Read Lashi ACTS 8 Bible Online

ACTS 8 - Lashi bible

ACTS 8

¹Sholu gi stephain ri said' wa zi myid bo veing" su: nghoid. Hau: bidnyid moo Yerusalem voomoo" moo nyid da- loem" jeung" phung byu yi gi dayam, dayoo: shen" yhen zi gyisho' shau" nyid boem bye. Lagyoo: yi mo we' je" wigi loem" jeing" mo, dangain" gi Yuda mung" yo' Samari mung" gyoo: khyoo: goem: sho' phang: byo, sain" lo" boem abye: go.

²Loem" jeung" nheigloem: kang: lung bu nyid bang: gi Stephain ri yhe: myhoeb, shoung: pyam boem lho: nyang: yoomo gye" koug shu: ngau, nyid boem ago".

³Nghoid loug we' sholu gi phung ri phyo' shoin, pyam' byid: wa shid re" yoem: kaid' nyid da. Nyang: gi dayhoem: bain' dayhoem: khyoo: cang vang yhe: lho: loem" jeung" da" yuggi myi: yi: dangain" bang: ri she: khyoid' thu yu lho: nyangnu" ri thung: lhoung pyam.

⁴Joyoo loem: khang" moo khyoo: byo, sain" loo" mo, gi ju" lo" da" joyoo loem: khang" moo" moo Mungdang: ri cang kho" kyo" boem ago".

⁵Philib, gi Samari mung" mo voomoo" khyoo: yhe: lho: hau: voobyu yi ri Meshia yo' sen: da" khyoo: ri yhe: kho" kyoo" bye.

⁶Meing: byu yi gi philib, tid da" dang: ri tam" gyo: yu boem lho: Nyang: koid da" mau" pho" alhoo: again joem ri myangboem yoomo nyangnu" gi nheigloem: zhug zhug za: mungdang: ri tam" gyo: yu boem ago".

⁷Akhyeung" yu, vang ci: da" byu yi myoo" sho' mo yu joem gi yoid nyho: lho: phang: thu lo" boem ago' ajoem: shid: mo, myoo" sho' yo' Khyid: yoin" mo, myoo" sho' bang: we' ge lo" boem ago".

⁸Hougsu" nghoid yoomo voomoo" khoug: mo byu yi gi gye" agau yi ngei pyo: lo boem bye.

⁹Hau: voogung mo Simun ga: su: dayug gi nyang: fa" da" phajhi" khyo" -Samari byu yi ri moug" nhang: nyid.

¹⁰Simun gi nya: gung ri gye" bui" su: nghoid ga- phau: fu" nyid yoomo houg: moo nyid da" byu yi ngi, mo, gyi: mo, dangain" gi nya: dang: ri zhug zhug za: tam" gyo: nyid ago". Nyang: gi" gyi: da" yoem: moo" ga: da- Mangso yoem: moo" boo su: nghoid ga- nyangnu" tid nyid boem.

¹¹Nyang: gi nyang: fa" da" phajhi" khyo" nyangnu" ri, moug" nhang: ziri myang bye: yoomo nyangnu" gi houg: su" nyang: ri zhug zhug za: tam" gyo: boem zi nghoid.

¹²Nghoid loug we' - Mangso mungdain da" ludang: seig yo' yesu khristu da" khyoo: yo' sen: lho: wigi Philib, kho" kyo" da" mungdang: ri nyangnu" loem" jeung" lo boem wigi nyangnu" myiyi: yug gi dangain" bang: babtisma kham: yu boem bye.

¹³Simun nyang: we' loem" jeung" lo wigi babtisma bain' kham: yu thang: ri Simun gi philib, da" thang: moo cang lho: Philib, koid da" mau" pho" alhoo: again joem yo' mau" pho" moozoo" joem ri shau" myang lang" nyang: gi gye" mau" nyid bye.

¹⁴Yerusalem moo nyid da" lagyoo: yi gi Samari byu yi Mangso mungdang: ri lhoem: kham: yu bye: ga- da" thui: ri shaug" gyoo: lang" Nyang: nu" gi Petru yo' Yohan eig yug ri nyang: jhang khyoo: zheung: nhang: kaid ago".

