Read Lashi Roma 10 Bible Online

Roma 10 - Lashi bible

Roma 10

¹Mang: nhung" yi we" - ngoo gi ngoonya: da" byumyu" khyoid' yu zi shau" wa shid' re" - nheigloem: ungkhoug: dangain" yo" myid byu zoo" re" - Mangso: da jhang; moo akyu" mho' nyid.

²Nyanu" gi Mangsoo: ri gye loem" jeing" loem" jeung" mo nghoid zi ri ngoo sag si yo" kham: loug we' - nyanu" da loem" jeung" da" akhyoo" ri shoid' vhang: nyid boem.

³Nyanu" gi - Mangso: da shid' khoin" moo deingbyeing" lo wa da akhyoo" ri asi yoomo hau: khyoo" moo acang loo za: nyang: nyang: myid soin: nyheing koid' to" da khyoo: ri cang lo" boem. Houg: yoomo nyanu" gi - Mangsoo: nyheing to" deingbyeing" khyoo: moo acang boem.

⁴Houg: yoomo - Khristu gi tarha" pyaid ri thang loo" nhang: bye nghoid yoomo Aseing: ri loem" jeung" mo dangain" ri - nya: da" shid' khoin" moo deingbyeing" mo bue" loo wa da" akhang" ri Mangsoo: byid: bye.

⁵Moshe da" tarha" ri cang lho: Mangso: da" shid' moo deingbyeing" mo, yo" bue" lo da" khyoo: yo" lho: - Moshe gi tarha" cang mo gi kangso' dei nyid wa ga tid to".

⁶Nghoidloug we' loem" jeung" khyoo: khyo" Mangso: da shid' moo deingbyeung" zi yo" lho: jhoem: mungdang: moo- kha: yug gi moug: khung: khyoo: yo" ju" loo" wa lha"- ein: nanya: gung ri nanyang: atid'.

⁷Khayug gi ngarai" mung" khyoo: yo" gyoo" loo" wa lha ga: - nyang: nya: gung ri amyid: yu" goo" - ga: wigi (Tid' nau da" dang: gung gi - Khristu ri moug: khung: tho' mo ngoonu" jhang gyoo" loo wa shid' re" khayug gi moug: khung: khyoo: do lo" lho: khe: khyo yu la". Khristu ri shid: jang" mo doem dei to'' loo wa da shid' re" - khayug gi ngarai" mung" khyoo: gyoo" lo" lho: lo" khe: thoid' yu la"» ga: bo nyid).

⁸Jhoem: mungdang: moo tid nau zi gi - Mungdang: tarha" gi re" da" nam moo nyang: jo bye. Hau: mungdang: tarha" ri re" da nhoid' moo yhen: yu lho: re" da" nheigloem: ung: khoug: moo xoem" too" bye - ga: wigi tid. Hau: mungdang: tarha" ga: zigi nanu" ri ngoo kho" kyo" Mangsoo: ri loem" jeung" khyoo: yo" da" mungdang: nghoid.

⁹Hougsu" wigi Yesu gi Aseing: nghoid ga: wigi re" nhoid' moo yhen: yu lho: Mangsoo: gi - Hau da" Aseing: ri shid: da' jang" mo doem dei to'' loo nhang: da" khyoo: ri - re" nheigloem: ung: khoug: moo loem" jeung" nghoid rigi nang Mangsoo: da" khyoid' yu zi shau" wa nghoid.

¹⁰Khasu" wim ga: ri nanu" gi nheigloem: ung: khoug: moo loem" jeung" khyo" Mangsoo: da" shid' khoin" moo deingbyeing" mo yo" bui" wa akhang" yo" lho: nhoid' mo yhen: yu khyo" khyoid' yu khyoo: ri yo" yu zi nghoid.

¹¹Hau: jhoem mungdang: moo hang" nghoid loug we' - ASEING Yesu ri loem" jeung" mo, gi nheigloem: byo yoin loo" wa khyoo: aboo loo: ga: tid to".

¹²Phoo Mangsoo: gi byu xangsu: yi dangain" bang: da" kangso' Aseing: nghoid lho: - nyang: gi akyu" mho' mo dangain" ri joeb byeung" da mainkaid jeju" byid. Houg: yoomo Yuda byumyu" yo" - tungbau byumyu" - ga: suid" aphyed'.

¹³Jhoem: mungdang: gi Mangsoo: ri akyu" mho' mo dangain" ri khyoid' yu khyoo: yo" yu wa ga: toin" shid' to.

¹⁴Nghoidloug we' houg: bang: gi - u" vang loem" jeung" khyoo: abo rigi - Khasu" wigi - Aseing: jhang akyu" yhe; se' mho' wa lha". Mungdang: tarha" ashug" gyo: rigi - khasu" wim u" vang se' loem jeing" wa Mungdang: tarha" kho" kyoo" su: anyid ri khayo se' shaug" gyoo: wa

¹⁵Kho" kyoo" wa shid' re" nhang: kaid' su: abo ri khasu" se' kho" kyoo" wa. Jhoem: mungdang: moo bo zi yo" dakhyoo" ti" - ngibu: lu dang: gi ri voin loo mo da" khyid: yi gi - khayhi' young" du nyid boem lha"» ga: lhid" to".

¹⁶Nghoidloug we' hau ngei bu: lu dang: gi ri byu dangain" mo aloem" jeung" boem. Lapi: Esaia tid to" zi gi - O phoo Mangsoo: we" ngoonu" tid fu" da" ngei bu: lu dang: gi ri -hang" loem" wa lha"» ga: tid.

¹⁷Houg yoomo byu yi gi Mungdang: shaug" gyoo: yoomo u" vang loem" jeung" lo boem. Byu dayug gi Khristu da" khyoo: kho" kyoo" yoomo byu yi gi mungdang: ri yo" shau" gyo: boem.

¹⁸Hougsu" nghoid loug byu yi gi - hau da" mungdang: shaug" gyoo: wa akhang" ajo la" ein: ngoo myid nau. Byu yi gi shaug" gyoo: wa da" akhang" gyeing" gyeing" yo" boem. Jhoem: mungdang: moo Mungdang: tarha" ri kho" khyoo" su: da" thui: gi - mougmyid, dagyab goin" moo fu" nheing" loo" bye. Nyanu" da" tarha" dang: yi gi moug myid ayam loem: kheing goem: sho' ngam' loo" bye.- ga: tid zi yo" dakhyoo" nyang: nghoid bye.

¹⁹Ngoo dalheing: doem myid shi" wa Israela byumyu" yi gi - hau da" khyoo: ri ase' gyo: boem la". Mangsoo: gi Moshe khyo" wigi - Ngoo gi ci: anghoid da byumyu" ri ci lho: -no" zo' vo da nheigloem: kaid' byid wa. Agyeing" da" byumyu" khyo: wigi nga" da" byumyu" ri nheig ze" shoo" byid: wa. - ga: wigi xangshid" phoid: kyo.

²⁰Mangsoo gi Esaia khyo" tid to" zigi ngoori; ashoo; mo, gi shau" nyang beom- nga" da khyoo: ri amyid aphoid: sho: mo, gi ngoori shau" myang boem. ga wigi gyeing" nyang: tid to.

²¹Nghoidloug we' - Israela byumyu" yi da khyoo: gi -Ngoo ri pyi: sho: gyi koid' lho: - nga" dang: ri atam" gyo: da" byumyu" ri - ngoo gi danyid" goin" lo fe: khye: nyid - ga: Mangsoo: tid da" khyoo: Esaia xo' tid to".