Read Lashi ACTS 9 Bible Online

ACTS 9 - Lashi bible

ACTS 9

¹Hau: ayo, moo sholu gi Yesu ri loem" jeung" loo mo, ri pyi: sho: shen" yhen wa shid re" kyoug nyid su nghoid. Nyang: gi khainjung agyi zeung jhang khyoo: yhe: lho:

²Aseing: da" khyoo: ri phau" cang nyid mo Yuggi myiyi: yi ri myang lang" nyangnu" ri myheug yu lho: wigi Yerusalem voomoo" khyoo: shu" tau" loo" wa shid mo khainjung pho, jang" mo Damasku voo moo jo, da- tarha" jung yi jhang being" si' byid: da" akhang" mougsoug" ri yhe: mho' ci: da.

³Sholu gi Damasku voogung moo ju" yhe: lo" nyid uri nyid' dain' tung" - moug: khung: mo bidbang gi nya: ayam, aqei: moo gye" bang lo.

⁴Sholu koem gi myidjang: moo leung goeb, loo" khare" - hau: thang: ri nyang: gi Sholu- Sholu- nang ngoori ce: noem koid wigi shen" yhen nyid lha"» ga: da" thui: ri shau" gyo: kaid.

⁵" Sholu gi Aseing: we' nang hang" nghoid lha"» ga: myed: - hau: thui: gi Ngoo gi nang shen" yhen nyid su- Yesu nghoid ga: tid.

⁶Nghoid loug we' nang to' lho: voomoo" khyoo: vang loo" we' - houg: moo nang koid ca" da" moo" ri lhoem: tid kyoo" wa" - ga: tid.

⁷Sholu yo' dage" gyung: so" loo" bang: gi yab, theug: lho: dang: dakhoin" we' ameing loo: nghoid ago". Nyang: nu" gi thui: ri shau" gyo: boem nghoid loug we' - hang" ri we' amyang boem nghoid da.

⁸Sholu gi myidjang: mo to' re" lho: nyang: myojid" ri phang kaid' nghoid loug we' - ci" we' amyang loo: nghoid da. Houg: yoomo Sholu ri nya: lo, mo she: lho: wigi Damasku voogung khyoo: shu" vang lo" boem ago".

⁹Sholu gi soem" nyid" loem: loem: nyang: myo, amyang loo- hau: bid, nyid gyoo: moo nyang: gi ci" we' azoo: ashug loo: nyid nyid.

¹⁰Damasku voogung moo- loem" jeung" da" Anania ga: da" byu dayug nyid. Nyang: yoeb, myang myang jang" moo Aseing: gi Anania we"- ga: tid. Anania gi Aseing: we" ngoo hid: moo nyid o" - ga: phoug tu.

¹¹Houg: lang" Aseing: gi nyang: ri to' lho: khyoo: dain: thung" ga: da" fu" moo" khyoo: moo yhe: loo" we' hau: lho: Yuda yhoem: mo, Tarshu voobyu sholu ga: su: ri yhe: sho: myed: yu we'. Nyang: gi akyu" mho' lho: nyid nyid.

¹²Nyang: gi yoeb, myang moo Anania ga: su: dayug vang re" wigi nya: myo, doem myang loo wa shid mo Nya: vhuloem tho' moo lo, ki" byid: ziri myang bye: - ga: tid.

¹³Houg: lang" Anania gi Aseing: we" - he: yug gi Yerusalem voomoo" moo nyid shi" uri Re" phung byu yi ri agyug alhung: nyang- shen" yhen lid loo bye- ga: tid go" thui: ri byu myoo" sho' nhoid mo shaug" gyoo: bye.

¹⁴Hau: tho' moo agoo" -Nang ri coung" nghei bang: dangain" ri we' myheug yu wa shid re" khainjung agyi moo" yi jang" mo amyeing" mougsoug" ri mho' voin, lho: wigi he: Damasku voogung moo ju" ri su: nghoid- ga: tid.

¹⁵Aseing: gi Anania ri doem tid zigi yhe: loo" we' tungboug yi ri we' khokham" ri we' Israela byu yi ri we' nga" myeing ri cang tid fu" Yen" zoore- ngoori coung" nghei byid: wa shid mo ngoo khyen: yu too" su: nghoid.

¹⁶Nga" myeing yoomo nyang: dayam, dayoo: kham, zoo: ca" gu: ri dangain" ngoo, Nyang: ri toin" shid' wa nghoid- ga: tid.

