Read Lashi Roma 11 Bible Online

Roma 11 - Lashi bible

Roma 11

¹Hougsu" nghoid yoomo - ngoo gi myid kaid' bye. Mangsoo: gi nya: da byumyu" ri she: lhei" pyam' bye: la". Gyeing" nyang: ashe: pyam. Ngoo nya: gung du: nyang: lang" Israela byumyu" dayug nghoid nyid. Ngoo gi Abraham mo ko' gyoo" loo su Benyamin kung: moo boo su" dayug nghoid.

²Mangsoo: gi xang: shid" mo wigi nyang: khyen: yu to" da byumyu" ri ashe: pyam' - jhoem: mungdang: moo Elia gi Israela byumyu" yi ri tu: mhoug lho: - Mangso: jang" moo kau: to" mougsoug" du.

³Elia gi - Mangsoo: we" -houg: bang: gi Mangso: da Lapi yi ri said' pyam' boem abye:. Aseing: da xoin" to phoin: ri lhu: phyo' pyam' boem abye:. Ngoo dayug kyeing" deing o". Ngoo ri we' nyangnu" gi said' pyam' wa shid' re" yoem: kaid' nyid boem bye - ga: da" dang: ri nanu" asi' goo" la".

⁴Hougsu" nghoid loug we' - Elia ri Mangsoo: khasu" doem ga: lha". Mangsoo: gi - Ngoo gi bala' phara" ri u" pid' apid' - no' we' ano' mo. Byu nyhed khyeing" ri - nga" shid' re" teung too" byid: bye. ga: wigi tid.

⁵Akhid" ayo moo we' - houg: yo" dakhyoo" nghoid nyid. Mangsoo: nheig khyeug yoomo - khyen: to" da" byumyu" dajhi' zoo: deung nyid shi.

⁶Mangsoo: gi houg: bang: ri nheig khyeug khyoo: khyo" khyen: yu to. ngoonu" da" aved ri yu" lho: khyen: yu zi anghoid. Gyeing" nyang: Mangso: khyen: yu da" khyoo: gi - byu avoidd ri yu" nghoid rigi - nya: nheig khyeug khyoo: gi gyeing" da" nheig khyeug khyoo: anghoid.

⁷Houg: yoomo khasu" tid wa lha". Israela byumyu" yi gi nyanu" sho: nyid ziri ashug" boem. Hau: zi ri myang mo gi Mangso: khyen: to" da" byuphung: nu" zoo: da nghoid. Jain" nyid mo gi Mangsoo: khi: thui" ashaug" gyoo: mo nghoid.

⁸Jhoem: mungdang: moo Mangsoo: gi - nanu" da nheigloem: ri deing lid nhang. Akhid" nyid" ju" sho' nyanu" gi nyang: nya: da" khyoo: ri myang loug we' amyang boem. Shoug" gyoo: loug we' ashaug" gyoo: boem ga: tid to" zi yo" dakhyoo" ti" nghoid.'

⁹Hau: tho' moo David khokham" gi - nyanu" da zoo: shug pui" joem gi nyanu" shid' re" teikhuang yhang: ti" we' thoung: to" lhid' yhang: ti" we' bue" nyid wigi nyanu" gi Joem: loo" wa yooboo dam kham zo: boem baja".

¹⁰Nyanu" gi yo" loug amyang nhang: wa shid' re" - myo, go jo, goo" baja". Nyanu" phyid" doem we' zheing: voen da yooven yoomo khanham we' jha" gyau: jo boem baja" o' - ga: tid to.

¹¹Hougsu" nghoid yoomo - Yuda byumyu" yi gi - Mangso: mungdang: ri she: pyam' boem lho: - apyaid' atoo: soem" joem: shid: lo" boem bye la". ein: ngoo myid nau. Khasu" nghoid loug asoem" ajoem: loo" wa. Nyanu" yooboo shoid' nyid yoomo tungbau byumyu" yi gi khyoid' yu shau" lo. Hidsu" bue" loo yoomo Yuda byumyu" yi gi tungbau byumyu" yi ri - noo" zo: nheigloem: bolo boem.

¹²Yuda byumyu" yi yooboo shoid' khyoo: yoomo myo: lug mainkaid jeju" gi mougmyid goin" byo loo" bye. Tungbau byumyu" yi we' mainkaid jeju" byeung" sho' yo" kham: zoo: bye. Hougsu" nghoid ri Yuda byu damyu" goin" gi Khristu ri loem" jeing kham: yu lo lang" nyanu" gi mainkaid jeju" lang" shau" kham: zo boem wa.