¹⁵Nya: eig yug zheung: ju" yhi: lang" loem" jeing" bang: gi gyeungshang: da" Venyi ri yo" kham: yu boem wa shid re" nya: eig yug gi nyangnu" shid mo a akyu" mho' byid: bye.

¹⁶Khasu" wim gari nyangnu" hang" da" atho' moo we' - gyeungshang: Venyi aju" gyo" loo shi" nghoid ago". Nyang: nu" gi ASEING Yesu da" myeing: khyang" mo wigi babtisma kham: yu to" zishi" danghoid ago".

¹⁷Houg: yoomo Petru yo' Yohan eig yug gi nyangnu" da" a tho" moo nya: eig youg da" lo, ki" byid: lho: nyangnu" gi gyeungshang: da" Venyi ri yo" kham: yu boem ago".

¹⁸Lagyo: eig youg da" lo, nyangnu" da" atho' moo ki" byid: lang" loem" jeing" mo, gi gyeungshang: da" Venyi ri yo" kham: yu boem ziri Simun shau" myang lang" nyang: gi Petru yo' Yohan eig yug ri ngei byed, lho: wigi

¹⁹Nga" lo, ki" byid: mo, hang" we' - gyeungshang: da" Venyi yo" yu wa shid mo hau: yoem: so' ngoori we' byid: ge' ga: mho' da.

²⁰Nghoid loug we' Petru gi nyang: ri nang gi Mangso da" jeju" ri ngei yo' yo" qei yu wa ga: jho: nyid yoomo nang yo' re" da" ngei gi myithoem" khyoo: vang loo" goo" baja" - ga: phoug tu.

²¹Re" da" nheigloem: gi Mangso shid khoin" moo adain: yoomo ngoonu" da" moozoo" moo ayo" bo zei: nghoid da.

²²Houg: yoomo he: akhyeung" da" lo, moo" mo nheigloem: thid' we'. Houg: su" myed shoid' da" yooboo ri khyoid pyam' byid: zi shau" wa shid re" Aseing: ri akyu" mho' we'.

²³khasu" wim gari nang gi myid noug: myid khyoid' zi xoo: sho' byeung" sho' yo' yoobo wigi tei" joeb, to" da" byu dayug nghoid ziri ngoo yo" yu" myang bye" - ga: tid.

²⁴Simun gi Petru yo' yohan eig yug ri re" eig yug tid da" khyoo: ce: noem, daja" we' nga" vhuloem tho' moo azang" loo baja" nga" shid mo Mangsoo ri akyu" pang" mho' byid: ge' ga: tid.

²⁵Nya: eig yug gi Yesu da" khyoo: yo' sen: lho: sag si: kham, kyo" wigi Yesu da" mungdang: ri bain kho" kyoo" lang" Petru yo' Yohan gi Yerusalem voomoo" khyoo: doem, tau" lo" ago". Nya: eig yug doem tau" lo" da" khyoo: moo jo, da- Samari voogung joem myoo" sho' moo ngeibu: ludang: gi, ri cang kho" kyo" lo" ago".

²⁶Aseing: da" moug: lagyoo: dayug gi philib, ri too' we' - Yerusalem mo zi gaza: khyoo: ju" yhe: lo" da" khyoo: khyo" moug: thang: shoid khyoo: yhe: loo" we'. (He: da" fu" moo" khyoo: gi dain" pyid' yoo khyoo: nghoid nyid)

²⁷Houg: yoomo philib, gi to' yhe: loo" bye- akhid" Etiopi mungdain ri vhoeb khang" nyid da- khokham, myhi, kandake da" soidgain ziyoo dangain" ri zoem: da" vhu" jhung: zoug: phoo- U" nug we' nghoid da- Etiopi zung: phoo dayug gi nya: yhoem: khyoo: lo" nyid da. (U" nug ga: zigi khokham" yhoem: moo shain: to" da" moo" voin' su: nghoid)

²⁸Nyang: gi Yerusalem khyoo: yhe: lho: Mangsoo ri bain coung" nghei khoo lang" gi myang: rheing" tho' moo zhoung: lho: yhoem: khyoo: doem, lo nyid. Nyang: gi myang: rheing: tho' moo zhoung: jo, lho: Lapi: Esaia da" mougsoug" ri nghab nyid da- ga: tid.