¹⁷Houg: yoomo Anania gi Sholu nyid da" yhoem: khyoo: vang yhe: lho: Sholu da" atho' moo nya: lo, yhe: ki" byid: wigi mang: nhung" phoo Sholu we" - nang he: voogung khyoo: do, lo da" uri khyoo: moo nang ri toin" shid' byid: da- ASEING Yesu nyang: wigi ngoori re" jang" moo nhang: kaid' zi nghoid. Nyang: gi nang myo, doem myang loo wa shid mo we' gyeungshang: da" venyi yoo" baja" ga: we' ngoori nhang: kaid' zi nghoid- ga: nyang: ri tid kyo.

¹⁸Houg: lang" Sholu da" myojid" mo ngoo: kyab, te" zi, zheung: yed" gyo" lho: nyang: gi myo, doem myang loo bye. Houg: lang" nyang: gi to' re" lho: babtisma ri kham: yu bye.

¹⁹Hau: thang: ri nyang: gi zoo: noem ri doem zo: lho: yoem: doem bo loo bye. Sholu gi Damasaku voogung mo loem" jeing" bang: yo' dayo, koo: nyid nyid da.

²⁰Nyang: gi Yuda tarha" jung joem khyoo: dain: yhe: lo" lho: Yesu gi Mangso nya: zoo: nghoid- ga: khyoo: ri kho" kyoo" byid: bye.

²¹Nya: dang: ri shaug" gyoo: mo, dangain" bang: gi gyo: mau" byug boem wigi byu he: yug gi Yerusalem voomoo" moo Yesu ga: su: ri Noku coung" nghei mo, ri lhoung said' pyam' nyid su: nghoid - anghoid goo" la"» ga: myed go" nyid boem.

²²Nghoid loug we' - sholu gi kho" jang" moo je" yoem: bo lo wigi Yesu gi Meshia nyang: nghoid ga: ziri sag si: yo' khyag khyag kho" kyoo" byid: yoomo Damasku voogung mo: da" Yuda byumyu" yi gi nya: dang: ri ayo" phoug lo: boem nghoid ago".

²³Bidnyid myoo" sho' nyid" lid lo" thang: ri Yuda byu yi gi Sholu ri said' pyam' wa da" phajhi" khyau" ago".

²⁴Nghoid loug we' hau: khyoo: ri sholu gi se' pyam' byid: bye. Yuda byu yi gi Sholu ri said' pyam wa shid re" voogoung khoem" duang: moo nyid" ri myen" ri lhoem: nyid boem ago,

²⁵Nghoid loug we' damyen rigi sholu da" cangzoo: yi gi nyang: ri shu" yu lho: gyoin khoug: moo zhung: nhang: wigi vang khyam: yam, bang: zo: khoem" khyo" wigi nyang: ri shoid' khyo' kaid' ago".

²⁶Sholu gi Yerusalem Voomoo" moo ju" yhi: lang" cangzoo: yi yo' zoem" khoug: wa shid mo yoem: kaid' nyid. Nghoid loug we' nyangnu" gi nyang: cangzoo: bue" loo bye: ziri aloem" boem yomo- nyangnu" dangain" bang: gi Sholu ri gyoug nyid boem ago".

²⁷Hau: thang: ri Barnaba gi Sholu ri lagyoo: yi jhang khyoo: shu" yhe: lho: khyoo: moo sholu gi Aseing: yo' khasu" shau" go" da" khyoo: ri we' Aseing: gi Sholu ri khasu" ga: tid da" khyoo: ri we' sholu gi damasku voo, moo Aseing: yesu da" myeing ri lang: lho: agyug avoem, khasu" ga: kho" kyo" loo bye: da" khyoo: ri we' - lagyoo: yi ri tid kyoo" bye.

²⁸Houg: yoomo Sholu gi lagyoo: yi yo' dage" yhe- dage" nyid lho: wigi Yerusalem voomoo" moo Aseing: myeing: ri lang: wigi agyug avoem, loo: cang kho" kyo" yen" boem ago".

²⁹Sholu gi Grid" myeing" kaid' da" Yuda yi we' - tid ngeig go" nyid. Nyang: nu" gi sholu ri said' pyam' wa ga: soin' ago".