¹³tungbau byumyu" nghoid mo nanu' ri ngoo tid nau. Ngoo gi tungbau byumyu" yi da" lagyoo: nghoid zi yo" dakhyoo" ti" ngoo nya: da" moozoo" moo myonhoo: sho: yo" phau: khuang wa.

¹⁴Ngoo gi ngoonu" byumyu" yi ri no" zo: da" byu nheigloem: ri kaid' byid khyo" hau bang: khoug: mo dayham" gi khyoid' yu khyoo: yo" shau" yu boem wa.

¹⁵Mangsoo: gi nga" da" byumyu" ri she: pyam da" uri mougmyid byu yi ri nya gyivoo nghoid nyid jang" mo bidnoem yi bue" loo nhang: - hougsu" nghoid yoomo - Yuda byumyu" ri Mangsoo: doem kham: yu da" uri - Khasu" bue" loo wa lha". Shid: mang ri doem dei loo nhang: yhang: ti" mau" pho" moozoo" bue" loo wa nghoid.

¹⁶Nyang: yo" da" zooyho' mo dajhi' za: yu lho: Mangsoo: ri xoin" ngei" nghoid ri zooyho' dangain" ri xoin" ngei" byid zi yo" du nyid. Seig gam mo seig gyi ri xoin" ngei" byid: nghoid ri seig gam goin" xoin" ngei" byid zi yo du.

¹⁷Byu yi gi zhain lun: gi akung: yi dayham" ri cu: khyo' pyam' lho: deing jo da" angoid' moo zhainlun: lam" akung: ri deom xo lho: sho" too" se' nyid boem. Hau: zhainlun: lam" gi agam gyid: ri jhoeb' yu yhang: ti" Tungbau byumyu" nghoid mo nanu" gi Yuda byumyu" yi jang" mo akyu" jeju" myoo" sho' shau" kham: yu boem.

¹⁸Houg: yoomo nanu" gi cu: khyo' pyam shau" da akung: yo" du mo ri ayu" rui" goo". Nanu" gi khasu" ein: nghoid boin: nyid go" lha". Nanu" gi akung: ako'' za danghoid yoomo seig gyi: ri yoem: yo" pyeing byid: wa zi anghoid. Agyi: gi nanu" ri yoem: je yo" pyeing byid.

¹⁹Nghoidloug nanu" gi - ngoonu" ri jo yoo byid: wa shid' re" zhainlun: akung: gi yi ri cu: khyo' pyam' anghoid goo" lo" ga: wigi tid goo" wa.

²⁰Nanu" tid zi yo" dakhyoo" we' deing: houg: bang: cu: khyo' pyam' shau" da khyoo: gi nyanu" gi Mangsoo: ri aloem khoug: boem yoomo nghoid. Hau: su wi nanu" gi Mangsoo: ri we' loem" jeung" yoomo - zhainlun gam mo dakhyam" dayam' yo" bue" lo boem. Nghoidloug we' nanu" da gung ri nghoid aboin: loo za gyoug zid" nyid, ge'.

²¹Mangsoo: gi zhainlun: gam mo akhang: dab gu akung: yhang: ti" nghoid mo ri lang" vhoo" abyid: nghoid rigi - khasu" wigi nang ri vhoo" se' byid: wa la".

²²He jang" moo Mangsoo: gi - khayhi' gyeing" nheig khyeug shoo" se' myen: da" khyoo: yo' khayhi' gyeing" noo sho' yooboo dang: se' kho: da" khyoo: ri ngoonu" shau" myang boem. Mangsoo: gi yooboo shoid' mo ri gye thain: sho' yooboo dam yo" byid nyid da" khyo" ein: ri nanu" gi Mangso: nheig khyeug khyoo: ri yo" xo kham: yu sho' cang koid' zei: so' ri gi Mangsoo: gi nanu" da" tho' moo nheig khyeug nheig myen: nyid wa zi za nghoid. Hau: nheig khyeug myen: da" khyoo: ri shau" kham yu sho' akoid' acang loem boem ri koem' gi nanu" ri we' Mangsoo: gi cu: khyo' pyam' wa.

²³Yuda byumyu" yi gi nheigloem: thid' lho: Mangsoo: ri loem" jeung" lo boem nghoid rigi anghoid moo akung: doem xo' toid lho: sho" to" zi shau" boem shi" wa. Mangsoo: gi he: da" moo" ri yo" zei: su: nghoid.

²⁴Dang: thang: said' ba ein: rigi tungbau byumyu" nghoid mo nanu" ri akhang: nanu" nya: da" zhainlun: shi" lam" kung: mo zain: phyed yu lho: nanu" da" akhang mo agam nghoid da" zhainlun: gi mo ako moo yo" xo' sho" nghoid rigi akhang: zhainlun: akung: gi nghoid da" mo - Yuda byumyu" yi ri akhang: zhainlun: gam zeing moo doem xo' sho" too" wa zi gi je lei wa anghoid la".