²⁹Gyeungshang: da" Venyi gi Philip, ri hau: myang: rheing" khyoo: tab' tab' yhe: loo" we' ga: tid da.

³⁰Philib gi to' yhe: lo" ri Zoug: phoo gi lapi: Esaia mougsoug" nghab nyid ziri shau" gyo: wigi Philib, gi hau" zoug: phoo ri nang nghab nyid da" jhoem: dang: ri nang se' gyo: la"» ga: myed.

³¹Hau zung: phoo gi dang kang: phoid: kyoo" su: abo ri ngoo khasu" se' gyoo: wa lha"» ga: phoug tu" lho: myang: rheing" lho' khyoo: do, lo wigi nyang: yo' dage" lo zhung: wa shid re" Philib, ri khe.

³²Nyang: nghab nyid da" jhoem: dang: gi he: zi nghoid- " Said pyam' wa da" " yang r ri yhang: ti" nyang: ri shu" yhe: lo" ago". yang moug" yham" uri tam" to" da" yang nu" yi' dakhyoo" ti" Nyang: gi dang: dakhoin" we' ameing nghoid da.

³³Nyang: gi nyhoem: khyo, pyam' zi shau" wigi adeung amain" da" dang: phyed' zi shau" nyid. Nya: kangso' ri moug: myed tho' mo yu pyam byid: yoomo nya: myed: yi, zoo: yi da" byuxeig ri hang" ayo" shab, nghoid da- ga: zi nghoid.

³⁴Houg: lang" hau: da" zoug: phoo gi Philib, ri Lapi: phoo gi kha: youg khyoo: ri tid to" zi nghoid lha". Nya: khyoo: ri nghoid la". anghoid lang" gootu: dayoug da" khyoo: ri tid to" zi nghoid la". ngoori tid kyoo" we' ga: tid nyid.

³⁵Hau: thang: ri Philib, gi hau: jhoem: dang: mo ayang: qei" lho: Yesu khyoo: yo' sen: da" ngeibu: ludang: seig ri kho" kyoo" byed.

³⁶Nya: eig yug gi hougsu" so" gyo" lo" da" uri gyid jo, da" joyoo moo ju" lo" ago". Houg: lang" zoug: phoo gi yu" we' hidmoo gyid yau, da- ngoo babtisma kham: yu wa shid re" toem, too" cang ce: noem bo la"» ga: myed: yu".

³⁷Philib, gi nyang: ri nang gi re" da" nheigloem: ung: khoug: dangain"- Yesu khristu ri loem" jeing" bye: la". loem" jeing" bye: nghoid rigi nang babtisma ge, kham: yu bye- Houg: lang" hau: zoug: phoo gi Yesu Khristu gi Mangso nya: zoo nghoid ziri ngoo loem" jeing" bye" ga: tid. (Loem, ge" da" Grid" jhoem: mougsoug" " xoug" dayham" moo he: da" axeing zoo: gi aboo.)

³⁸Houg: lang" hau: zoug: phoo gi myang: rheing" ri theing: wa da" amyeing" byid: lho: nya: eig yug goin" gyid khyoo: gyoo" yhe: wigi Philib, gi hau: zoug: phoo ri babtisma kham: byid: bye.

³⁹Nya: eig yug gi gyid mo doem do' loo lang" Aseing: da" Venyi gi philib, ri shu" lo" byug bye. Hau: zoug: phoo gi Philib, ri adoem myang loo: nghoid da. Nyang: gi ngei pyo: ziyo' nya: gyung: khyoo: moo doem xo' so" lo" da.

⁴⁰Philib, gi Azutu voogung: moo ju" lo" ziri nya: gung nyang: boin: da. Hougsu" nyang: gi kesare khyoo: yhe: lo" khyoo: cang jo, da- voogung khang" moo" moo ngeibu: ludang: seig ri cang kho" kyo" lo.