Read Lashi ACTS 3 Bible Online

ACTS 3 - Lashi bible

ACTS 3

¹Danyed" ri Petru yo' Yohan eig yug gi myenthang: soem" nayi: koo: moo akyu" mho' wa shid mo noku yhoem: moo" khyoo: yhe: lo" ago".

²Young" lho, ga: myeung da" khoem" duang: moo khu: jang" mo nyang: khyid: yoin" su: dayug nyid. Hau: khyid: yoin" su: ri noku yhoem: moo" khyoo: vang yhe: loo" mo", jang" mo ngei mho' zoo: baja" ga: - khoem" duang: yam, moo nyid" khang" moo" yhe: dang nyhed: too" too" koid boem.

³Hau: khyid: yoin" su: gi Petru yo' yohan noku yhoem: moo" khyoo: vang re" zi myang laang" - nya: eig yug ri daja: ja: mho' da.

⁴Nya: eig yug gi khyid: yoin" su: ri-yu" zhug to" lho: Petru gi nga" eig yug ri yu" we' ga: tid.

⁵Houg: yoomo hau: khyid: yoin" su: gi-nya: eig youg jang" mo daja: ja: yo" yu abe ga: yu" zhoug to.

⁶Petru gi ngoo gi ngei dakyab, we' ayoo - nghoid loug we' ngoo yo" ja: nang ri byid: wa. Nazared mo yesu khristu da" myeing yo' ngoo nang ri amyeing" byid: da -to yab, lho: khyoo: so" loo" we'. ga: tid.

⁷Hau: thang: ri Petru gi hau: khyid: yoin" su: da" lo, yo lo, moo zei: lho: she: to kaid. Dalheing: dam hau: khyid: yoin" su: da" khyid: yo' khyidmyo, pyoin: moo yoem: bo lo wigi nyang: byam, to yab, lho: khyoo: so" loo" bye.

⁸Nyang: gi Mangso jeju" ri thu byam, coung" nghei zoore- nya: eig yug yo" dage noku yhoem: moo" khyoo: bo vang lo.

⁹Houg: moo nyid da" mung" byu yi gi nyang: gi hougsu" khyoo: so" zoore Mangsoo ri coung" nghei ziri myang ago".

¹⁰Houg yoomo nyangnu" gi nyang: gi yung" lho' khoem" duang: nam, moo zung: jo, lho: lhoung mho' zo: nyid su: nghoid ziri yu" se' boem wigi nyang: moo bue" lo moozoo" ri nyangnu" dangain" mo, mau" hang" to" boem ago".

¹¹Sholumun ga: da" mugbyam" khoug: moo hau: yug gi Petru yo' Yohan ri cang: zei: nyid uri - byu yi gi yu" mau" ziyo' nyangnu" jhang khyoo: gei re" boem.

¹²Petru gi meing byu yi ri myang lang- Israela byu yi we" nanu" cenoem wim wigi hid: yhi' moug" go" lha". Nanu" ciwim wigi nga" eig yug ri yu" zhoug too" la". Nga" eig youg da" yoem: so' yo' Nga" eig youg da" gyeungshang: joeb byeung" nyid yab, khyoo: yoomo-he: yug ri yo" so" loo" nhang: su" jhoo: go" la".

¹³Abraham Isag yo' Yaku da" Mangsoo nghoid nyid ngoonu" phoug" phyid" yi da" Mangsoo gi Nya: deizoo: Yesu ri yoem: moo" phung yoeb, byid: to" abye:. Nghoid loug we' nanu" gi nyang: ri amyeing" ci: mo, da" lo, moo, ab, byid: pyam lho-pilaid gi nyang: ri pyoin kaid' wa ga: lang" bain myed phyed' to" thang: ri nanu" gi Pilaid' shid khoin" moo-Nyang: ri he: ngeug pyam boem abye: go.

¹⁴Nyang: gi gyeungshang: ziyo' gi su: nghoid- nghoid loug we: nanu" gi nyang: ri he: ngeug" pyam ago". Byu said' su: ri she' nanu" lhoid pyoin kaid' wa shid re" pilaid jhang nanu" mho' ago".

