" ngoori yooboo foin: nyid da" khyoo: gi adeung amain" khyoo: nghoid ziri nyangnu" da" lo, moo ngoori hang" we' ayo" ab, byid: nghoid ago"- ngoori khosen" pho, da" shid' khoin" khyoo; lhai to' kaid wa ziri ngoo mho' nau- ga: tid.

³⁰Polu gi eig zain' loem: lei:- nyang: ngho" to" da" yhoem: moo nyid nyid lho: nya: jhang ri" bang: ri being" lhoem: tau, yu nyid.

³¹Nyang: gi Mangso mungdain khyoo: ri kho" kyo" nyid ziyo' ASEING Yesu da" khyoo: ri agyug avoem, - ciri" we' alung" loo: za: jhau" mhoo, byid: nyid.