Read Lashi Roma 16 Bible Online

Roma 16 - Lashi bible

Roma 16

¹Kenkhrea phung: mo phungtau nghoid da" nga" nham" moo" phobe: ri nanu" jhang khyoo: nhang: kaid'. Nyang: gi phung: moo aja: ja: gye bo se' pang" zei: su nghoid.

²Nanu" gi Mangso: da" phung" byu yi nyang: cang" koid' kham: yu go" moo" khyo" nyang: ri we' Aseing: da" myeing mo kham: yu ge'. Nyang: moo ca" da" khyoo: bo ri coem' pang" thoug byid: ge'. Nyang: gi byu myoo" sho' ri pang" thoug lid: loo su: nghoid. Ngoori we' gye pang" thoug yu" su: nghoid.

³Khristu Yesu da" moozoo" coem' zei: jang" moo nga" moo" zei: byen cang" Priska yo" Akula tang: ri we' ngoo u" kaid'.

⁴Nya: eig yug gi nga" shid' re" kang: ab so' ab sho' moozoo" bo voin vu yu" su: eig yug nghoid. Nya: eig yug ri ngoo kyeing" za: anghoid nghizain: byumyu" phung: byu dangain" mo we' jeju" boin: nyid boem.

⁵Nyanu" da" yhoem: moo lhoung no' ku" nyid da' phung: byu yi ri we' ngoo u" kaid' da" khyoo: ri bo tid khyoo" byid: ge'. Asha' moug: moo xang: shid" phung: vang loo su: nga" da' bidnoem phoo Eponetu ri we' bo u" byid ge'.

⁶Nanu" da shid' re" moo" ri gye bo zei: byid: su nghoid da' Mari ri we' bo u" byid: ge'.

⁷Nga" byukung: mo ngoo yo" dage" thung: loung" yu" da" Androniku yo' Yuni eig yug riwe' bo u" byid: ge'. Nyang: eig yug gi Lagyoo: amain" khyo" myeing fu" lho: nga" shid' mo Khristan bue" loo su: eig yug nghoid.

⁸Khristu yo" dadeing: daloem: za nyid su nyang: yo" zoem" jeung" bidnoem Ampliatu: ri we' bo u" byid ge'.

⁹Khristu da" moozoo" ri voin vu da jang" moo nga" moo" voin luzoem" cang" nghoid da' Orban yo' ngoo jed' dab da" bidnoem Staku ri we' bo u" byid: ge'.

¹⁰Khristu moo byu gyeing" nghoid da" Apele ri we' bo u" byid: ge'. Aristobulu da yhoem bang: ri we' bo u" byid ge'.

¹¹Ngoo yhang: ti" Yuda byumyu" dayug nghoid da" Herodoin ri we' bo u" byid: ge'. Narkiso da" yhoem: mo Khristan mang: nhung" yi ri we' bo u" kaid' byid: ge'.

¹²Aseing: Mangso: da" moo" bo voin vu su: Truphena yo" Truphosa eig yug ri we' bo u" kaid' ge'. Hau Aseing: moo" moo gye yoem: bo kaid' da" nga" jheddab byen cang" Persi ri bo u" byid ge'.

¹³Hau: Aseing: moo Ruphu ri we' - ngoori nya: zoo: dayug ti" yu" coung: su: Ruphu nya: myhi' ri we' bo u" byid ge'.

¹⁴Asunkritu: - Phelegu - Herea- Patroba - Herma yo' nyanu" yo' dage" nyid da' gootu: Khristan: mang: nhung" yi dangain" mo ri bo u" byid: ge'.

¹⁵Philogu -yo" Yulia - Nerea yo' nya: nham" moo" Olumpa yo' nyanu" yo" dage" nyid da" Mangso: da" phung: byu dangain" mo ri we' bo u" byid: ge'.