³⁰He: da" khyoo: ri - loem" jeung" nyid phung byu yi se. lo boem wigi nyangnu" sholu ri kesare voogung khyoo: shu" yhe: lo" boem lho: Houg: mo wigi Tarshu khyoo: nyang: ri nhang: kaid' ago".

³¹Houg: yoomo yuda meing: - Galile meing: yo' Samari meing: goin" jang" mo, phung byu yi gi shen" yhen zi ashug" loo: dayo, daboin: zoo: shau" nyid boem ago". Phung byu yi gi ASEING Yesu ri gyoug phau" nyid boem ziyo' - kangso' dei lho: gyeungshang: da" Venyi wigi, pang" thoug byid: yoomo geung: teung lo wigi phung byu yi gi je" myo: tham: lo nyid boem bye.

³²Petru gi joyoo khyi khang" moo" khyoo: cang so" koem" yen" lho: dalheing: rigi Luda voogung moo nyid da- Mangso byu yi jang" moo we' doem yhe: koem" yu" kho!

³³Hau: da" voogung moo gung joem: shid: lho: ayo" too, loo: shed' zain' loem: loem: nyang- yhoeb, joyoo moo leung jo, da- Ainea ga: su: dayug ri Petru gi yhe: myang bye.

³⁴Houg: lang" Petru gi hau: gung joem: shid: su: ri Ainea we" - Yesu khristu gi nang ri gi byid: bye- to lho: re" yhoeb, yoo nyheung we' ga: tid. Houg: lang" Ainea gi to' loo" bye.

³⁵Luda voogung yo' sharon voo moo nyid mo, mung" byu yi dangain" bang: gi Ainea ri zheung: myang lang" gi Aseing: jhang khyoo: lheung: lo boem ago".

³⁶Akhid" Yopa voogung moo Tabitha ga: loem" jeung" da" myiyi: dayug nyid - (Nya: myeing ri Grid" myeing" khyo" - Dorka ga: zi nghoid wigi nya: da" dangkang: gi " Soo" cid" , , ga: zi nghoid) Nyang: gi khanham we' ge da" moo" riza: zei: nyid wigi sho" jhen: bang: ri bo pang" thoug nyid da" myiyi: nghoid.

³⁷Hau: da" ayo, moo nyang: gi no wigi shid: loo" bye- nyang: mang ri ced" sain' pyam lho: atho' pyam: mo yab, moo mhang to" ago".

³⁸Yopa voogung gi Luda voo yo' atoung" thei" vi: nghoid da- houg: yoomo Yopa voogung mo loem" jeing" bang: gi Luda voo moo Petru ju" nyid ziri shau" gyo: boem wigi nyangnu" gi byu eig yug ri Petru jhang khyoo: nhang: kaid' lho: ngoonu" jhang khyoo: myab, myab, jen" re" lhoo: we' ga: khi: nhang: kaid' ago".

³⁹Houg: yoomo Petru gi hau: eig yug yo' dage" yhe: loo" bye- Petru gi ju" yhi: lang" nyangnu" gi Petru ri atho' pyam: khyoo: shu" do' lo" ago". Cougmoo" yi dangain" mo, gi ngau, zoore" Petru da" gung yam, moo zeung: foem: lo lho: Dorka nyang: dei nyid shi" ayo, moo coeb, too" khare" da" byimi dangain" ri Petru ri ci: shug ago".

⁴⁰Houg: lang" Petru gi Nyang: nu" dangain" mo, ri tung: gung kyoo: thu' loo" nhang: lho: poid thug thoug wigi akyu" mho' nyid. Hau: thang: ri mang jo, shoid khyoo: lheung: lho:" Tabitha we" too' we' - ga: tid. Houg: lang" Dorka gi myo, phang kaid' lho: Petru ri myang wigi nyang: gi to' zhoung: jo, bye.

⁴¹Petru gi nya: lo, yhoin" kaid' lho: nyang: ri she: to' kaid'. Hau: thang: ri Petru gi cougmoo" myhi, yi yo' dage" loem" jeing" mo, dangain" - nyang: ri khe: yu wigi Dorka dei lo bye: zi nyangnu" ri ab, byid: bye.

⁴²He: ludang: gi Yopa voogung goin" moo byeung" sho' fu" lo" wigi byu myoo" sho' mo, gi Aseing: ri loem" lo boem bye.

⁴³Petru gi Yopa voogung moo xang: shed" lheing: moo" zei: bye. Simun ga: su: yo' dage" myoo" sho' nyid" theung: nyid.