²⁵Mang: nhung" yi we" - nanu" gi nyang: nya: da" gungdu: ri gye se' nheig bo ein: amyid wa shid' re" ngoo gi Mangsoo: zau" yhoem" to" da" no thang da" khyoo: yi ri nanu" ri tid khoo" nau. Hau: zau" yhoem" to" da no thang da" khyoo: gi Hidsu" nghoid. Yuda byumyu" yi gi khanham we' u" loem' thain: nyid wa zi anghoid. Khyoid' yu khyoo: ri shau" wa da: nghizain' byumyu" yi bainsho' Mangso: byu yi bue" lo da" yo ju" sho' za nghoid.

²⁶Hau: thang: rigi Mangso: wigi Israela damyu" goin" khyoid' yu shau" wa zi nghoid. Jhoem: mungdang: moo Khyoid' yu da" Aseing: gi Zion boem mo thu' re" lho: Yaku da nya: myid: nya: zoo: yi jang" mo anyhoin: athung" khyoo: dangain" ri soid' pyam' wa nghoid. - ga: wigi toin" shid' wa zi nghoid.

²⁷Ngoo Mangsoo: gi houg: bang: da" yooboo dangain" ri khyoid' byid: uri nyanu" yo" he: thang" cab' too" wa ga: wigi tid to" zi yo" dakhyoo" ti" nghoid.

²⁸Khasu" wim ga: ri ludang: gi ri she: pyam' yoomo Israela byumyu" gi Mangso: da gyivoo bue" loo bye. Hang" bue" loo da" khyoo: gi tungbau byumyu" yi nanu" akyu" yoo" wa shid' re" nghoid. Nghoidloug we' Mangsoo: gi nyanu" ri khyen: yu yoomo nyanu" da" phoug" phyid" yi ri byid kaid' da" dang: theing khoin" ri yu" lho: nyanu" ri jheddab ashi".

²⁹Mangsoo: gi hang" ri nghoid loug khyen: yu lho: mainkaid jeju" byid: wa ga: bain phyed: to" thang: ri - nheigloem: ase' fain" loo: su: nghoid.

³⁰Tungbau byumyu" ein: da" nanu" gi - daleing: ri Mangso: da" dang: ri atam" gyo: boem nghoid loug we' akhid" uri Mangso: da' nheig khyeug zi nanu" shau" kham zoo: nyid zi gi Yuda byumyu" yi gi Mangso: da" dang: atam" gyo: boem yoomo nghoid.

³¹Houg: yo" dakhyoo" ti" Mangso: nheig khyeug da" jeju nanu" shau" kham: zoo wa shid' re" yuda byumyu" yi gi akhid" ju" sho' Mangso: da dang: ri atam" gyo: boem. Nanu" shau" kham yu da" jeju yo" dakhyoo" ti" shau" kham yu goo" baja".

³²Xangsu: byu yi dangain" mo gi - nya: mungdang: ri atam" gyo: boem yoomo Mangsoo: gi nyanu" ri thung: loung" da byu yi yhang: ti" bue" byid nhang. Mangsoo: hidsu" koid' da" khyoo: gi nyanu" ri nheig khyeug nheig leom yo" toin" shid' wa shid' re" nghoid.

³³Apyaid' ato: Mangso: da jeju" gi gye gye jo nhung: lha". Mangso: da" nyan phajhi" yo' se' yeig phajhi" gi gye no jo, nhung: nya: dang: phyed' dang: phyed' da" khyoo: ri hang" yo" phoid' kyoo" wa lha". Nya: moozoo" ri hang" se' gyoo: byid: wa lha".

³⁴Jhoem: mungdang: gi Hang" gi apyaid' ato: Aseing : myid soin' to" khyoo: ri yo" si wa lha". Hang" su: gi Mangsoo: ri phajhi" yo" byid: wa lha".

³⁵Mangsoo: gi jeju" doem yo" toug" byid: sho' kha: yug gi Mangsoo: ri jeju" yo" koid' wa lha"» ga: wigi tid to" zi yo" dakhyoo" ti" nghoid.

³⁶mangsoo: gi - jo, moo jo, ri phain" to" lho: hau: zi joem gi Mangsoo: khyo" wigi we' Mangso: shid' re" nghoid loug we' dageing: teing" jo boem. Mangsoo: gi apyaid' atoo: myonhoo: phung" yoeb doug bang nyid baja" o" Amen.