¹⁵Nanu" gi kangso' Aseing: ri said' pyam ago". Nghoid loug we' Mangsoo gi nyang: ri shid: jang" mo doem dei to' loo nhang: bye. ngoonu" gi hau: da" sagsi: nghoid nyid boem.

¹⁶Houg: yoomo nya: myeing yo' yoem: so' gi-he: khyid: yoin" su: ri ge loo nhang: bye. Nya: myeing ri loem" jeung" khyo" wigi Nanu" myang se' ziyo' dakhyoo" ti" bue" lo zi nghoid bye. Nanu" shau" myang ziyo' dakhyoo" ti" Yesu ri loem" da" nheigloem: wigi he: khyid: yoin" su: ri goolhoo: za: ge loo" nhang: abye:.

¹⁷Nga" mang: nhung" yi we' nanu" yo' nanu" da" vhu" jhung: yi-Yesu ri koid lid lo da" moo" gi asi aboin: loo: za: koid ziri ngoo si' bye.

¹⁸Mangsoo nya: da" Meshia gi dayam, dayoo: kham, zoo: wa nghoid ga- Mangsoo gi goonhaam gooco, mo Lapi: yi dangain" khyo" tid fu" to" lho: hau: lapi: dang: gi hid: bue" nyid khyo" wigi joed byeung" loo nhang: bye.

¹⁹Hougsu" nghoid yoomo nanu" nheugloem: ri thid' ge-Mangso jhang doem tau" loo ge'. Houg: lang" Nyang: gi nanu" da" yooboo joem ri khyoid pyam byid: wa zi nghoid.

²⁰Nanu" hougsu" koid boem nghoid rigi Aseing: jang" mo Venyi yoem: vhoo" yo" yu wa da" ayo, ju" loo wa nghoid. Xo, lho: wigi nanu" shid re" khyen: nyheung too" byid: gu nghoid da- Meshia Yesu ri nyang: byid: wa zi nghoid.

²¹Mangsoo gi goonham mo Nya: gyeungshang: da" Lapi: yi nhoid dang: khoin" thui: khyo" tid kyo" to" ziyo' dakhyoo" ti" ja: khang" moo" ri aseig doem koid pyam da" ayo, aju" ju" gi Nyang: gi moug: khung: tho' moo nyid nyid ca" da.

²²Moshe Doem tid zigi nanu" da" Aseing: Mangsoo gi ngoori nhang: kaid ziyo' dakhyoo" ti" nanu" jhang khyoo: lapi: dayug nhang: kaid' wa zi nghoid. Nyang: gi nanu" da" byu" myu" khoug: mo dayug nghoid lho: Nyang: nanu" ri koid nhang: da" khyoo: joem dangain" ri nanu" tam" gyo: nyid ca" boem wa nghoid.

²³Hau: Lapi: tid da" mungdang: ri a phau" cang loo" su: gi Mangso byumyu" mo kho' khyo, pyam zi shau" lho: lhu: phyo' lhu: shoin pyam zi shau" wa nghoid ga: tid.

²⁴Hau: lho: Samuela yo' Nya: thang: moo ju" ri" mo, mungdang: ri yo" da" lapi: yi dangain" mo, gi he: da" bidnyid moo bue" nyid da" khyoo: dangain" ri we' lapi: pe: too" bye.

²⁵Hau" lapi: yi da" nhoid dang: thui: khyo" byid: to" da" Mangso dang: soo" khoin" joem gi nanu" shid re" nghoid nyid. Mangsoo gi nanu" phoug" phyid" yo' koid to" da- dang: theing khoin" moo boo mo, nanu" we' boo bye. Mangsoo gi Abraham ri Ngoo gi re" myed: re" zoo: yi khyo" wigi moug: myed xangsu: byu yi dangain" ri main kaid' byid: wa ga: tid to.

²⁶Hougsu" nghoid yoomo nanu" yug khang" moo" ri akhyeung" da" lo, moo" mo-doemtau" loo nhang: khyo" wigi nanu" ri mainkaid byid: zi yo" yu wa shid re" Mangsoo gi Nya: deizoo: ri khyen: yu lho: nanu" jhang khyoo: Nyang: ri xang: shed" nhang: kaid' byid: abye:- ga: kho" kyo.