¹⁶Nanu' dayug yo" dayug jhed' jhed' kug kug yung" lho' boobug yo" u" goo" ge' Khristu da" phung: byu dangain" mo gi nanu" ri u" kaid' boem ago".

¹⁷Mang: nhung" yi we" nanu" shau" jhau" yu da: tid poin" tid khyeing" mungdang: ri nung phug pyam' lho: subi" ri aveing" goo" nhang: da" zi - khyoo vhang: shu" vhang: loo" mo ri zid" nyid ge'. Houg: bang: ri jhang" pyam' ge'.

¹⁸Houg: bang: gi ngoonu" da" ASEING Yesu Khristu da moo" voin mo anghoid. Nyanu' nya: da" zoo: noem kha: ja: shau" zoo wa ashug" zoo: wa da" khyoo: ri za: te: myid yu" mo nghoid. Nyanu" gi nu" nham' cau: main da" dang: ri tid coung" myeing" coung" thui: yo" wigi deingmain" nyid mo ri lang" yo" mhoug zoo: se' ago".

¹⁹Nanu' gi ge da ngei bu: lu dang: ri khayhi' ju" sho' loem" jeung" geing: teing ci: da" khyoo: ri byu dangain" mo nyang: shau" gyo: ci: boem bye: - houg: yoomo ngoo gi nanu" da' shid' re" gye gau yi nyid. Nanu" gi ge da" moo" kha: ja: nghoid da" zi ri se' da" phajhi" boo mo nghoid lho: wigi aco' ajhoid' da" moo" yo" sen: lho: wigi ce: yooboo adab mo bue" loo nhang: nau.

²⁰Myenjham" Aseing: Mangsoo: khamyhang amyang" ri Nanu" da" khavoo: khoug: moo satan: ri nang: zeug pyam' nhang: wa ngoonu" da" Aseing: Yesu da" jeju" ri Nanu" shau" kham zoo: baja" o".

²¹Ngoo ri pang" thoug nyid da" byen cang - Timothi' yo" nga" byumyu" nghoid da" Luki - Yason yo" Sosipata gi nanu" ri u" kaid' ago".

²²He: mougsoug" lhid" su: gi ngoo Tertiu nyang: lhid" da" zi nghoid. Ngoo we' phung: byu dayug khyo" nanu" ri u" kaid' zi nghoid.

²³Ngoo ri being" di" su: - phung: byu yi akyu" mho' zeing: foem: nyid da" yhoem: seing: Ge u we' nanu" ri u" kaid' Hau: voomo ngei deig zoem: su: Erastu eig yug Kuartu we' nanu" ri u" kaid'.

²⁴Ngoo nu" da" ASEING Yesu Khristu da" jeju" ri nanu" dangain" mo shau" kham: zo: boem baja" o" Amen.

²⁵Mangsoo: da" phung" yoeb myho, nhoo: ri ngoo nu" coung" nghei" boem shang ngoo khyo" kyo" tid Khristu Yesu da" lu dang: gi khyo" we' shid' phyang" pyaid mo, zau" to" da" no thang deungmain" tarha" khyoo: ri toin" shid' khyo" we' Mangsoo: gi ngoonu" da" loem jeing" khyoo: ri o" geing: teing nhang.

²⁶Nghoidloug we' Akhid" uri hau: tarha" gi Lapi yi da" jhoem: dang: khyo" wigi bang myang thu' loo nhang: abye:. Byumyu" bain sho' mo gi Mangso: da" mungdang: ri yo" tam" gyo: lo boem wa shid' re" apyaid' atoo: dei nyid da" Mangso: amyeing" yo" dakhyoo" ti" hau tarha" ri tid fu" kaid' bye.

²⁷Dayug kyeing" nghoid lho: dangain" ri yo" myang se' da" Mangsoo: gi ASEING Yesu Khristu khyo" wigi apyaid' atoo: moo bug thu' sheing" jhu" da" myo nhoo: phung" yoeb dajo jo nyid baja" o" Amen.